AJUMTALÁB 8

Ka eyendhaʼ i tʼiplab abal ka bínaʼ i exobintaláb

Mateo 13:34, 35

RESUMEN: Ka eyendhaʼ i tʼiplab axi yab kʼibat, antsanáʼ jitaʼ ti atsʼál neʼets kin kulbétnaʼ an exobchixtaláb ani neʼets kin exbay an exobchixtaláb axi más exbadh.

JANTʼINIʼ KA TʼAJAʼ

Ka eyendhaʼ i tʼiplab axi yab kʼibat abal kin ejtiy jitaʼ ti atsʼál. Ka nitsʼbiy a Jesús: abal ka olnaʼ i exobchixtaláb axi exbadh, ka eyendhaʼ i tʼiplab axi an atikláb in ujnám kin tʼajaʼ ani abal ka olnaʼ i exobchixtaláb axi kʼibat kin exbay jitaʼ ti otsʼówiyal ka eyendhaʼ i tʼiplab axi yab kʼibat. Tam ka eyendhaʼ an tʼiplab yab ka uluw i káw axi kin tʼajaʼ abal yab kin exbaychik. Abal yab ka ukʼpiy jitaʼ ti otsʼówiyal, ka lej tʼajaʼ ti kwéntaj abal an tʼiplab axi a eyendhál ka kʼwajiy junat kʼal an exobchixtaláb axi a léʼ ka bínaʼ.

Ka tsuʼuw jawaʼ waʼats. Ka tʼajaʼ ti kwéntaj jawa waʼats ta tonidh, ka exóbnaʼ jawa in olnál an publicaciones ani ka batsʼuw in tólmixtal jitaʼ más witʼadh. Ka dhuchaʼ i tʼiplab axi a kulbétnaʼ ani ka dhayaʼ abal tam ka bínaʼ jún i exobintaláb.
Ka tʼajaʼ ti kwéntaj jitaʼ ti otsʼówiyal. Ka takuy i tʼiplab kʼal axi in ujnám kin tʼajaʼ jitaʼ kʼwajat ti atsʼál o kʼal jantʼoj axi tu tʼeʼpindháb. Yab ka eyendhaʼ i tʼiplab axi kin yajnaʼ nibal kin tidhebédhaʼ jitaʼ ti otsʼówiyal.
Ka tejwamédhaʼ jawa játs axi más exbadh. Yab ka eyendhaʼ yan i tʼiplab, expidh axi a yéjenchal abal ka wilkʼaʼ an exobintaláb axi más exbadh. Ka tʼajaʼ ti kwéntaj abal jitaʼ ti atsʼál kin exbay an exobintaláb ani yab expidh an tʼiplab.