Tatáʼ a éjtowal ka bajuw jun i ayláb abal ka kulbedhaʼ a Jehová

1. ¿Jantʼoj játs axi i atsʼál tʼojláb ki tʼajaʼ?

¿A ATSʼÁMAL kʼibat ka bajuw jun i ayláb axi a tsalpayámal?b Yab expidh tatáʼ a atsʼámal antsanáʼ. Jun i epchal axi in bij Philip, in léʼak kin ólonchij más a Jehová pero in atsʼálak kʼibat kin jolkʼaʼ i kʼij abal kin tʼajaʼ. A Erika in léʼak ka ulits más kʼijilej tam u kalel ti ólnom pero belits abal in tsápnanchij, yab in éjtowalak. A Tomás in exalak kin ajiy an Biblia kidhat pero yab in ejtow. A Tomás in ulal: «Yab u kulbetnálak ku ajiy an Biblia. Oxíl u exaʼ pero expidh in junelak ti Levítico».

2. ¿Jaleʼ yab in tomnál ki walbaʼ ti baʼ max yabaye i bajuwámal jun i ayláb axi i léʼ?

² Max tatáʼ a tsalpayámal ka bajuw jun i ayláb ani yab a ejtowamal, yab ka walbaʼ ta baʼ. Jawákits tam ayláb axi jun kin léʼnaʼ kin bajuw, neʼets kin yejenchij i tsapláb ani i kʼij. Max tatáʼ kʼwajat a tsápnanchal ka bajuw jun i ayláb játs kom a kʼanidhál a Jehová ani a léʼ ka tʼojonchij. A Jehová in lej tʼajál ti kwéntaj patal an tsapláb axi a tʼajál, ani jajáʼ yab neʼets ti konchij ka tʼajaʼ jantʼoj axi yab ka ejtow (Sal. 103:14; Miq. 6:8). Jaxtám lej exbadh ka takuy jun i ayláb axi tatáʼ ka tsalpay abal neʼets ka ejtow ka bajuw. Max a tsálpayits kʼal jun i ayláb axi a léʼ ka tʼajaʼ, ¿jantʼoj a éjtowal ka tʼajaʼ abal ka bajuw?

LEJ EXBADH KI KOʼOY I KANATALÁB

3. ¿Jaleʼ ti lej exbadh ki koʼoy i kanataláb?

³ Max wawáʼ i léʼ ki bajuw jun i ayláb, lej exbadh ki koʼoy i kanataláb. ¿Jaleʼ? Kom antsanáʼ neʼets ki punchij patal i tsap abal ki bajuw an ayláb. An kanataláb axi i atsʼál abal ki tʼajaʼ jantʼoj pel ejtíl an ikʼ axi in nixál jun i tsakam tan abal ka beláts. Max an ikʼ kin áynanchij kin nixaʼ an tsakam tan, neʼets ka ulits ma juʼtáj tin léʼ. Ani max an ikʼ u wawnal más tsapik, walám an tsakam tan neʼets ka ulits más dhubat. Jayej max wawáʼ i kwaʼal i kanataláb, tam neʼets ki ejtow ki bajuw jun i ayláb axi i tsalpayámal. Jun i epchal axi u kʼwajíl ti Salvador ani in bij David in uluw axéʼ: «Tam jun in kwaʼal i kanataláb, in tʼajál patal jawaʼ kin ejtow abal kin bajuw jun i ayláb». Tam, ¿jantʼoj neʼets ti tólmiy abal ka koʼoy i kanataláb abal ka bajuw jun i ayláb?

4. ¿Jantʼoj i éjtowal ki konchij a Jehová? (Filipenses 2:13; ka tsuʼuw jayej an imagen).

