AJUMTALÁB 57
¿Jantʼoj neʼets ka watʼey max ka kʼibchij a Jehová?
Tatáʼ a lej kʼanidhál a Jehová ani a tsápnanchal abal yab ka yajbédhanchij in ichích, bélits antsanáʼ junchikíl neʼets kit ukʼpin. Pero waʼats i walabtaláb axi más kidháb (1 Corintios 6:9, 10). Ka tʼilaʼ abal max ka tʼajaʼ jun i walabtaláb axi kidháb, a Jehová yab neʼets ti pojkaʼ. Neʼets ti pákwlanchij ani neʼets ti tólmiy abal ka lujkuw a bélil.
1. ¿Jantʼoj kwaʼal ki tʼajaʼ abal a Jehová tu ku pákwlanchij i wálab?
Tam jun i atikláb axi in kʼanidhál a Jehová ka wálbin, in atsʼál lej yajlidh in ichích. Pero a Jehová in uchál axéʼ xi kaw patal jitaʼ in yajnál jawaʼ in tʼajámal: «Max lej yan a wálab ejtíl max tsakniníl, neʼets tu tʼokedhanchij abal junílekʼij ka jílkʼon dhakniʼ» (Isaías 1:18). Max chubax ku tʼeʼpin kʼal jawaʼ i tʼajámal, a Jehová neʼets tu ku pákwlanchij. Pero, ¿jantʼoj in léʼ kin uluw ku tʼeʼpin kʼal i wálab? Axéʼ in léʼ kin uluw ki yajnaʼ kʼal jawaʼ i tʼajámal, ki jilaʼ ki tʼajaʼ ani ki konchij a Jehová abal tu ku pákwlanchij. Talbél, kwaʼal ki tsápnanchij abal ki jalkʼuy i tsalápil ani yabáts ki áynanchij kʼal jawaʼ in tʼajaʼ abal ku wálbin. Jayej, i tsápnanchal ki tʼajaʼ ti kwéntaj jawaʼ tu konchal a Jehová (ka ajiy Isaías 55:6, 7).
2. ¿Jantʼiniʼ in eyendhál a Jehová an ókʼnomchik abal tu ku tólmiy?
A Jehová in uchál axéʼ patal jitaʼ in tʼajámal jun i walabtaláb axi kidháb: «Ka kaniy ka chich an ókʼnomchik axi ti tamkuntaláb» (ka ajiy Santiago 5:14, 15). Axéʼchik xi ókʼnom in kʼanidhál a Jehová ani an epchalchik. Jajáʼchik in éjtowal tu ku tólmiy abal ku utey junílekʼij kʼal a Jehová (Gálatas 6:1).
¿Jantʼiniʼ tu tólmiyal an ókʼnomchik max ki tʼajaʼ jun i walabtaláb axi kidháb? Neʼets tu ku tʼilmay tsab i ókʼnom o ox tin eb, abal tu ku tejwamédhanchij kʼal an Biblia abal jawaʼ i tʼajaʼ yab tekedh. Jayej neʼets tu ku lej kanatbédhaʼ ani neʼets tu ku tólmiy abal ki exlaʼ jantʼoj ki tʼajaʼ abal yabáts ki tʼajaʼ nixéʼ xi walabtaláb. Walám an ókʼnomchik tu ku uchaʼ abal yabáts i éjtowal ki tʼajaʼ talchik i tʼojláb ban tamkuntaláb, ma tam ki tejwamédhaʼ abal junílekʼij kʼwajat tu utel kʼal a Jehová. Max jun i epchal ka wálbin ani yab kin jilaʼ kin tʼajaʼ an walabtaláb, neʼets ka kaldháj ban tamkuntaláb abal yab kin ódhnaʼ axi kʼeʼat an epchalchik.
ABAL KA EXÓBNAʼ MÁS
Ki lej tʼajaʼ ti kwéntaj jantʼiniʼ a Jehová tu tólmiyal tam ki tʼajaʼ jun i walabtaláb axi kidháb ani ki pidhaʼ in jalbíl patal jawaʼ in tʼajál.
3. Neʼets ki ejtow ki boliy i bélil max ki ólnaʼ i wálab
A Jehová in lej yajnál tam i tʼajál jun i walabtaláb, jaxtám kwaʼal ki ólchij jawaʼ i tʼajámal. Ka ajiychik Salmo 32:1-5 ani ka tsálpaychik kʼal axéʼ:
¿Jaleʼ ti más alwaʼ ki ólchij a Jehová i wálab ani yab ki tsinkaʼ?
Neʼets ki atsʼaʼ lej alwaʼ max ki ólchij a Jehová, pero jayej kwaʼal ki ólchij an ókʼnomchik abal kin ejtow tu ku tólmiy. Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jantʼiniʼ ti tólmiyat a Canon kʼal an ókʼnomchik, abal ka wichiy kʼal a Jehová?
