Ku olnomáts kʼal i kulbetaláb antsanáʼ jantʼiniʼ tin tʼajaʼ a Jesús

1. ¿Jaleʼ ti an ólchixchik kʼal a Jehová yab junat kʼal kʼeʼat i atikláb axi in ulal abal pel i aykol kʼal a Jesús?

AN ÓLCHIXCHIK kʼal a Jehová in le kulbetnál ti ólnom, yab ejtíl an atiklábchik axi in ulal abal pel i aykol kʼal a Jesús pero yabchik u ólnom (Tito 2:14). Pero junchikíl walám i atsʼál abal yab u kanat tu ólnom. Walám i watʼamal ejtíl jun i ókʼnom axi in lej kulbetnál ti tolmix. Jajáʼ in uluw: «Junchikíl yab u atsʼál max u léʼ kin kalej tin ólnom».

2. ¿Jaleʼ ti junchikíl yab i kwaʼal i kanataláb abal tu ólnom?

² Walám waʼats kʼeʼat i tʼojláb tin bichówil a Jehová axi i lej kulbetnál ki tʼajaʼ pero yab i lej kulbetnál an olnomtaláb. ¿Jaleʼ walám i atsʼál antsanáʼ? Tam u tolmix abal ka tsʼejkáj o ka beletnáj jun i atáj tamkuntaláb, dhúbatkʼij i tʼajál ti kwéntaj abal u kʼakʼnancháb i tʼojlábil. Jayej, tam i kanatbedhál jun i epchal, o tam i tólmiyal talbél ti watʼenek jun i yajchiktaláb, dhúbatkʼij u kʼakʼnancháb. Jayej i kulbetnál ku tʼojon kʼal an epchalchik kom u tʼojnal junkudh ani waʼats yan i kʼanidhomtaláb, pero ¿jaleʼ ti atsʼál tʼojláb ku kalej tu ólnom? Walám biyálits tu ólnom ti kwenchálil ani lej wéʼ i atikláb tu atsʼál, walám ma waʼats i atikláb axi tu pojkanchal jawaʼ i olnál. Jayej i exlál abal biyat más u utel in kʼichájil a Jehová, más neʼets tu ku kʼwiyaʼ an atiklábchik (Mat. 10:22). ¿Jantʼoj neʼets tu ku tólmiy abal yab ki kʼibaʼ an kanataláb ani ki kulbétnaʼ más an olnomtaláb?

3. ¿Jantʼoj tu exóbchal tin kwéntaj a Jesús jawaʼ in ulal Lucas 13:​6-9?

³ Jawaʼ neʼets tu ku tólmiy abal ki kulbétnaʼ más an olnomtaláb pel ki exóbnaʼ in tʼiplábil a Jesús. Jajáʼ in lej kulbetnálak an olnomtaláb ani yab jaykʼiʼ tin koydhaʼ in tʼojlábil (ka ajiy Lucas 13:​6-9). Jajáʼ in jumbiy in tʼojlábil kʼal jun i inik axi kʼwajiy in beletnál jun i tʼayabláb al ox i támub, pero yab jaykʼiʼ tin tsuʼchiy in walíl jawaʼ in tʼayaʼ. A Jesús jayej kʼwajiy ti ólnom al ox i támub, pero lej wéʼ i atikláb wenkʼon tin aykolil. Antsanáʼ jantʼiniʼ an inik in áynanchij kin béletnaʼ an tʼayabláb, a Jesús in áynanchij ti ólnom ani yab jaykʼiʼ in koydhaʼ in tʼojlábil. A Jesús tʼójon más tsapik abal kin tólmiy an judíos kin batsʼuw an alwaʼ kaw.

4. ¿Jantʼoj tam tseʼ i tsalap neʼets ki exóbnaʼ?