⁴ Ka konchij a Jehová abal ti tólmiy ka koʼoy i kanataláb. A Jehová in éjtowal kin eyendhaʼ in tʼokat tsap abal ti pidhaʼ i kanataláb ani antsanáʼ ka ejtow ka bajuw jun i ayláb (ka ajiy Filipenses 2:13). Junchikíl walám i tsápnanchal ki bajuw jantʼoj kom i exlál abal játs in tomnál ki tʼajaʼ, pero walám yab játs abal chubax i léʼ ki bajuw. Játs jawaʼ in watʼaʼ jun i epchal axi u kʼwajíl ti Uganda, jajáʼ in bij Norina. Jajáʼ in léʼak kin tujuw jun i exobintaláb kʼal an Biblia, pero in atsʼálak abal yab in éjtowalak ti exóbchix alwaʼ, jaxtám yab in lej léʼak kin tʼajaʼ. ¿Kʼal jantʼoj ti tolmiyat? Jajáʼ in ulal: «Chudhél chudhél u kónchalak a Jehová ti kin tólmiy abal ku koʼoy an kanataláb abal ku tujuw jun i exobintaláb kʼal an Biblia, ani nanáʼ u tsápnanchij kin tʼojojon más alwaʼ abal ku ejtow tin exóbchix. Kʼayúm kʼayúm u atsʼálak más i kanataláb abal tin exóbchix ani al nixéʼ xi támub u tujuw tsab i exobintaláb kʼal an Biblia».

5. ¿Jantʼoj i éjtowal ki tʼajaʼ abal ki atsʼaʼ más i kanataláb?

⁵ Ka lej tsalpay kʼal patal jawaʼ a Jehová in tʼajámal abal ti tólmiy (Sal. 143:5). An abatwálej Pablo in tsalpay kʼal patal an kʼanidhomtaláb axi koʼonchat kʼal a Jehová ani kʼal nixéʼ tólmiyat abal kin léʼnaʼ kin tʼojonchij a Jehová kʼal patal in kanat (1 Cor. 15:9, 10; 1 Tim. 1:12-14). Tatáʼ jayej max ka tsalpay kʼal patal jawaʼ a Jehová in tʼajámal abal ti tólmiy, más neʼets ka atsʼaʼ i kanataláb abal ka léʼnaʼ ka tʼojonchij (Sal. 116:12). Ki tsuʼuw kʼal jantʼoj ti tólmiyat jun i epchal mimláb axi u kʼwajíl ti Honduras abal kin tʼajaʼ ti precursora regular. Jajáʼ in ulal: «In kʼwajiy u tsalpayal abal a Jehová tin lej kʼanidhál, tin utúmal tin bichówil ani tin beletnál lej alwaʼ. Nixéʼ tin tólmiy abal ku kʼanidhaʼ más a Jehová ani ku léʼnaʼ ku tʼojonchij jantʼiniʼ in precursora».

6. ¿Jantʼoj más neʼets tu ku tólmiy abal ki koʼoy i kanataláb?

