Tin nakél i ejatal i tsuʼúmal jantʼiniʼ tu exobchámal a Jehová

AN ALWAʼ TʼIPLAB AXI TIN PUNCHIJ U PAPÁ ANI U MAMÁ

U tátajchik u kʼwajilak ti Italia, pero tin taltal an támub 1950, kʼalechik ti kʼwajíl ti Canadá, al jun i tsakam kwenchal axi in bij Kindersley, axéʼ kwéntalidh ti Saskatchewan. Tam ti neʼdhálakits wéʼ i kʼij tu ulnek ti Canadá u ólchin tin kwéntaj an Biblia ani wawáʼ i pidhaʼ yan in jalbíl jawaʼ kʼwajatak i exobnál. Jayej u tʼilál abal ma tu tsakamtal, u yanél in jolkʼálak yan i kʼij abal ti ólnom ani nanáʼ u junalakchik. Jaxtám junchikíl nanáʼ in kʼatsub ani u ulal abal u tujchij tin precursor auxiliar tam tu kwaʼalak ocho i támub.

U tátajchik yab in lej kwaʼalak i tumín, pero etsʼey in tsápnanchij kin tʼojonchij a Jehová. Jun i tʼiplab, ti 1963 tʼajan jun i púlik tamkuntaláb internacional ti Pasadena (California, Estados Unidos). U papá ani u mamá in léʼakchik ka kʼalej, jaxtám in nujuw yan jantʼoj axi in kwaʼalak abal kin kídhbaychik an tumín abal ka kʼalej. Ti 1972 u kʼalej tu kʼwajíl al jun i tsakam kwenchal axi in bij Trail, axéʼ kʼwajatak al 1.000 kilómetros in owél. U kʼalej tanáʼ kom i léʼak ki ólchij an alwaʼ kaw an atiklábchik axi u kaw italiano. U papá u tʼojnalak al jun i nujnél, jajáʼ jats axi in tʼokedhálak ani in wejkʼálak tanáʼ altáj. Ani kom in léʼak kin tʼojonchij más a Jehová, yab in batsʼuw i tʼojláb juʼtáj ka jálbiyat más alwaʼ.

U lej kʼákʼnanchal u tátajchik kom tu pidhaʼ jun i alwaʼ tʼiplab u epchalchik ani nanáʼ. Jajáʼchik tin exóbchij jantʼoj lej exbadh: Max nanáʼ ku tʼojonchij a Jehová, Jajáʼ etsʼey neʼets ti kin béletnaʼ (Mat. 6:33).

U TUJCHAL KU TʼOJONCHIJ MÁS A JEHOVÁ

Ti 1980 in tomkin kʼal a Debbie, jajáʼ jayej in léʼak kin tʼojonchij más a Jehová. Jaxtám, óx a ítsʼ talbél tu tomkinének a Debbie in tujchij precursora. Jun i támub talbél tu tomkinének, u kʼalej tu tolmix al jun i tsakam tamkuntaláb juʼtáj u yejenchábak i epchal abal ti ólnom, ani nanáʼ jayej u tʼajaʼ tin precursor.

Tam ti neʼdhálakits wéʼ i kʼij tanáʼ u tujey tu tsekel ani i léʼakits ku kʼalej pil. Pero okʼox i tʼilmay an ókʼnom kʼal an circuito, jajáʼ tu tʼilmay kʼal i kʼanidhomtaláb pero tu tajax uchaʼ axéʼ: «Kwaʼal ka jalkʼuychik a tsalápil kom kʼwajat a lej tsálpayal kʼal jawaʼ a atsʼál kʼibat. Max ka tsálpaychik kʼal an alwaʼtaláb axi a bátsʼuwal tejéʼ, neʼets ka atsʼaʼchik más kulbél». I tʼajaʼ ti kwéntaj abal jats jawaʼ i yéjenchalak ku uchan (Sal. 141:5). Dhúbatkʼij i tʼajaʼ jawaʼ tu uchaʼ an epchal ani i tʼajaʼ ti kwéntaj abal kʼwajatak i bátsʼuwal yan i alwaʼtaláb. I tʼajaʼ ti kwéntaj abal ti tamkuntaláb waʼatsak yan i epchal axi kʼwajatak in tsápnanchal kin tʼojonchij a Jehová, ejtíl an tsákamchik. Jayej waʼatsak i epchalchik mimláb axi kʼwajatak in tʼójonchal kwetém a Jehová kom in tomkíl yabák pel i ólchix kʼal a Jehová. Axéʼ tu exóbchij jantʼoj lej exbadh, i exóbnaʼ abal kwaʼal ki tʼajaʼ ti kwéntaj an alwaʼtaláb axi kʼwajat i bátsʼuwal, ani ki lej belaʼ abal a Jehová neʼets kin tsʼejkaʼ an kʼibataláb tam Jajáʼ kin tsuʼuw abal in tomnál kin tʼajaʼ (Miq. 7:7). Patal nixéʼ tu tólmiy ki atsʼaʼ más kulbél ani ki jalkʼuy i tsalápil.

