Ki eyendhaʼ i videos kʼal an exóbalchik kʼal an Biblia

Patal i kulbetnál ki tsuʼuw i videos, axéʼ tu tólmiyal ki exbay más alwaʼ ani ki tʼilaʼ jawaʼ i exobnámal. An Púlik Exóbchix Jehová, in exóbchij in tʼojnálilchik kʼal i tʼiplab axi in ejtowalak kin tsuʼuw (Gé 15:5; Jer 18:1-6). An Púlik exóbchix Jesús jayej in eyendhaʼ (Mt 18:2-6; 22:19-21). Jún i eyextaláb axi lej eyendhámej al axéʼchik xi tamub pél an videos. ¿Kʼwajat i eyendhál i videos abal ki tólmiy an exóbalchik kʼal an Biblia?

Xowéʼ i kwaʼal 10 i videos axi in wilkʼál talchik i ajumtaláb in kʼal an folleto Jawaʼ a Dios tu ólchal lej alwaʼ. Yan kʼal axéʼchik xi video kaldhámej in bij al jún i ajumtaláb in kʼal an folleto. An folleto axi kʼwajat ti Internet in kwaʼal i enlaces axi tu ólchal jaykʼiʼ ki eyendhaʼ jun i video. Jayej waʼats más i videos abal kʼeʼat i publicaciones axi jayej i eyendhál abal tu exóbchix.

¿In atsʼál kʼibat an atikláb kin exbay jawa a exóbchal tin kwéntaj an Biblia? ¿Kʼwajat in tametnál jún i kʼibataláb? Ka aliy ti jw.org® o ti JW Broadcasting® jun i video kʼal axi ka tolmiyat an exóbal. Walám ka ejtow ka metʼaʼ kʼal jajáʼ ani ka exóbnaʼchik.

Ta ítsʼ u punuwab ti Internet i it videos. Tam ka tsuʼuw an videos ka tsalpay jantʼiniʼ ti neʼets ka eyendhaʼ abal ka exóbchij an atiklábchik.