«Ka eyendhaʼ ta ejatal jawaʼ a exobnámal ti Biblia»

1, 2. ¿Jaleʼ tin tʼojnálilchik a Jehová in atsʼál kulbél? (Santiago 1:​22-25).

A JEHOVÁ ani a Jesús in léʼ abal ku kʼwajiy kulbél. Jats jawaʼ in tejwamedhál an kaw axi kʼwajat ti Salmo 119:2: «Neʼets ka lej kulbéj jitaʼ in belkál a káwintal ani jitaʼ in aliyal kʼal patal in ichích». A Jesús jayej in uluw: «Axi kin atsʼanchij ani kin putuw in káwintal a Dios jats axi lej kulbél» (Luc. 11:28).

² Patal axi i tʼójonchal a Jehová i atsʼál lej kulbél. Jun i tʼiplab, i atsʼál u kulbél tam ki ajiy an Biblia ani ki eyendhaʼ ti ejatal jawaʼ i exobnál (ka ajiy Santiago 1:​22-25).

3. ¿Jantʼoj tam alwaʼtaláb i bátsʼuwal max ki eyendhaʼ ti ejatal jawaʼ i exobnál ti Biblia?

³ ¿Jantʼoj tam alwaʼtaláb i bátsʼuwal tam i eyendhál ti ejatal jawaʼ i exobnál ti Biblia? Jun i tʼiplab, i kulbedhál a Jehová ani jayej in tʼajál abal wawáʼ ki atsʼaʼ kulbél (Ecl. 12:13). Jayej tu tólmiyal abal ku neʼdhaxin alwaʼ kʼal i yanél ani kʼal an epchalchik axi ti tamkuntaláb. Tatáʼ walám jayej a tʼajámal ti kwéntaj nixéʼ. Jayej tu tólmiyal abal yab ki lej yajchiknaʼ jantʼiniʼ an atiklábchik axi yab in exlál a Jehová. Játs jawaʼ in uluw an tsʼalej David al jun i ajatláb. Jajáʼ in uluw: «Jitaʼ kin bélkaʼ jawaʼ in ulal a Jehová neʼets kin batsʼuw yan i alwaʼtaláb» (Sal. 19:​7-11).

4. ¿Jaleʼ ti junchikíl neʼets ki atsʼaʼ kʼibat ki eyendhaʼ ti ejatal jawaʼ i exobnál ti Biblia?

⁴ Junchikíl i atsʼál kʼibat ki punuw ti tʼajbiláb jawaʼ i exobnál ti Biblia. Belits abal u kʼwajat lej tʼojlidh, kwaʼal ki jolkʼaʼ i kʼij abal ki ajiy ani ki exóbnaʼ an Biblia ani antsanáʼ neʼets ki exlaʼ jantʼoj in léʼ a Jehová abal ki tʼajaʼ ti ejatal. Al axéʼ xi exobintaláb neʼets ki tsuʼuw talchik i tsalap axi neʼets tu ku tólmiy ki ajiy an Biblia chudhél chudhél. Jayej neʼets tu ku tólmiy abal ki tsalpay kʼal jawaʼ kʼwajat i ajiyal ani jantʼiniʼ ki eyendhaʼ ti ejatal jawaʼ kʼwajat i exobnál.

KA JOLKʼAʼ I KʼIJ ABAL KA AJIY AN BIBLIA

5. ¿Jantʼoj in tʼajál abal ku kʼwajiy lej tʼojlidh?

⁵ Patal axi i tʼójonchal a Jehová u kʼwajat lej tʼojlidh kʼal i tʼojláb axi lej exbadh. Walám kwaʼal ku tʼójon abal ki pidhaʼ i yanél jawaʼ in yéjenchal (1 Tim. 5:8). Talchik i epchal in kwaʼal jun in yanél axi u yaʼul ani kwaʼal kin béletnaʼ. Ani wawáʼ jayej kwaʼal ki béletnaʼ i ejatal abal yab ku yawʼláts. Jayej ti tamkuntaláb i kwaʼal yan i tʼojláb, ejtíl ku kalej tu ólnom. Jaxtám walám a konowiyal ta baʼ: «¿Jantʼoj u éjtowal ku tʼajaʼ abal ku ajiy an Biblia chudhél chudhél, abal ku tsalpay kʼal jawaʼ u ajiyal ani ku eyendhaʼ tu ejatal?».

6. ¿Jantʼoj u éjtowal ku tʼajaʼ abal ku áynanchij ku ajiy an Biblia chudhél chudhél? (Ka tsuʼuw jayej an imagen).