⁴ Tejéʼ neʼets ki exóbnaʼ jantʼoj in tʼajaʼ a Jesús abal kin tejwamédhaʼ abal in kulbetnálak an olnomtaláb ani más tam tin kʼibchalak akak a ítsʼ abal kin bínaʼ in ejatal (ka tsuʼuw an nota de estudio «Después de estas cosas» axi ti Lucas 10:1). Neʼets ki tsuʼuw tseʼ jantʼoj axi in tʼajaʼ a Jesús ani jantʼoj i éjtowal ki tʼajaʼ abal ki nitsʼbiy. Kʼaʼál tsalap; jawaʼ más exbadh abal a Jesús pelak kin tʼajchij in kulbétal a Jehová. Tsabchíl tsalap; in exbay an kʼej kaw ani in lej tʼajaʼ ti kwéntaj. Oxchíl tsalap; etsʼey in belaʼ abal neʼets ka tólmiyat kʼal a Jehová. Ani an tseʼchíl tsalap jats abal in belaʼ abal neʼetsak ka atsʼan kʼal talchik i atikláb.

ETSʼEY IN TʼAJAʼ TI KWÉNTAJ JANTʼOJ JATS AXI MÁS EXBADH ABAL A JEHOVÁ

5. ¿Jantʼiniʼ in tejwamédhaʼ a Jesús abal jawaʼ más exbadh pelak kin tʼajchij in kulbétal a Jehová?

⁵ A Jesús in punchij yan i kanataláb an olnomtaláb kom in exlálak abal jats jawaʼ a Jehová in léʼak abal kin tʼajaʼ (Luc. 4:43). An olnomtaláb jatsak jawaʼ más exbadh abal a Jesús ani tam ti wéʼits neʼets ka tsemdháj, a Jesús xeʼtsinej ti ólnom ban bichowchik ani ban kwenchaláb (Luc. 13:22). Jayej in tʼojojoy más in aykolil abal kin áynanchij kʼal an olnomtaláb (Luc. 10:1).

6. Belits max i kwaʼal kʼeʼat i uchbiláb tin bichówil a Jehová, ¿jantʼoj jats axi más exbadh? (Ka tsuʼuw jayej an imágenes.)

⁶ An tʼojláb axi más exbadh xowéʼ ta kʼicháj pel an olnomtaláb, jaxtám a Jehová ani a Jesús in léʼ abal ku olnomáts (Mat. 24:14; 28:​19, 20). Patal an tʼojláb axi u tʼajnal tin bichowil a Jehová pel abal ka aynanchat ka olnáj an alwaʼ kaw. Jun i tʼiplab, ¿jaleʼ u tsʼejkáb yan i atáj tamkuntaláb? Pel abal an atiklábchik axi kin atsʼaʼ an alwaʼ kaw ka kʼalej tanáʼ ani kin kʼakʼnaʼ a Jehová. Jayej, an tʼojláb axi u tʼajnal ti Betel u eynal abal ka tólmiyat an olnomtaláb. Ani, ¿jaleʼ u tolmiyáb an epchalchik talbél ti watʼenek jun i yajchiktaláb? Pel abal kin koʼoychik jawaʼ in yéjenchal pero jayej abal kin áynanchij kin kʼakʼnaʼ a Jehová, ani jawaʼ más exbadh jats kin áynanchij kʼal an olnomtaláb. Yab jaykʼiʼ ki ukʼchiy abal jawaʼ más exbadh abal a Jehová pel ki áynanchij tu ólnom. Max etsʼey ki tʼilaʼ nixéʼ, neʼets ki koʼoy an kanataláb abal tu ólnom. Jun i ókʼnom axi u kʼwajíl ti Hungría ani in bij János in ulal axéʼ: «Etsʼey u tsápnanchal ku tʼilaʼ abal jawaʼ más exbadh jats an olnomtaláb. Nixéʼ yab i éjtowal ki kalchiy kʼal kʼeʼat jantʼoj».

7. ¿Jaleʼ tin léʼ a Jehová abal ki áynanchij tu ólnom? (1 Timoteo 2:​3, 4).