Ban kʼaʼál escuela de precursores axi i koʼoy, waʼtsin tseʼ i epchal axi in bínaʼ an escuela ani óx kʼal jajáʼchik kʼwajinek ti tolmix al pil i bichow. Jajáʼchik tu ólchij i fotos ani tu tʼilchij an kʼibataláb axi in tamétnaʼchik. Jayej tu tʼilchij an lablixtaláb axi in bátsʼuwchik biyat kʼwajiy ti tolmix al nixéʼ xi bichow. Nixéʼ in tʼajaʼ abal wawáʼ jayej ki léʼnaʼ ku tólmixin jantʼiniʼ u misioneros.

Wawáʼ i léʼak ki bajuw nixéʼ xi ayláb, jaxtám ti 1984 u kʼalej tu tolmix ti Quebec, nixéʼ kʼwajat al 4.000 kilómetros in owél ma ti Columbia Británica. Tanáʼ an atiklábchik u kaw francés, jaxtám i yéjenchij ki exóbnaʼ nixéʼ an kawintaláb ani ki ujnaʼ tu kʼwajíl ejtíl jajáʼchik. Kʼeʼat i kʼibataláb axi i tamétnaʼ tanáʼ jats abal junchikíl yab u kidhelak an tumín. Jun a kʼicháj, jun i inik axi in tʼayálak i papas tu jilchij ku kʼalej ki penaʼ jawaʼ jilkʼonének. Jats expidh nixéʼ i kwaʼalak abal tu kʼapul. A Debbie in exóbnaʼ kin tsʼejkaʼ pílchik i kʼapnél kʼal an papas. Belits abal i tamétnaʼ i kʼibataláb, i tsápnanchij ku kʼwajiy kulbél. Jayej i tʼajaʼ ti kwéntaj abal a Jehová tu lej béletnaʼ (Sal. 64:10).

Jun a kʼicháj u tawnáj ani u kániyat ban Betel axi ti Canadá. I atsʼaʼ kulbél pero jayej wéʼ tʼeʼpidh kom wawáʼ i léʼak ku kʼalej ban Escuela de Galaad. Tam tu ulits ti Betel u tʼilmáts kʼal an epchal Kenneth Little, jajáʼ u tólmixak ban Comité de Sucursal. Wawáʼ i konoy: «¿Jantʼoj neʼets ka watʼey max ku kániyat ti Galaad?». Jajáʼ tu uchaʼ: «Max ki kániyatchik, tam neʼets ki tsuʼuw jantʼoj ki tʼajaʼ».

Jun i semana talbél tu ulnek ti Betel, a Debbie ani nanáʼ u kániyat ti Galaad. Wawáʼ kwaʼalak ki takuy max neʼets ku jilkʼon ti Betel o ku kʼalej ti Galaad. An epchal Little tu uchaʼ: «Jawákits tam ayláb axi ka tákuychik neʼets ka kalej alwaʼ. Junchikíl neʼets ka tsalpay abal más alwaʼ max a batsʼúmalak axi jun an ayláb. Tsablom an ayláb alwaʼ ani a Jehová neʼets kin lábliy jawákits ka takuy». Wawáʼ i takuy ku kʼalej ti Galaad ani i tʼajámal ti kwéntaj abal chubax jawaʼ in uluw an epchal Little. Junchikíl jayetsej i uchál an epchalchik axi in yéjenchal kin takuy jawaʼ tam ayláb neʼets kin batsʼuw.

JAWAʼ I WATʼAʼ TAM TI PELAK U MISIONEROS

U kániyat ti Galaad ti 1987 ti Brooklyn (Nueva York). U kaniyat 22 ti éb ani an clase pelak an número 83. An epchalchik axi in bínaʼ an clase pelak a Ulysses Glass ani a Jack Redford. An clases u owelak bóʼ a ítsʼ pero i atsʼaʼ abal watʼey lej dhubat. An clase taley ti 6 a septiembre ti 1987. U aban ti Haití junax kʼal a John ani a Marie Goode.

