Ti 2021 u kʼalej ki tólmiy an epchalchik

Ban támub de servicio 2021,a an COVID-19 in lej ódhnaʼ an atiklábchik tin puwél an tsabál. Ban artículo axi in bij: «An tolmixtaláb axi in bínaʼ an epchalchik tin puwél an tsabál», i ólnaʼ abal in pakúmal yan i tumínb abal kin tólmiy an epchalchik axi in yéjenchal, ani tʼojojyámej watʼadh 950 i Comités de Socorro.

Biyat kʼwajat an coronavirus, watʼey talchik i yajchiktaláb axi in ódhnaʼ an epchalchik. An Comité de Coordinadores axi in tólmiyal an Kwenél i Ókʼnom in uluwchik abal an tumín axi u eyendháb abal ka tólmiyat an epchalchik kom kʼwajat an coronavirus, jayej ka eyendháj watʼadh 162 millones i tumín abal ka tólmiyat an epchalchik axi kin watʼaʼ jun i yajchiktaláb. Ki tsuʼuw jantʼiniʼ ti eyendháj an tumín kʼal tsab i yajchiktaláb axi watʼey yabáyej lej ówat.

Tam ti an volcán Nyiragongo in wakʼlaʼ i kʼamal

Ti 22 a mayo ti 2021, an volcán Nyiragongo axi kʼwajat ban República Demócratica del congo, in wakʼlaʼ i kʼamal. Nixéʼ xi kʼamal in ódhnaʼ i atáj ani juʼtáj tu dhaynál i jáʼ. Pero yab expidh axéʼ. Al yan a kʼicháj, an volcán kʼwajiy in wakʼlál i pojodh axi u ódhnax ban bichow Goma ani ba juʼtamkʼij yatsin an Tsabál. Ani watʼadh tsʼejél kʼal an atiklábchik axi u kʼwajíl tanáʼ kaldhájchik. Lej yan i atiklábchik axi kʼalej ti tsinél ani talchik ulits ma ti Ruanda.

Kʼal nixéʼ xi atiklábchik jayej neʼetsak watʼadh 5.000 i ólchixchik kʼal a Jehová. Talchik odhnanchat in kʼimaʼ kʼal an kʼamal ani kʼeʼatchik kweʼchin jawaʼ in kwaʼalak tam ti kalejchik. An comités de socorro axi ti Ruanda ani axi ban República Democrática del Congo, tʼójonchik junkudh. An sucursal axi ban Congo tu ólchal jawaʼ in tʼajaʼ an sucursales: «okʼxidh ka uchan an atiklábchik ka kalej, an comités kʼwajatakits in binál, i kʼapnél, i jáʼ, i sábanas ani i tóltom, bélits abal lej kʼibatak ti kʼwajat an bichow». Al jun i bichow juʼtáj ti ulits watʼadh 2.000 i epchalchik, jun i comité de socorro, in kʼwájbaʼ i tiendas de campaña, in bínaʼ in paxkʼíl i wíʼani jayej in uchaʼchik an epchal jantʼoj kin tʼajaʼ abal yab ka dhaʼun kʼal an corona virus ani kʼal an cólera.

Al óx a itsʼ, an epchalchik in bínaʼ 6 toneladas i arroz, 6 toneladas i harina abal i bakan, watʼadh 8.000 litros i aceite ani watʼadh 8.000 litros i jaʼ. An epchalchik in éjtow kin tsʼaʼiy jun kalat i kʼapnél tanáʼ. Antsanáʼ yab in pakuwchik más i tumín abal ka kʼalej al píl i bichow kin aliy

Jun i epchal in ulal: «U kʼwajatak i lej yajchiknál». An epchal odhnanchat kʼal an volcán in kʼimáʼ axi itéj tin tsʼejkámal, pero dhubatkʼij pidhan jawaʼ in yéjenchal ani jayej tólmiyat abal ka tsapikméj in bélomtal. Ani xowéʼ in ulal: «Kʼakʼnámal a Jehová xowéʼ i kwaʼal jawaʼ i yéjenchal. I tʼajámal ti kwéntaj abal a Jehová tu lej tólmiyal ani tu pidhál jawaʼ i yéjenchal abal ki kuxuy an kʼibataláb axi i tametnál».

Ti Venezuela lej kʼibatchik kin elaʼ an tumín

In neʼdhálits yan i támub ti a Venezuela lej tsʼejwantal. Waʼats lej wéʼ i kʼapnél ani lej yanenek an pojkaxtaláb. Lej kʼibat jawaʼ in watʼál an epchalchik. Pero, yabchik ukʼchiyámej kʼal in bichówil a Jehová.

Ti watʼey támub pákuwat watʼadh 30 millones i tumín abal ka tsʼaʼiyat i kʼapnél ani i jabón, abal ka pidhan an epchalchik axi más in yéjenchal. An sucursal axi ti Venezuela in ulal: «Lej kʼibat ki neʼdhaʼ 130 i toneladas i kʼapnél ta ítsʼ tin puwél an bichow ani ki pidhaʼ an epchalchik». An epchalchik in abal i kʼapnél axi yab u dhubat odhel abal kin kuxuy. An sucursal in áynanchal kin uluw: «i tsʼaʼiyal yan i kʼapnél tam pel in kʼijíl, jayej tam kʼwajat más tsaʼat. Talbél i eyendhál jawaʼ más tsaʼat abal ki neʼdhaʼ an kʼapnél».

A Leonel pel jun i epchal axi u tólmix ban Comité de Socorro ti Venezuela. Jajáʼ in lej kulbetnál axéʼ xi tʼojláb. In ulal: «Abal nanáʼ lej exbadh ku tólmiy an epchalchik axi in watʼál jun i yajchiktaláb. Axéʼ tin lej tolmiyámal, kom u kʼimádhil dhaʼun kʼal an coronavirus ani tsemets. Antsanáʼ jayej in kʼwajíl tʼojlidh, ani u éjtowal ku tólmiy an epchalchik axi in yajchiknál. U tsuʼúmal jantʼiniʼ a Jehová in pútuwal in káwintal, yab in ukʼchiyal in bichówil».

Ki tʼajaʼ ti kwéntaj axi in ulal jun i epchal axi ti biyál u tólmixak ban comité de socorro: «Xowéʼ pelak nanáʼ axi u yéjenchal an tolmixtaláb. An epchalchik yab expidh tu pidhaʼ jawaʼ in yéjenchalak. Jayej tu kanatbédhaʼ ani tu tólmiychik abal yab ku lej tʼeʼpin».

An yajchiktaláb u watʼel tam yab i áychal. In bichówil a Jehová dhubatkʼij in áliyal ani in binál i tolmixtaláb. Kom tatáʼchik a binál i donaciones. A éjtowalchik kit otsits ti donate.jw.org abal ka exlaʼ jantʼiniʼ ka bínaʼchik i donaciones. ¡I lej kʼakʼnál an tumín axi a binálchik!