⁶ Jawaʼ más exbadh abal patal jitaʼ i tʼójonchal a Jehová, jats ki ajiy an Biblia (Filip. 1:10). Ban kʼaʼál capítulo in kʼál an Salmos in ulal abal «neʼets kin atsʼaʼ lej kulbél jitaʼ in kulbetnál kin ajchij in káwintal a Dios chudhél chudhél, ani in tsalpayal jawaʼ in ajiyal» (Sal. 1:​1, 2). Axéʼ tu tejwamédhanchal abal lej exbadh ki ajiy chudhél chudhél an Biblia. Pero, ¿al jawaʼ tam hora in tomnál ki ajiy? Expidh tatáʼ a exlál jawaʼ tam hora más i jolat. Lej alwaʼ ka koʼoy bíjidh jun i hora kom nixéʼ neʼets ti tólmiy abal ka ejtow ka ajiy chudhél chudhél an Biblia. An epchal Víctor tu ólchal jantʼoj in tʼajál jajáʼ: «Nanáʼ u kulbetnál ku ajiy an Biblia tam dhajuwej. Yab u lej kulbetnál kin dhajuwméj, pero u tʼajámal ti kwéntaj abal nixéʼ xi hora yabaye in kʼwajat tin lej tsalpax ani u éxbayal alwaʼ jawaʼ u ajiyal». ¿A tsalpayal tatáʼ jayej jantʼiniʼ a Víctor? Ka konowiy ta báʼ: «¿Jawaʼ tam hora u éjtowal ku jolkʼaʼ abal ku ajiy an Biblia?».

KA TSALPAY KʼAL JAWAʼ KʼWAJAT A AJIYAL

7, 8. Ka olnaʼ kʼal jun i tʼiplab jantʼoj yan in tomnál ki tʼajaʼ tam i ajiyal an Biblia.

⁷ Max a kwaʼalits bíjidh jun i hora abal ka ajiy an Biblia, yab ka ajiy yan, kom walám talbél yab neʼets ka tʼilaʼ ni jantʼoj. Walám tatáʼ a tʼajámal ti kwéntaj abal chudhél chudhél i ajiyal yan jantʼoj, pero talbél yabáts i tʼilál jawaʼ i ajiy. Yab i léʼ ki watʼaʼ axéʼ tam i ajiyal an Biblia. Walám i kwaʼalits bíjidh jay i capítulo neʼets ki ajiy al a kʼicháj ani axéʼ lej alwaʼ kom etsʼey u uchnének ki punuw i ayláb ani ki tsápnanchij ki putuw (1 Cor. 9:26). Lej alwaʼ max a tujchíts ka ajiy an Biblia, pero max a léʼ ka batsʼuw más i alwaʼtaláb in yéjenchal ka tʼajaʼ kʼeʼat jantʼoj.

⁸ Ki tsuʼuw jun i tʼiplab. An tʼayabláb in yéjenchal i ab, pero max ka ulits lej tsapik, neʼets ka ukʼtsin an tʼayabláb ani yab neʼets ka tolminchat. Pero max an ab ka ulits kʼayúm kʼayúm, an tsabál neʼets kin ejtow kin utsʼnaʼ an jáʼ ani an tʼayabláb neʼets kin ejtow ka púwey. Jayetsej in tomnál ki tʼajaʼ tam ki ajiy an Biblia, yab ki ajiy lej dhubat kom walám yabáts ku jolkʼan abal ki tsalpay kʼal jawaʼ i ajiy, nibal neʼets ki exlaʼ jantʼiniʼ ki eyendhaʼ ti ejatal (Sant. 1:24).

9. ¿Jantʼoj i éjtowal ki tʼajaʼ max i ujnám tu ajum lej adhik?

⁹ ¿Jantʼoj a éjtowal ka tʼajaʼ max ka tsuʼuw abal kʼwajat a ajiyal lej adhik an Biblia? Ka tsápnanchij ka ajiy más kʼayúm ani ka tsalpay kʼal jawaʼ a ajiyal. ¿Jantʼiniʼ a éjtowal ka tʼajaʼ nixéʼ? A éjtowal ka ajiy expidh wéʼ i minutos an Biblia ani axi más an kʼij ka eyendhaʼ abal ka tsalpay kʼal jawaʼ a ajiyal. Kʼeʼat jantʼoj axi a éjtowal ka tʼajaʼ pel ka ajiy wéʼ i versículos ani ka jilaʼ i kʼij abal ka tsalpay kʼal jawaʼ a ajiyal. Ban párrafo 6 u kawin tin kwéntaj a Víctor, jajáʼ in ulal: «U tsápnanchal yab kin ajumáts yan, expidh u ajiyal jun i capítulo. Ani kom u ujnám tin ajum dhajuw, tin naktal a kʼicháj u tsápnanchal ku tsalpay kʼal jawaʼ u ajiy». Jawaʼ más exbadh tam u ajum, játs ki exbay jawaʼ i ajiyal ani ki eyendhaʼ ti ejatal (Sal. 119:97; ka tsuʼuw an recuadro «Konowixtalábchik axi neʼets ti tólmiy ka exbay jawaʼ a ajiyal»).