Ti Haití waʼtsin i misioneros ti biyál, pero ti 1962 kaldhájchik ani yabáts aban jitaʼ ma ti 1987 tam tu ulits wawáʼ. Óx i semana talbél u ulits tu tolmix al jun i tsakam tamkuntaláb juʼtáj ti waʼatsak 35 i publicadores. Axéʼ xi tamkuntaláb kʼwajatak juʼtáj ti tsʼénlidh. U kʼimádhil ani naná ʼ u kʼwajilak kwetém, u lej tsákamejak ani waʼatsak yan jantʼoj axi yabak i exlál jantʼiniʼ ki tʼajaʼ. Jayej, an atiklábchik axi ti Haití lej tsʼejwantálak ani yan kʼal jajáʼchik yab in exlálak ti ajum. Tam tu kʼwajiy tanáʼ, an atiklábchik in tomolnálak an eyal ani in exaʼ kin tixkʼaʼ. Jayej i tamétnaʼ pílchik i yajchiktaláb, ejtíl i tsapik ablom.

I exóbnaʼ yan jantʼoj tin kwéntaj an epchalchik, jajáʼchik in áynanchij kin tʼojonchij a Jehová kʼal i kulbetaláb belits abal in tametnámal yan i kʼibataláb. Tejwaʼak abal in lej kʼanidhálak a Jehová ani in lej kulbetnálak an olnomtaláb. Jun i tʼiplab, ti tamkuntaláb waʼatsak jun i epchal payeblábits axi yab in exlálak ti ajum, pero in kwaʼalak tsʼatʼat tin okʼ 150 i textos axi ti Biblia. Patal an kʼibataláb axi i tamétnaʼ tu tólmiy abal ki léʼnaʼ ki ólnaʼ más an alwaʼ kaw, kom i léʼak ki tejwamédhanchij an atiklábchik abal expidh in Éyaltal a Dios neʼets kin tixkʼaʼ an yajchiktaláb. U lej kulbél kom talchik i exóbal kʼal an Biblia talbél in bajuw ti precursores regulares, ti precursores especiales ani ti ókʼnom.

Ti Haití u exlaʼ jun i kwitól axi pelak i mormón, jajáʼ in bij Trevor ani u ejtow ku tʼilmay tin kwéntaj an Biblia al yan i kalel. Yan i támub talbél jajáʼ tin abchij jun i carta axi in ulalak: «Neʼets kin pujan jantʼiniʼ in ólchix kʼal a Jehová al axi jun an púlik tamkuntaláb. U léʼ kin wichiy ti Haití juʼtáj tin xeʼtsin tam ti pelak in mormón, pero xowéʼ u léʼ ku tʼajaʼ tin precursor especial». Jajáʼ in putuw jawaʼ in uluw, kʼwajiy yan i támub tanáʼ ti Haití kʼal in kʼimádhil.

U ABAN TI EUROPA ANI TALBÉL TI ÁFRICA

U aban al jun i bichow juʼtáj ti biyál u kʼánchinalak tu ólnom, pero xowéʼ kʼwajatak tu jílchinal ku olnomáts junílekʼij. Ti 1992 u ulits ti Liubliana (Eslovenia) utat juʼtáj ti yejey u tátajchik. Al nixéʼ xi támub exomak jun i pextaláb ban bichow axi ti biyál u exlábak ti Yugoslavia. An sucursal axi ti Viena (Austria) ani an oficinas axi ti Zagreb (Croacia) ani ti Belgrado (Serbia) jats in okʼnálak an olnomtaláb al nixéʼ xi bichow. Pero xowéʼ patal an bichowchik neʼetsak kin koʼoy junchik i sucursal.

Koʼoy ki exóbnaʼ jun i ít kawintaláb ani ki ujnaʼ tu kʼwajíl jantʼiniʼ an atiklábchik axi ti Eslovenia. An atiklábchik axi u kʼwajilak ti Eslovenia tu uchálak «Jezik je težek». Axéʼ in léʼ kin uluw: «An kawintaláb lej kʼibat» ani chubax, lej kʼibat axéʼ xi kawintaláb. Lej kulbélak i atsʼál kom an epchalchik u lej bélkaxak ani dhúbatkʼij u tólmixak tam in bichówil a Jehová in jálkʼuyalak jantʼoj. I tʼajaʼ ti kwéntaj abal a Jehová in lej labliyálak an epchalchik kom in tʼajálak patal nixéʼ. Junílekʼij i tʼajaʼ ti kwéntaj abal a Jehová in tsʼejkál jawákits tam kʼibataláb tam Jajáʼ kin tsuʼuw abal in tomnál. Ti Eslovenia i exóbnaʼ yan jantʼoj ani jayej tu lej tólmiy patal jawaʼ i exobnámalits okʼxidh ku ulits tanáʼ.

