A Jehová in lej tʼajál ti kwéntaj jitaʼchik yab u otsʼox

A Jehová in léʼ abal patal an atiklábchik kin exlaʼ tin kwéntaj in Eyaltal. (1 Timoteo 2:3, 4) Jaxtám, an ólchixchik kʼal a Jehová in tsʼejkál i Biblias ani i publicaciones axi tu tólmiyal ki exbay an Biblia, jayej abal jitaʼchik yab u otsʼox. In bichówil a Jehová in tsʼejkámal yan i publicaciones ti videoa al watʼadh 100 i kawintaláb ti señas. ¿Jantʼiniʼ tu tsʼejkab ani tu bukʼuwab axéʼchik xi publicaciones? ¿Jantʼiniʼ u tsʼejkab xowéʼ axéʼchik xi publicaciones?

¿Jantʼiniʼ u tsʼejkáb an videos axi ti señas?

Tin puwél an tsabál, waʼats yan i equipos axi u wilkʼom al pílchik i kawintaláb ti señas. Tam neʼets kin wilkʼaʼ i publicaciones in exóbnalchik alwaʼ jawaʼ neʼets kin wilkʼaʼ. Talbél in tákuyal jawaʼ tam wilkʼaxtaláb jilkʼon alwaʼ, axi yab kʼibat kin exbaychik. Ani talbél in tsʼejkalitschik an video. Xowéʼ waʼtsits 60 i equipos axi in wilkʼál i publicaciones abal ki exóbnaʼ an Biblia ani 40, expidh u wilkʼom junchikilkʼij.

Ti biyál kwaʼalak ka pakun yan i tumin abal ka tsʼejkaj axéʼchik xi videos. An cámaras ani jawaʼ ka eyendháj abal ka tsʼejkáj axéʼchik xi videos u kalelak lej jálbidh. Junchikíl kwaʼalak ki tsʼejkaʼ al jun i estudio de grabación ani tam kin yéjenchij, kwaʼalak ka tʼojojoyat jun i atáj abal ka tʼajan axéʼ xi video. U pakuwabak $30,000 dólares,b abal ka tsʼejkaj jun i video de señas.

Abal ka eyendháj alwaʼ an donaciones, in bichówil a Jehová in aliyámal jantʼoj kin tʼajaʼ abal yab kin pakuw yan i tumín abal ka tsʼejkáj axéʼchik xi videos. Jaxtám, xowéʼ kʼwajat i eyendhál i equipos axi más ít axi kin tʼajaʼ yan jantʼoj ani yab ka kalej jalbidh. Xowéʼ yabáts i yéjenchal ki kubaʼ jun i estudio de grabación. Xóʼ, axi u wilkʼomchik in éjtowal kin tʼajaʼ jun i video juʼtáj tu tʼojnál, expidh in yéjenchal jun i fondo verde o croma. Tam al jun i video u tejwamél talchik i epchal, in éjtowal kin tʼajaʼ an grabación ti oficina juʼtáj tu tʼojnal.

Jayej i tsʼejkámal i programas abal ki tólmiy an epchalchik abal kin tsʼejkaʼ i publicaciones. An epchalchik in lej kʼakʼnál axéʼchik xi tolmixtaláb, kom antsanáʼ in éjtowal kin tʼajaʼ más dhubat an tʼojláb. Jun i epchal axi in bij Alexánder in ulal: «U lej kʼakʼnál kom wilkʼidh u kalel i videos ti lenguaje de señas. Chudhél u tsuʼtal jun».

Xowéʼ i pakuwal watʼadh 4.000 i dólares abal ki koʼoy an equipo abal an tʼojláb. Kʼakʼnámal kʼal axéʼ xowéʼ i éjtowal ki tʼajaʼ más i videos abal an lenguajes de señas.

¿Jantʼiniʼ ti bukʼuwáb axéʼchik xi videos?

Talbél ti tsʼejkámal an video, kwaʼal ki tejwamédhanchij jitaʼ in yéjenchal. Ti biyál, i abchalak an grabaciones jun i compañía abal kin tsʼejkaʼ i copias al i videocintas ani i DVD, ani abal kin tʼajaʼ axéʼ xi tʼojláb, kwaʼalak ki jálbiy. Talbél, axéʼchik xi videocintas i abalak ti tamkuntaláb. Abal ka tʼajan patal axéʼ xi tʼojlab i yejenchalak yan i kʼij ani i tumín. Expidh ban tamub 2013 i bajuw ki pakuw 2.000.000 de dólares abal ka tsʼejkáj an videos abal jitaʼchik yab u otsʼox.