Ka ólchij an ókʼnomchik jawaʼ a tʼajámal, ani yab ka tsínkanchij nibal jantʼoj, antsanáʼ neʼets kin éjtowchik ti tólmiy. Ka ajiychik Santiago 5:16 ani ka tsálpaychik kʼal axéʼ:
¿A tsálpayal abal max ki ólchij an ókʼnomchik patal jawaʼ i tʼajámal, neʼets kin ejtow tu ku tólmiy? ¿Jaleʼ?
Ka ólchij an ókʼnomchik patal jawaʼ a tʼajámal ani ka jilaʼ abal a Jehová ti tólmiy.
4. Tam ka kaldháj jun i atikláb ban tamkuntaláb pel abal ka tólmiyat ani ka beletnáj an epchalchik
Max jun i epchal kin tʼajaʼ jun i walabtaláb axi kidháb ani kin áynanchij, neʼets ka kaldháj ban tamkuntaláb, ani yabáts neʼets kin ejtow kin junkuw an epchalchik nibal kin tʼilmay. Ka ajiychik 1 Corintios 5:6, 11 ani 2 Juan 9-11 ani ka tsálpaychik kʼal axéʼ:
Wéʼ i levadura in jilbedhál an kʼoyej, jayej, max ki áynanchij ki junkuw jun i atikláb axi yab in jilál kin tʼajaʼ jun i walabtaláb, ¿walám in éjtowal tu ku ódhnaʼ? ¿Jaleʼ?
¿Jaleʼ ti yan i atikláb axi kaldháj ban tamkuntaláb, in ejtow ka wichiy? Kom tam ti kʼwajiychik eléb, in tsalpay kʼal patal jawaʼ in kʼibámal (Salmo 141:5). Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jaleʼ ti tʼajchat alwaʼ a Sonia ka kaldháj ti tamkuntaláb?
Tam jun i atikláb u kaldháb ban tamkuntaláb...
... ¿jaleʼ u puwencháb in bij a Jehová?
... ¿jaleʼ in tejwamedhál abal tekedh jawaʼ in tʼajál a Jehová ani abal tu kʼanidhál?
5. A Jehová tu pákwlanchal max ku tʼeʼpin kʼal i wálab
A Jesús in eyendhaʼ jun i tʼiplab axi tu tólmiyal ki exbay jantʼiniʼ in atsʼál a Jehová tam jun i atikláb ka wichiy kʼal Jajáʼ. Ka ajiychik Lucas 15:1-7 ani ka tsálpaychik kʼal axéʼ:
¿Jantʼoj tu exóbchal axéʼ xi tʼilab tin kwéntaj a Jehová?
Ka ajiychik Ezequiel 33:11 ani ka tsálpaychik kʼal axéʼ:
¿Jantʼoj kwaʼal ki tʼajaʼ abal ki tejwamédhaʼ abal i yajnál jawaʼ i tʼajámal?
A Jehová tu lej tʼajál ti kwéntaj antsanáʼ jantʼiniʼ jun i inik axi in beletnál i koʼnél.
JAWAʼ TALCHIK IN TSÁLPAYAL: «Yab u léʼ ku tʼilchij an ókʼnomchik patal jawaʼ u tʼajámal, kom neʼets ti kin kaldhaʼchik ban tamkuntaláb».
¿Jantʼoj neʼets ka uchaʼ, jitaʼ in tsálpayal antsanáʼ?
JAWAʼ I EXOBNÁMAL
Max ki tʼajaʼ jun i walabtaláb axi kidháb ani ku tʼeʼpin, a Jehová neʼets tu ku pákwlanchij max yabáts ki áynanchij ki tʼajaʼ.
Ki tʼilaʼ jawaʼ i exóbnaʼ
¿Jaleʼ ti lej alwaʼ ki ólchij a Jehová patal jawaʼ i tʼajámal?
¿Jantʼoj kwaʼal ki tʼajaʼ abal a Jehová tu ku pákwlanchij i wálab?
¿Jaleʼ ti kwaʼal ki ólchij an ókʼnomchik, max i tʼajámal jun i walabtaláb axi kidháb?
KA EXÓBNAʼ JANTʼOJ ÍT
Ka tsuʼuw jantʼiniʼ ti tólmiyat jun i inik, kʼal jawaʼ in ulal Isaías 1:18, tam tin exlaʼ abal a Jehová u lej yájnanchix.
¿Jaleʼ tu kaldháb jun i atikláb ban tamkuntaláb?
«Jitaʼ u kaldháb ti tamkuntaláb, pel kom u kʼanidháb» (La Atalaya, 15 de abril de 2015)
Ka tsuʼuw jantʼiniʼ a éjtowal ka wílkʼanchij jun i atikláb jaleʼ tu kaldháb talchik ban tamkuntaláb.
Ka ajiy an biografía «U yéjenchalak kin wichiy kʼal a Jehová», abal ka tsuʼuw jantʼiniʼ jun i inik in atsʼaʼ abal kʼwajatak ti kaniyáb kʼal a Jehová, abal ka wichiy tin bichówil.
«Tólmiyatchik kʼal an Biblia abal kin jalkʼuy in ejatal» (La Atalaya, 1 de abril de 2012)