⁷ Kʼeʼat jantʼoj axi neʼets tu ku lej tólmiy abal ki kulbétnaʼ más an olnomtaláb jats ki kʼanidhaʼ an atiklábchik antsanáʼ jantʼiniʼ u kʼanidháb kʼal a Jehová. Jajáʼ in léʼak max patal an atikláb kin atsʼaʼ an alwaʼ kaw ani kin batsʼuw (ka ajiy 1 Timoteo 2:​3, 4). A Jehová in exlál abal an alwaʼ kaw neʼets ka eyan abal yan i atikláb kin kʼaniy in ejatal, jaxtám tu pidhál patal jawaʼ i yéjenchal abal ku bajudhméj más ban olnomtaláb. Jun i tʼiplab, an folleto Ka kʼanidhaʼ an atikláb tu pidhál i alwachik tsalap abal jantʼiniʼ ki tujchij ki tʼilmay jun i atikláb ani ki tujuw jun i exobintaláb kʼal an Biblia. Walám xowéʼ ta kʼicháj yab kin léʼnaʼ kin batsʼuw an alwaʼ kaw, pero walám kin léʼnaʼ tam ka tujey an púlik yajchiktaláb. Patal jawaʼ i ólchal xowéʼ walám jats kin tʼajaʼ abal jun a kʼicháj kin léʼnaʼ kin batsʼuw. Jaxtám ti lej exbadh ki áynanchij ku olnomáts.

IN EXBAY AN KʼEJ KAW ANI IN TʼAJAʼ TI KWÉNTAJ

8. ¿Jantʼiniʼ ti tólmiyat a Jesús kom in éxbayalak lej alwaʼ an kʼej kaw?

⁸ A Jesús in éxbayalak lej alwaʼ patal an kʼej kaw axi kʼwajat ban dhuchlab ani jaxtám in exlálak abal expidh neʼetsak kin ejtow ka olnomáts al ox i támub kʼal tsʼejel (Dan. 9:​26, 27). Jayej in exlálak jantʼiniʼ ti neʼetsak ka tsemdháj ani jaykʼiʼ (Luc. 18:​31-34). Jajáʼ in éxbayalak lej alwaʼ an kʼej kaw, jaxtám in eyendhaʼ alwaʼ an kʼij ani olnomáts kʼal yan i kulbetaláb, kom in léʼak kin talabédhaʼ an tʼojláb axi uchbiyat kal a Jehová.

9. ¿Jaleʼ ti an kʼej kaw axi ti Biblia tu tólmiyal ku olnomáts kʼal i kanataláb?

⁹ Max ki exbay más alwaʼ an kʼej kaw, neʼets ki léʼnaʼ ku olnomáts kʼal más i kanataláb. I exlál abal yabáts in kʼibchal yan abal ka talabedháj axéʼ an xeʼtsintaláb. Tam i tsuʼtal jantʼiniʼ in ey an atiklábchik ani i tʼajál ti kwéntaj patal jawaʼ exom ti watʼel, i éxbayal abal jats in uluw an Biblia abal neʼetsak ka tejwaméj tin taltal an xeʼtsintaláb. I éxbayal abal kʼwajat ti putnal an kʼej kaw tin kwéntaj an rey del sur (a Reino Unido ani a Estados Unidos) ani an rey del norte (a Rusia ani an bichowchik kʼal axi tu tolmiyáb) (Dan. 11:40). Jayej i éxbayal abal in akan an imagen axi u olnáb ti Daniel 2:​43-45 in tʼipoyal a Reino Unido ani a Estados Unidos. An exobintaláb axi i koʼoyámal kʼal an Biblia tin kwéntaj axéʼ xi kʼej kaw, tu tolmiyámal ki exbay abal in kʼibchal lej wéʼ i kʼij abal a Dios kin talabédhaʼ patal an eyal axi ti tsabál. Patal an kʼej kaw axi ti Biblia tu tejwamédhanchal abal u kʼwajílits tin taltal an xeʼtsintaláb ani jaxtám ti kwaʼal ku olnomáts kʼal más i kanataláb.

10. ¿Jantʼiniʼ más tu tólmiyal an kʼej kaw axi ti Biblia?