10. Ka olnaʼ kʼal jun i tʼiplab jantʼoj i éjtowal ki tʼajaʼ abal ki eyendhaʼ ti ejatal jawaʼ i exobnál (1 Tesalonicenses 5:​17, 18).

¹⁰ Tatáʼ a éjtowal ka takuy jaykʼiʼ ti neʼets ka ajiy an Biblia ani jay i pejach neʼets ka ajiy, pero jawaʼ más exbadh jats ka tsalpay kʼal jawaʼ kʼwajat a exobnál ani ka eyendhaʼ ta ejatal. Biyat kʼwajat ti ajum a éjtowal ka tsalpay kʼal axéʼ xi konowixtaláb: «¿Jantʼiniʼ u éjtowal ku eyendhaʼ axéʼ xi pejach xowéʼ o axi taʼtal a kʼicháj?». Ka tsalpay abal tatáʼ a ajiy 1 Tesalonicenses 5:​17, 18 (ka ajiy). Xowéʼ ka tsalpay kʼal an oláb axi a tʼajchal a Jehová. ¿A ólchal patal jawaʼ a atsʼál? ¿Jayil a ólonchal? ¿Jantʼoj játs axi a kʼákʼnanchal a Jehová? Walám ka tʼilaʼ ox jantʼoj axi a léʼ ka kʼákʼnanchij. Max ka jilaʼ wéʼ i kʼij abal ka tsalpay kʼal jawaʼ a ajiyal neʼets ka jilaʼ abal a Jehová ti béldhanchij a ejatal ani yab neʼets ka atsʼaʼ kʼibat ka punuw ti tʼajbiláb. Max chudhél chudhél ka eyendhaʼ ta ejatal jawaʼ a exobnál ti Biblia, neʼets ka jalkʼuy jantʼiniʼ a ey ani neʼets ka atsʼaʼ más kulbél. Pero, ¿jantʼoj neʼets ka tʼajaʼ max lej yan jawaʼ kwaʼal ka jalkʼuy ta ejatal?

KA PUNUW I AYLÁB AXI NEʼETS KA BAJUW

11. ¿Jaleʼ ti walám junchikíl neʼets ku wéʼ tʼeʼpin tam ki ajiy an Biblia? Ka olnaʼ jun i tʼiplab.

¹¹ Tam ka ajiy an Biblia ani ka tsuʼuw abal lej yan jawaʼ a yéjenchal ka jalkʼuy, walám kit tʼeʼpin ani ka tsalpay abal yab neʼets ka ejtow ka tʼajaʼ. Ki tsalpay kʼal axéʼ xi tʼiplab, walám a ajiy jun i pejach juʼtáj tin ulal abal yab kwaʼal ki pokʼodh tsuʼuw an atiklábchik (Sant. 2:​1-8). Tam, a tʼajál ti kwéntaj abal a yéjenchal ka jalkʼuy jantʼiniʼ a ey kʼal an atiklábchik ani a tsápnanchal ka tʼajaʼ. Kʼeʼat a kʼicháj a ajiyal jun i pejach juʼtáj tin ulal abal ki lej tʼajaʼ ti kwéntaj jantʼiniʼ u kaw (Sant. 3:​1-12). Nixéʼ in tʼajaʼ ka tʼilaʼ abal jun a kʼicháj a odhnaʼ jun i epchal kʼal a káwintal, xowéʼ a tsápnanchal ka tʼajaʼ ti kwéntaj jantʼiniʼ i kaw abal yabáts ka odhnaʼ axi más. Al kʼeʼat a kʼicháj a ajiyal abal yab kwaʼal kit tsálpaxin jantʼiniʼ an atiklábchik axi yab in kʼakʼnál a Jehová (Sant. 4:​4-12). Nixéʼ ti tólmiyal ka lej tʼajaʼ ti kwéntaj an películas axi a tsuʼtal. Talbél ta tsalpayámal kʼal jawaʼ a ajiy walám ka atsʼaʼ abal lej yan jawaʼ kwaʼal ka jalkʼuy ani walám i wéʼ tʼeʼpinal.

