Jantʼiniʼ ka exóbchij a tsakámil

Tam ti a Jehová in tsʼejkaʼ an yanéláb, in pidhaʼ in uchbíl an tatalábchik abal kin exóbchij in tsakámil (Colosenses 3:20). Jantʼiniʼ tataláb pél a uchbíl ka exóbchij a tsakámil abal kin kʼanidhaʼ a Jehová ani tam ka púwey kin tʼajaʼ axi alwaʼ (2 Timoteo 1:5; 3:15). Jayej kwaʼal ka exlaʼ jantʼonéy in kwaʼalchik tin ichích. Lej yejentál ka punchij an tʼiplab. Abal ka ejtow ka exóbchij a tsakámil in káwintal a Dios, okʼox kwaʼal ka kʼwajiy ta ichích (Salmo 40:8).

1 KA TÓLMIY A TSAKÁMIL ABAL KIN LÉʼNAʼ TI KÁW KʼAL TATÁʼ

AXI AN BIBLIA IN ÓLNÁL: «Kwaʼal kit kʼwajiychik tʼojojodh abal ka atsʼaʼ, ka koʼoy i kʼayaʼtaláb abal kit káwin» (Santiago 1:19, TNM). Tatáʼ a léʼ abal a tsakámil ti ólchij jawaʼ in atsʼál. Kwaʼal ka tejwamédhanchij abal etsʼey neʼets ka otsʼówiy tam kin yejenchij. Ka tejwamédhaʼchik i koyattaláb abal an tsakam kin léʼnaʼ ti ólchij jawaʼ in atsʼál (Santiago 3:18). Max jajáʼchik kin tʼajaʼ ti kwéntaj abal neʼets kit tsákuy, walám yab kin léʼnaʼ ti ólchij. Ka tejwaʼmédhaʼ i kʼayaʼtaláb ani ka uchaʼ a tsakámil abal a kʼanidhál (Mateo 3:17; 1 Corintios 8:1).

AXI A EJTOWAL KA TʼAJAʼ:

• Ka otsʼówiy a tsakámil tam kin yejenchij ti tʼilom

• Kit tʼilmáts etsʼey kʼal a tsakámil, yab expidh tam in kwaʼal i kʼibataláb

2 KA TSÁPNANCHIJ KA EJTIY JAWAʼ IN LÉʼ TI UCHAʼ

AXI AN BIBLIA IN ÓLNÁL: «Jitaʼ in ejtiyal alwaʼ jún i káw neʼets kin koʼoy i alwaʼtaláb» (Proverbios 16:20). Walám junchikíl kwaʼal ka tʼajaʼ jantʼoj más abal ka exlaʼ jawaʼ in atsʼál a tsakámil. Tam junchikíl an tsakamchik in jalpinchal an káw o in ulal jantʼoj axi yab in atsʼál. «Tam jún kin tókʼtsiy jún i káw okʼxidh kin otsʼówiy, yab in tejwaʼmédhál i tsalpadhtaláb.» (Proverbios 18:13.) Jaxtám yab kit dhubat tsákuy (Proverbios 19:11).

AXI A EJTOWAL KA TʼAJAʼ:

• Ka jilaʼ abal a tsakámil ti ólchij jawaʼ in atsʼál ani yab kit tsákuy dhubat max yab a kulbétnál jawaʼ ti ólchal

• Ka tʼilaʼchik tam tit tsakamej, jantʼoj a atsʼalak ani jantʼoj játs axi más exbadhak abal tatáʼ

3 KA TSÁLPAYCHIK JUNAT

AXI AN BIBLIA IN ÓLNÁL: «Ka tʼajaʼ ti kwéntaj in exóbchixtal a tátaj ani yab ka pojkaʼ in abatnaxtal a nánaj» (Proverbios 1:8). An tataláb ani an nanaláb pidhnének in uchbíl kʼal a Jehová abal kin exóbchij in tsakámil ti kʼakʼnax ani ti bélkax (Efesios 6:1-3). A tsakámilchik in tʼajál ti kwéntaj tam yab «a tsálpayalchik [...] junat» (1 Corintios 1:10, TNM). Max yab a tsálpayalchik junat, yab kit pejéxin tin tamét a tsakámil abal yab kin jilaʼ ti kʼakʼnaʼ.

AXI A EJTOWAL KA TʼAJAʼ:

• Kit tʼilmáts kʼal a tomkíl abal jantʼiniʼ ka exóbchij a tsakámilchik

• Max yab a kulbétnál jantʼiniʼ a tomkíl in tsalpayal kin exóbchij a tsakámil, ka tsápnanchij ka ejtiy

4 KIT TʼOJOJON OKʼXIDH

AXI AN BIBLIA IN ÓLNÁL: «Ka exóbchij an kwitól an bél axi in tomnál kin aynaʼ» (Proverbios 22:6). Max a léʼ abal a tsakámilchik ka bélkaxin, ka exóbchij. Ka tʼajaʼ jún i programa abal jantʼiniʼ ti neʼets ka exóbchij ani ka boliy a tsakámil (Salmo 127:4; Proverbios 29:17). Ka boliy a tsakámil yab expidh pél ka kwadhaʼ, in léʼ kin uluw abal kwaʼal ka tólmiy kin ejtiy jaleʼ ta boliyal (Proverbios 28:7). Jayej, ka exóbchij kin kʼanidhaʼ in káwintal a Dios ani kin exbay an exobchixtaláb axi kʼwajat tanáʼ (Salmo 1:2). Kʼal axéʼ neʼets ka tolmiyat abal kʼal in tsalápil ka ólchin jawaʼ alwaʼ ani jawaʼ yab alwaʼ (Hebreos 5:14).

AXI A EJTOWAL KA TʼAJAʼ:

• Ka tsápnanchij abal a tsakámil kin tsuʼuw a Jehová jantʼiniʼ jún i Dios axi chubax

• Ka tolmiychik a tsakámil abal kin exlaʼ jantʼoj tam tʼajbiláb in ejtowal ka odhnáj ani antsanáʼ yab kin tʼajaʼ. Ka exóbchij abal kin pojkaʼ jawaʼ tejwaʼmél ti Internet. Ejtíl, an atiklábchik axi in aliyal an tsakam abal kin ódhnanchij in iniktal