¿Jantʼiniʼ a ejtowal ka elaʼ an kʼakʼnaxtaláb axi bolidh?

Max i léʼ ki tʼajaʼ ti jaʼúb a Dios, kwaʼal ki kʼakʼnaʼ jantʼiniʼ jajáʼ in kulbetnál. A Jesús in uluw abal «axi chubax in kʼakʼnál a Dios», neʼetsak kin tʼajaʼ jantʼiniʼ tin ólnál an «chubaxtaláb» (Juan 4:23, 24, NM). Expidh waʼats junkats in ay abal ki kʼakʼnaʼ a Dios jantʼiniʼ tin tomnál (Efesios 4:4-6). An kʼakʼnaxtaláb axi bolidh, tu neʼdhál ti ejataláb abal etsʼey ani an kʼakʼnaxtaláb axi yab bolidh, tu neʼdhál ti kʼibeltaláb (Mateo 7:13, 14).

Max ki tajaʼ ti kwéntaj in xeʼtsintal an atiklábchik neʼets ki ejtow ki exlaʼ an kʼakʼnaxtaláb axi bolidh. Axi chubax in kʼakʼnál a Dios, kwaʼal kin tʼajaʼ ti alwaʼinik kom a Jehová antsanáʼ in éy. Kʼwajat jantʼiniʼ jún i teʼ i lanáx, max alwaʼ, in bínál in walíl axi alwaʼ. Jayej kʼal an kʼakʼnaxtaláb, max alwaʼ, in tʼajál ka waʼtsin i atiklábchik axi alwaʼ (Mateo 7:15-20).

In jaʼubchik a Jehová lej in kʼakʼnál an Biblia. In exlálchik abal pél in Káwintal a Dios. Jaxtám, in jilál ka tolminchat abal kin exlaʼ más tin kwéntaj a Dios ani kʼal patal jawaʼ in kwaʼal kin tsuʼuw kʼal in ejatal (2 Timoteo 3:16). Jayej, in tsápnanchal kin tʼajaʼ jawaʼ in ólnál.

In jaʼubchik a Dios in kʼanidhál axi más. A Jesús in tejwamedhaʼ abal in kʼanidhálak an atiklábchik tam tin exóbchij tin kwéntaj a Dios ani in lejkiy an yaʼulchik. Axi chubax in kʼakʼnál a Dios, jayej in kʼanidhál axi más an kʼwajílomchik. Antsanáʼ jantʼiniʼ a Jesús, yabchik in pojkál an tsʼejwantál, axi pil in wal o pil in káwintal. A Jesús in uluw abal an kʼwajílomchik neʼetsak kin exlaʼ jitaʼchik játs in aykólil, kʼal an kʼanidhomtaláb axi neʼetsak kin tejwamedhaʼ kʼal in at-juntal (Juan 13:35).

In bij a Dios pél Jehová, ani in jaʼubchik in eyendhál. Max jún i atikláb yab in léʼ kin eyendhaʼ i bij, ¿walám ki kʼanidhaʼ jantʼiniʼ i jaʼúb? Imbáj, ¿yab aníts? Tam i kwaʼal jún i jaʼúb, i tawnál tin bij ani i ólchal kʼeʼat i atiklábchik jantʼiniʼ játs jajáʼ. Jaxtám, jitaʼ in léʼ kin tʼajaʼ tin jaʼúb a Dios, kwaʼal kin eyendhanchij In bij ani kin ólchij kʼeʼat i kʼwajílomchik tin kwéntaj jajáʼ. A Jehová in léʼ ki tʼajaʼ antsanáʼ (Mateo 6:9; Romanos 10:13, 14).

Antsanáʼ jantʼiniʼ a Jesús, in jaʼubchik a Dios in ólchal an atiklábchik tin kwéntaj in Eyaltal a Dios. In Eyaltal a Dios pél jún i abatnaxtaláb axi kʼwajat ti éb ani neʼets kin alubmedhaʼ an Tsabál. In jaʼubchik a Dios, in ólchal kʼeʼat i kʼwajílomchik axéʼ xi alwaʼolchixtaláb (Mateo 24:14).

An ólchixchik kʼal a Jehová in tsápnanchal kin tʼajaʼ tin jaʼúb a Dios. In kʼakʼnál an Biblia ani u kʼanidháxchik. Jayej, in kʼakʼnál ani in eyendhanchal in bij a Dios ani in exóbchal kʼeʼat i atiklábchik tin kwéntaj in Eyaltal. Xowéʼ, an ólchixchik kʼal a Jehová játs axi in kwaʼal an kʼakʼnaxtaláb axi bolidh.