Jun i tolmixtaláb abal ki bínaʼ i exobintaláb kʼal an Biblia axi lej junits

Ti enero ti 2021, an Kwenél i Ókʼnom in ólnaʼ abal neʼets ka kaldháj jun i ít eyextaláb abal ka bináj i exobintaláb kʼal an Biblia, axi in bij: Kit kʼwajiy kulbéla ¿Jantʼoj a atsʼaʼ tam ti olnáj axéʼ xi olchixtaláb? A Mateo axi ti canadá, tu ólchal jantʼoj in atsʼaʼ: «¡Yab u belálak! Pero tam tu atsʼaʼ an tʼilomtaláb ani tam tu tsuʼuw an video jaleʼ ti tsʼejkáj axéʼ xi publicación, ani jantʼiniʼ an atiklábchik in batsʼuw lej alwaʼ axéʼ xi Publicación tam ti an epchalchik in ólchij. Axéʼ in tʼajaʼ abal nanáʼ jayej ku léʼnaʼits ku éyendhaʼ».

Axéʼ xi publicación neʼets kin lej tólmiy abal an atiklábchik kin exbay lej alwaʼ an exobintaláb kʼal an Biblia, axéʼ lej juníts kʼal an publicación axi i eyendhálak ti biyál. Max tatáʼ a kwaʼal axéʼ xi publicación, walám a tsuʼúmal jantʼoj játs axi jalkʼunének. ¿A léʼ ka exlaʼ? Jawaʼ jalkʼunének játs jantʼiniʼ ti tsʼejkáj an libro Kit kʼwajiy kulbél

Jun i ít libro axi lej juníts jantʼiniʼ ti tsʼejkámej

In tolow an úw. U yejenchabak jun i úw axi tolów abal ka tsʼejkáj an libro Kit kʼwajiy kulbél. ¿Jaleʼ? Axéʼ xi libro in kwaʼal watʼadh 600 i imágenes axi alwachik, más ke an libro Nos Enseña. Jayej yab in kwaʼal yan i letras nibal i imágenes. Axéʼ xi tsab in tʼajál abal yab ka tejwaméj alwaʼ. Abal jun lej dhadhat in tʼajál abal an imágenes ani an letras ka tejwaméj jun pokʼeʼ. Abal yab ka tejwaméj tam ka watʼey axéʼ, an epchalchik axi ban Departamento Internacional de Impresión en Wallkill (Nueva York) in takaʼ kin eyendhaʼ tseʼ i pílchik uw axi u eyendhábak ban imprentas. An Comité de Redacción kʼal Kwenél i Ókʼnom in tʼajaʼ ti kwéntaj axéʼ ani in tákuy axi más tolów. Axéʼ xi úw más wéʼ jálbidh, yab in bájuwal ejtíl axi i eyendhál kʼal axi más an publicaciones. Axéʼ in tʼajál abal jitaʼ kʼwajat ti exóbal kʼal an libro Kit kʼwajiy kulbél, yab kin léʼnaʼ kin waxaʼ in áytal an página.

In otʼól an libro. In otʼól an an libro Kit kʼwajiy kulbél lej juníts kʼal axi kʼeʼatchik an libro, kom lej alwaʼ tsʼejkadh. In otʼól axi kʼeʼatchik an libros lej tsʼumimíl yab antsanáʼ kʼal an libro Kit kʼwajiy kulbél. Jayej in tʼajaʼ abal an imagen ka tejwaméj más alabél jayej in tʼajál abal in otʼól an libro yab ka dhubat mitskʼan kom tekedh u eyendháb. In jalbíl an láminado mate, boʼ kalel más ke axi kʼeʼatchik an libro. Jaxtám an sucursales tʼójonchik junkudh abal kin elaʼ an láminado mate axi más tsaʼat.

Tam, ¿jaleʼ ti eyendháj axéʼ xi úw max más jálbidh? An epchal axi u tʼojnal ti impresión tu wilkʼanchal jantʼoj ti tsʼejkadh axéʼ xi libro: «Kom axéʼ xi libro neʼets ka lej eyendháj in yéjenchal ka kʼwajiy alwaʼ yan i kʼij». A Eduardo, axi u tʼojnal ban imprenta axi ban sucursal ti Brasil, in ulal: «Lej kulbél i atsʼál kom jun bichówil a Jehová, in eyendhál i alwaʼ eyextaláb abal kin tsʼejkaʼ axéʼ xi libro lej alwaʼ ani lej kuxudh ani antsanáʼ i eyendhál lej alwaʼ an donaciones axi u bináb».

