A Hulda in ejtow kin koʼoy jawaʼ in léʼak

MAX TATÁʼ i kalnekak ti belel ban isla Sangir Besar (Indonesia) in tʼajál jayits i támub, walám a elamalak walteʼ ban plaza ox i epchal. Axéʼ xi epchalchik u lej exlábak kʼal an atikláb kom u lej ólnomak, pero ban playa kʼwájatakchik in tʼajál kʼeʼat jantʼoj.

Jajáʼchik u otselak ban jáʼ ani in aliyalak an tʼujub axi más púlik, in puwém pel ejtíl an balón axi u eyendháb ban fútbol, ani in kitnalakchik ma ban playa. Tanáʼ in kwaʼalakchik jun i tsakam laktem ani u buxkanalak abal kin muʼuw an tʼujub kʼal jun i martillo. In muʼwalakchik ma ka jilkʼon tʼijax ejtíl in puwém jun i dhakʼchokʼ, talbél in punuwalakchik al i cubetas ani in kitnalakchik ma tin kʼimáʼ. In jolkʼowalakchik al i costales ani talbél jun i camion in ikʼtalak ani in neʼdhálak abal kin tsʼejkaʼ an bel.

Jun kʼal axéʼ xi epchal in bij Hulda. Jajáʼ játs axi u tʼojnálak más i kʼij tanáʼ ban playa. An tumín axi in atálak in eyendhálak abal kin tólmiy in yanel kʼal jawaʼ in yéjenchal. Pero xowéʼ kʼwajatak ti tʼojnal más kom in yéjenchalak kʼeʼat jantʼoj, jajáʼ in léʼak kin koʼoy jun i tablet abal kin ejtow kin koʼoy an aplicación JW Library^®. A Hulda in exlálak abal neʼetsak ka lej tolmiyat kʼal an aplicación JW Library kom neʼetsak kin ejtow kin tsuʼuw i videos ani kin exbay más an Biblia.

Al jun a ítsʼ kʼal tsʼejel, a Hulda u tsʼakílak lej dhajuwej abal ka kʼalej ti tʼojnal tsab i hora. Kʼal an tʼujub axi in muʼuw in tʼuchiy jun i tsakam camión ani kʼal an tumín axi in ataʼ in ejtow kin kidhbay jun i tablet.

A Hulda in ulal: «Pelak jun i tʼojláb lej tsekentál ku muʼuw i tʼujub, pero tam tu koʼoyits an tablet u tsalpay abal neʼetsakits ku ejtow ku eyendhaʼ abal tin ólnom más alwaʼ ani abal kin exobláts abal an tamkuntaláb, nixéʼ in tʼajaʼ abal ku ukʼchiy abal lej tsekentál an tʼojláb». Jajáʼ in uluw abal in lej eyendhaʼ an tablet tam ti tujey an pandemia, kom an tamkuntaláb tʼajan kʼal i videollamada. ¡I atsʼál lej kulbél kom a Hulda in ejtow kin koʼoy jawaʼ in léʼak!