Ki nitsʼbiy a Pedro, yab ki walbaʼ ti baʼ

1. ¿Jantʼoj in tʼajaʼ a Pedro tam tin tsuʼuw abal kalej lej yan i toʼol?

A PEDRO kʼwajinek patal akal in exál kin kaldhaʼ i toʼol, pero yab in kaldhámal nibal jun. Tam uchan kʼal a Jesús: «Ka béldhaʼ an tan juʼtáj ti lupudh an jáʼ ani ka petʼnaʼ an dhachumtaláb kʼal an toʼol» (Luc. 5:4). A Pedro yab in exlálak max neʼetsak kin ejtow kin kaldhaʼ i toʼol, pero bélkaxin. Otsits yan i toʼol ani ma tujey ka mitsʼkʼan an dhachumtaláb. A Pedro ani axi más an abatwálej in lej jikʼpaʼchik axéʼ, kom in tʼajaʼchik ti kwéntaj abal pelak jun i labidh tʼajbiláb. Tam a Pedro in uluw: «Ajátik kom pel in wálbidh inik yab u atsʼál max in tomnál kin chich ta tamét» (Luc. 5:​6-9). A Pedro in atsʼálak abal yab in tomnálak ka kʼwajiy utat kʼal a Jesús.

2. ¿Jaleʼ ti neʼets tu ku lej tólmiy in tʼiplábil a Pedro?

² Chubax jawaʼ in uluw a Pedro, pelak jun i inik axi wálbidh. An Biblia in ulal abal a Pedro yaníl ukʼpin, junchikíl in uluw o in tʼajaʼ jantʼoj axi yab tekedh. ¿A atsʼál tatáʼ ejtíl a Pedro? ¿Biyálits ta exál ka jilaʼ jantʼoj axi yab tekedh ani yab a ejtowamal? Yab ka walbaʼ ta baʼ, in tʼiplábil a Pedro neʼets ti lej tólmiy. Ka tsalpay kʼal axéʼ, a Jehová in éjtowalak kin tʼajaʼ abal yab ka dhuchan ti Biblia tam ti ukʼpin a Pedro, pero in tʼajaʼ abal ka jilkʼon dhuchadh kom in léʼ tu ku exóbchij yan jantʼoj (2 Tim. 3:​16, 17). Tam i exobnál patal jawaʼ in watʼaʼ a Pedro, i tʼajál ti kwéntaj abal yaníl ukʼpin ani abal pelak jun i inik axi in atsʼálak ejtíl wawáʼ. Axéʼ tu tólmiyal ki ejtiy abal a Jehová in exlál abal neʼets ku ukʼpin, pero jawaʼ in léʼ Jajáʼ játs abal yab ki walbaʼ ti báʼ, ki áynanchij ki tʼojonchij belits max ku ukʼpin.

3. ¿Jaleʼ ti lej exbadh yab ki walbaʼ ti baʼ?

³ ¿Jaleʼ ti lej exbadh yab ki walbaʼ ti báʼ? Kom antsanáʼ neʼets ki ejtow ki áynanchij ki tʼojonchij a Jehová. Ka tsalpay kʼal axéʼ, jun i atikláb axi kʼwajat ti exóbal ti tʼénel neʼets ka ukʼpin yaníl biyat u exóbal. Pero max yab kin walbaʼ tin baʼ, kʼayúm kʼayúm neʼets kin exóbnaʼ ani talbél yabáts neʼets ka lej ukʼpin. Jayetsej awil ka watʼey kʼal wawáʼ max kʼwajat i tsápnanchal ki jilaʼ ki tʼajaʼ jantʼoj axi kidháb, junchikíl neʼets ku wichʼkʼon, pero yab in tomnál ki walbaʼ ti baʼ. Patal u ukʼpinal ani junchikíl neʼets ki uluw o ki tʼajaʼ jantʼoj axi yab tekedh, pero max yab ki walbaʼ ti baʼ, a Jehová neʼets tu ku tólmiy abal ki jalkʼuy jantʼiniʼ i éy (1 Ped. 5:10). Antsanáʼ tin tʼajaʼ a Pedro ani in tʼiplábil in éjtowal tu ku lej tólmiy. Jajáʼ lej yajnanchat kʼal a Jesús belits abal ukʼpin, nixéʼ neʼets tu ku lej tólmiy wawáʼ jayej abal ki áynanchij ki tʼojonchij a Jehová.

