A Jehová neʼets ti tólmiy ka tamétnaʼ an kʼibataláb axi yab a aychal

1. ¿Jantʼoj i lej belál?

Patal axi i kʼakʼnál a Jehová i lej belál abal Jajáʼ tu kʼanidhál ani in léʼ abal etsʼey ku kʼwajiy alwaʼ (Rom. 8:35-39). Jayej i tʼajál ti kwéntaj abal tam i belkál an tsalpadh kaw axi ti Biblia u kʼwajíl más alwaʼ (Is. 48:17, 18). Pero ¿jantʼoj neʼets ki tʼajaʼ max ki tamétnaʼ jun i kʼibataláb axi yab i aychal?

2. a) ¿Jantʼoj tam kʼibataláb neʼets ki watʼaʼ tam junchikíl? b) ¿Jantʼoj awits ki konowiy ti baʼ?

² Patal i tametnál i kʼibataláb, walám jun i yanél in ulúmal o in tʼajámal jantʼoj axi i yajnaʼ. O walám i kwaʼal jun i yawʼláts axi tu tʼokʼbanchal ki tʼojonchij a Jehová jantʼiniʼ ti tʼajálak ti biyál. Jayej, walám kʼwajat i yajchiknál kom watʼenek jun i ikʼlom lej tsapik o walám u ayoknáb kom i kʼakʼnál a Jehová. Tam kʼwajat i watʼal axéʼ xi kʼibataláb walám ki tsalpay: «¿Jaleʼ ti kʼwajat u yajchiknál? ¿Walám u tʼajaʼ jantʼoj axi yab tekedh? ¿Walám a Jehová yabáts kʼwajat tin tólmiyal?». Max a atsʼámal antsanáʼ yab kit lej tsalpaxin, kom yab expidh tatáʼ a atsʼál antsanáʼ, jayej talchik in tʼojnálil a Jehová axi ti biyál antsanáʼ tin atsʼaʼ (Sal. 22:1, 2; Hab. 1:2, 3).

3. ¿Jantʼoj tu exóbchal Salmo 34:19?

³ (Ka ajiy Salmo 34:19). Al axéʼ xi versículo u olnáb tsab i tsalap lej exbadh. Jun játs abal jitaʼchik in tʼajál jawaʼ tekedh in tametnál i yajchiktaláb, ani an tsabchíl játs abal a Jehová etsʼey neʼets tu ku tólmiy. Jun i tolmixtaláb axi a Jehová tu pidhál, játs ki exbay abal junchikíl neʼets ki tamétnaʼ i kʼibataláb. A Jehová tu uchamal abal neʼets ki atsʼaʼ lej kulbél max ki tʼojonchij, pero belits antsanáʼ neʼets ki tamétnaʼ i kʼibataláb xowéʼ ta kʼicháj (Is. 66:14). A Jehová in léʼ abal ki lej tsalpay kʼal patal an lablixtaláb axi neʼets ki batsʼuw ban Alabél Tsabál, kom játs an ejataláb axi tu leʼnanchal (2 Cor. 4:16-18). Pero biyat in bájuwal nixéʼ a kʼicháj Jajáʼ neʼets tu ku tólmiy chudhél chudhél abal ki tamétnaʼ an kʼibataláb (Lam. 3:22-24).

4. ¿Jantʼoj neʼets ki exóbnaʼ?

⁴ Al axéʼ xi exobintaláb neʼets ki tsuʼuw in tʼiplábil i atikláb axi ti biyál ani axi xowéʼ ta kʼicháj. Neʼets ki tsuʼuw abal junchikíl awil ki watʼaʼ jun i kʼibataláb axi yab i aychal, pero max i lej belál kʼal a Jehová neʼets ki ejtow ki tamétnaʼ (Sal. 55:22). Tam ki exóbnaʼ axéʼchik xi tʼiplab, ki tsalpay kʼal axéʼ: «¿Jantʼoj u tʼajámalak max játs nanáʼ axi u tamtém an kʼibataláb? ¿Jantʼiniʼ tin tólmiyal axéʼ xi tʼiplab abal ku belaʼ más kʼal a Jehová? ¿Jantʼiniʼ u éjtowal ku nitsʼbiy tu ejatal jawaʼ u exobnál?».

