Ka jilaʼ abal a Jehová ti tólmiy, antsanáʼ jantʼiniʼ a Sansón

1, 2. ¿Jaleʼ ti lej exbadh ki exóbnaʼ jawaʼ in watʼaʼ a Sansón?

¿Jantʼoj a atsʼámal tin kwéntaj a Sansón? Jajáʼ pelak jun i inik axi lej tsapik, pero jun a kʼicháj ukʼpin ani in lej yajchiknaʼ. Belits antsanáʼ, a Jehová in tʼajaʼ abal ka jilkʼon dhuchadh abal pelak jun i inik axi in lej belaʼ kʼal a Jehová ani jaxtám i éjtowal ki exóbnaʼ yan jantʼoj tin kwéntaj a Sansón.

² A Jehová in eyendhaʼ a Sansón abal kin tólmiy in bichówil ani kin tʼajaʼ yan jantʼoj. Yan i támub talbél a Jehová in tʼajaʼ abal an abatwálej Pablo kin dhuchaʼ in bij a Sansón al jun i lista, tanáʼ waʼats más i bijláb in kʼál i atikláb axi in tejwamédhaʼ i belomtaláb (Heb. 11:​32-34). A Sansón in konchij i tolmixtaláb a Jehová tam ti más in tamétnaʼ i kʼibataláb. Tejéʼ neʼets ki tsuʼuw abal in tʼiplábil a Sansón tu lej kanatbedhál ani tu exóbchal yan jantʼoj.

A SANSÓN IN LEJ BELAʼ KʼAL A JEHOVÁ

3. ¿Jantʼoj tam tʼojláb bíjchin a Sansón abal kin tʼajaʼ?

³ Tam ti a Sansón waʼtsin an israelitas kʼwajatak ti lej odhnáb ani ti abatnáb kʼal an filisteos (Juec. 13:1). Jajáʼchik lej pojkaxak ani in tʼajálak abal an israelitas kin lej yajchiknaʼ. Jaxtám a Jehová in takuy a Sansón abal ka tujey kin kʼaniy an israelitas ani yabáts ka odhnáj kʼal an filisteos (Juec. 13:5). Nixéʼ pelak jun i tʼojláb lej kʼibat, kwaʼalak kin konchij i tolmixtaláb a Jehová.

4. ¿Jantʼiniʼ ti tólmiyat a Sansón kʼal a Jehová? (Jueces 15:​14-16).

⁴ Ki tsuʼuw jantʼiniʼ in tejwamédhaʼ a Sansón abal in lej belálak kʼal a Jehová. Jun a kʼicháj an soldados filisteos kʼalej in aliyal a Sansón ti Judá, kom in léʼakchik kin yakʼwaʼ. An atiklábchik axi u kʼwajilak ti Judá lej jikʼey ani in olnaʼ juʼtáj ti kʼwajatak a Sansón abal ka yakʼwan. Tam jajáʼchik in yakʼwaʼ a Sansón ani in wikʼaʼ kʼal tsab i tsʼáj abal kin nenchij an soldados filisteos (Juec. 15:​9-13). Pero a Jehová in pidhaʼ i tsapláb a Sansón, jaxtám in ejtow ka walkan. Tam, a Sansón in elaʼ jun i beklák in kʼál jun i burro ani kʼal nixéʼ in tsemdhaʼ mil i soldados filisteos (ka ajiy Jueces 15:​14-16).

5. ¿Jantʼiniʼ tin tejwamédhaʼ a Sansón abal in belálak kʼal a Jehová?

⁵ ¿Jaleʼ ti a Sansón in eyendhaʼ in beklák jun i burro abal ti pejex? Jajáʼ in exlálak abal jawaʼ más exbadh játs kin belaʼ kʼal a Jehová ani yab kʼal jawaʼ neʼetsak kin eyendhaʼ abal ti pejex. A Sansón in eyendhaʼ jawaʼ in kwaʼalak abal kin tʼajchij in kulbétal a Jehová. Jajáʼ in ejtow kin putuw kʼal an tʼojláb kom in belaʼ kʼal a Jehová.

6. ¿Jantʼoj más i éjtowal ki exóbnaʼ kʼal jawaʼ in tʼajaʼ a Sansón?