⁶ Ka tsalpay kʼal an alwaʼtaláb axi neʼets ka batsʼuw tam ka bajuw jun i ayláb. Ki tsalpay kʼal in tʼiplábil a Erika, jajáʼ i tʼilaʼits ban párrafo 1. ¿Kʼal jantʼoj ti tólmiyat abal ka ulits más kʼijilej tam u tʼajnal an tamkuntaláb abal ti ólnom? Jajáʼ in ulal: «U tʼajaʼ ti kwéntaj abal kom in ulelak wákal yabáts u atsʼálak an exobchixtaláb axi u olnábak abal ku olnomáts. Pero max kin ulits kʼijilej, neʼetsak ku bajuw ku tsapnédhaʼ an epchalchik ani ku tʼilmaychik. Jayej neʼetsak ku ejtow ku batsʼuw an exobchixtaláb axi u binábak ani ku eyendhaʼ ban olnomtaláb, nixéʼ jayej neʼetsak kin tʼajaʼ abal ku kulbétnaʼ más tin ólnom». A Erika in tsalpay kʼal an alwaʼtaláb axi neʼetsak kin batsʼuw max ka ulits más kʼijilej, jaxtám in ejtow kin bajuw nixéʼ xi ayláb. Ani tatáʼ, ¿jantʼoj tam alwaʼtaláb neʼets ka batsʼuw max ka bajuw an ayláb axi a tsalpayámal? Max jawaʼ a léʼ ka bajuw játs ka ajiy an Biblia kidhat o ka ólonchij más alwaʼ a Jehová, ka tsalpay jantʼiniʼ neʼets ti tólmiy nixéʼ xi ayláb abal ki utey más kʼal Jajáʼ (Sal. 145:18, 19). O walám tatáʼ a léʼ ka jalkʼuy jantʼoj tin kwéntaj a ey abal ka nitsʼbiy más a Jehová, ¿jantʼoj neʼets ti tólmiy abal ka bajuw? Ka tsalpay jantʼiniʼ neʼets ti tólmiy nixéʼ abal kit neʼdhaxin más alwaʼ kʼal an epchalchik (Col. 3:14). Jayej, kʼeʼat jantʼoj axi a éjtowal ka tʼajaʼ, játs ka dhuchaʼ jaleʼ ta léʼ ka bajuw nixéʼ xi ayláb ani tam junchikíl, ka ajiy abal ka tʼilaʼ jantʼoj játs axi a léʼ ka bajuw. A Tomás in uluw: «Tam u tsalpayal kʼal patal an alwaʼtaláb axi neʼets ku batsʼuw max ku bajuw jun i ayláb, u punchal más u kanat abal ku bajuw».

7. ¿Jantʼoj in tʼajaʼ a Julio ani in kʼimádhil abal kin bajuw an ayláb axi in tsálpayalak?

⁷ Ka junkuw i epchal axi neʼets ti kanatbédhaʼ abal ka bajuw jun i ayláb (Prov. 13:20). A Julio ani in kʼimádhil in léʼak ka kʼalej ti tolmix juʼtáj más u yejenchábak i tolmixtaláb. ¿Kʼal jantʼoj ti tólmiyatchik abal kin bajuw nixéʼ xi ayláb? A Julio in ulal: «I junkuw i epchalchik axi tu ku kanatbédhaʼ, i tʼílchalak jawaʼ i tsálpayalak ki bajuw, axéʼchik xi epchal in bajuwámalits jun i ayláb, jaxtám in éjtowalak tu ku tólmiy. Etsʼey tu kónoyalak jantʼoj in kʼíbchalak kʼal an ayláb axi i tsálpayalak ki tʼajaʼ ani junchikíl tu kanatbedhálak abal yab ki walbaʼ ti baʼ».

¿JANTʼOJ I ÉJTOWAL KI TʼAJAʼ TAM YAB I ATSʼÁL I KANATALÁB ABAL KI BAJUW JUN I AYLÁB?

8. ¿Jantʼoj awil ka watʼey max expidh i tsápnanchal tam i atsʼál u kanat? (Ka tsuʼuw jayej an imagen).