I TʼIPLABCHIK AXI TI BIYÁL

5. ¿Jantʼiniʼ ti odhnáj a Jacob kʼal a Labán? (Ka tsuʼuw an imagen axi kʼwajat ban portada).

⁵ Ti biyál waʼtsin in tʼojnálil a Jehová axi in tamétnaʼ i kʼibataláb axi yab in aychalak. Jun i tʼiplab játs jawaʼ in watʼaʼ a Jacob. Kʼal in papá uchan ka kʼalej ka tomkin kʼal in tsʼikʼáchil a Labán, kom pelak in yanél ani jayej in kʼakʼnálakchik a Jehová. Jayej uchan abal neʼets ka lej lábliyat kʼal a Jehová (Gén. 28:1-4). A Jacob in bélkaʼ jawaʼ uchan kʼal in papá ani kʼalej ti Canaán abal kin aliy a Labán, jajáʼ in kwaʼalak tsab i tsʼikʼách, jun in bij Lea ani axi jun Raquel. A Jacob in kulbétnaʼ a Raquel, jaxtám in uluw abal neʼets kin tʼojonchij a Labán buk i támub abal kin ejtow ka tomkin kʼal in tsʼikʼáchil (Gén. 29:18). Pero tam ti a Jacob neʼetsakits ka tomkin kʼal a Raquel, kʼámbiyat kʼal a Labán ani pidhan a Lea. Jun i semana talbél uchan abal neʼetsak kin ejtow ka tomkin kʼal a Raquel (Gén. 29:25-27). Pero yab expidh tʼajchin nixéʼ a Jacob. Jayej lej tsapik tʼojondháj kʼal a Labán al 20 i támub ani yab u jalbiyábak alwaʼ (Gén. 31:41, 42).

6. ¿Jantʼoj tam kʼeʼat i kʼibataláb in tamétnaʼ a Jacob?

⁶ A Jacob in tamétnaʼ más i kʼibataláb. In kwaʼalak yan i tsakam ani junchikíl yabchik u neʼdháxak alwaʼ. Axéʼchik xi tsakam in nujuw a José. Jayej, a Simeón ani a Leví kʼalej in tsemdhál i atiklábchik ani nixéʼ in lúklinchij in bij a Jehová ani a Jacob. Talbél tsemets a Raquel, tam ti kʼwajatak ti waʼtsinal jun in tsakámil. Ani tam ti a Jacob payeblábits koʼoy ka kʼalej ti Egipto kom dhaykʼan jun i jayil ti Canaán (Gén. 34:30; 35:16-19; 37:28; 45:9-11, 28).

7. ¿Jantʼiniʼ tin tejwamédhaʼ a Jehová abal kʼwajatak in tólmiyal a Jacob?

⁷ A Jacob etsʼey in belaʼ kʼal a Jehová belits abal in tamétnaʼ yan i kʼibataláb. Jajáʼ etsʼey tejwamédhanchat kʼal a Jehová abal kʼwajatak ti lábliyab. Ejtíl, yánedhanchat in koʼnélil ani in kʼalabil belits abal u odhnábak kʼal a Labán. Ani talbél in atsʼaʼ jun i púlik kulbetaláb tam ti eláxin kʼal a José, kom a Jacob in tsálpayalak abal a José yabáts ejatak. A Jacob in ejtow kin tamétnaʼ axéʼ xi kʼibataláb kom etsʼey in belaʼ kʼal a Jehová (Gén. 30:43; 32:9, 10; 46:28-30). Ani jayetsej neʼets ki ejtow ki tʼajaʼ wawáʼ max ku kʼwajiy utat kʼal a Jehová.

8. ¿Jantʼoj in léʼak kin tʼajaʼ a David?

⁸ An tsʼalej David yab in ejtow kin tʼajaʼ patal an tʼojláb axi in tsálpayalak kin tʼajaʼ abal kin kʼakʼnaʼ a Jehová. A David in léʼak kin tsʼejkaʼ jun i atáj juʼtáj ka kʼakʼnáj a Jehová ani in ólchij a Natán jawaʼ in tsálpayalak kin tʼajaʼ. Tam, uchan kʼal a Natán: «Ka tʼajaʼ jawaʼ a tsálpayal ta ichích, kom a Jehová neʼets ti tólmiy» (1 Crón. 17:1, 2). A David in atsʼaʼ lej kulbél tam ti uchan nixéʼ kʼal a Natán. Walám ma in tujchij kin tsalpay jantʼiniʼ ti neʼets kin tʼajaʼ an tʼojláb.

