AJUMTALÁB 58
Etsʼey kit kʼwajiy putudh kʼal a Jehová
I tsápnanchal abal yab jitaʼ tu ku tʼókʼbanchij ki kʼakʼnaʼ a Jehová. I lej belál abal tatáʼ jayej a atsʼál antsanáʼ ani a Jehová in lej kʼakʼnál an putudhtaláb axi tatáʼ a tejwamedhál (ka ajiy 1 Crónicas 28:9). ¿Jantʼoj walám in éjtowal kin tʼajaʼ abal ka kʼibchij a Jehová? ¿Jantʼoj a éjtowal ka tʼajaʼ abal kit kʼwajiy putudh?
1. ¿Jantʼoj walám in éjtowal kin tʼajaʼ kʼeʼat abal ki kʼibchij a Jehová?
Talchik walám kin tʼajaʼ abal ki jilaʼ ki tʼojonchij a Jehová. ¿Jitaʼchik játs axi in tʼajál antsanáʼ? I atiklábchik axi in jilámal in bichówil a Jehová, ani xowéʼ in búkʼuwal i janamtaláb abal tu ku owmédhaʼ kʼal a Jehová. Axéʼchik xi atikláb u exláb ti apóstatas. Jayej, yan i atikláb axi in okʼnál jun i belomtaláb, in olnál i janamtaláb tin kwéntaj an ólchixchik kʼal a Jehová. In tʼajál antsanáʼ kom in léʼchik kin kʼambiy jitaʼ kʼwajat ti exóbal kʼal an Biblia. Max ki tʼilmay jitaʼchik in tomolnál in bichówil a Jehová, max ki ajiy an libros axi in bukʼnál o max ku otsits ti Internet abal ki exlaʼ tin kwéntaj jajáʼchik, neʼets tu ku lej ódhnaʼ. Tin kwéntaj axéʼ xi atiklábchik, a Jesús in uluw: «Yab kit tsʼatʼeychik [kʼal jajáʼ] kom jajáʼ pel ejtíl i jókʼtsij axi lótoknax kʼal in at jókʼtsij. Max ka íjkan an jókʼtsij lótoknax al i jol, neʼets ka íjkan jayej axi u lotoknáb» (Mateo 15:14).
Pero, ¿jantʼoj neʼets ki tʼajaʼ max jun i jaʼúb o i yanél yabáts in léʼ kin tʼajaʼ ti ólchix kʼal a Jehová? Nixéʼ pel jantʼoj axi neʼets ki lej yajnaʼ. Walám ki atsʼaʼ kʼibat ki áynanchij ki tʼojonchij a Jehová, kom yab neʼets ki léʼnaʼ ku owméj kʼal nixéʼ xi atikláb. Pero yab kwaʼal ki jilaʼ abal nibal jantʼoj kin tʼajaʼ ki kʼibchij a Jehová (Mateo 10:37). Jaxtám kwaʼal ki belkaʼ a Jehová ani yab ki júnkunchij nixéʼ xi atikláb (ka ajiy 1 Corintios 5:11).
2. ¿Jaleʼ walám junchikíl neʼets ki atsʼaʼ kʼibat ku kʼwajiy putudh kʼal a Jehová?
Kom i kʼanidhál a Jehová, yab i léʼ ki júnkunchij kʼal nibal jantʼoj an kʼakʼnaxtaláb axi yab chubax. Jaxtám, yab i tʼajál nibal jun i tʼojláb abal ki tólminchij an kʼakʼnaxtaláb axi yab chubax, nibal i júnkunchal kʼal jawaʼ in tʼajálchik. A Jehová in uchál axéʼ xi kaw in tʼojnálil: «Kit kalpan al nixéʼ xi bichow» (Apocalipsis 18:2, 4).
ABAL KA EXÓBNAʼ MÁS
Ka exóbnaʼ jantʼoj a éjtowal ka tʼajaʼ abal yab jitaʼ ti owmédhaʼ kʼal a Jehová. Jayej, ka tsuʼuw abal max yab ka tʼajaʼ nibal jantʼoj axi in tʼajál an kʼakʼnaxtaláb axi yab chubax, neʼets ka tejwamédhaʼ abal a kʼanidhál a Jehová.
3. Yab ka tʼajaʼ ti kwéntaj jitaʼchik in olnál i exobchixtaláb axi yab chubax
¿Jantʼoj kwaʼal ki tʼajaʼ max ki atsʼaʼ abal u kawiliyáb in bichówil a Jehová? Ka ajiychik Proverbios 14:15 ani ka tsálpaychik kʼal axéʼ:
¿Jaleʼ ti kwaʼal ki lej tʼajaʼ ti kwéntaj ani yab ki belaʼ patal jawaʼ u ólchinal?