⁸ Junchikíl yab neʼets ki atsʼaʼ kanat ani yabáts neʼets ki léʼnaʼ ki áynanchij kʼal an ayláb axi i kwaʼalak tsalpadh. ¿Pero walám in tomnál ki walbaʼ ti baʼ? Imbáj. Ki tʼilaʼ juníl an tʼiplab tin kwéntaj an tsakam tan. An ikʼ játs axi in tʼajál abal an tsakam tan ka kʼalej más adhík pero junchikíl nibal u wawnal an ikʼ. Pero, ¿walám an inik yabáts neʼets kin ejtow kin yátsiy an tsakam tan kom yab u juchnal an ikʼ? Imbáj. Kʼeʼatchik i tsakam tan u yatsnál tam an béldhom in yátsiyal an jáʼ kʼal tsab i téʼ, ani talchik i tsakam tan in kwaʼal i motor. Tam, an béldhom in éjtowal kin eyendhaʼ an tsakam tan belits max yab u juchnal an ikʼ. Wawáʼ jayej, junchikíl yab neʼets ki atsʼaʼ u kanat ani yabáts neʼets ki léʼnaʼ ki áynanchij kʼal an ayláb axi i tsalpayámal ki bajuw, pero ki tʼilaʼ abal i kwaʼal i tolmixtaláb. An kanataláb axi i yéjenchal yab neʼets ki elaʼ ti kwetemtal. Jun i inik in éjtowal kin béldhaʼ an tsakam tan belits max yab kʼwajat ti juchnal an ikʼ. Wawáʼ jayej i éjtowal ki áynanchij kʼal an ayláb axi i kwaʼal, belits abal junchikíl yab i atsʼál u kanat. Abal ka bajuw jun i ayláb in yéjenchal ka tsápnanchij, pero yab ka walbaʼ ta baʼ. Xowéʼ neʼets ki exóbnaʼ jantʼoj neʼets tu ku tólmiy tam i atsʼál abal yab i kwaʼal an kanataláb, pero okʼox ki tókʼtsiy jun i konowixtaláb axi walám yan in tʼajámal.

9. ¿Walám alwaʼ ki bajuw jun i ayláb max i atsʼál abal yab i lej léʼ ki tʼajaʼ?

⁹ A Jehová in léʼ ki tʼojonchij kʼal i kanát ani kʼal patal i ichích (Sal. 100:2; 2 Cor. 9:7). Tam, ¿jaleʼ ti kwaʼal ki tsápnanchij ki bajuw jun i ayláb max ti ichích yab i atsʼál max i léʼ ki tʼajaʼ? Ki tsalpay kʼal in tʼiplábil an abatwálej Pablo. Jajáʼ in uluw abal in abatnálak in iniktal abal kin tʼajaʼ jawaʼ tekedh (1 Cor. 9:25-27, nota). A Pablo junchikíl yab in atsʼálak lej kanat, pero in nixoknálak tin baʼ kom in léʼak kin kulbedhaʼ a Jehová. ¿In atsʼálak kulbél a Jehová kʼal an tʼojláb axi in tʼajálak an abatwálej Pablo? Aníts, ani kʼal a Jehová lej láblinchat in tʼojlábil (2 Tim. 4:7, 8).

10. ¿Jantʼoj tam alwaʼtaláb i bátsʼuwal tam ki tsápnanchij ki bajuw jun i ayláb belits abal i atsʼál abal yab u lej kanat?

¹⁰ A Jehová in atsʼál lej kulbél tam i tsápnanchal ki bajuw jun i ayláb, belits abal i atsʼál abal yab i lej léʼ ki tʼajaʼ. ¿Jaleʼ tin atsʼál kulbél? Kom in exlál abal kʼwajat i tʼajál kom i kʼanidhál jajáʼ belits max yab i lej kulbetnál an tʼojláb axi kwaʼal ki tʼajaʼ. A Jehová in láblinchij an tsapláb axi in tʼajaʼ an abatwálej Pablo ani jayetsej neʼets kin tʼajaʼ kʼal wawáʼ (Sal. 126:5). Tam ki tsuʼuw abal a Jehová in lábliyal an tsapláb axi tʼajál, walám neʼets ki atsʼaʼ más kanat abal ki bajuw jun i ayláb. Jun i epchal axi u kʼwajíl ti Polonia ani in bij Lucyna in uluw axéʼ: «Junchikíl yab u kwaʼal i kanataláb abal kin kalej tin ólnom kom in lej tsekenek. Pero u tʼajámal ti kwéntaj abal tam kin wichiy u atsʼál más in kulbél». Xowéʼ ki tsuʼuw jantʼoj i éjtowal ki tʼajaʼ tam yab i atsʼál u lej kanat abal ki bajuw jun i ayláb.

