¿In ts’ejkámal an ólchixchik k’al a Jehová jun i Biblia expidh abal jajá’chik?

An ólchixchik k’al a Jehová in eyendhámal yan i biblias abal ka exobláts, pero más in kulbetnál kin eyendha’ an Traducción del Nuevo Mundo, kom lej tajax an kaw ani yab jalchamej an tsalap. Jayej, k’wajat al yan i kawintaláb ani in eyendhál in bij a Dios.

• In bij a Dios. Yan i atikláb axi in ts’ejkál i biblias, yab in le t’ajálchik ti kwéntaj in bij a Dios. Jun i t’iplab, al jun i Biblia k’wajat utat setenta i bijláb in k’ál i atikláb axi tólmixin abal ka ts’ejkáj, pero yab k’wajat dhuchadh nibal jun i kalel in bij a Dios: Jehová.

  An Traducción del Nuevo Mundo, in kwa’al miles i kalel in bij a Dios ju’táj tin tomnál ka k’wajiy ani yab in olnál jita’chik tólmixin abal ka ts’ejkáj axé’ xi Biblia.

• Yab jalchamej i tsalap. Wa’ats yan i biblias axi punchinének i tsalap axi yab k’wajatak ban k’a’ál dhuchlab. Wa’ats jun i Biblia axi in wilk’ámal antsaná’ Mateo 7:13: «Kit otsits ban wí’leb axi xuyat, kom an wí’leb ani an bél axi tu ne’dhál ban infierno lej ts’ikodh». Pero an k’a’ál dhuchlab in ulalak «k’ibey abal ets’ey», yab in ulalak «infierno». Jita’chik in wílk’a’ nixé’ xi Biblia in tsálpayalak abal an atikláb axi pójkax, ne’ets ka odhnáj abal ets’ey ban infierno. Pero an Biblia yab játs jawa’ in lé’ kin ólna’. Jaxtám an Traducción del Nuevo Mundo in eyendhál an kaw «talabédha’ abal ets’ey».

• Yab k’ibat ka éxbayat. Jun i Biblia yab kwa’al ka jalchat i tsalap, pero jayej kwa’al ka éxbayat. Jun i t’iplab, yan i biblias in wilk’ál Mateo 5:3 k’al i kaw axi wé’ k’ibat ka éxbayat. Ejtíl, wa’ats jun axi in ulal: «Yan ti pidhóblidh axi ts’ewantálchik ti ál in espíritu». Pero yan i atikláb yab in éxbayal nixé’ xi kaw. Jaxtám, an Traducción del Nuevo Mundo in wilk’ál antsaná’ axé’ xi texto: «K’ijidh jita’chik in tsálpayal abal in yéjenchal a Dios».

An Traducción del Nuevo Mundo in eyendhál in bij a Dios, yab tixk’anchámej nibal jun i tsalap ani yab k’ibat abal ki exbay, ani jayej yab u nujuwáb. Jaxtám, millones i atikláb in éjtowal kin ajiy tin káwintal, bélits max yab in kwa’al i tumín abal kin ts’a’iy.