AJUMTALÁB 13

Ka tejwamédhaʼ jantʼiniʼ tu tólminchal an exobchixtaláb

Proverbios 3:21

RESUMEN: Ka tólmiy jitaʼchik ti atsʼál kin exbay jantʼiniʼ neʼets ka tolmiyat kʼal jawaʼ kʼwajat a exóbchal ani ka tejwamédhaʼ jantʼiniʼ kin punuw ti tʼajbiláb tin ejatal.

JANTʼINIʼ KA TʼAJAʼ

Ka tsalpay kʼal jitaʼchik ti atsʼál. Ka tsalpay jaleʼ in yéjenchal kin exlaʼchik jawaʼ neʼets ka ólchij ani ka tsalpay kʼal jawaʼ tam exobchixtaláb neʼets ka tolminchat más.
Ma tin tujtal an exobchixtaláb, ka tejwamédhaʼ jantʼoj kwaʼal kin tʼajaʼchik jitaʼ ti atsʼál. Tam kit tujey ti exóbchix, jitaʼchik kʼwajat ti atsʼál kwaʼalits kin exbay abal jawaʼ kʼwajat a olnál pél abal jajáʼchik. Tam ka olnaʼ jún i exbadh exobchixtaláb, ka tejwamédhaʼ jantʼiniʼ kin punuwchik ti tʼajbiláb. Ka olnaʼ tajax jantʼoj kwaʼal kin tʼajaʼchik jitaʼ ti atsʼál.

Ka tejwamédhaʼ abal a kʼanidhál jitaʼ ti otsʼówiyal ani ka exbay jawaʼ in atsʼál, antsanáʼ neʼets ka ejtow ka tejwamédhanchij jantʼiniʼ kin punuwchik ti tʼajbiláb an tsalpadh káw axi ti Biblia. Yab ka tʼajaʼchik kin tsalpay jitaʼ ti atsʼál abal yab jantʼoj in tʼajál alwaʼ, jawaʼ in tomnál ka tʼajaʼ pél ka tsapikmédhanchij an belomtaláb ani an kʼanidhomtaláb axi in kóʼonchal a Dios. Ka belaʼ abal max in kwaʼalchik jún i alwaʼ ichích neʼets kin léʼnaʼchik kin tʼajaʼ jawaʼ tekedh.