I tʼojláb axi talabedháj tam ti yabayej u tujél an pandemia

Támub ti támub, u pujnal cientos de miles i atikláb. Jaxtám u yejencháb más i atáj juʼtáj ka kʼakʼnáj a Jehová. An departamentos locales de Diseño y Construcción axi tin puwél an tsabál, in kwaʼalak tsalpadh abal ban támub 2020, kin tsʼejkaʼ o kin tʼojojoy 2.700 kʼal axéʼchik xi atáj.a

Pero an pandemia in kʼál an COVID-19 in tʼajámal abal ka kubdháj yan kʼal axéʼ xi tʼojláb. Jayej, abal ka beletnáj an epchalchik ani ka belkáj an eyal, an Kwenél i Ókʼnom in konchámal an Comité de Publicaciones abal kin wéʼ kubdhaʼ axéʼ xi tʼojláb. Pero ban támub 2020, éjtowat ka tʼojojyat ani ka tsʼejkáj watʼadh 1.700 i atáj juʼtáj ka kʼakʼnáj a Jehová, ani patal axéʼ tʼajan ókʼxidh ka tujey an pademia. Jayej talabedháj an tʼojláb al watʼadh 100 i sucursales. Ki tsuʼuw tsab kʼal axéʼ xi tʼojláb ani jayej ki tsuʼuw jantʼoj tam alwataláb in batsʼumal an epchalchik.

An sucursal axi ti Camerún. An sucursal axi kʼwajatak ti Duala, lej tsípkatsak ani in yéjenchalakits ka tsab tsʼejkáj. An Comité de Publicación in tsálpayalak kin tsab tsʼejkaʼ, pero neʼetsak ka kalej lej jálbidh. Jayej in tsálpayalakchik kin tsʼejkaʼ kʼeʼat i sucursal, o kin tsʼaʼiy jun i atáj ani kin tʼojojoy. Pero yab awits ka tʼajan axéʼ.

Tam, an epchalchik in exlaʼ abal an eyal kʼwajatak in tsʼejkál jun i bel, axi neʼets ka watʼey juʼtáj ti kʼwajat jun i atáj abal an púlik tamkuntaláb. An epchalchik in tsalpay abal max ka tsʼejkáj tanáʼ an sucursal, neʼetsak ka jílkʼon utat ban bél ani utat kʼal patal jawaʼ u yejencháb. Tam, an Kwenél i Ókʼnom in uluw abal ka tsʼejkáj an sucursal al jun i pejach i tsabál juʼtáj ti kʼwajat an atáj abal an púlik tamkuntaláb.

Abal ka tʼajan talchik i tʼojláb, an epchalchik in jalbiy jun i empresa abal ka tólmiyat. Antsanáʼ, an tʼojláb tʼajan más dhubat ani yab lej pákuwat i tumín. Yab pákuwat an tumín axi u tsálpayabak, jílkʼonej dos millones i dólares. An epchalchik axi u tʼojnalak ti Betel, in éjtowchik ka kʼalej ban ít sucursal tam ti yabayej u tujelak an pandemia in kʼál an COVID-19.

Xowéʼ, an betelitas axi ti Camerún kʼwajatchik más alwaʼ ani in kulbetnálchik juʼtáj u tʼojnal. In lej belálchik abal axéʼ xi sucursal pídhanchik kʼal a Jehová. Jun i tomkinél in ulal: «I lej kʼaknál axéʼ xi tsʼejwalixtaláb ani i léʼ ki tʼonchij más a Jehová».

An Oficina Remota de Traducción abal an tojolabal (México). Al yan i támub, an equipo de traducción abal an tojolabal, tʼojon ban sucursal axi ti Centroamérica, axéʼ kʼwajat utat ban Ciudad de México. An tojolabal u kawnáb ban municipio axi ti Altamirano ani ban municipio Las Margaritas, axéʼ an municipios in kwaʼal utat 1.000 kilómetros in owél ma ban sucursal. Jaxtám, an epchalchik axi u wílkʼom in atsʼálak kʼibat kin eyendhaʼ in káwintal. An sucursal jayej kʼibatak in atsʼál kin kaniy i epchalchik abal ti wílkʼom, o abal kin tʼajaʼ i grabaciones.

Jaxtám, an Comité de Redacción axi u okʼnáb kʼal an Kwenél i ókʼnom, in tsalpay abal más alwaʼ max an equipo de traducción ka kwajiy juʼtáj u kawnáb an tojolabal. Tam, an sucursal in tsʼaʼiy ani in tʼojojoy jun i atáj. Max tsʼejkámejak jun i atáj, o jalbiyámejak i oficinas, neʼetsak ka kalej más jálbidh.

Jun i epchal axi u wílkʼom, tu ólchal jantʼiniʼ tin atsʼál: «Ban 10 i támub axi in tʼojon ban sucursal yab u elaʼ nibal jitaʼ axi u kaw tojolabal. Xowéʼ, an oficina kʼwajat juʼtáj ti más u kawnáb an tojolabal, chudhél u éjtowal kin tʼilmáts tu káwintal. Axéʼ tin lej tólmiyal ban tʼojláb axi u tʼajál».

I tʼojláb axi u tsalpayáb ka tʼajan ban támub 2021

Max ka awits, ban támub 2021, u léʼnab ka tsʼejkáj 75 oficinas de traducción ani i atáj abal an Escuelas Bíblicas. Jayej u leʼnáb ka tʼajan 8 i tʼojláb al talchik i sucursales, ejtíl an tʼojláb axi ti Rámapo (Nueva York) ani ka jálkʼuyat an sucursales axi ti Argentina ani axi ti Italia. Jayej u yejencháb ka tsʼejkáj 1.000 i atáj tamkuntaláb. Waʼats jayej 6.000 i atáj tamkuntaláb axi in yéjenchal ka tsab tsʼejkáj, ani 4.000 axi in yéjenchal ka tʼojojyat.

¿Juʼtáj tu elnal an tumín abal ka tʼajan patal axéʼ xi tʼojláb? An epchal Lázaro González, axi u tólmix ban Comité de Sucursal axi ti Centroamérica, in ulal axéʼ tin kwéntaj an Oficina de Traducción abal an tojolabal: «An epchalchik axi u kʼwajíl ti Centroamérica yab in lej kwaʼalchik i tumín. Max an epchalchik axi tin puwél an tsabál yabak tu ku tólmiy, yab neʼets ki ejtow ki tsʼejkaʼ an oficinas de traducción axi u yejencháb. Kʼal an donaciones axi tataʼchik a binál, i éjtowal ki abaʼ an traductores ban kwenchaláb juʼtáj u kawnáb in káwintal. I lej kʼakʼnanchal an epchalchik kom in binál i donaciones kʼal in kulbétal». ¿A tʼajaʼchik ti kwéntaj? Axéʼ xi tʼojláb u tʼajnal kʼal patal an donaciones axi u bináb tin puwél an tsabál. Yan kʼal axéʼ xi donaciones u bináb ti donate.jw.org.