¹⁰ An kʼej kaw axi kʼwajat ti Biblia jayej tu pidhál jun i aychixtaláb lej alabél ani jats i léʼ ki ólchij an atiklábchik. Ti República Dominicana u kʼwajíl jun i epchal axi in bij Carrie. Jajáʼ in ulal: «Tam in kʼwajíl ku tsalpay kʼal patal jawaʼ a Jehová neʼets kin tʼajaʼ ban kʼicháj axi taʼtal u atsʼál abal kwaʼal ku tʼilchij an atiklábchik. U tʼajál ti kwéntaj abal an atiklábchik in tametnál yan i kʼibataláb ani u tsálpayal abal jajáʼchik jayej in yéjenchal kin exlaʼ an alwaʼtaláb axi a Jehová neʼets kin bínaʼ. An kʼej kaw axi kʼwajat ti Biblia jayej tu tʼilchal abal a Jehová neʼets tu ku tólmiy ki tʼajaʼ axéʼ xi tʼojláb ani nixéʼ tu kanatbedhál abal ki áynanchij tu ólnom. Jun i epchal axi u kʼwajíl ti Hungría ani in bij Leila in ulal: «Isaías 11:​6-9 tin exóbchal abal a Jehová in éjtowal kin tólmiy jitakits tam atikláb abal kin jalkʼuy in ey. Nixéʼ jats jawaʼ tin kanatbedhál abal ku ólchij an alwaʼ kaw an atiklábchik axi tejwaʼ abal yab in léʼ tu ku atsʼaʼ». Kʼeʼat i epchal axi u kʼwajíl ti Zambia ani in bij Christopher in ulal axéʼ: «Marcos 13:10 tin exóbchal abal an alwaʼ kaw kwaʼal ka olnáj tin puwél an tsabál. Nanáʼ u tsuʼtal ejtíl jun i lablixtaláb lej púlik ku ejtow kin tólmixin abal ka putun axéʼ xi kʼej kaw. ¿Jawaʼ tam kʼej kaw ti tólmiyal tatáʼ abal ka áynanchij ta ólnom?

IN LEJ BELAʼ ABAL NEʼETS KA TÓLMIYAT KʼAL A JEHOVÁ

11. ¿Jaleʼ tin yéjenchalak a Jesús kin belaʼ kʼal a Jehová abal kin áynanchij ti ólnom? (Lucas 12:​49, 53).

¹¹ A Jesús in lej belálak abal neʼetsak ka tólmiyat kʼal a Jehová abal kin áynanchij ti ólnom kʼal i kanataláb. Tam u ólnomak, in lej tʼajálak ti kwéntaj an kaw axi neʼets kin uluw, pero in exlálak abal jawaʼ kin ólnaʼ neʼetsak kin tʼajaʼ abal yan i atikláb ka tsakuy (ka ajiy Lucas 12:​49, 53). Jayej, a Jesús u lej kʼwíynalak kʼal an okʼlekchik ani yaníl exan ka tsemdháj (Juan 8:59; 10:​31, 39). Pero a Jesús in áynanchij ti ólnom kom in exlálak abal neʼetsak ka tólmiyat kʼal a Jehová. A Jesús in uluw: «Nanáʼ yab in kʼwajat kwetém. U Tátaj ti éb jats axi tin abámal kin chich tejéʼ tsabál ani Jajáʼ etsʼey kʼwajat kʼal nanáʼ» (Juan 8:16). Jayej in uluw axéʼ: «Yab tin jílkakiyal kom etsʼey u tʼajchal in kulbétal» (Juan 8:29).

12. ¿Jantʼiniʼ tin tólmiy a Jesús in aykolil abal kin áynanchij ti ólnom belits abal u kʼwiynalchik?

¹² A Jesús in exóbchij in aykolil abal kwaʼalak kin bélaʼchik abal neʼets ka tólmiyat kʼal a Jehová. Jajáʼ in exlálak abal in aykolil neʼetsak ka ayoknáj, jaxtám in uchaʼ abal kʼal a Jehová neʼets ka tólmiyat (Mat. 10:​18-20; Luc. 12:​11, 12). Jayej in uchaʼ abal kin lej tʼajaʼchik ti kwéntaj kom neʼetsak ka lej kʼwiyan kʼal yan i atikláb (Mat. 10:16; Luc. 10:3). Ani in uchaʼ abal max jun i atikláb yab in léʼ kin atsʼaʼ an alwaʼ kaw, yab kin nixoknaʼ (Luc. 10:​10, 11). Jayej in uchaʼchik abal max ka ayoknáj al jun i bichow, ka nixkʼin tanáʼ ani ka kʼalejchik pil (Mat. 10:23). A Jesús in lej belálak kʼal a Jehová ani u ólnomak kʼal yan i kanataláb, pero tam in tʼajálak ti kwéntaj abal u leʼnábak ka odhnáj, u nixkʼinalak (Juan 11:​53, 54).

13. ¿Jaleʼ ta lej belál abal a Jehová neʼets ti tólmiy?

