¿Jantʼoj tam exobintaláb i kaldhál al tsablom i cartas axi in dhuchaʼ a Pedro?

1. ¿Jantʼoj tam tʼojláb pidhan an abatwálej Pedro kʼal a Jehová, okʼxidh ka tsemets?

AN ABATWÁLEJ Pedro in tʼojonchij a Jehová al yan i támub. Xeʼtsin kʼal a Jesús ti ólnom, tolmixin abal ka olnáj an alwaʼ kaw al pílchik i bichow ani tolmixin ban kwenél i ókʼnom. Tam ti a Pedro wéʼits neʼetsak ka tsemets, pidhan kʼeʼat i tʼojláb kʼal a Jehová. Ban támub 62 ma ti 64, a Jehová in tʼajaʼ abal a Pedro kin dhuchaʼ tsab i cartas, jats an primera ani segunda de Pedro. An abatwálej Pedro in léʼak abal talbél tam jajáʼ ka tsemets, axéʼ xi tsab i cartas ka eyan abal an epchalchik (2 Ped. 1:​12-15).

2. ¿Jaleʼ ti neʼetsak ka lej eyan an cartas axi in dhuchaʼ an abatwálej Pedro?

² An abatwálej Pedro in dhuchaʼ axéʼ xi tsab i cartas tam ti an epchalchik kʼwajatak in tametnál yan i kʼibataláb (1 Ped. 1:6). Waʼatsak i atikláb axi xeʼetsak in bukʼuwal i exobchixtaláb axi yab chubax ani in nixoknálak an epchalchik abal kin tʼajaʼ i kidháb tʼajbiláb (2 Ped. 2:​1, 2, 14). An epchalchik axi u kʼwajílak ti Jerusalén wéʼits neʼetsak kin tamétnaʼ jun i kʼibataláb lej púlik, kom an romanos neʼetsak kin otsánchij an bichow ani kin talabédhaʼ an templo (1 Ped. 4:7). Jaxtám, an cartas axi an abatwálej Pedro in dhuchaʼ, neʼetsak ka lej eyan abal an epchalchik kin watʼenchij patal nixéʼ xi kʼibataláb, ani jayej abal an kʼibataláb axi neʼetsak kin tamétnaʼ talbél.b

3. ¿Jaleʼ ti lej exbadh ki exóbnaʼ an cartas axi in dhuchaʼ an abatwálej Pedro?

³ A Pedro in dhuchaʼ axéʼ xi tsab i cartas abal kin abchij an epchalchik axi ti kʼaʼál siglo, pero a Jehová in tʼajaʼ abal ka jílkʼon dhuchadh ti Biblia, kom jayej in léʼak abal ka eyan abal wawáʼ (Rom. 15:4). Xowéʼ ta kʼicháj, i tametnál yan i kʼibataláb ani an xeʼtsintaláb jayej tu nixál abal ki tʼajaʼ jawaʼ kidháb, nixéʼ in éjtowal kin tʼajaʼ abal ki atsʼaʼ kʼibat ki tʼojonchij a Jehová. Lej wéʼits neʼets ki tamétnaʼ jun i kʼibataláb más púlik, kom neʼets ka talabedháj axéʼ an xeʼtsintaláb. Jaxtám, an cartas axi in dhuchaʼ an abatwálej Pedro neʼets tu ku tólmiy abal ku kʼwajiy tʼojojodh abal in kʼichájil a Jehová. Jayej neʼets tu ku tólmiy abal yab ki tsʼejnaʼ an atiklábchik ani abal ku kʼanidháxin más. Ani jayej neʼets ka tólmiyat an ókʼnomchik axi ti tamkuntaláb, abal jajáʼchik kin béletnaʼ más alwaʼ an epchalchik.

KU KʼWAJIY TʼOJOJODH

4. ¿Jantʼoj in éjtowal kin tʼajaʼ abal ka tsaʼkan i bélomtal? (2 Pedro 3:​3, 4).

