¿Jaleʼ ti tsemets yan i judíos? ¿Jaleʼ ti yab kʼaniyatchik kʼal a Dios?
Jitaʼchik in tʼajál axéʼ xi konowixtaláb pel kom in yajchiknámal o kom in kʼibámal jun in yanél ban tsemláj ani in aliyalchik abal ka pidhan i aychixtaláb kʼal jitaʼ. Yan i atikláb in tsálpayal abal jawaʼ in watʼaʼ an judíos játs axi más yajchik ani yab in éxbayalchik jaleʼ ti yab kʼaniyat kʼal a Dios.
Tsalap axi yab tekedh tin kwéntaj a Dios ani jawaʼ watʼey kʼal an judíos
Janamtaláb: Pel i walabtaláb ki konowiy jaleʼ ti a Dios in jilaʼ ka tsemdháj yan i judíos.
An chubaxtaláb: Yan i atikláb axi in kʼakʼnálak a Dios, in konowiyámal jaleʼ ti a Dios in jilál abal ki yajchiknaʼ. Jun i tʼiplab, a Habacuc in konowiy a Dios axéʼ: «¿Jaleʼ a jilál abal ku tsuʼuw yan i pojkaxtaláb, ani jaleʼ ti yab a tixkʼál an pojkaxtaláb?» (Habacuc 1:3, Martín Nieto, 1992). A Dios yab tsakuy kom tʼajchat axéʼ xi konowixtaláb, ma in tʼajaʼ abal ka jílkʼon dhuchadh ti Biblia.
Janamtaláb: A Dios yab in tʼajál ti kwéntaj max i yajchiknál.
An chubaxtaláb: A Dios in lej yajnál kin tsuʼuw abal waʼats yan i atikláb axi pojkax ani abal waʼats yan i pojkaxtaláb (Proverbios 6:16-19). An Biblia in ulal abal a Dios «in lej yajnaʼ tin ichích» tam ti in tsuʼuw abal waʼatsak yan i pojkaxtaláb tin kʼichájil a Noé (Génesis 6:5, 6). Jaxtám i exlál abal a Dios in lej yajnaʼ tam ti tsemdháj yan i judíos (Malaquías 3:6).
Janamtaláb: A Dios in tʼajaʼ abal ka odhnáj an judíos.
An chubaxtaláb: Ti kʼaʼál siglo, a Dios in jilaʼ abal an romanos kin talabédhaʼ a Jerusalén (Mateo 23:37–24:2). Pero talbél, yab in odhnámal nibal jun i bichow ani yab waʼats jun i bichow axi kin kʼanidhaʼ más, kom patal in tsuʼtal jununúl. An Biblia in ulal abal «a Dios yab in pokʼodh tsuʼtal an israelchik ani axi yab i Israel» (Romanos 10:12, Dios habla hoy [Versión Popular]).
Janamtaláb: Max a Dios chúbaxak tu kʼanidhál, yab neʼets kin jilaʼ abal ka tsemdháj yan i judíos.
An chubaxtaláb: Bélits abal a Dios yab in tʼajál abal ki yajchiknaʼ, tam junchikíl in jilál abal ka watʼey jun i yajchiktaláb (Santiago 1:13; 5:11).
¿Jaleʼ ti a Dios in jilaʼ abal ka tsemdháj yan i judíos?
A Dios in jilámal ka watʼey i yajchiktaláb ejtíl axéʼ abal kin tejwamédhaʼ jitaʼ in tomnál ti abatnom. An Biblia in ulal abal yab pel a Dios axi kʼwajat in abatnál an xéʼtsintaláb, pel a Satanás (Lucas 4:1, 2, 6; Juan 12:31). Ki tsuʼuw tsab i tsalap axi ti Biblia abal ki exbay jaleʼ ti a Dios in jilaʼ abal ka tsemdháj yan i judíos.
A Dios in jílchal an atikláb abal kin takuy jantʼoj játs axi in léʼ kin tʼajaʼ. A Dios in tejwamédhanchij a Adán ani a Eva jantʼoj játs axi in léʼak abal ka tʼajan, pero yab in níxoknaʼchik abal ka bélkaxin. Jajáʼchik in takuy tin kwetémtal jawaʼ in léʼakchik kin tʼajaʼ (Génesis 2:17; 3:6; Romanos 5:12). Jaxtám, ma ti nixéʼ a kʼicháj an atiklábchik in lej yajchiknámal. An publicación Statement of Principles of Conservative Judaism (Declaración de principios del judaísmo conservador) in ulal: «Yan kʼal an yajchiktaláb axi i watʼál, pel kom i takuyámal ki tʼajaʼ jantʼoj axi yab tekedh». Pero a Dios yab in kʼanchámal an atiklábchik kin tʼajaʼ jawaʼ in léʼ, in jilámal abal an xeʼtsintaláb kin takuy tin kwetémtal jawaʼ in léʼ kin tʼajaʼ.
A Dios in éjtowal kin tʼajaʼ jantʼoj abal kin tólmiy an judíos axi tsemdháj. Jajáʼ in ulumal abal neʼets kin edhaʼ patal an tsemélom, jayej an judíos axi tsemdháj tam ti waʼtsin an pextaláb. Jayej neʼets kin tʼajaʼ abal patal an atikláb axi in yajchiknaʼ, kin kʼayúm ukʼchiy jawaʼ in tsuʼuw ani jawaʼ in watʼaʼ (Isaías 65:17; Hechos 24:15). A Dios in lej kʼanidhál an atiklábchik, jaxtám i lej belál abal neʼets kin putuw patal jawaʼ in ulumal (Juan 3:16).
Yan i atikláb axi in yajchiknaʼ kʼal an pextaláb, talbél in éjtowchik kin atsʼaʼ kulbél ani in áynanchij kin belaʼ kʼal a Dios. ¿Kʼal jantʼoj ti tólmiyachik? In exlaʼchik jaleʼ ti a Dios in jilál ki yajchiknaʼ ani jantʼoj neʼets kin tʼajaʼ abal kin tixkʼaʼ.