¿Jantʼonéy u watʼel tam ku tsemets?

¿Jantʼonéy játs an tsemlaj? An tsemlaj pél jantʼiniʼ tam jún lej wayámadh (Juan 11:11-14). An tsemélomchik yabáts in ejtowal ti káw ti tsuʼux ni ti otsʼox ni kin tsalpay ni jantʼoj (Eclesiastés 9:5, 10). An kʼakʼnaxtaláb axi yab chubax, in ólnál abal an tsemélomchik u wenkʼonal ti espíritus abal ka kʼalej ti kʼwajíl kʼal in yanél axi tsémenekits ti biyál. Pero an Biblia yab tu exóbchal nixéʼ.

An tsemélomchik yab in ejtowal tu ku tólmiy ni tu ku odhnaʼ. An atiklábchik in tʼajál i ajib abal an tsemélomchik kom in tsálpayal abal antsanáʼ in ejtowal kin kulbedhaʼchik. Pero axéʼ xi tʼajbiláb pél jún in jánamtal a Satanás. Jaxtám, a Dios yab in kulbetnál. Jayej, axéʼ xi ajib yabáts in ejtowal kin kulbedhaʼ an tsemélomchik kom yabáts ejat. Jaxtám, yab kwaʼal ki tsʼejnaʼ ni ki kʼakʼnaʼ an tsemélomchik. Expidh kwaʼal ki kʼakʼnaʼ a Dios (Mateo 4:10).

An tsemélomchik neʼets ka wichbanchat in ejatal junílekʼij. Axi taʼtál a kʼicháj, a Jehová neʼets kin tsʼakbaʼ an tsemélomchik abal ka kʼwajiy ti Alabél Tsabál (Juan 5:28, 29; Hechos 24:15). A Dios in ejtowal kin édhaʼ an tsemélomchik ejtíl tam wawáʼ i édhál jún i atikláb axi kʼwajat ti wáyal (Marcos 5:22, 23, 41, 42).

Jún i janamtaláb axi in bukʼumal a Satanás an Diablo pél abal wawáʼ yab u tsémel. A Satanás ani in tolmiwálchik, in tʼajál abal an atiklábchik kin tsalpay abal in ejatal an tsemélomchik xeʼets ti ikʼ ani in tʼajál ku yawʼláts o ki yajchiknaʼ. A Satanás in wachbindhál o in tsuʼbindhál an atiklábchik abal kin kʼambiy. Jaxtám a Jehová, yab in batsʼkʼuwal tin jaʼúb ni jitaʼ axi in takal ka tʼilmáts kʼal an tsemélomchik (Deuteronomio 18:10-12).