⁴ Waʼats yan i atikláb axi yab in belál jawaʼ in ulal an Biblia abal neʼets ka watʼey axi taʼtal a kʼicháj. Wawáʼ biyálits ti ólchal an atiklábchik abal axéʼ an xeʼtsintaláb neʼets ka talabedháj, jaxtám yan i atikláb tu telál, kom yab in tsuʼúmal ka putun axéʼ xi kaw ani in tsálpayal abal yab jaykʼiʼ neʼets ka ulits (ka ajiy 2 Pedro 3:​3, 4). Walám ban olnomtaláb u uchnének nixéʼ, o walám ban tʼojláb o jun i juntal exóbal. Nixéʼ awits kin tʼajaʼ abal wawáʼ jayej ki tsalpay abal walám yab neʼets ka ulits in kʼichájil a Jehová. ¿Jantʼoj neʼets tu ku tólmiy abal yab ku tsalpaxin antsanáʼ? Ki tsuʼuw jawaʼ in uluw an abatwálej Pedro.

5. ¿Jantʼoj neʼets tu ku tólmiy abal ki aychij kʼal i kʼayaʼtaláb in kʼichájil a Jehová? (2 Pedro 3:​8, 9).

⁵ Yan i atikláb in tsálpayal abal a Jehová lej oweyits abal kin putuw jawaʼ in ulúmal. Pero a Pedro in uluw jantʼoj lej exbadh, in uluw abal a Jehová lej pilits jantʼiniʼ tin ajiyal an kʼij (ka ajiy 2 Pedro 3:​8, 9). A Jehová in ajiyal mil i támub ejtíl max pel junkats a kʼicháj. Jayej, a Jehová lej kʼayaʼlidh ani yab in léʼ abal ka talabedháj nibal jun i atikláb tam ka ulits in kʼichájil. Pero nixéʼ a kʼicháj neʼets ka ulits ani neʼets ka talabedháj axéʼ an xeʼtsintaláb, jaxtám i léʼ ki eyendhaʼ alwaʼ an kʼij axi i kwaʼal abal ki ólnaʼ an alwaʼ kaw.

6. ¿Jantʼoj i éjtowal ki tʼajaʼ abal yab ki ukʼchiy abal wéʼits neʼets ka ulits in kʼichájil a Jehová? (2 Pedro 3:​11, 12).

⁶ An abatwálej Pedro tu uchaʼ abal yab ki ukʼchiy abal lej utatits in kʼichájil a Jehová (ka ajiy 2 Pedro 3:​11, 12). ¿Jantʼoj i éjtowal ki tʼajaʼ abal yab ki ukʼchiy? Ki tsalpay chudhél chudhél kʼal patal an alwaʼtaláb axi neʼets ki batsʼuw tam ku kʼwajiyits ban ít tsabál. Ka tsalpay abal it kʼwajatits al jun i tsabál axi lej tʼokat, tanáʼ waʼats yan i kʼapnél axi lej kujuw ani ti tʼajchal alwaʼ. Ka tsalpay abal neʼets ka ejtsin yan i atikláb axi biyálits ti tsémenek ani neʼets ka ejtow ka wilkʼanchij an kʼej kaw axi ti Biblia. Ki tsalpay kʼal patal axéʼ neʼets tu ku tólmiy abal yab ki ukʼchiy abal u kʼwajílits tin taltal axéʼ an xeʼtsintaláb, jayej neʼets tu ku tólmiy abal ku tʼojojon abal in kʼichájil a Jehová. Wawáʼ i exlálits jantʼoj neʼets ka watʼey ban kʼicháj axi taʼtal, jaxtám yab i jilál tu ku kʼambiy jitaʼchik in bukʼuwal i exobchixtaláb axi yab chubax (2 Ped. 3:17).

YAB KI TSʼEJNAʼ AN ATIKLÁBCHIK

7. ¿Jantʼoj awits ki watʼaʼ max i tsʼejnál axi más?

⁷ Wawáʼ i exlálits abal in kʼichájil a Jehová kʼwajat lej utat, jaxtám i léʼ ki tólmiy an atiklábchik abal kin exlaʼ an alwaʼ kaw. Pero walám junchikíl i tsʼejnál ki tʼilmay an atiklábchik tin kwéntaj an Biblia. A Pedro jayej jikʼey ban akal tam ti yakʼwan a Jesús ani in uluw abal yab pelak i aykol kʼal a Cristo. Oxíl i kʼalel in uluw abal yab in exlál (Mat. 26:​69-75). Pero yab in jilaʼ abal ka atáj kʼal an jikʼeltaláb, jaxtám talbél jajáʼ in uluw: «Yab kit jikʼey ani yab ki tʼeʼpin» (1 Ped. 3:14). Axéʼ tu tejwamédhanchal abal wawáʼ jayej i éjtowal ki ataʼ an jikʼeltaláb ani yab ki tsʼejnaʼ axi más.

