Ki pojkaʼ an kʼakʼnaxtaláb axi yab bolidh

A Satanás ani in tolmiwálchik yab in léʼ abal wawáʼ ki tʼojonchij a Dios. Jajáʼchik in exál tu ku ówmédhaʼ kʼal a Dios. ¿Jantʼiniʼ tin tʼajál? Jún i wipol axi in eyendhál pél an kʼakʼnaxtaláb axi yab bolidh (2 Corintios 11:13-15). Jún i kʼakʼnaxtaláb yab bolidh max yab in ólnál an chubaxtaláb axi tal ti Biblia. An kʼakʼnaxtaláb axi yab bolidh pél jantʼiniʼ jún i waliláb axi eblim lej alabél pero kʼatsenek tin al; max ki kʼapuw expidh neʼets tu ku yaʼundhaʼ.

An kʼakʼnaxtaláb axi yab tekedh, yab in ejtowal kin kulbedhaʼ a Jehová kom jajáʼ yab u kʼambix. Tam ti a Jesús kʼwajiy tejéʼ ti Tsabál, waʼatsak jún múkeʼ i atiklábchik axi in úlalak in kʼakʼnál a Dios, pero in léʼakchik kin tsemdhaʼ a Jesús. In tsálpayalak abal jajáʼchik in kʼakʼnálak a Dios jantʼiniʼ tin tomnál. In úlalak: «I kwaʼal junkats i Tátaj [...] a Dios». Pero ¿jantʼoj in uluw a Jesús? Jajá tokʼtsin: «An tenekláb játs a tátajchik» (Juan 8:41, 44). Xóʼ, yán i kʼwajílomchik in tsálpayal abal kʼwajat in kʼakʼnál a Dios, pero jitaʼ chubax kʼwajat in kʼakʼnál pél a Satanás ani in tolmiwálchik (1 Corintios 10:20).

An kʼakʼnaxtaláb axi yab alwaʼ, pél jantʼiniʼ jún i teʼ axi in bínál in walíl kʼatsenek. Tin puwél an Tsabál waʼats yán i tʼeʼpintaláb kom yán i atiklábchik in kulbetnál kin xeʼtsindhaʼ yán i uxum o inik, in yakʼwál jún i uxum kʼal i tsápláb abal kin odhnaʼ, u pejéxchik, u kwéʼ, u ódhnáx ani u tsemdháx. Yán i kʼwajílomchik axi in tʼajál axéʼ in ulal abal in kwaʼal jún i kʼakʼnaxtaláb, pero yab u nixáb kin tʼajaʼ jawaʼ alwaʼ. Max yabchik kin jilaʼ ti pojkax, yab neʼets kin ejtow kin tʼajaʼ tin jaʼúb a Dios (Mateo 7:17, 18).

An kʼakʼnaxtaláb axi yab alwaʼ, in exóbchal an atiklábchik kin ólonchij i walekláb. A Dios tu uchál abal yab alwaʼ ki tʼajaʼ axéʼ. ¿Walám in tomnál tu ku konchij axéʼ? Komʼíj. Ka tsálpaykʼij: ¿Walám ka kulbetnaʼ abal an atiklábchik etsʼey kin eyendhaʼ jún i fotografía abal ka tʼilmáts kʼal tatáʼ? ¿Walám kin ejtow kin tʼajaʼ ta jaʼúb nixéʼchik xi atikláb? Imbáj, yab neʼets kin ejtow. A Jehová in léʼ abal an kʼwajílomchik ka tʼilmáts kʼal jajáʼ, yab kʼal jún i walekláb axi yab ejat (Éxodo 20:4, 5).

An kʼakʼnaxtaláb axi yab bolidh, in ólnál abal yab jantʼoj in kwaʼal max ki tsemdhaʼ kʼeʼat i atiklábchik tam waʼats i pextaláb. A Jesús in uluw abal in jaʼubchik a Dios neʼetsak ka kʼanidháxin. Yab i tsemdhál an atiklábchik axi i kʼanidhál (Juan 13:35). Jayej yab alwaʼ ki tsemdhaʼ an atiklábchik axi pojkax. Tam ti kʼalej ti yakʼwnal a Jesús kʼal an atiklábchik kʼal axi tu kʼwíynalak, jajáʼ yab in jilaʼ abal in aykólil ka pejéxin abal ka kʼaniyat (Mateo 26:51, 52).

An kʼakʼnaxtaláb axi yab bolidh, in ólnál abal an atiklábchik axi pojkax neʼets ka chikan al an kʼamal. Pero an Biblia tu ólchal abal wawáʼ u tsémel kom pél u waláblom (Romanos 6:23). A Jehová pél jún i Dios kʼanidhom. ¿Walám jún i Dios axi kʼanidhom kin léʼnaʼ kin odhnaʼ an atiklábchik abal etsʼey? Imbáj, ¿yab aníts? Ti Alabél tsabál, expidh neʼets ka waʼtsin junkats i kʼakʼnaxtaláb axi a Dios in batsʼkʼuwal (Revelación 15:4). Patal axi más an kʼakʼnaxtaláb, axi in ólnál in jánamtal a Satanás neʼets ka taley.