¿Jantʼonéy in yéjenchal abal ki koʼoy jún i yanel kulbél?

AXI AN BIBLIA IN ÓLNÁL

«Jitats kin atsʼanchij ani kin punuw [...] in káwintal a Dios játs axi lej kulbél.» (Lucas 11:28, An it jilchith cau [IJC].)

JANTʼINIʼ TU TÓLMIYAL KI EXLAʼ

Neʼets ki elaʼ i chubax kʼanidhomtaláb (Efesios 5:28, 29).

Neʼets ku kʼakʼnaxin (Efesios 5:33).

Neʼets ka waʼtsin i chubax junkudhtaláb (Marcos 10:6-9).

¿LEJ CHUBAX I EJTOWAL KI BELAʼ JAWAʼ IN ULAL AN BIBLIA?

Antsanaʼ, neʼets ki tsuʼuw expidh tsáb i tʼipláb:

• A Dios pél an tsʼejkom kʼal an yanel. An Biblia in ulal «patal an yanéláb [...] pidhnének in bij» kʼal a Jehová Dios (Efesios 3:14, 15, Traducción del Nuevo Mundo). Uludh kʼal pil i káw, an yanel kʼwajat kom a Jehová in tsʼejkaʼ. ¿Jaleʼ ti exbadh ki exlaʼ axéʼ?

  Ka tsalpay: Max kʼwajatak a kʼapal jún i teʼnél lej kujúw ani a léʼ ka exlaʼ jantʼonéy jolchin, ¿jitaʼ neʼets ka konówiy? Yab aníts, abal pél an atikláb axi in tsʼejkaʼ.

  Jayetsekʼij, max a léʼ ka exlaʼ jantʼiniʼ kit kʼwajiy kulbél kʼal a yanel, más alwaʼ ki konówiy a Jehová, kom játs an tsʼejkom kʼal i yanel (Génesis 2:18-24).

• A Dios tu beletnál. Jaxtám, lej alwaʼ abal tatáʼ ani a yanel ka aliychik ti an Biblia in exóbchixtal a Jehová, «Kom jáʼits a Dios axi ti beletnál ta junchik» (1 Pedro 5:6, 7, IJC). A Jehová in léʼ axi más alwaʼ abal wawáʼ. Ani in exóbchixtal etsʼey tu tólmiyal (Proverbios 3:5, 6; Isaías 48:17, 18).