Neʼets ki batsʼuw yan i alwaʼtaláb max ki jaʼúbnaʼ más an epchalchik

1, 2. ¿Jantʼoj jats axi a Jehová in pidhál yan in exbádh ani jantʼoj in léʼ abal ki tʼajaʼ?

A JEHOVÁ in lej tʼajál ti kwéntaj jantʼiniʼ ti tsuʼtal an atiklábchik. A Jesús tu exóbchij abal kwaʼal ki kʼanidhaʼ patal an atikláb antsanáʼ jantʼiniʼ i kʼanidhál ti kwetémtal (Mat. 22:​37-39). Jayej kwaʼal ki tʼajaʼ tu alwaʼ inik kʼal jitaʼchik yab in kʼakʼnál a Jehová. Max ki tʼajaʼ antsanáʼ neʼets ki nitsʼbiy a Jehová, «Jajáʼ in abchal in tajáx a kʼicháj axi alwaʼ inik ani jayej axi pojkax. In úldhanchal an áb axi putudh kʼal Jajáʼ ani axi yab putudh» (Mat. 5:45).

² A Jehová in kʼanidhál patal an atikláb, pero in koʼonchal jun i kʼanidhomtaláb más púlik an atiklábchik kʼal axi tu belkáb (Juan 14:21). A Jehová in léʼ abal ki nitsʼbiy ani jaxtám tu uchál abal ki kóʼonchij jun i púlik kʼanidhomtaláb an epchalchik (1 Ped. 4:8; Rom. 12:10). Nixéʼ xi kʼanidhomtaláb pel ejtíl axi i atsʼál kʼal jun i yanél o kʼal jun i jaʼúb axi i lej kʼanidhál.

3. ¿Jantʼoj kwaʼal ki tʼilaʼ tin kwéntaj an kʼanidhomtaláb?

³ An kʼanidhomtaláb pel ejtíl jun i wits axi in yéjenchal ka wakʼyat ani ka beletnáj abal ka púwey. An abatwálej Pablo in uchaʼ an epchalchik abal in tomnálak kin áynanchij ka kʼanidháxin (Heb. 13:1). A Jehová in léʼ abal ki áynanchij ki tejwamédhanchij an epchalchik abal i kʼanidhál. Tejéʼ neʼets ki exóbnaʼ jaleʼ ti kwaʼal ki áynanchij ki jaʼúbnaʼ an epchalchik ani jantʼiniʼ i éjtowal ki tʼajaʼ.

¿JALEʼ TI KWAʼAL KI JAʼÚBNAʼ MÁS AN EPCHALCHIK?

4. Antsanáʼ jantʼiniʼ in ulal Salmo 133:​1, ¿jantʼoj neʼets tu ku tólmiy abal ki pidhaʼ yan in jalbíl an junkudhtaláb axi waʼats tin bichówil a Jehová? (Ka tsuʼuw jayej an imágenes).

⁴ (Ka ajiy Salmo 133:1). Antsanáʼ jantʼiniʼ an salmista, wawáʼ jayej i léʼ ki uluw abal «lej alwaʼ ani lej kʼijidh» ki jaʼúbnaʼ jitaʼchik in kʼanidhál a Jehová. Pero kom i ujnámits ki tsuʼuw nixéʼ xi junkudhtaláb tin bichówil a Jehová, walám talbél yabáts ki pidhaʼ yan in jalbíl. Awits ki watʼaʼ ejtíl jun i atikláb axi in kwaʼal jun i téʼ lej púlik ani alabél, pero kom in ujnámits kin tsuʼuw chudhél chudhél, walám yabáts in jikʼpál. An epchalchik axi ti tamkuntaláb jayej i tsuʼtal semana ti semana, ¿jantʼoj i éjtowal ki tʼajaʼ abal ki áynanchij ki kʼanidhaʼ? Ki jolkʼaʼ i kʼij abal ki tsalpay jaleʼ ti an epchalchik in kwaʼal yan in jalbíl abal wawáʼ ani abal an tamkuntaláb.