⁶ A Jehová in éjtowal tu ku pidhaʼ an tsapláb axi i yéjenchal abal ki putuw kʼal jun i tʼojláb axi ku bíjchin tin bichówil, belits max wawáʼ i tsalpayal abal yab neʼets ki ejtow ki tʼajaʼ. Jajáʼ in éjtowal tu ku tólmiy ani kin tʼajaʼ jantʼoj axi yabak jaykʼiʼ i tsalpayámal. Max tatáʼ ka jilaʼ abal a Jehová ti tólmiy, Jajáʼ neʼets ti pidhaʼ an tsapláb axi a yéjenchal abal ka putuw kʼal jawaʼ ti bijchámal, antsanáʼ jantʼiniʼ tin tʼajaʼ kʼal a Sansón (Prov. 16:3).

7. ¿Jantʼoj tam tʼiplab tu tejwamédhanchal abal lej exbadh ki jilaʼ abal a Jehová tu ku tólmiy?

⁷ Yan i epchal axi u tolmix abal ka tsʼejkáj i atáj juʼtáj ka kʼakʼnáj a Jehová, in tejwamedhál abal in lej belál kʼal a Jehová. In bichówil a Jehová in ujnámak kin tsʼejkaʼ patal an atáj tamkuntaláb axi i eyendhál abal ki kʼakʼnaʼ a Jehová. Pero, ¿jantʼoj tʼajnének xowéʼ? Jawaʼ kʼwajat ti tʼajnal játs abal u tsʼaʼyáb i atáj axi kʼwajatits tsʼejkadh ani expidh u tʼojojóyab. Axéʼ tʼajnének kom lej yánenek an epchalchik tin puwél an tsabál. An epchalchik axi in okʼnál an tʼojláb in tʼajámal ti kwéntaj abal játs jawaʼ a Jehová in léʼ abal ka tʼajan. A Robert lej tolmixnének kʼal axéʼ xi tʼojláb al yan i bichow, jajáʼ in ulal: «Ti kʼaʼál i atsʼaʼ kʼibat ki bélkaʼ axéʼ xi tsalap, kom al yan i támub pil jantʼiniʼ ti ujnámak ki tʼajaʼ an tʼojláb. Pero an epchalchik bélkaxin ani in tʼajaʼchik ti kwéntaj abal a Jehová kʼwajatak in lábliyal axéʼ xi tsalap abal ka tʼajan an tʼojláb». Axéʼ xi tʼiplab tu tejwamédhanchal abal a Jehová kʼwajat in okʼnál in bichówil abal kin putuw in tsalápil. Junchikíl wawáʼ jayej in tomnál ki konowiy ti kwetemtal: «¿U jilál abal a Jehová ti kin tólmiy ani u tsápnanchal ku jalkʼuy u tsalápil?».

A SANSÓN IN EYENDHAʼ AN TOLMIXTALÁB AXI PIDHAN KʼAL A JEHOVÁ

8. ¿Jantʼoj in tʼajaʼ a Sansón tam ti lej chikey?

⁸ Walám a tʼilál kʼeʼat jantʼoj axi in tʼajaʼ a Sansón. Jun a kʼicháj in tsemdhaʼ jun i tsój kʼal in kʼubak ani talbél in tsemdhaʼ treinta i inik filisteos axi u kʼwajilak ti Asquelón (Juec. 14:​5, 6, 19). A Sansón in exlálak abal max yab ka tólmiyat kʼal a Jehová yab neʼetsak kin ejtow kin putuw kʼal axéʼ xi tʼojláb. Talbél tin tsemdhámal mil i filisteos, a Sansón lej chikey. Tam, junílekʼij in aliy ka tólmiyat kʼal a Jehová. Yab in aliy an jáʼ tin kwetemtal, jajáʼ in konchij ka tolmiyat kʼal a Jehová (Juec. 15:18).

9. ¿Jantʼoj in tʼajaʼ a Jehová tam ti konchat i tolmixtaláb kʼal a Sansón? (Jueces 15:19).