8. ¿Jantʼoj neʼets tu ku tólmiy abal yab tu ku ataʼ an jikʼeltaláb? (1 Pedro 3:15).

⁸ ¿Jantʼoj neʼets tu ku tólmiy abal yab ki tsʼejnaʼ axi más? An abatwálej Pedro in uluw axéʼ: «Kʼal patal a ichích ka kʼakʼnaʼ a Cristo» (ka ajiy 1 Pedro 3:15). Neʼets ki tʼajaʼ axéʼ max ki tsalpay abal a Jesús kʼwajatits ti tsʼalej tiwaʼ ti éb ani pidhnének yan in éy. Max jun a kʼicháj it xeʼets ti ólnom ani a atsʼál it wéʼ jikʼél, ka tsalpay abal a Jesucristo pélits i tsʼalej, jayej ka tsalpay abal tiwaʼ ti éb jajáʼ kʼwajat ti tʼojnal kʼal millones i ángeles. Ani yab ka ukʼchiy abal a Jesús in uluw abal «pidhnének kʼal a Dios kin ábatnaʼ patal axi ti éb ani axi ti tsabál», ani abal neʼets ka kʼwajiy kʼal wawáʼ chudhél chudhél, ma ka taley an xeʼtsintaláb (Mat. 28:​18-20). An abatwálej Pedro in uluw abal kwaʼal ku kʼwajiy «tsʼejkakadh kʼal i kaw», abal ki ólnaʼ jawaʼ i belál. Ani tatáʼ, ¿a léʼ ta ólnom ban escuela, ta tʼojlábil, o pil juʼtáj? Max játs antsanáʼ, ka tsalpay jaykʼiʼ ti neʼets ka tʼajaʼ ani ka tʼojojoy alwaʼ jawaʼ neʼets ka uluw. Ka konchij a Jehová ti tólmiy abal yab kit jikʼey ani ka lej belaʼ abal Jajáʼ neʼets ti tólmiy abal yab ka tsʼejnaʼ an atiklábchik (Hech. 4:29).

«KIT LEJ KʼANIDHÁXIN»

9. ¿Jaykʼiʼ yab in tejwamédhaʼ i kʼanidhomtaláb a Pedro? (Ka tsuʼuw jayej imagen).

⁹ A Pedro in exóbnaʼ kin tejwamédhaʼ i kʼanidhomtaláb. Jajáʼ in atsʼaʼ tam ti a Jesús in bínaʼ axéʼ xi abatnaxtaláb: «Kit kʼanidháxin jun kʼal axi jun, jantʼiniʼ nanáʼ tu kʼanidhálchik antsanáʼ pel a uchbíl kit kʼanidháxin» (Juan 13:34). Pero jun a kʼicháj, a Pedro yab in léʼnaʼ ti kʼapul kʼal an epchalchik axi yab pelak i judíos. An abatwálej Pablo in wéʼ kʼwiyaʼ a Pedro ani in uchaʼ abal yab tekedh jawaʼ kʼwajatak in tʼajál (Gál. 2:​11-14). A Pedro in batsʼuw tam ti boliyat kʼal a Pablo ani in tsápnanchij kin jalkʼuy in ey. Ban tsablom i cartas axi in dhuchaʼ a Pedro, jajáʼ tu exóbchij abal yab expidh kwaʼal ki uluw abal i kʼanidhál an epchalchik, jayej kwaʼal ki tejwamédhaʼ.

10. ¿Jantʼoj neʼets tu ku tólmiy abal ki chubax kʼanidhaʼ an epchalchik? (1 Pedro 1:22).