11. ¿Jantʼiniʼ tu tólmiyal a Jehová abal ki ejtow ki ábatnaʼ ti baʼ?

¹¹ Ka konchij a Jehová abal ti tólmiy ka ábatnaʼ ta baʼ. Jun i atikláb axi in exlál kin ábatnaʼ tin baʼ yab in jilál ka atáj kʼal jawaʼ in atsʼál o kʼal jawaʼ in léʼ. Axéʼ tu lej tólmiyal abal yab ki tʼajaʼ jantʼoj axi kidháb pero jayej tu lej tólmiyal abal ki tʼajaʼ jawaʼ tekedh, ani más tam i atsʼál kʼibat o tam yab i lej léʼ ki tʼajaʼ. Ki tʼilaʼ abal a Jehová játs axi tu tólmiyal abal ki ábatnaʼ ti baʼ. Jaxtám, max ki konchij a Jehová abal tu ku tólmiy kʼal in tʼokat tsap, neʼets ki ejtow ki ábatnaʼ ti baʼ (Luc. 11:13; Gál. 5:22, 23). Ban párrafo 3 u kawin tin kwéntaj a David, jajáʼ in tsápnanchij ka exobláts, jayej kʼal jawaʼ ti lej tolmiyat pel kom in ólonchal a Jehová. Jajáʼ in ulal: «U lej konchij a Jehová abal ku ábatnaʼ tu baʼ, jajáʼ tin lej tólmiy kom u ejtow ku tsʼejkaʼ jun i programa abal ku exóbnaʼ an Biblia tu kwetémtal ani u aynanchámal ku exóbnaʼ an Biblia ma xowéʼ».

12. ¿Jantʼiniʼ tu tólmiyal Eclesiastés 11:4 abal ki bajuw jun i ayláb?

¹² Yab ki aychij ma ku kʼwajiy alwaʼ abal tikʼelej ki tsalpay kʼal jun i ayláb. Xowéʼ ta kʼicháj waʼats yan i kʼibataláb, jaxtám yab i éjtowal ki aychij ma ka tixkʼan patal abal tikʼelej ki tsalpay jantʼoj neʼets ki tʼajaʼ abal ki tʼojonchij a Jehová. Max ku kʼwajiy tu aychix walám yab jaykʼiʼ neʼets ki bajuw an ayláb axi i tsalpayal (ka ajiy Eclesiastés 11:4). Jun i epchal axi in bij Dayniel in ulal: «Yab ka aychij ka tixkʼan patal an kʼibataláb axi a kwaʼal kom yab jaykʼiʼ neʼets ka watʼey nixéʼ. Pero max tatáʼ ka tujuw, neʼets ka tʼajaʼ ti kwéntaj abal kʼayúm kʼayúm, a watʼenchal an kʼibataláb ani tam neʼets a bájuwal an ayláb axi a tsalpayal. Kʼeʼat i epchal axi in bij Paul in uluw axéʼ: «Belits max kʼwajat a tametnál jun i kʼibataláb, pero max ka tsápnanchij ka bajuw jun ayláb, kʼwajat a jilaʼ abal a Jehová ti tólmiy» (Mal. 3:10).

13. ¿Jaleʼ ti lej alwaʼ ki tujuw ki tʼajaʼ jantʼoj ti wachik?

