Ki kanchij más in alwáʼ an exobintaláb kʼal an Biblia ti kwetémtal

JALEʼ TI EXBADH. An exobintaláb kʼal an Biblia tu tólmiyal ki exbay alwaʼ jantʼiniʼ játs in «tsʼikwél, in nakél, in lupudh ani in tʼekʼát» an chubaxtaláb (Ef 3:18). Jayej tu tólmiyal abal yab ku elchat ni jantʼoj kʼal tu ku jolbiyat al axéʼ xi xeʼtsintaláb pojkax, ani ki koʼoy «ti ichích in káwintal a Dios» (Flp 2:15, 16). Ban exobintaláb kʼal an Biblia ti kwetémtal i ejtowal ki takuy an olchixtaláb axi wawáʼ i tsalpayal abal i yéjenchal ti ejatal. ¿Jantʼiniʼ i ejtowal ki eyendhaʼ alwaʼ an kʼij axi i jolkʼál abal tu ajum ani tu exóbal kʼal an Biblia?

JANTʼINIʼ KI TʼAJAʼ

• Ka kiloy talchik i versículos, jayej, ban Biblia axi a eyendhál abal ti exóbal a ejtowal ka dhuchaʼ i notas, a ejtowal ka tʼajaʼ ban Biblia ti úw o ti electrónico.

• Biyat u exóbal, i ejtowal ki tókʼtsiy axéʼ xi konowixtalábchik «jitaʼ», «jantʼoj», «juʼtáj», «jaykʼiʼ», «jantʼiniʼ» ani «jaleʼ».

• Ki exóbnaʼ más jawaʼ i ajiyits. Ka eyendhaʼ an publicaciones axi waʼats abal ka aliy i exobchixtaláb tin kwéntaj jún i versículo, jayej a ejtowal ka aliy jún i tema kaldhach al an versículo.

• Ki lupudh tsalpay kʼal jawaʼ i exobnámal abal ki exbay jantʼiniʼ tu tólminchal ti ejatal.

• Ki punuw ti tʼajbiláb chudhél chudhél jawaʼ i exóbnal (Lu 6:47, 48).

TALBÉL TA TSUʼÚMAL AN VIDEO KA KOʼOY JÚN I LUPUDH EXOBINTALÁB KʼAL AN BIBLIA, KA TÓKʼTSIY AXÉʼ XI KONOWIXTALÁBCHIK:

• ¿Jantʼoj in tsalpayal talchik i epchal tin kwéntaj an exobintaláb kʼal an Biblia ti kwetémtal?

• ¿Jaleʼ in tomnál ki tʼajaʼ jún i oláb okʼxidh ku exobláts?

• ¿Jantʼoj neʼets tu ku tólmiy ki exbay más jawaʼ i ajiyal ban Biblia?

• ¿Jantʼiniʼ i ejtowal ki kiloy an Biblia axi i eyendhál abal tu exóbal?

• ¿Jaleʼ ti lej exbadh ki lupudh tsalpay kʼal jawaʼ i exóbnal ban Biblia?

• ¿Jantʼoj kwaʼal ki tʼajaʼ kʼal jawaʼ i exóbnal?