¿JANTʼOJ IN ATSʼAʼ KʼIBAT A PEDRO ANI JANTʼOJ TAM LABLIXTALÁB IN BATSʼUW?

4. ¿Jantʼiniʼ tin atsʼálak a Pedro ani jantʼiniʼ ti kanatbedháj kʼal a Jesús? (Lucas 5:​5-10).

⁴ An Biblia yab tu ólchal jaleʼ tin uluw a Pedro abal pelak jun i inik axi kʼwajatak ti wálbinal ani yab tu ólchal max kʼwajatak in tʼajál jun i walabtaláb (ka ajiy Lucas 5:​5-10). Walám játs kom ukʼpinének o in tʼajámal jantʼoj axi yab tekedh. A Jesús in tʼajaʼ ti kwéntaj abal a Pedro u jikʼél ani walám játs kom a Pedro in tsálpayalak abal yab neʼets kin ejtow kin putuw kʼal in tʼojlábil. Pero a Jesús in tʼajaʼ ti kwéntaj abal a Pedro neʼetsak kin ejtow kin áynanchij kin tʼojonchij a Jehová, jaxtám in uchaʼ: «Yab kit jikʼey». A Pedro lej tólmiyat kʼal an kaw axi uchan kʼal a Jesús. Talbél a Pedro ani a Andrés in jílaʼchik an tʼojláb ti kaldhom toʼol ani in tsʼatʼénchij a Jesús. Jajáʼchik in batsʼuw yan i alwaʼtaláb kʼal jawaʼ in tákuy kin tʼajaʼ (Mar. 1:​16-18).

5. ¿Jantʼoj tam alwaʼtaláb in batsʼuw a Pedro kom yab in jilaʼ ka atáj kʼal jawaʼ in atsʼálak?

⁵ A Pedro in batsʼuw yan i alwaʼtaláb kom in tʼajaʼ ti aykol kʼal a Cristo. Jun i tʼiplab, in tsuʼuw tam ti a Jesús in tʼajaʼ i labidh tʼajbiláb, ejtíl in jeldhaʼ i yaʼul, in édhaʼ i tsemélom ani in tólmiy i atiklábchik axi kʼwajatak ti odhnáb kʼal i demonios (Mat. 8:​14-17; Mar. 5:​37, 41, 42).b Jayej, a Pedro in tsuʼuw tam ti a Jesús in tʼipoy jantʼiniʼ ti neʼets ti ábatnom tiwaʼ ti eb (Mar. 9:​1-8; 2 Ped. 1:​16-18). A Pedro in ejtow kin tsuʼuw patal axéʼ xi alwaʼtaláb kom yab in walbaʼ tin baʼ. Lej alwaʼ abal a Pedro yab in jilaʼ ka atáj kʼal jawaʼ in atsʼálak.

6. ¿In atsʼaʼ kʼibat a Pedro kin jalkʼuy in ey?

⁶ Belits abal a Pedro in tsuʼuw yan i alwaʼtaláb axi in tʼajaʼ a Jesús, koʼoy kin tsápnanchij abal yab ka atáj kʼal jawaʼ in atsʼál. Ki tsuʼuw talchik i tʼiplab. Tam ti a Jesús in olnaʼ abal kwaʼalak kin yajchiknaʼ ani ka tsemets abal ka putun an kʼej kaw axi kʼwajat ban dhuchlab, kʼwiyan kʼal a Pedro (Mar. 8:​31-33). Jayej, a Pedro yaníl kʼwajiy ti tokʼtsíx kʼal axi más an abatwálej kom in léʼakchik kin exlaʼ jitaʼ játs axi más exbadh (Mar. 9:​33, 34). Tam ti neʼtsakits ka yakʼwan a Jesús abal ka neʼdháj tin tamét an eyalchik, a Pedro in mutsʼkʼinchij in xutsun jun i inik (Juan 18:10). Ani tam ti más akal, a Pedro in uluw oxíl i kalel abal yab in exlál a Jesús, kom u jikʼélak (Mar. 14:​66-72). Talbél a Pedro in lej yajnaʼ jawaʼ in uluw ani kalpan ti ukʼnal (Mat. 26:75).