9. ¿Jantʼoj in tʼajaʼ a David kom yab in ejtow kin tʼajaʼ jawaʼ in tsálpayalak?

⁹ Pero talbél, a Natán wichiy kin tsuʼuw a David ani in ólchij jawaʼ uchan kʼal a Jehová. A Natán uchan kʼal a Jehová abal yab pel a David axi neʼetsak kin tsʼejkaʼ an templo, axi neʼetsak kin tʼajaʼ nixéʼ xi tʼojláb pel a Salomón, in tsakámil a David (1 Crón. 17:3, 4, 11, 12). ¿Jantʼoj in tʼajaʼ a David tam ti uchan axéʼ? In jalkʼuy jawaʼ in tsálpayalak kin tʼajaʼ ani in tujchij kin tamkuy i tumín ani jawaʼ neʼetsak kin yéjenchij a Salomón abal kin tujchij an tʼojláb (1 Crón. 29:1-5).

10. ¿Jantʼiniʼ ti lábliyat a David kʼal a Jehová?

¹⁰ A Jehová in uchaʼ a David abal yab jajáʼ axi neʼets kin tsʼejkaʼ an templo. Pero in tsʼejkaʼ jun i kaw kʼal jajáʼ, in uchaʼ abal jun kʼal in tsakámil játs axi neʼets ti ábatnom abal etsʼey (2 Sam. 7:16). Tam a David ka ejtsin neʼets kin atsʼaʼ lej kulbél, kom neʼets kin exlaʼ abal jun in tsakámil játs axi kʼwajat ti ábatnom tin Éyaltal a Dios. In tʼiplábil a David tu exóbchal abal belits max yab ki ejtow ki tʼajaʼ patal jawaʼ i léʼ abal ki kʼakʼnaʼ a Jehová, Jajáʼ neʼets tu ku pidhaʼ i lablixtaláb axi yab i aychalak ki batsʼuw.

11. ¿Jantʼoj tam lablixtaláb in batsʼuw an epchalchik axi ti kʼaʼál siglo belits abal in Éyaltal a Dios yab ulits tam ti jajáʼchik in aychalak? (Hechos 6:7).

¹¹ An epchalchik axi ti kʼaʼál siglo in tamétnaʼ i kʼibataláb axi yab in aychalak. Jun i tʼiplab, jajáʼchik in aychalak ka ulits in Éyaltal a Dios, pero yab in exlálakchik jaykʼiʼ ti neʼets ka ulits (Hech. 1:6, 7). ¿Jantʼoj in tʼajaʼ an epchalchik? Kʼwajiychik lej tʼojlidh ban olnomtaláb. In tʼajaʼchik ti kwéntaj abal kʼayúm kʼayúm kʼwajatak ti bukʼel an alwaʼ kaw al más i bichow. Ani in exlaʼchik abal kʼwajatak ti lablincháb in tʼojlábil kʼal a Jehová (ka ajiy Hechos 6:7).

12. ¿Jantʼoj in tʼajaʼ an epchalchik axi ti kʼaʼál siglo tam ti dhaykʼan jun i jayil?

¹² Ti kʼaʼál siglo chich i púlik jayil tin puwél an Tsabál (Hech. 11:28). Axéʼ xi kʼibataláb jayej in odhnaʼ an epchalchik. Walám an tatalábchik u tʼeʼpinalak abal jantʼiniʼ neʼetsak kin béletnaʼ in yanél. Ani an tsakamchik axi in léʼak kin tʼojonchij más a Jehová walám kwaʼalak kin tsalpay max játs neʼets kin tʼajaʼ, o max kwaʼalak kin aychij ka koyóts an jayil. Jawaʼ i tʼajál ti kwéntaj játs abal an epchalchik yab in palkʼanchij kʼal an olnomtaláb. In áynanchij kin tʼajaʼ axéʼ xi exbadh tʼojláb belits abal kʼwájatakchik in tametnál jun i jayil ani in bínaʼchik jawaʼ in kwaʼalak abal kin tólmiy an epchalchik axi ti Judea (Hech. 11:29, 30).

13. ¿Jantʼiniʼ ti lábliyat an epchalchik tam ti kʼwajiy lej tsapik an jayil?

