¿Jantʼiniʼ i éjtowal ku tólmixin tam ka watʼey jun i yajchiktaláb?

Xoweykʼij waʼtsinének lej yan i yajchiktaláb. Jaxtám kwaʼal ka kʼwajiy alwaʼ tʼojojodh in bichówil a Jehová abal kin ejtow kin tólmiy axéʼchik xi epchal axi in yajchiknál. An Kwenél i Ókʼnom in bijiyámal al patal an sucursales, ka waʼtsin jun i kwenél i epchalchik axi ka tólmixin tam ka waʼtsin jun i yajchiktaláb. Axéʼ u bijiyáb ti Departamento de Labores de Socorro.

Tam ka watʼey jun i yajchiktaláb, axéʼchik xi epchal in tawnál an ókʼnomchik axi u kʼwajíl tanáʼ abal kin exlaʼchik jantʼoj in yéjenchal an epchalchik. Max lej yan jawaʼ kwaʼal ka tʼajan, an sucursal in abál i epchalchik abal ka tólmixin. Axéʼchik xi epchal walám kin konoy abal ka tólmiyat kʼal kʼeʼat i epchalchik, o jayej walám kin konoy ka tamkuyat jantʼoj axi jajáʼchik in exlál abal u yejencháb, o walám jajáʼchik kin bukʼuw an kʼapnél o kʼeʼat jantʼoj.

¿Jaleʼ ti alwaʼ ka tʼajan antsanáʼ an tʼojláb? Kom antsanáʼ patal neʼets kin koʼoy bíjchidhits an tʼojláb axi neʼets kin tʼajaʼ ani yab neʼets ka tʼokʼbáxin. Jayej, patal neʼets kin exbay jantʼiniʼ ti kwaʼal ka tʼójon ani neʼets ka eyendháj alwaʼ an tolmixtaláb axi binámej. Max an epchalchik ka tʼójon tin kwetemtal, walám ka ódhnachikat an tolmixtaláb axi bináj.

An epchalchik axi abnének kʼal an sucursal játs axi neʼets kin uluw jay i tumín u yejencháb ani jay i epchal u yejencháb abal ka tólmixin. Jayej neʼets kin tʼilmay an eyalchik abal ka jilchin kin tʼajaʼ in tʼojlábil. Jaxtám tu lej konchal abal yab kit xeʼtsin ti kónol tumín abal ka tólmiy axéʼchik xi epchal. Jayej, yab kit kʼalej juʼtáj ti watʼenek an yajchiktaláb nibal ka abaʼ i tolmixtaláb ta kwetemtal.

I exlál abal patal i kʼanidhál an epchalchik ani tam u watʼel jun i yajchiktaláb i léʼ ki tólmiychik (Heb 13:16). Tam, ¿jantʼiniʼ i éjtowal ku tólmixin? I éjtowal ki ólonchij a Jehová abal kin tólmiy an epchalchik axi kʼwajat in yajchiknál ani axi kʼwajat ti tolmix. Jayej i éjtowal ki bínaʼ i donaciones abal ka tólmiyatchik. An sucursales játs axi in exlál jantʼiniʼ ti neʼets ka eyendháj an tumín ani jantʼiniʼ ti neʼets ka okʼnáj an tʼojláb. Ani max i léʼ ku kʼalej tu tolmix, i éjtowal ki tʼuchiy an Solicitud de voluntario local de diseño y construcción (DC-50).

TALBÉL TA TSUʼÚMAL AN VIDEO JUN I UKʼELTALÁB AXI WATʼEY TI BRASIL, KA TÓKʼTSIY AXÉʼ XI KONOWIXTALÁB:

¿Jantʼoj játs axi más a jikʼpál kʼal jawaʼ in tʼajaʼ an epchalchik axi ti Brasil, talbél ti watʼenek an ukʼeltaláb?