Ban támub 2000 u aban ti Costa de Marfil, ti África Occidental. Pero tujey jun i pextaláb, jaxtám ti noviembre ti 2002 u neʼdháj ti Sierra Leona. Tanáʼ itekʼij ti koydhámej jun i pextaláb axi owey 11 i támub. Lej kʼibat i atsʼaʼ ku kalej ti Costa de Marfil, pero patal jawaʼ i exobnámalits okʼxidh, tu lej tólmiy abal ki áynanchij ki atsʼaʼ kulbél.

I tsápnanchij ki tʼajaʼ ti kwéntaj jantʼiniʼ in bátsʼuwalak an atiklábchik an alwaʼ kaw ani i tʼajaʼ ti kwéntaj abal an epchalchik lej kʼanidhom, belits abal in tamétnaʼ yan i kʼibataláb tam ti exomak an pextaláb. Jajáʼchik lej tsʼejwantálak pero in lej kulbetnálak kin bínaʼchik jawaʼ in kwaʼal. Jun a kʼicháj, jun i epchal in léʼak kin tsʼejwaliy i toltom u kʼimádhil. U kʼimádhil yab in lej léʼak kin bátsʼkʼunchij, pero an epchal in uluw: «Tam ti dhaykʼan an pextaláb, tu lej tólmiy an epchalchik axi u kʼwajíl al pil i bichow, jaxtám wawáʼ jayej i léʼ tu tolmix». U kʼimádhil ani nanáʼ i tsalpay ki nitsʼbiy axéʼchik xi epchal.

Talbél u wichiy ti Costa de Marfil, pero an atiklábchik junílekʼij in tomolnaʼ an eyal ani dhaykʼan jun i pextaláb, jaxtám ti noviembre ti 2004 u kaldháj kʼal i helicóptero ani expidh i ejtow ki neʼdhaʼ junchik i bolsa kʼal i toltomil. An helicóptero tu jilaʼ juʼtáj ti waʼatsak i soldados franceses. Tanáʼ tu wayits ani tam ti chudhey u neʼdháj kʼal i avión ti Suiza. U ulits ban sucursal tsʼejel akal, tanáʼ ti kʼwajatak an epchalchik axi ban Comité de Sucursal ani an epchalchik axi u exóbchix ban Escuela de Entrenamiento Ministerial ani in kʼimádhil. Jajáʼchik tu batsʼuw kʼal yan i kʼanidhomtaláb, in kwaʼalakits tsʼejkadh i kʼapnél ani i chocolate.

U aban wéʼ i kʼij ti Ghana ani tam ti wéʼ koyóts an pextaláb u wichiy ti Costa de Marfil. Al nixéʼ xi kʼij yaníl koʼoy ku kalej ban bichow ani i batsʼuw pílchik i uchbiláb. Patal axéʼ wéʼ tsekentálak, pero an kʼanidhomtaláb axi tu tejwamédhanchij an epchalchik tu lej tólmiy. A Debbie ani nanáʼ i uluw abal neʼets ki tsápnanchij ki kʼakʼnaʼ an kʼanidhomtaláb axi an epchalchik tu tejwamédhanchij. Patal an kʼibataláb axi i tamétnaʼ al nixéʼ an bichow tu exóbchij yan jantʼoj axi tu lej tolmiyámal abal ki áynanchij ki tʼojonchij a Jehová.

U ABAN TU TÓLMIX AL PIL I BICHOW

Ti 2006 an central mundial tu abchij jun i carta ani tu uchálak abal u aban tu tolmix ti Asia occidental (Oriente Medio). Junílekʼij kwaʼalak ki ujnaʼ tu kʼwajíl al pil i bichow ani ki exóbnaʼ jun i ít kawintaláb. Al nixéʼ xi bichow jayej neʼetsak ki exóbnaʼ yan jantʼoj, kom an atiklábchik in tametnálak yan i kʼibataláb tin kwéntaj an eyalchik ani yan i atikláb in lej kʼániyalak in bélomtal. I lej kulbétnaʼ kom an epchalchik u kawak al pílchik i kawintaláb. Jajáʼchik kʼwajatak lej junkudh ani in belkálak an olchixtaláb axi u pídhnalak kʼal in bichówil a Jehová. I lej jikʼpálak patal jawaʼ in tʼajálak an epchalchik abal kin kuxuy tam u tomolnábak kʼal in yanél, kʼal in juntal exóbal, kʼal in juntal tʼojnal ani kʼal in at-kʼwajíl.