7. Talbél ti edháj a Jesús, ¿jantʼoj tam tʼojláb in pidhaʼ a Pedro?

⁷ A Jesús yab in uluw abal yabáts neʼets kin eyendhaʼ a Pedro. Talbél ti edháj a Jesús in pidhaʼ jun i exbadh tʼojláb a Pedro, kin tólmiy an epchalchik (Juan 21:​15-17). A Pedro in batsʼuw kʼal yan i kulbetaláb axéʼ xi tʼojláb, jaxtám kʼalej ti Jerusalén ban ajib in kʼal an Pentecostés. Jajáʼ kʼwajat ajidh kʼal an epchalchik axi takuyat kʼal an espíritu santo nixéʼ a kʼicháj.

8. ¿Jantʼoj in tʼajaʼ a Pedro ti Antioquía?

⁸ A Pedro kʼwájatakits takudh abal ka kʼalej ti éb, pero belits antsanáʼ kwaʼalak kin lej tsápnanchij abal kin tʼajaʼ jawaʼ tekedh. Ban támub 36 a Pedro in tsuʼuw abal kʼwajatak ti takuyáb kʼal an espíritu santo jun i inik axi in bij Cornelio, ani jajáʼ yab pelak i judío. Kʼal axéʼ, a Pedro in tʼajaʼ ti kwéntaj abal a Jehová yab in kʼeʼatnál nibal jun i bichow ani abal patal an atikláb in éjtowal ka utey tin bichówil a Dios (Hech. 10:​34, 44, 45). Tanáʼ abal okʼox Pedro yabáts in atsʼaʼ kʼibat ka kʼapúts kʼal i atiklábchik axi yab pelak i judíos (Gál. 2:12). Pero waʼatsak talchik i epchal judíos axi in tsálpayalak abal jajáʼchik yab in tomnálak ka kʼapúts kʼal i atikláb axi talak al pil i bichow. Jun i kʼicháj, ulits ti Antioquía talchik i epchal u tsalpaxak antsanáʼ. Tam a Pedro yabáts kʼapúts kʼal an epchalchik axi talak al pil i bichow. A Pablo in tʼajaʼ ti kwéntaj abal a Pedro in tʼajaʼ antsanáʼ ani jaxtám in kʼwiyaʼ tin tamét an epchalchik (Gál. 2:​13, 14). Belits abal a Pedro ukʼpin, yab in walbaʼ tin baʼ. ¿Kʼal jantʼoj ti tólmiyat abal kin áynanchij kin tʼojonchij a Jehová ani yab kin walbaʼ tin baʼ?

¿KʼAL JANTʼOJ TI TÓLMIYAT A PEDRO ABAL YAB KIN WALBAʼ TIN BAʼ?

9. Kʼal jawaʼ in ulal Juan 6:​68, 69, ¿jantʼiniʼ tin tejwamédhaʼ a Pedro abal pelak jun i inik axi putudh?

⁹ A Pedro etsʼey kʼwajiy putudh kʼal a Jehová ani yab jaykʼiʼ tin jilaʼ kin aynaʼ a Jesús. Jun i tʼiplab, jun a kʼicháj a Jesús in uluw jantʼoj axi a Pedro ani axi más an aykol yab in exbay, belits antsanáʼ a Pedro yab owméj kʼal a Jesús (ka ajiy Juan 6:​68, 69). Yan i atikláb in jílkakay a Jesús ani yab in aychij ka wilkʼanchat jawaʼ in léʼak kin uluw, nibal uteychik kʼal a Jesús abal kin konoy jawaʼ yab in exbay, pero a Pedro yab in tʼajaʼ antsanáʼ. Jajáʼ in uluw tin tamét axi más an aykol abal expidh a Jesús in éjtowal kin olnaʼ i kaw axi in binál i ejataláb abal etsʼey.