¹³ Ki tujey ka tʼajaʼ ti wachik. Walám yab i lej léʼ ki tsápnanchij ki bajuw jun i ayláb, kom i atsʼál abal yab jaykʼiʼ neʼets ki bajuw. Max játs a atsʼál, ¿jaleʼ yab a tujchal ka tʼajaʼ ti wachik abal ka bajuw nixéʼ xi ayláb? Jun i tʼiplab, max tatáʼ a léʼ ka nitsʼbiy jantʼoj tin kwéntaj in ey a Jehová, ka tujuw ti wachik, a éjtowal ka tejwamédhaʼ kʼayúm kʼayúm kʼal jawaʼ a tʼajál. O walám a léʼ ka ajiy patal an Biblia, ¿jaleʼ ti yab a tujchal ka tʼajaʼ ti wachik abal yab ka atsʼaʼ kʼibat? A Tomás, in atsʼálak lej kʼibat kin ajiy an Biblia al jun i támub. Jajáʼ in uluw: «U tʼajaʼ ti kwéntaj abal yab neʼetsak ku ejtow ku talaʼ ajiy an Biblia al jun i támub, jaxtám u tujuw ti ít, pero u ajiy ti wachik abal yab ku atsʼaʼ kʼibat. U uluw abal neʼetsak ku ajiy talchik i párrafos chudhél chudhél ani neʼetsak ku lej tsalpay kʼal jawaʼ kʼwajat u exobnál. Kʼayúm kʼayúm u kulbetnáʼ más ku ajiy an Biblia». A Tomás in kulbétnaʼ kin ajiy más an Biblia ani jaxtám in ejtow kin ajiy kidhat.c

KA ÁYNANCHIJ KA KOʼOY I KANATALÁB BELITS ABAL A TAMETNÁL I KʼIBATALÁB

14. ¿Jantʼoj tam kʼibataláb walám ki tamétnaʼ?

¹⁴ Belits max i lej léʼ ki tʼajaʼ jantʼoj junchikíl neʼets ki tamétnaʼ i kʼibataláb axi neʼets tu ku tʼokʼbay. Junchikíl walám ka watʼey «jantʼoj axi yab i aychal» ani nixéʼ neʼets tu ku tíxkʼanchij an kʼij abal ki putuw kʼal an ayláb axi i tsalpayal (Ecl. 9:11). Jayej walám ki tamétnaʼ kʼeʼat i kʼibataláb axi kin tʼajaʼ abal yab ki atsʼaʼ kanat (Prov. 24:10). Ani kom wawáʼ u wálbidh, junchikíl neʼets ki tʼajaʼ jantʼoj axi tu ku tʼokʼbanchij kin putuw kʼal an ayláb axi i punumal (Rom. 7:23). O walám junchikíl i atsʼál lej u tsékenekits ani yabáts i léʼ ki tʼajaʼ (Mat. 26:43). ¿Jantʼoj neʼets tu ku tólmiy abal ki áynanchij kʼal jun i ayláb, belits max yab kanat i atsʼál?

15. ¿Jaleʼ ti yab i walbál ti baʼ belits abal i tametnál i kʼibataláb? (Salmo 145:14).

¹⁵ Walám junchikíl yab neʼets ki ejtow ki putuw kʼal jawaʼ i tsálpayalak ki tʼajaʼ. Pero nixéʼ yab in tomnál kin tʼajaʼ abal ki walbaʼ ti baʼ. An Biblia in ulal abal neʼets ki tamétnaʼ yan i kʼibataláb, pero an Biblia jayej tu olchál abal a Jehová neʼets tu ku tólmiy abal ki ejtow ki watʼenchij nixéʼ xi kʼibataláb ani ki bajuw an ayláb axi i tsalpayámal (ka ajiy Salmo 145:14). Ban párrafo 1 u kawin tin kwéntaj a Philip, jajáʼ in ulal: «Yab in tʼajál jayil ku ukʼpin, jawaʼ más exbadh játs ku kubiy juníl ani ki áynanchij». Jayej ki tʼilaʼ tin kwéntaj an epchal David. Jajáʼ in ulal: «Tam u watʼal jun i kʼibataláb u tsápnanchal yab ku walbaʼ tu baʼ. Jawaʼ u tʼajál játs ku tsalpay jantʼiniʼ neʼets ka eyan nixéʼ xi kʼibataláb abal ku tejwamédhanchij a Jehová an kʼanidhomtaláb axi u koʼonchal». Axéʼ lej chubax, max wawáʼ ki áynanchij kʼal an ayláb belits abal i atsʼál kʼibat, i tejwamédhanchal a Jehová abal i léʼ ki tʼajchij in kulbétal. ¿Jantʼiniʼ in atsʼál a Jehová tam in tsuʼtal abal tatáʼ a tsápnanchal ka bajuw nixéʼ xi ayláb?

