Konowixtalábchik axi a tʼajámal

¿Walám a David in watʼkʼanchij kʼal jawaʼ in uluw ti Salmo 61:8?

Imbáj. Jawaʼ in uluw tanáʼ a David chubax putun.

Ka tsalpay kʼal jawaʼ in uluw a David ti Salmo 61:8 ani kʼal kʼeʼat i versículos axi kʼwajat ti Biblia. Jajáʼ in uluw: «Neʼets ku puwénchij a bij abal etsʼey ani chudhél neʼets ku tsápnanchij ku putuw kʼal jawaʼ tu uchamal». Jayej in uluw: «Jehová Dios, neʼets tu kʼakʼnaʼ kʼal patal u ichích ani neʼets ku puwénchij a bij abal etsʼey». Al kʼeʼat i texto a David jayej in uluw, «yab jaykʼiʼ neʼets ku jilaʼ ku puwénchij a bij» (Sal. 61:8; 86:12; 145:1, 2).

A David in exbayalak alwaʼ jawaʼ kʼwajatak in ulal. Jajáʼ in exlálak abal jun a kʼicháj neʼets ku tsemets kom patal u wálbidh. Ma jajáʼ in uluw abal jayej wálbidh (Gén. 3:3, 17-19; Sal. 51:4, 5). Jajáʼ in exlálak abal yan in tʼojnálil a Jehová, ejtíl a Abrahán, a Isaac ani a Jacob, jayej tsemets. Tam ti jajáʼ payeblábits in exbay abal weʼits neʼets ka koyóts (Sal. 37:25; 39:4). Pero an kaw axi jajáʼ in uluw ti Salmo 61:8 in tejwamedhálak abal in léʼak kin kʼakʼnaʼ a Jehová abal etsʼey, in léʼak kin tʼajaʼ biyat ejat (2 Sam. 7:12).

A David in dhuchaʼ yan jantʼoj axi jajáʼ in watʼaʼ. Antsanáʼ ti tejwaʼ tin okʼtal an capítulo 18, 51 ani 52 in kʼál an Salmo. Ti Salmo capítulo 23, a David in uluw abal a Jehová pel jantʼiniʼ jun i béletnom koʼnél, axi in alwaʼ píjchiyal an ovejas, in neʼdhál abal kin utsʼaʼ an jáʼ ani in beletnál. Antsanáʼ in beletnálak a David an ovejas ani jaxtám in léʼak kin tʼojonchij a Jehová tin naktal in ejatal (Sal. 23:6).

Ki tʼilaʼ abal pel a Jehová axi in tʼajaʼ abal a David kin dhuchaʼ jawaʼ kʼwajat ti Biblia. Yan i kaw kʼal axi in dhuchaʼ a David pel i kʼej kaw axi neʼets ka putun ban kʼicháj axi taʼtal. Jun i tʼiplab, ti Salmo 110 a David in uluw abal jun a kʼicháj a Jesucristo neʼetsak ka ketlej ti éb, tin winab a Dios, ani neʼetsak ka pidhan yan in éy. Neʼetsak kin eyendhaʼ nixéʼ xi éy abal kin talabedhaʼ jitaʼchik in tomolnál a Dios. A Jesucristo waʼtsin al in yanél a David, jajáʼ neʼets ti ábatnom ti éb ani neʼets kin tʼajaʼ «ti sacerdote abal etsʼey» (Sal. 110:1-6). A Jesús in uluw abal jajáʼ játs axi neʼetsak kin putuw an kʼej kaw axi ti Salmo 110 ani jajáʼ játs axi neʼetsak ti ábatnom (Mat. 22:41-45).

I tʼilaʼits abal a Jehová in tʼajaʼ abal a David kin dhuchaʼ yab jantʼoj axi neʼetsak ka putun tin ejatal. Pero jayej neʼets ka putun ban kʼicháj axi taʼtal, tam a David ka edháj ani kin ejtow kin kʼakʼnaʼ a Jehová abal etsʼey. Antsanáʼ jayej u putnal an Salmo 37:10, 11, 29. Nixéʼ an versículos tu tejwamédhanchal jantʼiniʼ ti kʼwajiy an israelitas ti biyál ani jantʼiniʼ ti neʼets ku kʼwajiy tam ka pútunits patal an lablixtaláb axi a Jehová in ulúmal. (Ka tsuʼuw al axéʼ xi revista an párrafo 8 in kʼál an exobintaláb «Neʼets kit kʼwajiy kʼal nanáʼ ban alabél Tsabál»).

Tam, Salmo 61:8 ani kʼeʼat i versículos axi ejtíl axéʼ tu tejwamédhanchal abal a David in léʼak kin puwénchij a Jehová ani kin kʼakʼnaʼ. Ani jayej tu tejwamédhanchal jantʼoj neʼets kin tʼajaʼ tam ka edháj ban alabél tsabál.