5. ¿Jantʼiniʼ u tolmiyáb an atikláb kʼal an kʼanidhomtaláb axi u tejwamél tin bichówil a Jehová?

⁵ Tam jun i atikláb kʼaʼál tu kʼalel ban tamkuntaláb, junchikíl jawaʼ más in jikʼpál jats kin tsuʼuw an kʼanidhomtaláb axi an epchalchik in tejwamedhál, ani kʼal nixéʼ u tolmiyáb kin belaʼ abal jawaʼ u olnáb tanáʼ jats an chubaxtaláb. A Jesús in uluw axéʼ xi kaw: «Max chubax ki kʼanidháxin, tam patal an atikláb neʼets kin tsoʼóbnaʼ abal tatáʼchik chubax pel tu aykolil» (Juan 13:35). Ki tsuʼuw jawaʼ in watʼaʼ jun i exóbal kʼal an Biblia axi in bij Alejandra.a Jajáʼ kʼalej kʼal an púlik tamkuntaláb regional ani talbél kʼal an kʼaʼál kʼicháj in uchaʼ axéʼ xi kaw an epchal kʼal axi tu pídhnalak i exobintaláb kʼal an Biblia: «U tátajchik yab jaykʼiʼ tin mutsʼuknámal, pero axéʼ a kʼicháj 52 i epchal tin mutsʼuknaʼ. Jawaʼ in tʼajámal axéʼchik xi epchal tin tejwamédhanchal abal a Jehová tin lej kʼanidhál ani nanáʼ jayej u léʼ kin kʼwajiy tin bichówil a Jehová». A Alejandra in áynanchij ti exóbal kʼal an Biblia ani pujan ti 2024. Axéʼ tu exóbchal abal an exóbalchik kʼal an Biblia in tʼajál ti kwéntaj jawaʼ i tʼajál ani in tsuʼtal an kʼanidhomtaláb axi i tejwamedhál, ani kʼal nixéʼ u tolmiyáb abal kin léʼnaʼchik kin kʼakʼnaʼ a Jehová (Mat. 5:16).

6. ¿Jaleʼ ti lej alwaʼ ki jaʼúbnaʼ más an epchalchik?

⁶ Lej alwaʼ ki jaʼúbnaʼ más an epchalchik kom nixéʼ jayej tu tólmiyal abal ki béletnaʼ ti baʼ. A Pablo in uchaʼ axéʼ xi kaw an epchalchik: «Chudhél chudhél ki kanatbedháxin abal yab ki kʼámbinchat a ichích kʼal an walabtaláb (Heb. 3:13). A Jehová in éjtowal kin eyendhaʼ an epchalchik abal tu ku tólmiy max kin tsuʼuw abal i bélomtal kʼwajat ti tsaʼkanal o max kin tsuʼuw abal kʼwajat tu kʼalel al pil i bél (Sal. 73:​2, 17, 23). Lej kulbél i atsʼál kom a Jehová in eyendhál an epchalchik abal tu ku tólmiy.

7. ¿Jaleʼ ti lej alwaʼ ka waʼtsin i kʼanidhomtaláb ti tamkuntaláb? (Colosenses 3:​13, 14).

⁷ Wawáʼ u kʼwajat al jun i yaneláb axi exom in tsápnanchal kin tejwamédhaʼ i kʼanidhomtaláb ani nixéʼ in tʼajál abal ki batsʼuw yan i alwaʼtaláb (1 Juan 4:11). Jun i tʼiplab, an kʼanidhomtaláb tu tólmiyal abal ku kuxunchixin ani nixéʼ in tʼajál abal ku kʼwajiy junkudh (Efes. 4:​2-6; ka ajiy Colosenses 3:​13, 14). Jaxtám i atsʼál lej alwaʼ ku kʼwajiy kʼal an epchalchik ti tamkuntaláb, kom an kʼanidhomtaláb axi waʼats tanáʼ yab neʼets ki elaʼ pil juʼtáj.

