An janamtaláb axi in tʼajál ki tsalpay abal a Dios pojkax

JAWAʼ IN ULAL AN ATIKLÁBCHIK

«An atikláb axi u tsemel ani in tʼajámal jun i púlik walabtaláb u kʼalel ti infierno ani tanáʼ u chikáb» (Catecismo de la Iglesia Católica.) Junchik i ókʼnom religiosos in ulal abal an infierno pel tam jun i atikláb u walbinal ani yabáts in kwaʼal in batsʼkʼuxtal a Dios.

JAWAʼ IN ULAL AN BIBLIA

«Jitaʼ kin tʼajaʼ jun i walabtaláb... neʼets ka tsemets.» (Ezequiel 18:4.) Pero axi tsemenekits, «jajáʼchik yabáts in exlál ni jantʼoj» (Eclesiastés 9:5). Jaxtám, max an atikláb u tsemel ani yabáts in exlál ni jantʼoj, ¿jantʼiniʼ in éjtowal kin atsʼaʼ abal u chiknal ani yabáts in éjtowal ka utey kʼal a Dios?

Ti Biblia, an kawintaláb infierno expidh u eyendháb abal ka olnáj juʼtáj tu joliyáb an atiklábchik, ejtíl, tam ti a Job in koʼoy jun i kʼalchidh yawʼláts, in olonchij a Dios: «U leʼak max ti kin tsinaʼ ban jolimtaláb» (Job 14:​13, Nueva Versión Internacional). O jantʼiniʼ in ulal La Sagrada Biblia, de Guillermo Jünemann, «ti infierno». A Job yab in leʼak ka kʼwajiy al jun i infierno juʼtáj tu chiknal ani ka kʼwajiy ow kʼal a Dios, tokot in leʼak ka koyóts ban jolimtaláb.

JALEʼ TIN TOMNÁL KA EXLAʼ

Max ki tsalpay abal a Dios pojkax yab neʼets ki leʼnaʼ ku utey kʼal jajáʼ. «Tam tin tsipilej in exobchin abal waʼats jun i infierno —in ulal a Rocío, ti México⁠—. Kom u lej tsʼejnalak a Dios yabak u tsalpayal max alwaʼ inik. U tsalpayalak abal etsʼey kʼwajatak tsakúl ani tin kʼwiyál.»

Lej tólmiyat a Rocío kʼal jawaʼ in olnál an Biblia tin kwéntaj a Dios ani an tsemelom. Jajáʼ in ulal: «U atsʼaʼ lej koyat, ejtíl max in tixkʼanchat jun i púlik tʼeʼpintaláb. U exbay abal a Dios u tʼeʼpinal kʼal wawáʼ, abal tu kʼanidhál ani abal nanáʼ jayej u éjtowal kin utey kʼal jajáʼ. U tsuʼtal ejtíl jun i tataláb axi in lej tʼajál ti kwéntaj in tsakámil, ani in leʼ abal ka kʼwajiychik alwa» (Isaías 41:13).

Yan i atiklábchik in kʼakʼnál a Dios kom in tsʼejnál an infierno, pero a Dios yab antsanáʼ tin leʼ.  A Jesús antsanáʼ tin uluw: «Kwaʼal ka kʼanidhaʼ a Dios» (Marcos 12:​29, 30). Tam i exbayal abal a Dios yab in tʼajál ki yajchiknaʼ, yab kʼibat i atsʼál ki belaʼ abal neʼets kin putuw alwaʼ in kawintal al an kʼij axi taʼtál. Antsanáʼ jantʼiniʼ tin uluw a Elihú, in jaʼúb a Job, wawáʼ jayej i éjtowal ki uluw: «¡A Dios yab jaykʼiʼ neʼets tu ku odhnaʼ, jajáʼ etsʼey in tʼajál jawaʼ tekedh!» (Job 34:​10, Nueva Versión Internacional).