AJUMTALÁB 29
¿In áynanchal ejat an atiklábchik axi tsémenek?
¿A kʼibamal ban tsemláj jitaʼ axi a lej kʼanidhál? Max a watʼamal axéʼ, walám a konowiyámal ta kwetémtal max an tsemélom in áynanchal ejat. ¿Walám neʼets kit wichiy ka tsuʼuw a jaʼúb axi tsémenekits? Al axéʼ xi ajumtaláb ani al axi taʼtal neʼets ki exóbnaʼ jantʼoj in ulal an Biblia tin kwéntaj axéʼ.
1. ¿In áynanchal ejat an atiklábchik axi tsémenek?
A Jesús in uluw abal tam jun i atikláb ka tsemets, pel ejtíl max kʼwajat lej wayamadh. Walám a tʼajámal ti kwéntaj abal tam jun i atikláb kʼwajat lej wayamadh, yab in tʼajál ti kwéntaj jawaʼ u watʼel tin tonídh. ¿Jaleʼ ti ulal abal tam jun i atikláb tsémenek, pel ejtíl max kʼwajat wayamadh? Kom tam jun i atikláb ka tsemets, yabáts in atsʼál i yajal ani yab in atsʼál nibal jantʼoj. An Biblia in ulal abal «axi tsémenekits yabáts in exlál nibal jantʼoj» (ka ajiy Eclesiastés 9:5).
2. ¿Jaleʼ tu tólmiyal ki exlaʼ jawaʼ in ulal an Biblia tin kwéntaj an tsemélom?
Yan i atikláb u jikʼél ka tsemets ani in tsʼejnál an tsemélom. Pero ki exlaʼ jawaʼ in ulal an Biblia, neʼets tu ku tólmiy abal yab ku jikʼey. A Jesús in uluw: «Neʼets ka exlaʼ an chubaxtaláb ani játs neʼets ti wálkaʼ» (Juan 8:32). Yan i belomtaláb in ulal abal tam ku tsemets i áynanchal ejat, pero an Biblia yab tu exóbchal nixéʼ. Tam, yab jitaʼ neʼets kin yajchiknaʼ talbél tam ka tsemets. An tsemélom yab in éjtowal tu ku ódhnaʼ kom jajáʼchik yabáts in exlál jantʼoj. Jaxtám, yabáts in yéjenchal ka kónchinchat i alwataláb nibal ki kʼakʼnaʼ abal kin éjtowchik ka koyóts.
Waʼats i atikláb axi in ulal abal in éjtowal kin tʼilmay an tsemélom, pero nixéʼ yab chubax. Talelej i exóbnaʼits abal «an tsemélom yabáts in exlál nibal jantʼoj». Axi in tsálpayal abal in tʼilmayal in yanél axi tsémenek, walám kʼwajat in tʼilmayal an demonios. Tam, max ki exlaʼ an chubaxtaláb tin kwéntaj an tsemélom, neʼets tu ku tólmiy abal yab tu ku kʼambiy an demonios. A Jehová tu uchál abal yab in tomnál ki exaʼ ki tʼilmay an tsemélom, kom in exlál abal nixéʼ neʼets kin tʼajaʼ abal an demonios tu ku ódhnaʼ (ka ajiy Deuteronomio 18:10-12).
ABAL KA EXÓBNAʼ MÁS
Ki tsuʼuw jantʼoj más tu exóbchal an Biblia tin kwéntaj an tsemláj. Jayej neʼets ki bélaʼ más abal a Jehová tu kʼanidhál ani abal yab in odhnál an tsemélom.
3. Jawaʼ u watʼel tam jun i atikláb ka tsemets
An atiklábchik in kwaʼal yan i tsalap tin kwéntaj jantʼoj u watʼel tam jun i atikláb ka tsemets. Pero yab patal axéʼ xi tsalap kʼwajat tekedh.
Juʼtáj tatáʼ it kʼwajíl, ¿jantʼoj in belál an atiklábchik tin kwéntaj an tsemélom?
Abal ka exlaʼ jawaʼ in ulal an Biblia tin kwéntaj axéʼ, ka tsuʼuwchik an VIDEO.
Ka ajiychik Eclesiastés 3:20 ani ka tsálpaychik kʼal axéʼ:
¿Jantʼoj tu exóbchal axéʼ xi versículo abal u watʼel tam jun i atikláb ka tsemets?
Tam jun i atikláb ka tsemets, ¿walám u jílkʼonal ejat jantʼoj kʼal jajáʼ?