10. ¿Jantʼiniʼ tin tejwamédhaʼ a Jesús abal in belálak kʼal a Pedro? (Ka tsuʼuw jayej an imagen).

¹⁰ A Jesús yab jaykʼiʼ in walbaʼ a Pedro. An akal tam ti yakʼwan a Jesús abal ka tsemdháj, jajáʼ in exlálakits abal neʼets ka jílkakiyat kʼal a Pedro ani kʼal axi más an abatwálejchik. Pero a Jesús in exlálak abal a Pedro neʼets kin lujkuw in tsalápil ani neʼets kin áynanchij kin tʼojonchij a Jehová (Luc. 22:​31, 32). A Jesús jayej in exlál abal wawáʼ i léʼ ki tʼajaʼ jawaʼ tekedh, pero junchikíl neʼets ki atsʼaʼ kʼibat (Mar. 14:38). Jaxtám in áynanchij kin eyendhaʼ a Pedro belits abal oxíl in uluw abal yab u exlábak. Talbél ti edháj a Jesús, tejwaméj kʼal a Pedro walám tam ti kʼwajatak kwetém (Mar. 16:7; Luc. 24:34; 1 Cor. 15:5). Walám kʼal axéʼ ti tólmiyat abal kin atsʼaʼ más kanat a Pedro ani abal yab kin walbaʼ tin baʼ.

11. ¿Jantʼiniʼ ti tejwamédhanchat a Pedro kʼal a Jesús abal etsʼey neʼets ka beletnáj kʼal a Jehová?

¹¹ A Jesús in tʼilchij a Pedro abal etsʼey neʼetsak ka beletnáj kʼal a Jehová. Talbél ti edháj, a Jesús junílekʼij in tʼajaʼ abal a Pedro ani axi más an abatwálej kin kaldhaʼ yan i toʼol (Juan 21:​4-6). Axéʼ xi labidh tʼajbiláb eyan abal a Pedro kin belaʼ abal kʼal a Jehová neʼetsak ka pidhan patal jawaʼ kin yejenchij. Walám a Pedro jayej in tʼilaʼ an kaw axi a Jesús in ulúmalits, abal a Jehová neʼets kin alwaʼ béletnaʼ patal kʼal jitaʼ ka tʼójonchat (Mat. 6:33). Tam ti a Pedro in exlaʼ axéʼ in pidhaʼ más in exbadh an olnomtaláb. Jaxtám ban ajib in kʼal an Pentecostés axi ban támub 33, a Pedro in bínaʼ jun i tʼilomtaláb axi in tʼajaʼ abal yan i atikláb kin batsʼuw an alwaʼ kaw (Hech. 2:​14, 37-41). Ani talbél in tólmiy yan i samaritanos ani i atiklábchik axi tal al pil i bichow abal ka wenkʼon ti aykol kʼal a Cristo (Hech. 8:​14-17; 10:​44-48). Axéʼ xi tʼiplabchik in tejwamedhál abal a Jehová in lej eyendhaʼ a Pedro abal kin utuw más i atikláb ban tamkuntaláb.

¿JANTʼOJ I EXOBNÁL KʼAL IN TʼIPLÁBIL A PEDRO?

12. ¿Jantʼiniʼ tu tólmiyal in tʼiplábil a Pedro max biyálits i tsápnanchal ki jilaʼ ki tʼajaʼ jantʼoj axi yab tekedh?