¹³ ¿Jantʼiniʼ ti tólmiyat an epchalchik axi ti kʼaʼál siglo kʼal a Jehová tam ti kʼwajiy lej tsapik an jayil? An epchalchik axi ti Judea abchin i tolmixtaláb kʼal kʼeʼat i epchal, antsanáʼ in tʼajaʼchik ti kwéntaj abal kʼwajatak ti beletnáb kʼal a Jehová (Mat. 6:31-33). Jayej, kʼal nixéʼ tólmiyatchik abal ka kʼanidháxin más ani an epchalchik axi in abaʼ i tolmixtaláb in atsʼaʼchik lej kulbél (Hech. 20:35). Patal axéʼ xi epchal in áynanchij kin kʼakʼnaʼ a Jehová belits abal in tamétnaʼ i kʼibataláb, jaxtám lej lábliyat kʼal a Jehová.

14. ¿Jantʼoj in watʼaʼ a Bernabé ani a Pablo, ani jantʼiniʼ ti lábliyatchik kʼal a Jehová? (Hechos 14:21, 22).

¹⁴ An epchalchik axi ti kʼaʼál siglo yaníl ayoknáj tam ti yabak in tsálpayal abal játs neʼets ka tʼajchin. Ki tsuʼuw jawaʼ in watʼaʼ an abatwálej Pablo ani a Bernabé tam ti xeʼetsakchik ti ólnom ti Listra. Tam ti ulitschik bátsʼuwat lej alwaʼ, pero talbél talchik kʼal axéʼ xi atikláb in kwiʼiy a Pablo kʼal i tʼujub, in neʼdhaʼ bodhodhól eléb ban bichow ani in jílaʼchik tanáʼ kom in tsalpay abal tsemtsits (Hech. 14:19). Pero ¿jantʼoj in tʼajaʼ a Bernabé ani a Pablo? Jajáʼchik in áynanchij ti ólnom al pil i bichow. Antsanáʼ in tólmiy yantalom i atikláb abal ka wenkʼon ti aykol kʼal a Cristo ani in kanatbédhaʼ an epchalchik kʼal in tʼiplábil (ka ajiy Hechos 14:21, 22). A Bernabé ani a Pablo yab in jílaʼchik ti ólnom belits abal ayoknaʼ, jaxtám in ejtow kin tólmiy yan i atikláb. ¿Jantʼoj i exobnál? Max wawáʼ ki áynanchij tu ólnom belits abal i tametnál jun i kʼibataláb, a Jehová neʼets tu ku lej lábliy.

TALCHIK I TʼIPLAB AXI XOWÉʼ TA KʼICHÁJ

15. ¿Jantʼoj a exobnál kʼal in tʼiplábil an epchal Alexander Macmillan?

¹⁵ Ti 1914, an epchalchik in aychalak ka watʼey jantʼoj lej exbadh. Jun kʼal jajáʼchik pel an epchal Alexander Macmillan. Jajáʼ in aychalak abal ti 1914 ka kʼalej ti éb. Ti septiembre ti 1914, jajáʼ kʼwajatak in binál jun i tʼilomtaláb ani in uluw: «Walám axéʼ játs an júnkatsits i tʼilomtaláb axi neʼets ku bínaʼ». Pero yab watʼey nixéʼ. Talbél jajáʼ in dhuchaʼ axéʼ xi kaw: «Yan ti eb axi i tsalpay abal jun dhúbatkʼij neʼets ku kʼalej ti éb. Pero jawaʼ kwaʼalak ki tʼajaʼ játs ki áynanchij ki tʼojonchij a Jehová». Ani játs jawaʼ in tʼajaʼ an epchal, in áynanchij ti ólnom, in kanatbédhaʼ i epchalchik axi kʼwajatak ti wikʼaxteʼ ani in áynanchij ka kʼalej ti tamkuntaláb ma tam ti payeblábits. Jajáʼ in áynanchij kin tʼojonchij a Jehová biyat in aychalak ka kʼalej ti éb ani lej tólmiyat kʼal nixéʼ. Ti 1966, jajáʼ in dhuchaʼ axéʼ xi kaw okʼxidh ka tsemets: «U atsʼál abal u bélomtal kʼwajat lej tsapik, ejtíl tam tin tujey u exlál a Jehová». In tʼiplábil an epchal Macmillan tu tólmiyal patal wawáʼ ani más max biyálits i aychal ka ulits in kʼichájil a Jehová (Heb. 13:7).