⁹ ¿Jantʼoj in tʼajaʼ a Jehová abal kin tólmiy a Sansón? A Jehová in tʼajaʼ ka kalej i jáʼ al tsabál, tam ti a Sansón in utsʼaʼ «wichiy in tsap ani in atsʼaʼ más kanat» (ka ajiy Jueces 15:19). Axéʼ xi tsakam mom juʼtáj ti a Sansón in utsʼaʼ i jáʼ, belej kʼwajatak tam ti an kawlomej Samuel in dhuchaʼ an libro in kʼál a Jueces. Walám tam an israelitas kin tsuʼuw axéʼ xi mom, in tʼilálak abal max jajáʼchik jayej kin belaʼ kʼal a Jehová neʼetsak ka tólmiyat tam kin tamétnaʼ i kʼibataláb.

10. ¿Jantʼoj i yéjenchal ki tʼajaʼ abal a Jehová tu ku tólmiy? (Ka tsuʼuw jayej an imágenes).

¹⁰ Antsanáʼ jantʼiniʼ a Sansón, wawáʼ jayej i yéjenchal ki konchij a Jehová abal tu ku tólmiy, belits max u lej witʼadh o max biyálits i tʼójonchal a Jehová. Lej exbadh ki tʼilaʼ abal expidh neʼets ki ejtow ki putuw kʼal i uchbíl max ki koʼoy i tsaʼataláb ani max ki jilaʼ abal a Jehová tu ku tólmiy. A Sansón junílekʼij in koʼoy i tsapláb tam tin utsʼaʼ an jáʼ axi pidhan kʼal a Jehová. Wawáʼ jayej neʼets ki koʼoy tsapik i bélomtal max ki eyendhaʼ patal an tolmixtaláb axi a Jehová tu pidhámal (Mat. 11:28).

11. a) ¿Jantʼiniʼ neʼets ki tejwamédhaʼ abal i jilál abal a Jehová tu ku tólmiy? b) ¿Jantʼoj i exóbnal kʼal in tʼiplábil a Alexéi ani in kʼimádhil?

¹¹ Ki tsuʼuw in tʼiplábil an epchal Alexéi, jajáʼ u kʼwajíl ti Rusia. An epchalchik axi u kʼwajíl tanáʼ kʼwajat in tametnál i kʼibataláb kom u ayoknáb kʼal an eyalchik. ¿Kʼal jantʼoj ti tolmiyámej an epchal Alexéi abal kin koʼoy tsapik in bélomtal? Jajáʼ ani in kʼimádhil in tsapnanchámal ka kʼwajiy utat kʼal a Jehová. A Alexéi in ulal: «U kʼimádhil ani nanáʼ i kwaʼalakits bíjidh jaykʼiʼ ti neʼets ki ajiy an Biblia ani ki exóbnaʼ. Jayej i ajiyalak an texto diario ani i ólonchalak a Jehová junax». ¿Jantʼoj i exóbnal kʼal axéʼ xi tʼiplab? Kwaʼal ki konchij a Jehová tu ku tólmiy ani yab ki tʼajaʼ jantʼoj ti kwetemtal. Neʼets ki tejwamédhaʼ abal i jilál abal a Jehová tu ku tólmiy max ki ajiy chudhél an Biblia, max ki ólonchij, max ku kʼalej ti tamkuntaláb ani max ku kalej tu ólnom. Axéʼ neʼets kin tʼajaʼ abal a Jehová kin áynanchij tu ku lábliy ani tu ku tólmiy abal ki tʼojonchij. A Jehová in pidhaʼ i tsapláb a Sansón ani jayej neʼets tu ku pidhaʼ i tsapláb wawáʼ.

A SANSÓN YAB IN WALBAʼ TIN BAʼ

12. ¿Jaleʼ ti yab tekedh jawaʼ in takuy kin tʼajaʼ a Sansón?