¹² A Jehová jayej neʼets tu ku tólmiy wawáʼ abal yab ki walbaʼ ti baʼ. Junchikíl neʼets ki atsʼaʼ abal i léʼits ki walbaʼ ti baʼ, kom walám biyálits ti kʼwajat i tsápnanchal ki jilaʼ ki tʼajaʼ jantʼoj axi yab tekedh. Walám i tsalpayal abal an kʼibataláb axi wawáʼ i tametnál lej júnits kʼal axi in koʼoy a Pedro ani abal más kʼibat jawaʼ i tametnál wawáʼ. Belits antsanáʼ, a Jehová neʼets tu ku tólmiy abal yab ki walbaʼ ti baʼ (Sal. 94:​17-19). Ki tsuʼuw in tʼiplábil in kʼal jun i epchal inik. Tam ti yabaye in exlálak tin kwéntaj a Jehová, jajáʼ in ujnámak kin xeʼtsindhaʼ in at inik ani in tʼajaʼ al yan i támub. Tam tin exlaʼ a Jehová in jilaʼ kin tʼajaʼ nixéʼ, pero junchikíl in atsʼálak abal in léʼak ka wichiy kin tʼajaʼ. ¿Kʼal jantʼoj ti tólmiyat abal yab kin walbaʼ tin baʼ? An epchal in ulal: «A Jehová játs axi tu pidhál i tsapláb». Jayej in ulal: «A Jehová tin tólmiyamal kʼal an espíritu santo abal ku áynanchij ku tʼajaʼ jawaʼ tekedh. Jajáʼ tin tólmiyal ku áynanchij ku tʼojonchij belits abal in ukʼpinének».

13. ¿Jantʼiniʼ i éjtowal ki nitsʼbiy a Pedro? (Hechos 4:​13, 29, 31; ka tsuʼuw jayej an imagen).

¹³ A Pedro yaníl jikʼey, pero in ólonchij a Jehová ani jaxtám in koʼoy i iniktaláb ani yab in walbaʼ tin baʼ (ka ajiy Hechos 4:​13, 29, 31). Wawáʼ jayej neʼets ki ejtow ki áynanchij ki tʼajaʼ jawaʼ tekedh, belits abal junchikíl u jikʼél. Ki tsuʼuw jawaʼ in watʼaʼ an epchal Horst tam ti tsakamej. Jajáʼ kʼwajiy ti Alemania tam ti exomak an Segunda Guerra Mundial. Al nixéʼ an kʼij tam an atikláb u tsapnedháx, kwaʼalakchik kin uluw: «A Hitler neʼets tu ku kʼaniy». A Horst in exlálak abal yab tekedh kin uluw nixéʼ, pero kom in tsʼejnálak an maestros ani in juntal exóbal, yaníl in uluw. A Horst yab kʼwiyan kʼal in papá nibal kʼal in mamá, jawaʼ in tʼajaʼchik játs ka kónchinchat kʼal a Jehová abal ka pidhan i iniktaláb. An tolmixtaláb axi pidhan kʼal in tátachik ani kʼal a Jehová eyan abal a Horst yab kin walbaʼ tin baʼ ani kin áynanchij kin tʼojonchij a Jehová. Talbél a Horst in uluw: «A Jehová yab jaykʼiʼ tin jilaʼ».c

14. ¿Jantʼoj in éjtowal kin tʼajaʼ an ókʼnomchik abal kin tólmiy jun i epchal axi in atsʼál abal neʼets kin walbaʼits tin baʼ?

¹⁴ A Jehová ani a Jesús yab jaykʼiʼ neʼets tu ku jílkakay. Talbél ti ukʼpinének ani in uluw abal yab in exlál a Jesús, a Pedro koʼoy kin takuy max neʼetsak kin walbaʼ tin baʼ o neʼetsak kin áynanchij jantʼiniʼ i aykol kʼal a Cristo. A Jesús in konchamalits a Jehová abal kin tólmiy a Pedro abal yab ka tsaʼkan in bélomtal. Talbél, a Jesús in uchaʼ a Pedro abal in konchámalits a Jehová abal ka tólmiyat ani abal in lej belálak abal jajáʼ neʼetsak kin ejtow kin kanatbédhaʼ an epchalchik (Luc. 22:​31, 32). A Pedro in atsʼaʼ lej kanat tam tin tʼilaʼ an kaw axi uchan kʼal a Jesús. Wawáʼ jayej kwaʼal ki takuy yan jantʼoj ti ejatal, pero a Jehová in éjtowal kin eyendhaʼ jun i ókʼnom abal tu ku kanatbédhaʼ abal ki áynanchij ki tʼojonchij (Efes. 4:​8, 11). Jun i epchal axi in bij Pablo,d in neʼdhálits yan i támub tin tʼójonchal a Jehová jantʼiniʼ i ókʼnom ani jajáʼ in lej tsapnanchámal kin kanatbédhaʼ an epchalchik. Tam in tsuʼtal abal jun i epchal in walbálits tin baʼ, in uchál abal kin tʼilaʼ jantʼiniʼ ti tolmiyámej kʼal a Jehová abal ka utey tin bichówil. Jayej in uchál abal kʼal a Jehová u lej kʼanidháb ani jaxtám yab jaykʼiʼ neʼets ka jilan. Axéʼ xi ókʼnom in tsuʼúmal jantʼiniʼ a Jehová in tolmiyámal yan i epchal abal yab kin walbaʼ tin baʼ.