16. ¿Jantʼoj tam kʼibataláb in tamétnaʼ an epchal Jennings ani in kʼimádhil? (Santiago 4:14).

¹⁶ Yan i epchal tsʼatʼenek i yawʼláts axi yab in tsálpanchalak abal neʼets ka tsʼatʼey. Jun i tʼiplab, an epchal Herbert Jennings in uluw ban biografía abal jajáʼ ani in kʼimádhil kʼwájatakchik lej kulbél in tʼójonchal a Jehová ti Ghana.b Pero talbél elchin abal in kwaʼalak jun i yawʼláts tin okʼ. An epchal Jennings in uluw abal tam ti ólchin abal in kwaʼalak axéʼ xi yawʼláts, in uluw abal in tʼilaʼ an kaw axi kʼwajat ti Santiago 4:14 (ka ajiy) juʼtáj tin ulal: «Yab jitaʼ in exlál jawaʼ neʼets kin tamuw kalám». An epchal in ulal: «I exbay abal játsits i tamtém ani u tʼojojon abal ki jilaʼ i jaʼúbchik axi ti Ghana ani kin wichiy ti Canadá abal kin ilálin». A Jehová in tólmiy an epchal Jennings ani in kʼimádhil abal ka aynanchat ka tʼójonchat.

17. ¿Jantʼiniʼ ti tolmiyámej kʼeʼatchik i epchal kʼal in tʼiplábil an epchal Jennings?

¹⁷ Jawaʼ in uluw an epchal Jennings ban biografía in lej tolmiyámal yan i epchal. Jun i epchal mimláb in uluw: «Játs an biografía axi más tin kanatbedhámal […]. U tʼajaʼ ti kwéntaj abal an epchal Jennings koʼoy kin jilaʼ talchik i tʼojláb axi in tʼajálak tin bichówil a Jehová abal ka kʼalej ti ilálnal. Axéʼ tin tólmiy ku exbay abal u éjtowal ku áynanchij ku tʼojonchij a Jehová, belits abal u kwaʼal i kʼibataláb». Kʼeʼat i epchal in uluw: «U neʼdhálakits watʼadh laju i támub tin tolmix jantʼiniʼ in ókʼnom, pero koʼoy ku jilaʼ kom u kwaʼalak jun i yawʼláts tu okʼ. U atsʼálak lej kidháb ma yab u léʼak ku ajiy an biografías […]. Pero in tʼiplábil an epchal Jennings tin lej tólmiy». Axéʼ xi tʼiplab tu tʼilchal abal i éjtowal ki kanatbédhaʼ axi más tam kʼwajat i tametnál jun i kʼibataláb axi yab i aychalak. Axéʼ tu exóbchal abal max ki áynanchij ki tʼojonchij a Jehová belits abal yab u lej kanat, i tʼiplábil in éjtowal kin kanatbédhaʼ an epchalchik (1 Ped. 5:9).

18. ¿Jantʼoj i exóbnal kʼal jawaʼ in tʼajaʼ jun i epchal axi ti Nigeria? (Ka tsuʼuw an fotos juʼtáj tu tʼipoyáb jawaʼ in tʼajaʼ an epchal).

¹⁸ Waʼats yan i kʼibataláb axi in odhnámal an epchalchik, ejtíl an Coronavirus. Jun i tʼiplab, ti Nigeria u kʼwajíl jun i epchal mimláb axi tsemchidh, jajáʼ yabáts in lej kwaʼalak i tumín nibal i kʼapnél. Jun i kʼicháj tam ti in kwaʼalakits expidh jun i taza i arroz, kónoyat kʼal in tsakam tsʼikʼáchil jantʼoj neʼets kin kʼapuw tam kin talaʼits nixéʼ. An epchal in tókʼtsiy abal belits abal yabáts in lej kwaʼalak i kʼapnél, neʼetsakchik kin nitsʼbiy an tsemchidh mimláb axi u kʼwajilak ti Sarepta. Jajáʼchik neʼetsak kin tsʼejkaʼ nixéʼ xi kʼapnél ani neʼetsak kin belaʼ kʼal a Jehová (1 Rey. 17:8-16). Jajáʼchik yabaye in tsalpayámal jantʼoj neʼetsak kin kʼapuw nixéʼ xi dhajuw, pero tam, ulkan an epchalchik kʼal i kʼapnél. An kʼapnél axi nénchin kʼal an epchalchik neʼetsak kin eyendhaʼ abal tsab i semana. An epchal in tʼajaʼ ti kwéntaj abal a Jehová in atsʼaʼ jawaʼ jajáʼ in uchaʼ in tsʼikʼáchil. Axéʼ xi tʼiplab tu exóbchal abal belits max ki tamétnaʼ jun i kʼibataláb axi yab i aychal, i éjtowal ki eyendhaʼ abal ku utey más kʼal a Jehová (1 Ped. 5:6, 7).