12. ¿Jaleʼ ti yab in tomnál ku lej tʼeʼpin max ki tʼajaʼ ti kwéntaj abal in yéjenchal ki jalkʼuy yan jantʼoj ti ejatal? (Ka tsuʼuw jayej an nota).

¹² Max ka tsuʼuw abal kwaʼal ka jalkʼuy jantʼoj ta ejatal yab kit tʼeʼpin, nixéʼ in tejwamedhál abal a kwaʼal i tsaʼataláb ani abal a léʼ abal an Biblia ti béldhanchij a ejatal.a Jayej lej exbadh ka tʼilaʼ abal yab dhubat neʼets ka ejtow ka jalkʼuy jantʼiniʼ a ey (Col. 3:10). ¿Jantʼoj neʼets ti tólmiy abal ka eyendhaʼ ta ejatal jawaʼ a exobnál ti Biblia?

13. ¿Jantʼoj a éjtowal ka tʼajaʼ abal ka eyendhaʼ ta ejatal jawaʼ a exobnámal? (Ka tsuʼuw jayej an imágenes).

¹³ Jantʼoj axi neʼets ti lej tólmiy, jats ka tejwamédhaʼ i tsaʼataláb ani ka exbay abal yab patal neʼets ka ejtow ka tʼajaʼ jun dhúbatkʼij (Prov. 11:2). Kʼeʼat jantʼoj axi neʼets ti tólmiy jats ka tsʼejkaʼ jun i lista kʼal jawaʼ a léʼ ka tʼajaʼ, ka takuy tsab ani axi kʼeʼat ka jilaʼ abal talbél. Pero, ¿jawaʼ tam ayláb axi a kwaʼal ban lista a tsálpayal abal in tomnál ka tʼajaʼ okʼox?

14. ¿Kʼal jawaʼ tam ayláb i éjtowal ki tujchij?

¹⁴ A éjtowal ka tujchij kʼal axi tatáʼ a tsalpayal abal in yéjenchalits ka tʼajaʼ o kʼal jun axi yab lej kʼibat ka tʼajaʼ. Ani tam ka tákuyits jawaʼ neʼets ka tʼajaʼ, ka aliy i olchixtaláb ban Índice de las publicaciones Watch Tower o ban Guía de estudio para los testigos de Jehová. Ka ólonchij a Jehová ani ka konchij ti tólmiy abal ka tʼajchij in kulbétal (Filip. 2:13). Talbél, ka tsalpay kʼal kʼeʼat i ayláb axi a léʼ ka tʼajaʼ. Tam ka tsuʼuw abal kʼwajat a putuwal kʼal nixéʼ, neʼets ka léʼnaʼ ka áynanchij kʼal kʼeʼat.

KA JILAʼ ABAL IN KÁWINTAL A DIOS TI BÉLDHANCHIJ A EJATAL

15. ¿Jaleʼ ti an ólchixchik kʼal a Jehová yab junat kʼal kʼeʼat i atikláb axi in ajiyal an Biblia? (1 Tesalonicenses 2:13).

¹⁵ Talchik i atikláb in ulal abal in ajiyámal an Biblia yan i kalel. Pero, ¿walám chubax in belál jawaʼ in ulal an Biblia? O ¿walám in jilál abal ka béldhanchat in ejatal? Lej yan i atikláb axi yab in belál kʼal jawaʼ in ulal an Biblia. Antsanáʼ jantʼiniʼ an epchalchik axi ti kʼaʼál siglo, an ólchixchik kʼal a Jehová jayej in belál abal an Biblia pel in káwintal a Dios. Ani jaxtám i tsápnanchal ki eyendhaʼ ti ejatal jawaʼ in olnál an Biblia (ka ajiy 1 Tesalonicenses 2:13).

16. ¿Jantʼoj neʼets tu ku tólmiy abal ki eyendhaʼ ti ejatal jawaʼ i exobnál ti Biblia?

¹⁶ Junchikíl neʼets ki atsʼaʼ kʼibat ki ajiy an Biblia ani ki eyendhaʼ ti ejatal jawaʼ i exobnál. Walám tam ki ajiy lej adhík yab neʼets ki tʼilaʼ jawaʼ i exóbnaʼ. Ani walám ku tʼeʼpin kom lej yan jawaʼ in yéjenchal ki jalkʼuy ti ejatal. Jawákits tam kʼibataláb axi ka tamuw, a Jehová neʼets ti tólmiy abal ka tamétnaʼ. Yab expidh ka ajiy an Biblia, jayej ka tsápnanchij ka eyendhaʼ ta ejatal. Max tatáʼ ka tʼajaʼ patal axéʼ neʼets ka atsʼaʼ más kulbél ta ejatal (Sant. 1:25).