A Dios pél an más alwaʼ jaʼúb axi i ejtowal ki koʼoy

Lej alwaʼ ka tʼajaʼ ta jaʼúb a Dios. A Dios neʼets ti exóbchij jantʼiniʼ kit kʼwajiy kulbél ani neʼets ka atsʼaʼ abal ti beletnál, neʼets ti tólmiy ka jilaʼ i belomtaláb axi ukʼpidh ani i tʼajbiláb axi ti odhnanchal a ejatal. Neʼets ti atsʼanchij a olábil. Neʼets ti pidhaʼ i koytaláb ta ichích ani neʼets ti tólmiy ka belaʼ ta baʼ (Salmo 71:5; 73:28). A Dios neʼets ti tólmiy tam ka watʼenchij i tʼeʼpintaláb (Salmo 18:18). Jayej in léʼ ti tsʼejwaliy kʼal an ejataláb abal etsʼey (Romanos 6:23).

Tam u utel kʼal Dios, u utel kʼal in jaʼubchik. In jaʼubchik a Dios jayej neʼets kin tʼajaʼ ta jaʼúb. An epchalábchik neʼets ka wenkʼon ta yanél. Neʼets ka kulbéj kin ejtow ti tólmiy abal tatáʼ ka aynanchij ka exobnaʼ tin kwéntaj a Dios.

A Dios más púlik kej wawáʼ. Max i léʼ ki tʼajaʼ ti jaʼúb a Dios, kwaʼal ki exbay axéʼ: an junkudhtaláb kʼal a Dios yab ejtíl axi i kwaʼal kʼal an atiklábchik, ¿jaleʼ? Kom jajáʼ kʼwajinek más yán i tamub kej wawáʼ, más tsalpadh ani in kwaʼal yán i tsápláb. Jaxtám, expidh jajáʼ in kwaʼal in uchbíl tu ku Abatnaʼ. Tám, max i léʼ ki tʼajaʼ ti jaʼúb a Dios, kwaʼal ki belkaʼ ani ki tʼajaʼ jawaʼ tu konchal. Max ki belkaʼ a Dios, jajáʼ etsʼey neʼets tu ku lábliy (Isaías 48:18).