¹⁰ A Pedro in uluw abal kwaʼal ki tʼajaʼ tu «lej chubax kʼanidhom kʼal an epchalábchik» (ka ajiy 1 Pedro 1:22). I tsápnanchal ki tʼajaʼ antsanáʼ kom i léʼ ki bélkaʼ patal jawaʼ tu uchál a Jehová ani wawáʼ i exobnámal abal a Jehová yab in pokʼodh tsuʼtal an atiklábchik (Hech. 10:​34, 35). Max expidh i kʼanidhál talchik i epchal ti tamkuntaláb, tam yab exom i belkál jawaʼ a Jesús tu exóbchij. Walám wawáʼ i watʼál ejtíl a Jesús, waʼats i epchalchik axi i lej kulbetnál ki jaʼúbnaʼ (Juan 13:23; 20:2). Pero a Pedro tu uchaʼ abal kwaʼal ki tejwamédhanchij i chubax kʼanidhomtaláb patal an epchalchik. Axéʼ xi kʼanidhomtaláb pel ejtíl axi i koʼonchal i yanél (1 Ped. 2:17).

11. ¿Jantʼiniʼ i tejwamedhál abal kʼwajat i lubál ki tʼajaʼ tu kʼanidhom?

¹¹ A Pedro tu uchaʼ axéʼ xi kaw: «Ka lubaʼ kit júniniʼ kʼanidháxin». Tejéʼ, an kaw «lubaʼ» tu exóbchal abal kwaʼal ki tsápnanchij ki kʼanidhaʼ ma jitaʼchik i atsʼál abal yab neʼets ki ejtow ki kʼanidhaʼ. Jun i tʼiplab, ¿jantʼoj neʼets ka tʼajaʼ max jun i epchal ti uchál jantʼoj axi yab a kulbétnaʼ, o ti uchaʼ jun i kaw axi a yajnaʼ? Walám neʼets ka atsʼaʼ kʼibat ka kʼanidhaʼ ani walám neʼets ka léʼnaʼ ka wíchbanchij jawaʼ ti tʼajchij, pero a Jehová yab neʼets kin alwátnaʼ nixéʼ, kom yab játs jawaʼ exóbchat a Pedro kʼal a Jesús kin tʼajaʼ (Juan 18:​10, 11). An abatwálej Pedro in dhuchaʼ axéʼ xi kaw: «Max jitaʼ ti tʼajchal kidháb ani max jitaʼ ti odh-uchál, yab ka wíchbanchij, expidh ka kónchinchij i lablinchixtaláb kʼal a Dios» (1 Ped. 3:9). Max ki lubaʼ ki kʼanidhaʼ patal an atikláb, neʼets ki tʼajaʼ tu alwaʼ inik kʼal patal, ma kʼal jitaʼchik tu tʼajchámal jantʼoj.

12. a) Max chubax i kʼanidhál an epchalchik, ¿jantʼoj neʼets ki léʼnaʼ ki tʼajaʼ? b) Kʼal jawaʼ a tsuʼuw ban video Cuidemos nuestra valiosa unidad, ¿jantʼoj játs axi a léʼ ka tsápnanchij ka tʼajaʼ?

¹² Ban kʼaʼál carta axi in dhuchaʼ a Pedro, jayej in uluw: «Ka lubaʼ ki lej kʼanidháxin», ani in uluw abal «axi u kʼanidhom jayej u lej pákwlanchix» (1 Ped. 4:8). Tam ti a Pedro kʼwajatak in dhuchál axéʼ xi kaw, walám in tʼilaʼ jawaʼ exóbchat kʼal a Jesús jun a kʼicháj tam ti kʼwájatakchik ti tʼilom. A Pedro in tsalpay abal jajáʼ lej alwaʼ inik kom in uluw abal neʼetsak kin pákwlaʼ «ma buk i kalel» max ka tʼajchat jantʼoj, pero kʼal a Jesús exóbchat abal yab kin tʼajaʼ antsanáʼ. Kwaʼalak kin pákwlanchij «ma 77 i kalel», yab kwaʼalak kin ajiy jayíl in pákwlanchal jitaʼ. Axéʼ tu exóbchal abal etsʼey kwaʼal ki pákwlanchij axi más (Mat. 18:​21, 22). ¿A atsʼámal kʼibat ka bélkaʼ axéʼ xi exobchixtaláb? Yab ka walbaʼ ta báʼ, ka tsápnanchij ka tʼajaʼ. Patal axi i tʼójonchal a Jehová u wálbidh ani jaxtám junchikíl i atsʼámal kʼibat ki pákwlanchij jitaʼ. Tam, ¿jantʼoj a éjtowal ka tʼajaʼ? Ka tsápnanchij ka tʼilmay an epchal abal ka tsʼejkan an kʼibataláb, ani ka tsápnanchij ka pákwlanchij.c

ÓKʼNOMCHIK, KA BÉLETNAʼ ALWAʼ AN EPCHALCHIK

13. ¿Jaleʼ ti awits kin atsʼaʼ kʼibat an ókʼnomchik kin béletnaʼ an epchalchik?