15. ¿Jantʼiniʼ tin tejwamedhál in tʼiplábil a Pedro ani in kʼal an epchal Horst abal a Jehová etsʼey in putuwal jawaʼ in ulal Mateo 6:33?

¹⁵ I exóbnaʼits abal a Jehová in tólmiy a Pedro ani axi más an abatwálej abal kin koʼoy jawaʼ más in yéjenchal. Jayetsej neʼets kin tʼajaʼ kʼal wawáʼ max ki pidhaʼ más in exbadh an kʼakʼnaxtaláb axi i pidhál a Jehová (Mat. 6:33). Ki tʼilaʼ junílekʼij an epchal Horst, tam ti taley an Segunda Guerra Mundial, jajáʼ in léʼak kin tʼajaʼ ti precursor. Pero kom lej tsʼejwantál jajáʼ in tsálpayalak abal yab neʼets kin ejtow kin elaʼ jawaʼ kin yéjenchij. ¿Jantʼoj in tʼajaʼ a Horst? Tam ti an ókʼnom kʼal an circuito in tsaʼbiy an tamkuntaláb, jajáʼ kalej ti ólnom nakel semana kom in léʼak kin tʼajaʼ ti kwéntaj max chubax neʼetsak ka béletnaʼ kʼal a Jehová. Tam ti taley an semana, an ókʼnom kʼal an circuito utey kʼal a Horst ani in pidhaʼ jun i sobre juʼtáj ti talak jun i tolmixtaláb axi in bínaʼ jun i epchal. A Horst in lej jikʼpaʼ nixéʼ, kʼal nixéʼ xi tumín neʼetsak kin ejtow kin tʼójonchij a Jehová jantʼiniʼ i precursor al jayits a ítsʼ. A Horst in tʼajaʼ ti kwéntaj abal nixéʼ xi tolmixtaláb pidhan kʼal a Jehová ani abal neʼets ka aynanchat ka beletnáj. Ma ti nixéʼ a kʼicháj a Horst in aynanchámal kin tʼojonchij más a Jehová (Mal. 3:10).

16. ¿Jaleʼ ti lej exbadh ki exóbnaʼ in tʼiplábil an abatwálej Pedro ani tsablom an cartas axi in dhuchaʼ?

¹⁶ A Pedro in atsʼaʼ lej kulbél kom yab walbáj kʼal a Jesús tam tin uluw abal yab in tomnál ka kʼwajiy tin tamét, kom pelak jun i inik waláblom. A Jesús in áynanchij kin tólmiy a Pedro abal kin putuw alwaʼ kʼal in uchbíl ti abatwálej ani abal kin kanatbédhaʼ an epchalchik kʼal in tʼiplábil. Wawáʼ i exobnál yan jantʼoj kʼal an exobchixtaláb axi pidhan a Pedro. Talchik kʼal axéʼ xi exobintaláb kʼwajat dhuchadh al tsablom an cartas axi in dhuchaʼ an abatwálej Pedro ani in abchij an tamkuntalábchik axi ti kʼaʼál siglo. Axi taʼtal an semana neʼets ki tsuʼuw talchik kʼal axéʼ xi exobintaláb axi an abatwálej Pedro in dhuchaʼ al tsablom an cartas ani neʼets ki tsuʼuw jantʼiniʼ i éjtowal ki eyendhaʼ.