¹³ Xowéʼ ta kʼicháj jayej waʼats yan i atikláb axi tu kʼwiyál, jaxtám i yéjenchal abal a Jehová tu ku tólmiy ku olnomáts kʼal i kanataláb (Apoc. 12:17). ¿Jaleʼ ti belál abal a Jehová jayej neʼets tu ku tólmiy wawáʼ? Kom ti Juan capítulo 17, a Jesús in konchij a Jehová kin tólmiy in aykólil. A Jehová in atsʼanchij an oláb axi in tʼajaʼ a Jesús, ¿jaleʼ ti exlál? Kom an libro in kʼál a Hechos tu ólchal abal a Jehová in tólmiy an abatwálejchik abal ka olnomáts kʼal i kanataláb, belits abal u kʼwíynalak kʼal an atiklábchik. Ban oláb axi a Jesús in tʼajaʼ, jayej in konchij a Jehová abal kin tólmiy patal an atikláb axi kin batsʼuw an alwaʼ kaw, jaxtám i exlál abal jayej u kʼwajat ajidh wawáʼ. I lej belál abal a Jehová neʼets kin áynanchij kin tókʼtsiy an oláb axi in tʼajaʼ a Jesús ani neʼets tu ku tólmiy, antsanáʼ jantʼiniʼ in tólmiy an abatwálejchik (Juan 17:​11, 15, 20).

14. ¿Jaleʼ ti lej belál abal neʼets ki ejtow ki áynanchij ki ólnaʼ an alwaʼ kaw kʼal i kanataláb? (Ka tsuʼuw jayej an imagen).

¹⁴ Biyat más u utel in kʼichájil a Jehová, walám neʼets ki atsʼaʼ más kʼibat ki ólnaʼ kʼal i kanataláb an alwaʼ kaw, pero a Jesús in uluw abal neʼets ki koʼoy an tolmixtaláb axi i yéjenchal abal ki áynanchij ki tʼajaʼ axéʼ xi tʼojláb (Luc. 21:​12-15). Antsanáʼ jantʼiniʼ in tʼajaʼ a Jesús ani in aykolil, wawáʼ jayej yab u pejéx kʼal an atiklábchik ani yab in nixoknál abal tu ku atsʼaʼ. Waʼats yan i bichow juʼtáj an epchalchik yab u jílchinal ka olnomáts, pero jajáʼchik in ejtowamal kin áynanchij kin tʼajaʼ axéʼ xi tʼojláb kom kʼwajat ti pidhnal i tsapláb kʼal a Jehová. A Jehová in tólmiy in aykolil ti kʼaʼál siglo abal kin ólnaʼchik an alwaʼ kaw ani xowéʼ ta kʼicháj jayej neʼets tu ku tólmiy wawáʼ abal ki áynanchij kʼal an olnomtaláb ma tam Jajáʼ kin uluw abal ki koydhaʼits (2 Tim. 4:17). Etsʼey ki tʼilaʼ abal max ki bélaʼ kʼal a Jehová, Jajáʼ neʼets tu ku tólmiy abal ki áynanchij ku olnomáts kʼal i kanataláb.

IN BELAʼ ABAL NEʼETSAK KA ATSʼAN KʼAL TALCHIK I ATIKLÁB

15. ¿Jaleʼ i exlál abal a Jesús in belálak abal yan i atikláb neʼetsak kin batsʼuw an alwaʼ kaw?

¹⁵ A Jesús in lej belálak abal waʼatsak i atikláb axi neʼetsak kin léʼnaʼ kin atsʼaʼ an alwaʼ kaw ani kʼal nixéʼ tólmiyat abal kin áynanchij ti ólnom kʼal i kanataláb. Jun i támub talbél ti tújenek ti ólnom, a Jesús in tʼajaʼ ti kwéntaj abal yan i atikláb kʼwajatak in bátsʼuwal an alwaʼ kaw ani jaxtám in uluw abal pelak ejtíl an aleláb axi kwaʼalits ka kʼojowat (Juan 4:35). Ani jun i támub talbél, in uluw: «Waʼats yan i atikláb axi tʼojojodh abal ti kin belaʼ nanáʼ» (Mat. 9:​37, 38). Talbél, a Jesús jayej in uluw axéʼ: «Waʼats lej wéʼ an kʼojolchik, jaxtám ka konchij a Dios abal kin abayej jitaʼ ti kin ólnanchij u bij» (Luc. 10:2). A Jesús etsʼey in tʼilaʼ abal yan i atikláb neʼetsak kin léʼnaʼ kin batsʼuw an alwaʼ kaw ani tam jun i atikláb in bátsʼuwalak, a Jesús in atsʼálak lej kulbél (Luc. 10:21).

