¿A tʼilál axéʼ?
¿A ajiyámal An Ólchix Uw axi kalnek al axéʼ an támub? Ka tsuʼuw max a tʼilál an tokʼtsixtaláb in kʼál axéʼ an konowixtalábchik:
¿Jantʼoj tam alwaʼtaláb neʼets ki batsʼuw max ki jolkʼaʼ i kʼij abal ku tʼilmáts kʼal a Jehová, ki otsʼówiy ani ki tsalpay kʼal jawaʼ tu exóbchal?
Neʼets ki exlaʼ jantʼoj ki takuy ki tʼajaʼ, neʼets ku bajudhméj jantʼiniʼ u exóbchix, jayej neʼets ka tsapnéj más i bélomtal ani neʼets ki kʼanidhaʼ más a Jehová (w22.01-S, páginas 30 ani 31).
¿Jaleʼ ti lej exbadh ki belaʼ kʼal a Jehová ani kʼal jitaʼchik in bijiyámal abal tu ku ókʼnaʼ?
Xowéʼits tin tomnál ki belaʼ más abal a Jehová etsʼey in exlál jantʼoj neʼets kin tʼajaʼ. Nixéʼ i tejwamedhál tam i belkál jawaʼ tu uchál an ókʼnomchik ani an olchixtaláb axi tu pidhál. Tam ka tujey an púlik yajchiktaláb, yab neʼets ki atsʼaʼ kʼibat ki bélkaʼ jawaʼ ku uchan, belits max yab ki exbay alwaʼ jun i olchixtaláb o i tsalpayal abal yab tekedh (w22.02-S, páginas 4 ma ti 6).
¿Jaleʼ ti uchan a Zacarías kʼal jun i ángel abal an eyal Zorobabel ejtíl max in teyóm jun i plomada? (Zac. 4:8-10).
Axéʼ an tsuʼbixtaláb in tólmiy an judíos kin exbay abal neʼetsak ka tsʼejkáj an templo ani abal neʼetsak ka eyan abal ka kʼakʼnáj a Jehová tin tekedh (w22.03-S, páginas 16 ani 17).
¿Jantʼoj kwaʼal ki tʼajaʼ abal ki bínaʼ jun i alwaʼ tʼiplab tam u kaw? (1 Tim. 4:12).
Ki tejwamédhaʼ abal i kʼanidhál ani i kʼakʼnál jitaʼchik i tʼilmayal ban olnomtaláb, ku ajatin kʼal i kanataláb ti tamkuntaláb ani ki bínaʼ i tokʼtsixtaláb, ki uluw etsʼey an chubaxtaláb, ki kanatbédhaʼ axi kʼeʼat ani yab ki uluw i kaw axi u odhnax (w22.04-S, páginas 6 ma ti 9).
¿Jaleʼ an bestia axi ti Apocalipsis 13:1, 2 jayetsej kʼal an tséʼ i bestias axi ti Daniel capítulo 7?
An bestia axi ti Apocalipsis capítulo 13 yab expidh in tʼipoyal jun i potencia mundial o eyal. Axéʼ an bestia in tʼipoyal patal an eyalchik axi kʼwajinek ti ábatnom (w22.05, página 9).
¿Jantʼiniʼ i tejwamedhál abal i belál abal a Jehová etsʼey in tʼajál jawaʼ tekedh?
Max waʼats jitaʼ axi tu odhnámal kʼal in káwintal o kʼal jantʼoj axi in tʼajaʼ, i tsápnanchal yab ki dhayaʼ i lokotaláb ani i jilchal abal Jehová kin tsʼejkaʼ an kʼibataláb. Jajáʼ játs axi neʼets kin tsʼejkaʼ patal an kʼibataláb axi an walabtaláb in tʼajámal abal ka dhaykʼan (w22.06, páginas 10 ani 11).
¿Jantʼoj kwaʼal kin tʼilaʼ jun i epchal axi u kónchinal kin tʼajaʼ jun i oláb ti tamkuntaláb?
Kwaʼal kin tʼilaʼ abal an oláb yab pel abal kin boliy an epchalchik ani jayej yab pel abal kin bínaʼ jun i olchixtaláb. Yab in yéjenchal kin uluw yan i kaw, ani más max játs tin tujtal an tamkuntaláb (Mat. 6:7) (w22.07, página 24 ani 25).
¿Jaleʼ in ulal an Biblia abal an atiklábchik axi in tʼajaʼ yan jantʼoj kidháb ti biyál, neʼets ka edháj abal ka bóliyat? (Juan 5:29).
Jajáʼchik yab neʼets ka tʼajchat ti kwéntaj jawaʼ in tʼajaʼ kidháb ti biyál. Jawaʼ neʼets ka tʼajchat ti kwéntaj játs jawaʼ kin tʼajaʼchik ban ít tsabál, tam ka edhájchik (w22.09, página 18).
¿Jantʼoj tam exbadh olchixtaláb in bínaʼ an epchal Joseph Rutherford, al jun i púlik tamkuntaláb axi tʼajan ti septiembre ti 1922?
Al jun i púlik tamkuntaláb axi tʼajan ti Cedar Point (Ohio, Estados Unidos), jajáʼ in uluw: «Axéʼ pel jun i kʼicháj lej exbadh kom a Jesús kʼwajatits ti eyal ani tatáʼchik i takuyámej abal ka ólnaʼchik. Jaxtám ka ólnaʼchik abal jajáʼ kʼwajatits ti Eyal» (w22.10, páginas 3 ma ti 5).
Antsanáʼ jantʼiniʼ in ulal Isaías capítulo 30, ¿jantʼoj tam ox i tolmixtaláb tu pidhámal a Jehová abal ki ejtow ki kuxuy?
Axéʼ xi capítulo tu tejwamédhanchal abal 1) jajáʼ in atsʼál an oláb axi i tʼajchal ani tu tokʼtsiyal, 2) tu exóbchal ani 3) tu lábliyal xowéʼ ani neʼets tu ku lábliy axi taʼtal a kʼicháj (w22.11, página 9).
¿Jaleʼ ti belál abal an kaw axi kʼwajat ti Salmo 37:10, 11, 29 putun ti biyál ani neʼets ka putun axi taʼtal a kʼicháj?
Jawaʼ in uluw a David in tejwamedhál lej alwaʼ jantʼiniʼ u kʼwajílak an israelitas ti biyál, ejtíl tam ti u ábatnomak an tsʼalej Salomón. Tam ti a Jesús kawin tin kwéntaj an Paraíso in eyendhaʼ an versículo 11 (Mat. 5:5; Luc. 23:43) (w22.12, páginas 8 ma ti 10 ani 14).