¹³ Walám a Pedro yab jaykʼiʼ tin ukʼchiy an kaw axi uchan kʼal a Jesús tam ti edháj: «Ka alwaʼ béletnaʼ axi pel u kʼal ani pel ejtíl i ovejas» (Juan 21:16). Max tatáʼ pel i ókʼnom, a exlál abal kwaʼal ka bélkaʼ axéʼ xi abatnaxtaláb, pero jayej a exlál abal wéʼ kʼibat ka jolkʼaʼ i kʼij abal ka putuw kʼal axéʼ. An ókʼnomchik in kwaʼal yan i tʼojláb, jajáʼchik kwaʼal kin béletnaʼ alwaʼ in yanél, kwaʼal kin pidhaʼchik jawaʼ in yéjenchal, kin kanatbédhaʼ ani kin tolmiychik abal ka utey kʼal a Jehová. Kʼeʼat jantʼoj axi in tʼajál an ókʼnomchik játs kin ókʼnaʼ an olnomtaláb, kwaʼal kin tʼojojoy patal an pejach axi neʼets ki exóbnaʼ ti tamkuntaláb ani kwaʼal kin tʼojojoy i tʼilomtaláb axi neʼets kin bínaʼ ban púlik tamkuntaláb. Talchik i ókʼnom u tolmix kʼal an Comités de Enlace con los Hospitales o kʼal an Departamento Local de Diseño y Construcción. Axéʼ tu tejwamédhanchal abal an ókʼnomchik in kwaʼal yan i tʼojláb.

14. ¿Jaleʼ ti an ókʼnomchik in léʼ kin béletnaʼ an epchalchik ani kʼal jantʼoj ti neʼets ka tólmiyat? (1 Pedro 5:​1-4).

¹⁴ An abatwálej Pedro in uchaʼ axéʼ xi kaw kʼeʼat i epchalchik axi jayej pelak i ókʼnom: «Ka píjchiy an kwenél epchaláb kʼal in káwintal a Dios, juntit punumej kʼal a Dios ti béletnom» (ka ajiy 1 Pedro 5:​1-4). Wawáʼ i exlál abal an ókʼnomchik in lej kʼanidhál an epchalchik ani in léʼ kin béletnaʼ. Pero walám junchikíl in atsʼál abal yab neʼets kin ejtow kin putuw kʼal nixéʼ xi uchbiláb, kom kʼwajatchik tsekenek o lej tʼojlidh. Max játs jawaʼ kʼwajat a watʼal, ka ólchij a Jehová jantʼiniʼ ta atsʼál. A Pedro in dhuchaʼ: «Max i pidhnének i witʼomtaláb ti tolmix tin tʼojlábil a Dios, ka tólmiy kʼal patal in tsap a ichích axi ti pidhál a Dios» (1 Ped. 4:11). Walám an epchalchik kʼwajat in tametnál jun i kʼibataláb axi yab neʼets ka ejtow ka tíxkʼanchij tatáʼ ani yab neʼets ka tixkʼan al axéʼ an xeʼtsintaláb, pero etsʼey ka tʼilaʼ abal a Jesucristo «játs an púlik béletnom». Jajáʼ in éjtowal kin tʼajaʼ yan jantʼoj abal kin tólmiy an epchalchik xowéʼ ani al an kʼicháj axi taʼtál. A Jehová in aychal abal an ókʼnomchik kin kʼanidhaʼ an epchalchik, kin béletnaʼ ani kin punchij jun i alwaʼ tʼiplab.

15. ¿Jantʼoj in tʼajál jun i ókʼnom abal kin béletnaʼ an epchalchik? (Ka tsuʼuw jayej imagen).

