Juʼtáj ti yab wa’ats i internet, u eyendháb an señal in kʼál an satélite

Tam kin bajuw a ítsʼ, i lej léʼits ki tsuʼuw an programas ani an videos axi u kʼadhbáb ti JW Broadcasting. Pero an epchalchik axi ti África, yab in éjtowal kin tsuʼuw ti internet. ¿Jaleʼ?

Ti África yab lej waʼats i internet. Ani juʼtáj ti waʼats lej jálbidh ani yab lej alwaʼ. Jun i tʼiplab, ti Madagascar, jun i ókʼnom axi ban circuito in paʼbaʼ jun i programa axi ti Broadcasting ani koʼoy kin jalbiy 16 dólares.a Axeʼ játs jawaʼ in atál jun i atikláb al jun i semana.

Pero xowéʼ, lej yan i atikláb axi ti África in éjtowal kin tsuʼuw an programa JW Broadcasting, bélits abal yab in kwaʼal i internet. ¿Jantʼiniʼ tin tʼajálchik?

Ma ti 2017, yan i bichow axi ti África in éjtowalits kin tsuʼuw JW Broadcasting al jun i canal de televisión axi in yakʼwál an señal in kʼál an satélite. Axéʼ xi canal in éjtowalchik kin tsuʼuw chudhél chudhél, al 16 i kawintaláb, ani yab kwaʼal kin jálbiychik.

An ólchixchik kʼal a Jehová in jálbiyal jun i canal de televisión abal kin watʼbaʼchik. An señal in kʼál an satélite u ulel al 35 i pakdhaʼ bichow in kʼál an África subsahariana, abal axéʼ u jalbiyáb 12.000 dólares ta ítsʼ. Ani junchikíl, in jálbiyalchik kʼeʼat i canal abal ka tejwamedháj i tamkuntaláb axi kʼwajat ti watʼbáb. Antsanáʼ, yan i epchal in éjtowal kin tsuʼuw an púlik tamkuntaláb regional, jayej in éjtowalchik kin tsuʼuw tam jun i epchal axi ban central mundial, kin tsaʼbiy jun i sucursal ani kin bínaʼ jun i tʼilomtaláb.

Yan i atikláb ani i ólchixchik kʼal a Jehová, in tsuʼtal axéʼ xi canal de televisión. Pero yan i epchal, yab in kwaʼal jawaʼ in yéjenchal abal kin ejtow kin tsuʼuw. Jaxtám, al 3.670 i Atáj Tamkuntaláb punuwámej i patʼál in kʼál i satélite. Antsanáʼ, an epchalchik in éjtowal kin tsuʼuw JW Broadcasting ban Atáj Tamkuntaláb. Max ban Atáj Tamkuntaláb waʼtsits jun i televisión o jun i proyector, tam expidh in jálbiyal 70 dólares abal ka abchat axéʼ xi patʼál. Ani max yabchik in kwaʼal, tam kwaʼal kin jalbiy 530 dólares.

An epchalchik in atsʼál lej kulbél kom in éjtowal kin tsuʼuw axéʼ xi canal. Jun i ókʼnom axi ti Camerún in ulal: «U yanél ani nanáʼ i tsálpayal abal axéʼ pel ejtíl i maná ban desierto». Jun i epchal axi ti Nigeria, axi in bij Odebode, in ulal: «Oxíl ti semana u támkunal kʼal u yanél abal ki tsuʼuw axéʼ xi canal. U tsakámil in lej léʼits abal ku tamkun ani wilkʼidh tin konchal abal ku punchij an canal». A Rose, u kʼwajíl ti Nigeria ani jajáʼ in ulal: «¡U atsʼál lej kulbél! Ti biyál u lej tsuʼtalak an noticias, pero xowéʼ más u kulbetnál ku tsuʼuw JW. Tam u tsuʼtalak an noticias, dhubat in tsakúlak ani u kʼadhíl an presión. Pero patal jawaʼ u kalel ti JW, tin kanatbedhál ani tin tólmiyal ku atsʼaʼ alwaʼ. Játs an canal axi más u kulbetnál ku metʼaʼ. Pel jun i tsʼejwalixtaláb axi a Jehová tin pidhámal».

Ti Mozambique, jun i ókʼnom kʼal an circuito in ulal abal an tamkuntalábchik axi jajáʼ in tsaʼbiyal, in kwaʼalits patal jawaʼ u yejencháb abal kin batsʼuw an señal in kʼál an satélite ani kin tsuʼuwchik an canal JW. An epchalchik u ulel lej kʼijilej ti Atáj Tamkuntaláb abal kin tsuʼuw JW Broadcasting okʼxidh kʼal an tamkuntaláb.

Ti 2019, ti Johannesburgo (Sudáfrica) tʼajan i púlik tamkuntaláb internacional. An tʼilomtaláb axi in bínaʼ jun i epchal axi u tólmix ban Kwenél i Ókʼnom, watʼbáj al nueve i púlik tamkuntaláb. Abal ka watʼbáj an tʼilomtalábchik, eyendháj axéʼ xi canal. A Sphumelele, u tólmix ban Departamento Local de Broadcasting axi kʼwajat ban sucursal axi ti Sudáfrica, jajáʼ in ulal: «Ti biyál, i eyendhálak an internet abal ki watʼbaʼ. Pero u kalelak lej jálbidh kom kwaʼalak ki tsʼaʼiy i datos. Pero kʼal axéʼ xi canal, más tsaʼat ani yab u kʼalel an señal».

Kʼal an donaciones axi tatáʼchik a bínal, an epchalchik axi ti África in ejtowal kin tsuʼuw JW Broadcasting kʼal an señal in kʼál an satélite. I lej kʼakʼnál an donaciones axi tatáʼchik a binál ti donate.jw.org.