¿Jantʼiniʼ játs an exobchixtaláb axi in binál an ólchixchik kʼal a Jehová?
An ólchixchik kʼal a Jehová kʼwajat alwaʼ tʼojojodh, abal kin ólchij an alwaʼ kaw kʼal an Biblia an atiklábchik. An exobintaláb kʼal an Biblia in ejtowal ti pidhaʼ yan i tolmixtaláb, ejtíl:
Neʼets ka koʼoy jun i ejataláb kulbél.
Ka tʼajaʼ ta jaʼúb a Dios.
A éjtowal ka exlaʼ jantʼoj in ulal an Biblia kʼal an kʼicháj axi taʼtal.
Al an página ti jw.org neʼets ka elaʼ in tokʼtsixtal axéʼchik xi konowixtaláb:
¿U éjtowal tin exóbal jun i weʼ abal ku tsuʼuw jantʼiniʼ játs an exobintaláb?
¿Max ku batsʼkʼuw jun i exobintaláb kwaʼal ku tʼajaʼ tin ólchix?
¿Waʼats jun i tolmixtaláb abal ku éjtow nanáʼ ku exobnaʼ an Biblia tu kwetémtal?
¿Jantʼiniʼ játs an exobintaláb kʼal an Biblia?
Jun i Ólchix neʼets ti tólmiy abal ka exlaʼ jantʼoj in ulal an Biblia kʼayum, kʼayum. Kʼal an exobintaláb kʼal an libro Kit kʼwajiy kulbél abal etsʼey, kʼayum, kʼayum neʼets ka exobnaʼ jantʼoj tu exóbchal an Biblia ani jantʼiniʼ in éjtowal ti tólmiy. Max a léʼ ka exlaʼ más, ka tsuʼuw an video.
¿Kwaʼal ku bínaʼ i tumín?
Imbáj. I tʼajál jawaʼ a Jesús in uchaʼ in aykolilchik kin tʼajaʼ: «A batsʼuw tsʼejwalidh ka binaʼchik tsʼejwalidh» (Mateo 10:8). An exóbchixchik yab in batsʼkʼuwal i tumín. Max ki pidhan jun i Biblia yab kwaʼal ka jalbiy ni jantʼoj o an libro Kit kʼwajiy kulbél abal etsʼey.
¿Jay u owel an exobintaláb?
An libro in chiʼdhál 60 i ajumtaláb. A éjtowal tit exobal jantʼiniʼ tataʼ ti ka éjtow. Talchik in exobnál jun i ajumtaláb ti semana ani waʼatschik axi in exobnál más.
¿Juʼtáj tu ku tujuw?
1. A éjtowal ka konoy jun i exobintaláb ti Internet. Jawats ka punuw tanáʼ neʼets ka eyan abal ti tawnaʼ jun i exóbchix.
2. Jun i ólchix neʼets ti tawnaʼ abal ti exobchij an Biblia. Neʼets ti wilkʼanchij jantʼoj tam lablixtaláb neʼets ka batsʼuw kʼal an exobintaláb kʼal an Biblia ani neʼets kin tokʼtsiy jawakits tam konowixtaláb axi tatáʼ ka koʼoy.
3. Jitaʼ neʼets ti exóbchij ka uchaʼ jaykʼiʼ neʼets kin éjtow ka wichiy junílekʼij ti tsaʼbiy. A éjtowal kit exobláts ta kʼimaʼ o kʼal an teléfono, ti zoom o kʼal an correo electrónico. An exobintaláb u owel jun i hora, pero max a kulbetnál a éjtowal kit exobláts más, tatáʼ neʼets ka uluw jay i kʼij a kwaʼal abal tit exóbal.
¿U éjtowal tin exóbal jun i wéʼ abal ku tsuʼuw jantʼiniʼ játs an exobintaláb?
Aníts. A éjtowal ka tʼuchiy an formulario ti Internet. Tam an exobchix ti tawnaʼ ka uchaʼ abal expidh neʼets ta exobal jun i wéʼ, abal ka tsuʼuw max ka kulbétanaʼ. Tam a éjtowal ka eyendhaʼ an folleto Kit kʼwajiy kulbél abal etsʼey, kom expidh in chiʼdhál ox i ajumtaláb.
¿Max ku batsʼkʼuw jun i exobintaláb kwaʼal ku tʼajaʼ tin ólchix?
Imbáj. An ólchixchik kʼal a Jehová in lej kulbetnál kin binaʼ an exobintaláb kʼal an atiklábchik, pero yab jitaʼ in nixokʼnál abal kin tʼajaʼ ti ólchix. Kʼal i kʼanidhomtaláb neʼets ti wilkʼanchij jawaʼ in ulal na Biblia, in exlál abal an atiklábchik in éjtowal kin takuy jawaʼ in léʼ kin belaʼ (1 Pedro 3:15).
¿U éjtowal ku eyendhaʼ an Biblia axi nanáʼ u kʼal?
Aníts. A ejtowal ka eyendhaʼ jawakits tam Biblia axi ka kulbetnaʼ. An ólchixchik kʼal a Jehová in eyendhál an Traducción del Nuevo Mundo, axi yab kʼibat ki exbay. I exlál abal yan i atikláb in eyendhál an Biblia kom in ujnámits kin eyendhaʼ.
¿In éjtowal ti kin junaʼ kʼeʼat abal kin exobláts?
Aníts. A ejtowal ka kaniy a jaʼub ani a yanél.
Max nanáʼ u exobnámal an Biblia ti biyál kʼal an ólchixchik kʼal a Jehová, ¿u éjtowal ku exobnáʼ junílekʼij?
Aníts. Ani neʼets ka más kulbetnaʼ xowéʼ. An exobintaláb kʼwajat tsʼejkadh abal kin kulbetnaʼ an atiklábchik. Xowéʼ u tʼilom más kʼal an atiklábchik . In kwaʼal más i tʼiplabchik ani yab u junbinal kʼal jawaʼ i exobnálak ti biyál.
¿Waʼats jun i tolmixtaláb abal ku éjtow nanáʼ ku exobnaʼ an Biblia tu kwetémtal?
Aníts. Bélits abal yan i atikláb in atsʼál alwaʼ ka tolmiyat kʼal jun i exóbchix. Kʼeʼat in léʼchik ti exobal kwetém. Ban pejach «Tolmixtaláb abal ka exóbnaʼ an Biblia» waʼats yan i tolmixtaláb axi neʼets ti lej tólmiy. Axéʼ pel junchik:
Videos tin kwéntaj an Biblia. Neʼets ti wilkʼanchij talchik i exobintaláb axi ti Biblia, axi lej exbadh.
Konowixtaláb tin kwéntaj an Biblia. Al axéʼ xi exobintaláb in tokʼtsiyal yan i konowixtaláb axi tal ban Biblia.
Textos axi wilkʼadh axi tal ti Biblia. Ka exlaʼ an wilkʼaxtaláb axi tal ban Biblia kʼal i textos ani i kaw axi walám i exlálits.