¹² A Sansón junchikíl ukʼpin ani in tʼajaʼ jawaʼ yab tekedh. Jun a kʼicháj a Sansón in takuy kin tʼajaʼ jantʼoj axi yab tekedh, kom yab játs jawaʼ uchnének kin tʼajaʼ kʼal a Jehová. A Sansón pélakits i juez tam tin exlaʼ a Dalila, jun i mimláb axi u kʼwajilak ti Sorec (Juec. 16:4). Okʼxidh kin exlaʼ a Dalila, a Sansón in léʼak ka tomkin kʼal jun i mimláb axi ti filistea. Pero pel kʼal a Jehová ti tʼajan kin koʼoy nixéʼ xi tsalap kom kʼwajatak in aliyal jantʼiniʼ kin talabedhaʼ an filisteos. Talbél, a Sansón kʼalej ti Gaza ani jilkʼon tin kʼimáʼ jun i mimláb axi in nujuwal in iniktal. Nixéʼ xi akal a Jehová in pidhaʼ i tsapláb a Sansón abal kin jakaʼ an wiʼleb in kʼal an bichow ani antsanáʼ jitakits kin ejtow kin otsaʼ (Juec. 14:​1-4; 16:​1-3). Pero a Dalila walám pelak i israelita, jaxtám nixéʼ xi tomkintaláb yab neʼetsak ka eyan abal a Sansón kin putuw kʼal an tʼojláb axi pidhan kʼal a Jehová.

13. ¿Jantʼoj in tʼajaʼ a Dalila abal kin kʼambiy a Sansón?

¹³ A Dalila uchan kʼal an filisteos abal neʼetsak ka pidhan yan i plata ani i oro max kin kʼambiy a Sansón ani kin bínaʼ. Pero, ¿walám chubax yab in tʼajaʼ ti kwéntaj a Sansón abal u leʼnabak ka kʼámbiyat kʼal a Dalila? A Dalila yaníl in konoy a Sansón jaleʼ ti lej tsapik ani kom lej wílkʼidhits tu konoyáb, a Sansón in olnaʼ. Nixéʼ in tʼajaʼ abal a Sansón kin kʼibchij a Jehová, kin kʼibaʼ in tsap ani yabáts ka tólmiyat (Juec. 16:​16-20).

14. ¿Jantʼoj in watʼaʼ a Sansón kom in belaʼ kʼal a Dalila?

¹⁴ A Sansón in lej yajchiknaʼ kom in bélchij más jawaʼ uchan kʼal a Dalila, yakʼwan ani kʼanchat tsablom in wal. Talbél neʼdháj ti Gaza, an bichow axi jajáʼ in tíxkʼanchij an wiʼleb ani tanáʼ tʼojondháj ti tseʼel al jun i molino. Talbél an filisteos in tʼajaʼchik jun i ajib, in bínaʼ i tsʼakchixtaláb abal an dios Dagón kom in tsálpayalak abal kʼal jajáʼ ti tólmiyat abal kin yakʼwaʼchik a Sansón. In kaldhaʼchik a Sansón ti wikʼaxteʼ abal kin teʼchikiy ani kin tidhebédhaʼ (Juec. 16:​21-25).

15. ¿Jantʼiniʼ tin jilaʼ junílekʼij a Sansón abal ka tólmiyat kʼal a Jehová? (Jueces 16:​28-30; ka tsuʼuw an dibujo axi kʼwajat ban portada).

¹⁵ Belits abal a Sansón ukʼpin, yab in walbaʼ tin baʼ. Jajáʼ in léʼak kin áynanchij kin putuw kʼal an tʼojláb axi pidhan kʼal a Jehová, kin talabedhaʼ an filisteos (ka ajiy Jueces 16:​28-30). Jaxtám in lej konchij a Jehová axéʼ: «Ti kin tólmiy abal ku talabedhaʼ an filisteos». A Sansón atsʼanchat in olábil kʼal a Jehová ani wichbanchat in tsap. A Sansón in tsemdhámalits yan i filisteos, pero al nixéʼ a kʼicháj in tsemdhaʼ más yan.

16. ¿Jantʼoj i exobnál kʼal in tʼiplábil a Sansón?

