«Jálbinchatits jayej in wálab axi biyál ti tsémenek»

Expidh kʼal in tsémtal a Jesús jats ti awits ku pakwlanchat i wálab (Efes. 1:7) Pero an Biblia in ulal abal «jálbinchatits jayej in wálab an inikchik axi biyál tsémenekchik, kom a Dios lej alwaʼ inik» (Rom. 3:​25, nota.) Axéʼ xi kaw tu tejwamédhanchal abal a Jehová tujey in pákwlanchal in wálab an atiklábchik ma tam ti a Jesús yabaye in binálak in ejatal. Pero, ¿jantʼiniʼ in éjtowalak a Jehová kin tʼajaʼ nixéʼ?

Ma tam ti a Jehová in uluw abal neʼetsak kin bínaʼ jitaʼ abal tu ku kʼaniy kʼal an walabtaláb, pel ejtíl max in putuwits in káwintal, kom chubax neʼetsak kin tʼajaʼ (Gén. 3:15; 22:18). Jajáʼ in exlálak abal tam kin bájuwits a kʼicháj, a Jesús neʼetsak kin bínaʼ in ejatal kʼal in kulbétal (Gál. 4:4; Heb. 10:​7-10). Tam ti a Jesús kʼwajiy tejéʼ ti tsabál, in kwaʼalakits an uchbixtaláb abal kin pákwlanchij in wálab jitaʼchik kin belaʼ kʼal jajáʼ. Belits abal a Jesús yabaye in binálak in ejatal, neʼetsakits ka eyan in tsémtal abal ka pakwlanchatits in wálab an atiklábchik (Mat. 9:​2-6).