An epchalchik lej kulbél kʼal axéʼchik xi videos. Bélits abal tam junchikíl lej kʼibatak in atsʼál kin éyendhaʼ kom kʼwajatak ti yánel an videocintas ani an DVD. Tam junchikíl junkats an libro kʼal an Biblia, in eyendhálak yan i DVD. Jun i epchal axi u kʼwajíl ti Brasil axi in bij Gilnei in ulal: «Tam u leʼak ku aliy jun i texto, kwaʼalak ku aliy jawaʼ tam videocinta in kwaʼalak an capítulo ani talbél ku aliy an versículo. Lej tsekentalák ki tʼajaʼ». Jun i epchal axi in bij Rafayane, axi in eyendhálak axéʼchik xi DVD, in ulal: «Tam u léʼak ku exóbnaʼ an Biblia, lej tsekentalak u atsʼál, kom u kʼibalak yan i kʼij abal ku aliy an textos ani an referencias axi u léʼak ku exóbnaʼ». Ani abal ku kʼalej tu ólnom, i neʼdhálak an videocintas ani an DVD abal an atiklábchik axi in kwaʼal i tele kin éjtow kin tsuʼuw. Ani talchik ma in neʼdhálak an reproductor. Wéʼ talbél kalej an reproductor de DVD axi in kwaʼal i pantalla, axéʼ tu lej tólmiy abal ki éjtow ki tejwamédhanchij an atiklábchik an videos. Jun i epchal axi ti Estados Unidos axi in bij Bobby, in ulal: «Max u tejwamedhámalits jun i texto ani u leʼ ku punuw kʼeʼat kwaʼalak ku jalkʼuy an DVD. Jaxtám ku eyendhaʼ an Biblia ban olnomtaláb lej kʼibatak u atsʼál».

Ti tamub 2013, in bichow a Jehová in kaldhaʼ an aplicación JW Library Sign Language kʼal axéʼ, an epchalchik in éjtowalakits kin punuw an video o kin paʼbaʼ ti teléfono o ti tablet. Tam ti kʼaʼál expidh u tejwamelak ti lenguaje de señas americano. Pero ban tamub 2017, itmedháj abal patal jitaʼchik yab otsʼox kin éjtow kin tsuʼuw. An epchalchik kʼwajatak lej kulbél. Jun i epchal axi ti Brasil axi in bij Juscelino, in ulal: «U lej jikʼpaʼ. U tsuʼuw jantʼiniʼ a Jehová in léʼak abal ki koʼoy tsapik i junkuntal kʼal Jajáʼ, ejtíl axi más an epchalchik. Jaxtám, tam ti kalej an aplicación u léʼnaʼ ku exobnaʼ más an Biblia».

Xowéʼ ta kʼicháj i kaldhál yan i videos ani i kʼadhbal ti jw ani ti JW Library Sign Language. Xowéʼ i eyendhál lej wéʼ i kʼij abal ki wilkʼaʼ, ki tʼajaʼ an grabación ani ki kʼadhbaʼ an publicaciones. An publicaciones abal jitaʼchik yab u otsʼox. U kalel junax kʼal axi más an publicaciones.

Ki lej tʼajaʼ ti kwentaj jawaʼ in ulal an epchalchik axi yab u otsʼox. Jun i epchal axi in bij Klízia in ulal: «Yab waʼats kʼeʼat i kʼakʼnaxtaláb axi chubax ka tʼeʼpin kʼal axi yab otsʼox, expidh in bichówil a Jehová u tʼeʼpinal abal ki koʼoy patal jawaʼ ki yéjenchij ani abal ki koʼoy tsapik i bélomtal». Vladimir in ulal: «Kʼal an videos axi u tsʼejkáb abal wawaʼ. U tsuʼtal abal a Jehová in kʼanidhál patal an atiklábchik. Yab expidh jitaʼchik u otsʼox».

Yan kʼal an videos axi kʼwajat ti señas in ulal axéʼ: «Axéʼ xi videos u bukʼuwab tin puwél an tsabál abal kin tólmiy an atiklábchik kin exbay an Biblia ani u tsʼekáb kʼal an tumín axi an atiklábchik in binál kʼal in kulbétal». I lej kʼakʼnál an donaciones axi u bináb tin puwél an tsabál ti donate.jw.org. Kʼal axéʼ xi tumín u tsʼejkáb i Biblias ani i publicaciones abal ki exóbnaʼ an Biblia, jayej u tsʼekab abal an atikláb axi yab u otsʼox.