16. ¿Jantʼoj tam tsab i tʼiplab in eyendhaʼ a Jesús abal kin tólmiy in aykolil kin kulbétnaʼ an olnomtaláb? (Lucas 13:​18-21; ka tsuʼuw jayej an imagen).

¹⁶ A Jesús in tólmiy in aykolil kin exbay abal kʼal an olnomtaláb neʼetsak ka lej tólmiyat an atiklábchik, antsanáʼ tin tólmiy in aykolil abal kin kulbétnaʼchik an olnomtaláb. Ki tsuʼuw tsab i tʼiplab axi in eyendhaʼ a Jesús (ka ajiy Lucas 13:​18-21). Okʼox, in uluw abal in Éyaltal a Dios pel ejtíl an iyaláb in kʼál jun i mostaza axi u puwel ma ka wenkʼon ti jun i téʼ lej púlik. Kʼal axéʼ xi tʼiplab, in léʼak kin exóbchij in aykolil abal yan i atikláb neʼetsak kin batsʼuw an alwaʼ kaw ani yab jitaʼ neʼetsak kin ejtow kin kúbdhaʼ an tʼojláb. Talbél jayej in uluw abal an olnomtaláb pel ejtíl an levadura. Kʼal nixéʼ xi tʼiplab in léʼak tu ku exóbchij abal an alwaʼ kaw neʼetsak ka olnáj tin puwél an tsabál ani neʼetsak kin tʼajaʼ abal yan i atikláb kin jalkʼuy in ejatal kʼayúm kʼayúm. A Jesús in eyendhaʼ axéʼ xi tsab i tʼiplab abal in aykolil kin exbay abal an olnomtaláb neʼets kin tólmiy yan i atikláb.

17. ¿Jaleʼ ti léʼ ki áynanchij tu ólnom kʼal i kanataláb?

¹⁷ Jawaʼ tu kanatbedhál abal ki áynanchij tu ólnom jats ki tʼajaʼ ti kwéntaj jantʼiniʼ exom ti tolmiyáb yan i atikláb tin puwél an Tsabál kʼal an olnomtaláb. Támub ti támub, millones i atikláb u kʼalel kʼal an Conmemoración ani in tujchal kin exóbnaʼ an Biblia kʼal wawáʼ ani yan kʼal axéʼchik xi atikláb in tujchal ti ólnom ani u pujnal. Yab i exlál jay i atikláb neʼetsej kin batsʼuw an alwaʼ kaw, pero i exlál abal a Jehová kʼwajat in támkuyal jun i púlik mudhél i atikláb axi neʼets ka jekʼondháj talbél kʼal an púlik yajchiktaláb (Apoc. 7:​9, 14). A Jehová jats an dhabal kʼal axéʼ xi tʼojláb ani max Jajáʼ in tsuʼtal abal waʼatsej yan i atikláb axi neʼetsej kin batsʼuw an alwaʼ kaw, wawáʼ neʼets ki áynanchij tu ólnom.

18. ¿Jantʼoj i léʼ abal an atiklábchik kin tʼajaʼ ti kwéntaj?

¹⁸ Patal jitaʼ chubax pel i aykol kʼal a Cristo, etsʼey in tsapnanchámal kin ólnaʼ an alwaʼ kaw kʼal i kanataláb. Jun i tʼiplab, tam ti an atiklábchik in tsuʼuw abal an abatwálej in olnálak an alwaʼ kaw kʼal i kanataláb ani yabchik u jikʼélak, in tʼajaʼchik ti kwéntaj abal chubax exóbchin kʼal a Jesús (Hech. 4:13). Wawáʼ jayej i léʼ ki ólnaʼ an alwaʼ kaw kʼal yan i iniktaláb ani kʼal i kanataláb, antsanáʼ an atiklábchik neʼets kin tʼajaʼ ti kwéntaj abal exom i nitsʼbiyal a Jesús.