An coronavirus in tʼajaʼ ki atsʼaʼ kʼibat ki kaldhaʼ axéʼ xi libro

An libro kit kʼwajiy kulbél i tujchij ki kaldhaʼ ti marzo ti 2021. Biyat kʼwajat an corona virus koʼoy ki tamétnaʼ talchik i tʼokʼbantaláb. Kom ti Betel yabáts i éjtow ku kalej ni abal ka kaniyat i betelitas abal ka tolmíxin ti imprenta, nibal i ít betelitas, jaxtám yab waʼatsak i tólmix. Ani kʼeʼatchik i imprenta koʼoychik ka mapuyat kom antsanáʼ tin konoy an éyalchik.

¿Jantʼoj in tʼajaʼchik an epchal abal kin watʼenchij axéʼ xi tʼokʼbantaláb? Tam tin tujchij ka tʼojon junílekʼij an imprenta, kaniyat i betelitas axi u kʼwajíl tanáʼ abal ka tólmixin al wéʼ i kʼij ban imprenta. A Joel axi u tʼojnal ban Departamento Internacional de impresión in uluw: «Kom axéʼchik xi epchal in léʼak ti lej tólmix ani kin exóbnaʼchik jantʼoj ít, tu lej tólmiy abal ki éjtow ki kaldhaʼ an tʼojlab axi i kwaʼalak».

Bélits abal i tametnámal yan i kʼibataláb, i ejtowámal ki kaldhaʼ yan i libros Kit kʼwajiy kulbél. Ani abal ka tsʼejkáj axeʼ xi libros, eyendhámej i planchas de impresión, laminado, úw, tinta ani pegamento. Tam ti neʼdhálakits boʼ a ítsʼ ti kaldhál axéʼ xi libro, pakuwamejits 2,3 millones de dólares, expidh kʼal axéʼchik. Abal yab ki alkʼidh pákuw an tumín, expidh i kaldhál jawaʼ an tamkuntaláb chubax in yéjenchal.

«Pel jun i tolmixtaláb lej alwaʼ»

¿Jantʼoj in t atsʼál an exóbchix ani an exóbalchik tam in eyendhál axéʼ xi ít libro? Jun i epchal axi u kʼwajíl ti Australia axi in bij Paul, in ulal: «U lej kulbetnál ku éyendhaʼ axéʼ xi ít libro, lej alabél ani in tólmiyal an exóbal abal kin ólnaʼ jantʼoj in tsálpayal. Jayej in chiʼdhál i olchixtaláb axi tájax, i konowixtaláb, i videos, imágenes, tablas ani jawaʼ an exóbal in éjtowalej kin tʼajaʼ. Lej alwaʼ ti tsʼejkadh ani u léʼ kin bajudhméj jantʼiniʼ in exóbchix».

Jun i atikláb axi ti Estados Unidos axi kʼwajat ti exóbal kʼal an Biblia in ulal: «U lej kulbetnál axéʼ xi ít libro. An imágenes tin tólmiyal abal yab ku ukʼchiy jawaʼ más exbadh. Jawaʼ u tsuʼtal ban video u ulel tu ichích ani tin tólminchal ku tʼajaʼ jawaʼ u exobnál». Axéʼ xi atikláb u kʼalelits al patal an tamkuntaláb ani u exóbal tsabíl ti semana.

In yéjenchalej ka kaldháj yan i libros ejtíl axéʼ, al yan i kawintaláb. An Kwenél i Ókʼnom kin ulúmal abal ka kaldháj al 710 i kawintaláb, 340 más ke an libro Nos enseña.

¿Juʼtáj tu kaldháb an tumín abal ka tsʼejkáj axéʼ xi libro? Kʼal an donaciones axi u bináb tin puwél an tsabál, axéʼ xi donaciones u bináb ti donate.jw.org. I lej kʼakʼnál an tolmixtaláb axi a binálchik. Antsanáʼ i éjtowal ki tsʼejkaʼ más i publicaciones ejtíl axéʼ, abal an atiklábchik kin exlaʼ a Jehová ani abal «ka kʼwajiy abal etsʼey» (Salmo 22:26).