¹⁶ A Sansón in lej yajchiknaʼ kom ukʼpin, pero belits antsanáʼ in tsápnanchij kin putuw kʼal an tʼojláb axi bijchinének kʼal a Jehová. Walám jun a kʼicháj wawáʼ jayej u ukʼpinének, i yejenchij ku boliyat ani ma walám i kʼibaʼ jun i uchbíl axi i kwaʼalak tin bichówil a Jehová, pero yab in tomnál ki walbaʼ ti baʼ. Yab ki ukʼchiy abal a Jehová etsʼey in léʼ tu ku pakwlanchij (Sal. 103:​8-10). Wawáʼ i éjtowal ki áynanchij ki tʼojonchij a Jehová belits max ku ukʼpin, antsanáʼ jantʼiniʼ tin tʼajaʼ a Sansón.

17, 18. ¿Jantʼiniʼ ti kanatbedhál in tʼiplábil a Miguel? (Ka tsuʼuw jayej an imágenes).

¹⁷ Ki tsuʼuw jawaʼ in watʼaʼ jun i epchal kwitól axi in bij Miguel.b Jajáʼ kʼwajatak in lej tʼójonchal a Jehová, pélakits i tolmix ókʼnom ani i precursor regular, pero ukʼpin ani in kʼibaʼ in uchbíl axi in kwaʼalak ti tamkuntaláb. Jajáʼ in ulal: «Kʼwajatak u lej tsápnanchal ku tʼojonchij a Jehová. U atsʼálak ejtíl max in neʼetsak tin adhil, pero jun dhúbatkʼij u tamánaʼ jun i baʼteʼ. U exlálak abal a Jehová yab neʼets ti kin walbaʼ, pero yab u exlálak max jun a kʼicháj neʼetsak ku ejtow ku tʼojonchij a Jehová antsanáʼ jantʼiniʼ ti biyál».

¹⁸ A Miguel yab in walbaʼ tin baʼ, jajáʼ in ulal jawaʼ in tʼajaʼ: «U tsápnanchij kin utey más kʼal a Jehová. U exobnálak an Biblia, u tsálpayalak kʼal jawaʼ u exobnál ani u ólonchalak a Jehová». Talbél a Miguel in koʼoy junílekʼij in uchbíl ti tamkuntaláb, xowéʼ pel i ókʼnom ani i precursor regular. A Miguel jayej in uluw axéʼ: «An ókʼnomchik tin lej kanatbédhaʼ ani tin tólmiy ku tʼajaʼ ti kwéntaj abal a Jehová belej tin kʼanidhál. U atsʼál koyat u tsalápil ani junílekʼij u éjtowal ku tʼojonchij kulbél a Jehová. Jawaʼ u watʼaʼ tin tólmiy ku tʼajaʼ ti kwéntaj abal a Jehová in éjtowal kin pakwlanchij in wálab jun i atikláb max chubax kin yajnaʼ jawaʼ in tʼajaʼ». Antsanáʼ jantʼiniʼ a Miguel, a Jehová neʼets kin áynanchij tu ku eyendhaʼ ani tu ku lábliy max ku tʼeʼpin kʼal i wálab ani ki jilaʼ ki tʼajaʼ jawaʼ yab tekedh (Sal. 86:5; Prov. 28:13).

19. ¿Jantʼiniʼ ti tolmiyámal in tʼiplábil a Sansón?

¹⁹ Al axéʼ xi exobintaláb expidh i tsuʼúmal talchik jantʼoj axi in tʼajaʼ a Sansón. Jajáʼ yab in walbaʼ tin baʼ belits abal ukʼpin, in áynanchij kin tʼojonchij a Jehová ani a Jehová in áynanchij kin eyendhaʼ a Sansón abal kin putuw jun i exbadh tʼojláb. A Jehová in tsalpay abal a Sansón pelak jun i inik axi in tejwamédhaʼ yan i belomtaláb, jaxtám in tʼajaʼ ka dhuchan in bij al jun i lista axi kʼwajat ban capítulo 11 in kʼál a Hebreos. Lej kulbél i atsʼál ki exlaʼ abal a Jehová yab tu walbál ani abal etsʼey kʼwajat utat abal tu ku tólmiy tam i tametnál jun i kʼibataláb. Jaxtám, wawáʼ jayej in lej tomnál ki konchij a Jehová axéʼ: «Jehová Dios, tu lej konchal abal yab ti kin ukʼchiy, ti kin tólmiy ani ti kin pidhaʼ i tsapláb» (Juec. 16:28).