¹⁵ Jun i ókʼnom axi in bij William in pidhál yan in exbádh kin kanatbédhaʼ an epchalchik. Tam ti tujey an COVID-19, jajáʼ ani axi más an ókʼnomchik tʼilmáts ani in uluwchik abal neʼetsak kin tsápnanchij semana ti semana, kin tawnaʼ patal an publicadores axi ti tamkuntaláb. ¿Jaleʼ tin tʼajaʼchik nixéʼ? Jajáʼ in ulal: «Yan i epchal kʼwajatak kwetém tin kʼimáʼ, ani yab in kwaʼalak kʼal jitaʼ ka tʼilmáts, nixéʼ awitsak kin tʼajaʼ abal jajáʼchik ka tujey ti tsalpax ani ti tʼeʼpinal». Tam a William kin tsuʼuw abal jun i epchal kʼwajat tʼeʼpidh, in tsápnanchal kin otsʼówiy abal kin exlaʼ jantʼoj in yéjenchal ani antsanáʼ kin tólmiy. In aliyal jantʼoj ti jw.org kʼal axi kin ejtow kin tólmiy an epchal, ejtíl jun i video. A William in ulal: «Lej exbadh ki kanatbédhaʼ an epchalchik xowéʼ. Antsanáʼ jantʼiniʼ i tsápnanchal ki tólmiy an atiklábchik abal kin exlaʼ a Jehová, jayetsej in tomnál ki tʼajaʼ kʼal an epchalchik, kwaʼal ki béletnaʼchik ani ki tólmiy abal kin áynanchij kin kʼakʼnaʼ a Jehová».

KI JILAʼ ABAL A JEHOVÁ KIN ÁYNANCHIJ TU KU EXÓBCHIJ

16. ¿Jantʼiniʼ i éjtowal ki eyendhaʼ jawaʼ i exobnámal ban cartas in kʼál a Pedro?

¹⁶ Al axéʼ xi exobintaláb expidh i tsuʼúmal talchik i tsalap axi i kaldhámal al tsablom an cartas axi in dhuchaʼ a Pedro. Walám a tʼajaʼ ti kwéntaj abal waʼats jantʼoj axi in yéjenchal ka tʼajaʼ. Ejtíl, ka jolkʼaʼ más i kʼij abal ka tsalpay jantʼiniʼ neʼets kit kʼwajiy ban alabél tsabál. Jayej walám a tsalpayámal abal a léʼ ka tsápnanchij ti ólnom ta tʼojlábil, ban escuela o pil juʼtáj. ¿A tsálpayits jantʼoj más a éjtowal ka tʼajaʼ abal ka tejwamédhanchij an epchalchik abal chubax a kʼanidhál? O walám tatáʼ pel i ókʼnom, ¿a léʼ ka tsápnanchij ka béletnaʼ más alwaʼ an epchalchik ani ka tʼajaʼ kʼal a kulbétal? Max ka tʼajaʼ ti kwéntaj abal a yéjenchalej ka jalkʼuy jantʼoj, yab ka walbaʼ ta baʼ. Ka tʼilaʼ abal a Jesús lej alwaʼ inik ani abal jajáʼ neʼets ti tólmiy abal ka bajuw jawaʼ a tsalpayámal (1 Ped. 2:3). A Pedro in uluw axéʼ xi kaw: «A Dios neʼets ti alwamédhanchij a ichích, neʼets ti tsáplinchij a ichích ani neʼets ti tólmiy abal ka lej tʼayat koʼoy ta ichích in káwintal» (1 Ped. 5:10).

17. ¿Jantʼoj tam alwaʼtaláb neʼets ki batsʼuw max yab ki walbaʼ ti baʼ ani ki jilaʼ abal a Jehová kin áynanchij tu ku exóbchij?

¹⁷ Jun a kʼicháj a Pedro in uluw abal yab in tomnálak ka kʼwajiy tin tamét a Jesús (Luc. 5:8). Pero kom tólmiyat kʼal a Jehová ani a Jesús, in ejtow kin áynanchij kin tʼojonchij a Jehová, ani jaxtám in batsʼuw an lablixtaláb abal ka kʼalej ti eyal kʼal a Jesucristo ti eb (2 Ped. 1:11). ¡A Pedro in batsʼuw jun i púlik lablixtaláb! Jayej, max tatáʼ ka jilaʼ abal a Jehová ti tólmiy ani ti exóbchij, neʼets ka ejtow ka batsʼuw an ejataláb abal etsʼey. Nixéʼ játs jawaʼ in ulúmal a Jehová abal neʼets tu ku pidhaʼ max ki belaʼ kʼal Jajáʼ (1 Ped. 1:9).