KU KʼAKʼNAXIN

8. ¿Jantʼiniʼ tu tólmiyal a Jehová abal ku kʼwajiy junkudh?

⁸ A Jehová in tʼajámal abal ku kʼwajiy junkudh belits abal u wálbidh (1 Cor. 12:25). An Biblia in ulal: «A Dios ti exobchámalits ki kʼanidháxin» (1 Tes. 4:9). ¿Jantʼiniʼ tu exóbchal a Jehová? Ban Biblia tu exobchámal jantʼoj kwaʼal ki tʼajaʼ abal ki jaʼúbnaʼ más an epchalchik. Wawáʼ kwaʼal ki exóbnaʼ alwaʼ an Biblia ani ki eyendhaʼ ti ejatal jawaʼ a Jehová tu exóbchal (Heb. 4:12; Sant. 1:25). Axéʼ jats jawaʼ in tsápnanchal kin tʼajaʼ an ólchixchik kʼal a Jehová.

9. ¿Jantʼoj tu exóbchal Romanos 12:​9-13 abal in tomnál ki tʼajaʼ?

⁹ ¿Jantʼiniʼ tu tólmiyal an Biblia abal ku kʼwajiy más utat kʼal an epchalchik? Ki tsuʼuw jawaʼ in uluw an abatwálej Pablo ti Romanos 12:​9-13 (ka ajiy). Ki tʼajaʼ ti kwéntaj an kaw: «Yab ka lej léʼnaʼ ki kʼadhpich kʼakʼnáj». ¿Jantʼiniʼ i éjtowal ki tejwamédhaʼ abal yab expidh kʼwajat i aychal abal wawáʼ ku kʼakʼnáj? Max ki aliy jantʼiniʼ ki tejwamédhanchij an epchalchik abal i kʼanidhál. Neʼets ki pákwlanchij, neʼets ki batsʼuw alwaʼ ti kʼimáʼ ani neʼets ki tʼajaʼ tu alwaʼ inik kʼal jajáʼchik (Efes. 4:32). Yab expidh ki aychij abal an epchalchik kin tʼajaʼ jantʼoj abal tu ku jaʼúbnaʼ, wawáʼ jats axi kʼaʼál kwaʼal ki tʼajaʼ. Antsanáʼ neʼets ki tʼajaʼ ti kwéntaj abal chubax u putnal jawaʼ in uluw a Jesús: «Neʼets kin atsʼaʼ más kulbél jitaʼ kin bínaʼ jawaʼ in kwaʼal» (Hech. 20:35).

10. ¿Jantʼiniʼ i éjtowal ki tejwamédhaʼ abal u ikʼax? (Ka tsuʼuw jayej an imagen).

¹⁰ An abatwálej Pablo tu exóbchij abal yab expidh kwaʼal ki aychij ku kʼakʼnáj wawáʼ, pero talbél jayej in uluw axéʼ xi kaw: «Ka tʼajaʼ ti ikʼax, yab ka óbetnaʼ an tʼojláb». Jun i atikláb axi ikʼax dhúbatkʼij in tʼajál an tʼojláb axi u bíjchinal ani in tʼajál kʼal in kulbétal. Proverbios 3:​27, 28 tu ólchal axéʼ xi kaw: «Max waʼats jitaʼ axi in yéjenchal tolmidh ani tatáʼ a éjtowal ka tólmiy, ka tʼajaʼ». Jaxtám, max ki tsuʼuw abal jun i epchal in yéjenchal i tolmixtaláb, ki aliy jantʼiniʼ ki tólmiy. Yab ki tsalpay abal neʼets ki tólmiy talbél, o abal walám neʼets ka tólmiyat kʼal kʼeʼatchik (1 Juan 3:​17, 18).

11. ¿Jantʼoj neʼets tu ku tólmiy abal ki jaʼúbnaʼ más an epchalchik?