An Biblia tu ólchal jawaʼ watʼey kʼal a Lázaro, jajáʼ pelak in jaʼúb a Jesús. ¿Jantʼiniʼ tin uluw a Jesús abal kʼwajatak a Lázaro? Ka ajiychik Juan 11:11-14 ani ka tsálpaychik kʼal axéʼ:
¿Kʼal jantʼoj tin jumbiy an tsemláj, a Jesús?
¿Jantʼoj tu exóbchal tin kwéntaj an tsemláj, jawaʼ in uluw a Jesús?
¿A tsálpayal abal chubax jawaʼ in ulal an Biblia tin kwéntaj an tsemélom?
4. Ki exlaʼ jawaʼ chubax u watʼel kʼal an tsemélom tu lej tólmiyal
Tam ki exlaʼ jawaʼ chubax u watʼel kʼal an tsemélom, yabáts i tsʼejnál. Ka ajiychik Eclesiastés 9:10 ani ka tsálpaychik kʼal axéʼ:
¿In éjtowal tu ku ódhnaʼ an tsemélom?
An chubaxtaláb axi kʼwajat ti Biblia tu lej tólmiyal kom i tʼajál ti kwéntaj abal yab i yéjenchal ki kʼakʼnaʼ an tsemélom, nibal ki tʼajaʼ jantʼoj abal ka koyótschik. Ka ajiychik Isaías 8:19 ani Apocalipsis 4:11, ani ka tsálpaychik kʼal axéʼ:
¿Jantʼiniʼ a tsálpayal abal in atsʼál a Jehová tam jitaʼ in kʼakʼnál an tsemélom o in konchal abal ka tólmiyat?
Ki exlaʼ jantʼoj u watʼel kʼal an tsemélom, tu tólmiyal abal yab ki tʼajaʼ jantʼoj axi a Jehová yab in kulbetnál.
5. Ki exlaʼ an chubaxtaláb tin kwéntaj an tsemláj tu lej kanatbedhál
Yan i atikláb u exóbchinal abal tam ka tsemets neʼets kin lej yajchiknaʼ kʼal patal jawaʼ in tʼajaʼ tam ti kʼwajiy ejat. Pero tu lej kanatbedhál ki exlaʼ abal yab jitaʼ in yajchiknál tam ka tsemets, bélits max in tʼajaʼ jantʼoj axi lej kidháb. Ka ajiychik Romanos 6:7 ani ka tsálpaychik kʼal axéʼ:
An Biblia in ulal abal tam jun i atikláb ka tsemets, in jálbiyal patal in wálab. Tam, ¿jantʼoj a tsálpayal? ¿Walám an tsemélom kʼwajatchik in jálbiyal jawaʼ in tʼajaʼ tam ti ejat?
Biyat más ki exlaʼ a Jehová, más i tʼajál ti kwéntaj abal Jajáʼ yab jaykʼiʼ neʼets kin ódhnaʼ axi kʼwajatchik tsémenek. Ka ajiychik Deuteronomio 32:4 ani 1 Juan 4:8, ani ka tsálpaychik kʼal axéʼ:
Max a Jehová pel antsanáʼ jantʼiniʼ in ulal axéʼ an versículos, ¿walám neʼets kin ódhnaʼ an tsemélom?
¿A tsálpayal abal tu pidhál i kanataláb ki exlaʼ jawaʼ chubax u watʼel tam ku tsemets? ¿Jaleʼ?
JAWAʼ TALCHIK IN TSÁLPAYAL: «U tsʼejnál kin tsemets».
¿Jawaʼ tam textos axi ti Biblia neʼets ka eyendhaʼ abal ka kanabédhaʼ jun i atikláb axi ti uchaʼ axéʼ?
JAWAʼ I EXOBNÁMAL
Tam jun i atikláb ka tsemets, ma tanáʼ u talél. Yabáts in yajchiknál ani yab in éjtowal tu ku ódhnaʼ.
Ki tʼilaʼ jawaʼ i exóbnaʼ
Tam jun i atikláb ka tsemets, ¿in áynanchal ejat?
¿Jaleʼ tu lej tólmiyal ki exlaʼ jawaʼ u watʼel tam jun i atikláb ka tsemets?
¿Jaleʼ tu lej kanatbedhál ki exlaʼ jawaʼ u watʼel tam jun i atikláb ka tsemets?
KA EXÓBNAʼ JANTʼOJ ÍT
Ka tsuʼuw jantʼoj in ulal an Biblia abal pel an alma.
Ka tsuʼuw max chubax abal a Dios in abál ban infierno an atiklábchik axi pojkax.
¿In tomnál ki tsʼejnaʼ an tsemélom?
Ka exlaʼ jantʼiniʼ ti tólmiyat jun i inik tam ti in exbay jawaʼ u watʼel tam jun i atikláb ka tsemets.