Ti 2012 u kʼalej al jun i exbadh tamkuntaláb axi tʼajan ti Tel Aviv (Israel). Tanáʼ yabak jaykʼiʼ tʼajnének i púlik tamkuntaláb, tʼajatits ma ban Pentecostés axi ti támub 33.

Al nixéʼchik xi támub u aban al jun i bichow juʼtáj tu kʼánchinalak ku olnomáts. Wawáʼ i neʼdhálak i publicaciones ani u kalej tu ólnom ani u kʼalej al talchik i púlik tamkuntaláb axi ti circuito, pero u támkunalak wéʼ i atikláb. Juʼtámakits waʼatsak i soldados, pero yab u lej jikʼélak kom an epchalchik axi u kʼwajilak tanáʼ tu béletnaʼ.

U WICHIY TI ÁFRICA

Ti 2013 i batsʼuw kʼeʼat i uchbiláb, u aban tu tolmix ban sucursal axi ti Kinsasa (República Democrática del Congo). Axéʼ pel jun i bichow lej púlik ani alabél, pero waʼats yan i atikláb axi tsʼejwantál ani waʼats yan i pextaláb. Tam ti batsʼuw axéʼ xi uchbiláb, wawáʼ i tsalpay: «U kʼwajiyits ti África ti biyál, i exlálits jantʼoj tam kʼibataláb neʼets ki tamétnaʼ. Pero i yéjenchalak ki exlaʼ yan jantʼoj tin kwéntaj a África, ejtíl, i yéjenchalak ki exóbnaʼ jantʼiniʼ ku xeʼtsin juʼtáj ti yab tsʼejkadh an bel. Pero i tsápnanchij ki tʼajaʼ ti kwéntaj patal jawaʼ kʼwajatak in tʼajál alwaʼ an epchalchik. Jajáʼchik lej kuxudhak ani etsʼey xeʼetsak kulbél, belits abal yab in lej kwaʼalakchik i tumín. Jayej, in lej kulbetnálak an olnomtaláb ani in tsápnanchalak ka kʼalejchik kʼal an tamkuntaláb ani kʼal an púlik tamkuntaláb. Wawáʼ i tsuʼuw jantʼiniʼ a Jehová kʼwajatak tu láblinchal i tʼojlábil ani yan i atikláb tujey ti utel tin bichówil. Al patal an támub axi u kʼwajiy tu tolmix ti Congo-Kinsasa i exóbnaʼ yan jantʼoj axi tu lej tolmiyámal ti ejatal ani jayej i elaʼ yan i jaʼúb.

Ti 2017 u aban tu tolmix ti Betel ti Sudáfrica, axéʼ jats an sucursal más púlik juʼtáj tu kʼwajinek tu tolmix. U bijchat ki tʼajaʼ i tʼojláb axi yab jaykʼiʼ i tʼajámal ani i yéjenchalak ki exóbnaʼ yan jantʼoj, pero neʼetsak tu ku lej tólmiy patal jawaʼ i exobnámalits ti biyál. Tejéʼ waʼats i epchal axi in tʼojonchámal a Jehová al yan i támub ani i bajumal ki lej kʼanidhaʼchik. I lej kulbetnál abal an epchalchik kʼwajat lej junkudh belits abal pílchik in bichówil ani in káwintal. I tʼajámal ti kwéntaj abal a Jehová tu tólmiyal ku kʼwajiy junkudh, kom patal an epchal in tsápnanchal kin eyendhaʼ tin ejatal jawaʼ in exobnál, ani kin jalkʼuy in ey.

Al patal an támub axi i tʼojonchámal a Jehová, u kʼimádhil ani nanáʼ i batsʼúmal pílchik i uchbiláb, i tsapnanchámal ki ujnaʼ tu kʼwajíl ban bichowchik juʼtáj tu abnének ani i exobnámal pílchik i kawintaláb. Junchikíl i atsʼámal lej kʼibat, pero i tʼajámal ti kwéntaj abal a Jehová in eyendhál in bichówil ani an epchalchik abal tu ku tejwamédhanchij abal tu lej kʼanidhál (Sal. 144:2). Patal jawaʼ i exobnámal tu lej tolmiyámal abal ki áynanchij ki tʼojonchij más alwaʼ a Jehová.

U lej kʼakʼnál an exobchixtaláb axi tin pidhaʼ u tátajchik, jayej an tolmixtaláb axi tin pidhál u kʼimádhil ani in alwaʼ tʼiplábil i epchal axi tin puwél an tsabál. U kʼimádhil ani nanáʼ i léʼ ki áynanchij ki jilaʼ abal a Jehová tu ku exóbchij.