19. ¿Jantʼoj tam kʼibataláb in watʼaʼ an epchal Alexéi Yershov?

¹⁹ In tʼajál jayits i támub yan i epchal tújenek ti ayoknáb kʼal an eyalchik, nixéʼ pel jun i kʼibataláb axi jajáʼchik yab in aychalak. Ki tsuʼuw jawaʼ in watʼaʼ an epchal Alexéi Yershov. Jajáʼ pujan ti 1994, al nixéʼ xi támub an epchalchik yab u kʼánchinalak ka olnomáts kʼal an eyalchik. Pero talbél, an epchalchik axi ti Rusia tujey ti ayoknáb kʼal an eyalchik. Ti 2020 otsanchat in kʼimáʼ an epchal Yershov ani nenchat yan jantʼoj axi in kwaʼalak. Ani talchik a ítsʼ talbél jólbiyat an epchal kʼal an eyalchik. Jawaʼ más kidháb játs abal jun i inik kʼal axi ti jólbiyat pelak jun i atikláb axi in neʼdhálakits watʼadh jun i támub ti exóbal kʼal an epchalchik.

20. ¿Jantʼoj in tʼajámal an epchal Yershov abal ka utey más kʼal a Jehová?

²⁰ ¿Jantʼoj in exobnámal an epchal Yershov kʼal an kʼibataláb axi in watʼamal? Kʼal nixéʼ lej tolmiyámej abal ka utey más kʼal a Jehová. Jajáʼ in ulal: «U kʼimádhil ani nanáʼ i tsapnanchámal ki ólonchij más a Jehová. U exlál abal max a Jehová yabak tu ku tólmiy, yab neʼets ki ejtow ki watʼenchij axéʼ xi kʼibataláb. An exobintaláb kʼal an Biblia jayej tin lej tólmiyamal abal yab ti kin ataʼ an tʼeʼpintaláb. U tsápnanchal ku tsalpay kʼal talchik in tʼojnálil a Jehová axi kʼwajiy ti biyál. Waʼats yan i tʼiplabchik axi tin exobchámal abal lej exbadh ku belaʼ kʼal a Jehová ani yab ku jilaʼ ti kin ataʼ an tʼeʼpintaláb».

21. ¿Jantʼoj i exóbnaʼ al axéʼ xi exobintaláb?

²¹ ¿Jantʼoj i tsuʼúmal al axéʼ xi exobintaláb? I exobnámal abal junchikíl neʼets ki tamétnaʼ i kʼibataláb axi yab i aychalak. Pero max ki belaʼ kʼal a Jehová, jajáʼ neʼets tu ku tólmiy abal ki ejtow ki tamétnaʼ. Neʼets ki tʼajaʼ ti kwéntaj abal chubax u putnal axéʼ xi kaw «an atiklábchik axi in tʼójonchal a Jehová neʼets kin tamétnaʼ i kʼibataláb, pero etsʼey neʼets ka tólmiyat kʼal a Jehová» (Sal. 34:19). Jaxtám yab in tomnál ku lej tsalpaxin kʼal an kʼibataláb axi ki tamétnaʼ. Jawaʼ kwaʼal ki tʼajaʼ ti kwéntaj játs abal a Jehová lej tsapik ani neʼets tu ku tólmiy. Max ki tʼajaʼ, tam neʼets ki atsʼaʼ jantʼiniʼ an abatwálej Pablo, jajáʼ in uluw abal in éjtowalak kin watʼenchij jawákits tam kʼibataláb kom u pidhnal i tsapláb kʼal a Jehová (Filip. 4:13).