Konowixtalábchik axi a tʼajámal
¿Jitaʼchik jats an ángeles axi u olnáb ti 1 Timoteo 5:21?
An abatwálej Pablo in uchaʼ axéʼ xi kaw a Timoteo: «Nanáʼ tu uchbiyal Timoteo ka bolidh putuw kʼal a uchbíl ani yab ka pokʼodh tsuʼuw nibal jitaʼ. A Dios, a Jesucristo ani an ángeles axi kʼwajat kʼal a Dios in tsuʼtalchik max chubax a putuwal kʼal a uchbíl» (1 Tim. 5:21). ¿Jitaʼchik tam ángeles u bijiyáb al axéʼ an versículo?
Al axéʼ xi versículo a Pablo yab kʼwajatak ti kaw tin kwéntaj an 144.000 axi takudh. ¿Jaleʼ? Kom tam ti a Pablo in dhúchunchij axéʼ xi kaw a Timoteo, yabaye u tujchabak ka edháj jitaʼchik takudh abal ti eyal kʼal a Jesús. An abatwálejchik ani jitaʼchik takudh abal ka kʼalej ti éb yabaye wenkʼonének ti ángeles. Jaxtám ti ulal abal yab jajáʼchik axi u bijiyáb al axéʼ xi versículo (1 Cor. 15:50-54; 1 Tes. 4:13-17; 1 Juan 3:2).
Jayej yab kʼwajat ti kaw tin kwéntaj an ángeles axi jekʼombéj tin kʼichájil a Noé. Nixéʼ xi ángeles wenkʼon ti demonios ani in tomolnaʼ a Jesús (Gén. 6:2; Luc. 8:30, 31; 2 Ped. 2:4). Jajáʼchik jats axi neʼets ka mápuyat al 1.000 i támub, ani talbél neʼets ka talabedháj junax kʼal a Satanás (Jud. 6; Apoc. 20:1-3, 10).
1 Timoteo 5:21 in ulal abal axéʼ xi ángeles kʼwajat kʼal a Dios, jaxtám ti exlál abal axéʼ xi ángeles kʼwajat putudh kʼal a Jehová ani kʼwajat ti tʼojnal kʼal Jajáʼ.
Ti éb waʼats yantalom i ángeles axi kʼwajat putudh kʼal a Jehová (Heb. 12:22, 23). Pero patal axéʼchik xi ángeles pílchik an tʼojláb axi bijchidh, yab patal in tʼajál junkats i tʼojláb (Apoc. 14:17, 18). Jun i tʼiplab, a Jehová in uchbiy jun i ángel abal kin talabedhaʼ 185.000 i soldados asirios (2 Rey. 19:35). A Jesús, jayej in uluw abal jun múkeʼ i ángeles neʼets kin tamkuy ani kin pilmedhaʼ an atiklábchik axi pojkax, kom yab neʼets kin ejtowchik ka kʼwajiy tin Éyaltal a Dios (Mat. 13:39-41). Ani walám pel kʼeʼat i múkeʼ i ángeles axi neʼets kin tamkuy patal axi neʼets ka kʼalej ti éb (Mat. 24:31). Ani kʼeʼat i ángel uchbiyamej abal tu ku béletnaʼ antsanáʼ jantʼiniʼ tin ulal an Salmo 91:11 (Mat. 18:10; ka jumbiy kʼal Mateo 4:11 ani kʼal Lucas 22:43).
Tam, an ángeles axi u olnáb ti 1 Timoteo 5:21 walám pel jun i múkeʼ i ángeles axi uchbiyat abal kin béletnaʼ an epchalchik. Al axéʼ an capítulo, a Pablo kʼwajatak ti kaw tin kwéntaj an ókʼnomchik ani in uchaʼ an epchalchik abal kin kʼakʼnaʼ an tʼojláb axi in tʼajál an ókʼnomchik. An ókʼnomchik in tomnál kin tsápnanchij ki putuw kʼal in uchbíl, yab kin pokʼodh tsuʼuwchik nibal jitaʼ ani kin tsalpaychik alwaʼ jawaʼ neʼets kin tʼajaʼ. ¿Jaleʼ ti a Pablo in uchaʼ axéʼ xi kaw an ókʼnomchik? Kom jajáʼchik kʼwajat in tʼójonchal an epchalchik tin tamét «a Dios, tin tamét a Cristo Jesús ani tin tamét an ángeles». Kʼal axéʼ i éxbayal abal a Jehová, a Jesús ani an ángeles kʼwajat in lej tʼajál ti kwéntaj jantʼiniʼ an ókʼnomchik in putuwal in uchbíl ti tamkuntaláb. Tam, waʼats i ángeles axi bijchinének kin béletnaʼ an tamkuntaláb, ejtíl kin béletnaʼ an epchalchik, kin ókʼnaʼ an olnomtaláb ani kin ólchij a Jehová patal jawaʼ kʼwajat ti watʼel ban tamkuntaláb (Mat. 18:10; Apoc. 14:6).