16. ¿Jantʼoj i éjtowal ki exóbnaʼ max jun i kʼibataláb tu ku tʼokʼbanchij ki putuw kʼal jun i ayláb?

¹⁶ Ka tsalpay abal an kʼibataláb axi a tametnál neʼets ti exóbchij yan jantʼoj. Ka tsalpay kʼal jun i ayláb axi a exaʼits ka tʼajaʼ pero yab a bajuw, tam ka konowiy ta baʼ: «¿Jantʼoj u éjtowal ku tʼajaʼ abal yabáts ti kin tʼokʼbay jantʼoj ani ku ejtow ku bajuw nixéʼ xi ayláb?» (Prov. 27:12). Pero max i lej tsapnanchámalits ani yab i ejtowamal ki bajuw, ¿yab walám in tomnál ki jalkʼuy nixéʼ xi ayláb ani ki punuw kʼeʼat? Ka tsalpay max chubax neʼets ka ejtow ka bajuw an ayláb axi a punumal.d A Jehová yab neʼets kin tsalpay abal yab a putuwal a káwintal, expidh kom yab a bajuw jun i ayláb (2 Cor. 8:12).

17. ¿Jaleʼ ti lej exbadh ki tsalpay kʼal patal jawaʼ i bajuwámal ki tʼajaʼ?

¹⁷ Ka tsalpay kʼal patal jawaʼ a ejtowamal ka tʼajaʼ. An Biblia in ulal abal a Dios pel i lej alwaʼ inik ani yab neʼets kin ukʼchiy jawaʼ a tʼajchámal tin tʼojlábil (Heb. 6:10). Tatáʼ jayej yab ka ukʼchiy patal jawaʼ a ejtowamal ka tʼajaʼ abal ka tʼojonchij a Jehová. Ejtíl, a ejtowamal ka jaʼúbnaʼ a Jehová, walám it kalelits ti ólnom o ma it pújadhits. Patal an ayláb axi a ejtowamal ka bajuw ma xowéʼ, in tejwamedhál abal a éjtowalej ka tʼojonchij más a Jehová ani ka bajuw an ayláb axi a tsalpayámal (Filip. 3:16).

18. ¿Jantʼoj kwaʼal ka tʼilaʼ biyat a bájuwal jun i ayláb? (Ka tsuʼuw jayej an imagen).

¹⁸ A Jehová neʼets ti tólmiy ka bajuw an ayláb axi a tsalpayámal ani tam ka bajuw nixéʼ xi ayláb tatáʼ neʼets ka atsʼaʼ lej kulbél. Antsanáʼ jantʼiniʼ an inik axi neʼets in beldhál an tsakam tan, jajáʼ in atsʼál lej kulbél, tam ka ulits juʼtáj in tsálpayalak ka kʼalej. Pero jayej biyat neʼets ti béldhom u kʼijidhbél kʼal jawaʼ neʼets in tsuʼtal. Tatáʼ jayej a éjtowal kit kʼijidhbéj biyat neʼets a bájuwal jun i ayláb. ¿Jantʼiniʼ? Max ka tsalpay kʼal patal an alwaʼtaláb axi a batsʼúmal ani an tolmixtaláb axi a Jehová ti pidhál (2 Cor. 4:7). Max yab ka walbaʼ ta baʼ neʼets ka batsʼuyej yan i alwaʼtaláb axi taʼtal a kʼicháj (Gál. 6:9).