¹¹ Kʼeʼat jantʼoj axi i éjtowal ki tʼajaʼ abal ki kʼakʼnaʼ axi más jats ki pákwlanchij dhúbatkʼij tam tu ku tʼajchij jantʼoj. Efesios 4:26 in ulal: «Ka dhubat tixkʼaʼchik an tsakultaláb ta ichích». ¿Jaleʼ ti kwaʼal ki tʼajaʼ nixéʼ? Abal yab ki jilaʼ tu ku ataʼ an tenekláb, antsanáʼ jantʼiniʼ tin ulal an versículo 27. Ban Biblia, a Jehová wilkʼidh tu tʼilchal abal kwaʼal ki pákwlanchij axi más. Colosenses 3:13 tu uchál axéʼ xi kaw: «Ka kʼayanaʼ ani ka pákwlanchij axi más». Tam i pákwlanchal an epchalchik kom ukʼpinének o kom tu tʼajchámal jantʼoj, i éjtowal ki jaʼúbnaʼ más ani u kʼwajíl más junkudh ani koyat (Efes. 4:3). Axéʼ tu exóbchal abal kwaʼal ki pakwlanchij axi más max i léʼ ku kʼwajiy junkudh ani koyat.

12. ¿Jantʼini tu tólmiyal a Jehová abal ki pakwlanchij axi más?

¹² Junchikíl neʼets ki atsʼaʼ kʼibat ki pakwlanchij jitaʼ axi tu tʼajchámal jantʼoj. Pero a Jehová neʼets tu ku tólmiy kʼal an espíritu santo abal ki pakwlanchij. An abatwálej Pablo in uluw abal kwaʼal ki tejwamédhaʼ i kʼanidhomtaláb ani ki tʼajaʼ tu ikʼax, ani talbél jayej in uluw abal «ku tʼójon kʼal i ichích lej kanat». Axéʼ tu exóbchal abal a Jehová in éjtowal tu ku tólmiy kʼal an espíritu santo abal ki léʼnaʼ ki tʼajaʼ jawaʼ tekedh ani ki tʼajaʼ kʼal i kulbétal. Axéʼ jayej neʼets tu ku tólmiy abal ku kʼanidháxin ani ku pakwlanchíxin (Romanos 12:11). Jaxtám etsʼey i konchal a Jehová abal tu ku tólmiy (Luc. 11:13).

«YAB KIT BUKʼLAXIN»

13. ¿Jantʼoj walám kin tʼajaʼ abal ku bukʼlaxin?

¹³ Ti tamkuntaláb waʼats i epchalchik axi pílchik in bichówil (1 Tim. 2:​3, 4). Jaxtám junchikíl yab neʼets ku tsalpaxin junat tin kwéntaj an toltom o jantʼiniʼ tu kʼijidhbél. Walám jayej yab neʼets ku tsalpaxin junat tin kwéntaj an ilál axi i takuyal ki eyendhaʼ. Max wawáʼ yab i kulbetnál jantʼiniʼ tu tsalpax jajáʼchik, walám nixéʼ kin tʼajaʼ abal ku bukʼlaxin (Rom. 14:4; 1 Cor. 1:10). Pero a Jehová tu exobchámal abal kwaʼal ku kʼanidháxin, jaxtám i lej tʼajál ti kwéntaj abal yab ki nixoknaʼ axi más ka tsalpaxin ejtíl wawáʼ (Filip. 2:3).

14. ¿Jantʼoj kwaʼal ki tsápnanchij ki tʼajaʼ etsʼey?

¹⁴ Kʼeʼat jantʼoj axi neʼets tu ku tólmiy abal yab ku bukʼlaxin jats ki tsápnanchij ki kanatbédhaʼ an epchalchik (1 Tes. 5:11). Xoweykʼij kʼwajinek ti wichél tin bichowil a Jehová yan i epchal axi yabáts u kalelak ti ólnom ani yabáts u támkunalak. Ani jayej wíchenek yan i atikláb axi pilmedhámej. Wawáʼ i bátsʼuwal kʼal yan i kulbetaláb axéʼchik xi epchal (2 Cor. 2:8). Jun i epchal mimláb axi in neʼdhálakits laju i támub ti yab u kʼalel kʼal an tamkuntaláb in ulal: «Patal an epchal utey ti kin tsapnédhaʼ ani tejwaʼak lej kulbél» (Hech. 3:19). ¿Jantʼiniʼ tin atsʼaʼ an epchal kom bátsʼuwat lej alwaʼ? Jajáʼ in ulal: «U atsʼaʼ abal a Jehová kʼwajatak tin lotoknál abal kin wichiy juʼtáj ti neʼetsak ku atsʼaʼ más kulbél». Tam wawáʼ i tsápnanchal ki kanatbédhaʼ an epchalchik, a Jesús in éjtowal tu ku eyendhaʼ abal ki tólmiy axi más kʼal an tʼeʼpintaláb axi in kwaʼal (Mat. 11:​28, 29).

15. ¿Jantʼiniʼ más i éjtowal ku tólmixin abal ku kʼwajiy junkudh? (Ka tsuʼuw jayej an imagen).

¹⁵ Max ki tʼajaʼ ti kwéntaj jawaʼ i ulal jayej neʼets ku tolmixin abal ku kʼwajiy más junkudh. Job 12:11 in ulal: «Kʼal a lekʼáb a lekál an kʼapnél ani kʼal a xutsun a tʼajál ti kwéntaj jawaʼ it uchnal». Jun i atikláb axi in kulbetnál ti tsʼejkom kʼapnél etsʼey in lekál an kʼapnél abal kin exlaʼ max kujuw ani tikʼelej in binál. Jayej, okʼxidh ku kawin kwaʼal ki lej tsalpay max jawaʼ neʼets ki uluw neʼets kin kanatbédhaʼ axi más ani max chubax neʼets kin tólmiy (Sal. 141:3; Efes. 4:29).

16. ¿Jitaʼchik jats axi más in tomnál kin tʼajaʼ ti kwéntaj jantʼiniʼ u kaw?

¹⁶ An inik axi tómkidh, an tatalábchik ani an mimláb axi in kwaʼal i tsakam, jats axi más in tomnál kin tʼajaʼ ti kwéntaj jantʼiniʼ u kaw (Col. 3:​19, 21; Tito 2:4). An ókʼnomchik jayej in tomnál kin kanatbédhaʼ an epchalchik ani kin tólmiychik abal kin atsʼaʼ alwaʼ (Is. 32:​1, 2; Gál. 6:1). Jun i kaw axi kʼwajat ti Proverbios in ulal: «U lej tolmix an kaw axi ki uluw tam más in tomnál» (Prov. 15:23).

KI CHUBAX KʼANIDHAʼ AN EPCHALCHIK ANI KI TÓLMIY

17. ¿Jantʼoj kwaʼal ki tʼajaʼ abal chubax ki kʼanidhaʼ an epchalchik?

¹⁷ An abatwálej Juan in uluw: «Yab expidh ki uluw abal i kʼanidhál an epchalchik, ki chubax kʼanidhaʼ ani ki tolmiychik» (1 Juan 3:18). ¿Jantʼoj neʼets tu ku tólmiy abal ki kʼanidhaʼ kʼal patal i ichích an epchalchik? Ki jolkʼaʼ i kʼij abal ku kʼwajiy kʼal jajáʼchik, nixéʼ neʼets kin tʼajaʼ abal ki jaʼúbnaʼ ani ki kʼanidhaʼchik. Ki tsápnanchij ki junkuw ti tamkuntaláb ani ti olnomtaláb. Jayej ki tsápnanchij ki jolkʼaʼ i kʼij abal ki tsaʼbiychik. Max ki tʼajaʼ axéʼ, an atiklábchik neʼets kin tsuʼuw abal chubax u putnal axéʼ xi kaw: «A Dios ti exobchámalits kit kʼanidháxin» (1 Tes. 4:9). Ani wawáʼ neʼets ki tʼajaʼ ti kwéntaj abal «pel jantʼoj alwaʼ ani lej kʼijidh abal an epchalchik ka kʼwajiy junkudh» (Sal. 133:1).