Ka ajiychik 2 Juan 10 ani ka tsálpaychik kʼal axéʼ:
¿Jantʼoj yab in tomnál ki tʼajaʼ kʼal an apóstatas?
Bélits max yab i tʼilmayal an apóstatas, ¿jantʼiniʼ in éjtowal tu ku ódhnaʼ jawaʼ in olnál?
Max ki otsʼowiy tam u kawiliyáb a Jehová o in bichówil, ¿jantʼiniʼ walám neʼets kin atsʼaʼ Jajáʼ?
4. Tam jun i epchal kin tʼajaʼ jun i walabtaláb axi kidháb, ka tsápnanchij kit kʼwajiy putudh kʼal a Jehová
¿Jantʼoj in tomnál ki tʼajaʼ max ki exlaʼ abal jun i epchal in tʼajámal jun i walabtaláb axi kidháb? Ki tsuʼuw jun i tsalpadh kaw axi a Jehová in pidhaʼ an israelitas. Ka ajiychik Levítico 5:1.
Antsanáʼ jantʼiniʼ in ulal axéʼ xi versículo, max ki exlaʼ abal jun i epchal in tʼajámal jun i walabtaláb, kwaʼal ki ólchij an ókʼnomchik. Abal ki tejwamédhanchij abal i kʼanidhál, okʼox kwaʼal ki uchaʼ abal kin ólchij an ókʼnomchik jawaʼ in tʼajámal. Pero max yab kin tʼajaʼ, wawáʼ kwaʼal ki ólchij an ókʼnomchik, kom i léʼ ku kʼwajiy putudh kʼal a Jehová. ¿Jaleʼ i belál abal max ki tʼajaʼ antsanáʼ, i tejwamedhál abal i kʼanidhál...
... a Jehová?
... an atikláb axi walbinének?
... an tamkuntaláb?
Max jun i epchal in tʼajámal jantʼoj axi yab tekedh, ka tólmiy.
5. Yab ka júnkunchij an kʼakʼnaxtaláb axi yab chubax
Ka ajiychik Lucas 4:8 ani Apocalipsis 18:4, 5 ani ka exóbnaʼchik axéʼ xi konowixtaláb:
¿Bélej in ajiyáb al an kʼakʼnaxtaláb axi yab chubax?
An kʼakʼnaxtaláb axi yab chubax in tʼajál yan jantʼoj abal kin tólmiy an atiklábchik, ¿bélej in tólmix kʼal jajáʼchik?
¿U kwaʼal jun i tʼojláb axi u tólmix kʼal an kʼakʼnaxtaláb axi yab chubax?
¿Waʼats kʼeʼat jantʼoj axi in tomnál ku tʼajaʼ abal yabáts kin tólmixin kʼal an kʼakʼnaxtaláb axi yab chubax?
Max a tʼajaʼ ti kwéntaj abal it kʼwajatej tit tólmix kʼal an kʼakʼnaxtaláb axi yab chubax, ¿jantʼoj kwaʼal ka tʼajaʼ?
Jawaʼ ka takuy, kwaʼal kin tʼajaʼ abal ka atsʼaʼ alwaʼ ani kit kʼwajiy putudh kʼal a Jehová.
¿Jantʼoj neʼets ka tʼajaʼ max kit konchin i tolmixtaláb kʼal jantʼoj axi in tʼajál an kʼakʼnaxtaláb axi yab chubax?
JAWAʼ TALCHIK IN TSÁLPAYAL: «¿Jantʼiniʼ neʼets ku ólnaʼ an chubaxtaláb, max yab u exlál jawaʼ in ulal an apóstatas?».
¿Walám in tomnál ki tsalpay antsanáʼ? ¿Jaleʼ?
JAWAʼ I EXOBNÁMAL
Yab kwaʼal ki junkuw jitaʼ yabáts pel i ólchix kʼal a Jehová. Jayej, yabáts kwaʼal ku tólmixin kʼal an kʼakʼnaxtaláb axi yab chubax.
Ki tʼilaʼ jawaʼ i exóbnaʼ
¿Jaleʼ ti yab kwaʼal ki tsuʼuw nibal ki atsʼaʼ jawaʼ in olnál an apóstatas?
¿Jantʼoj in tomnál ki tʼajaʼ kʼal jitaʼchik yabáts pel i ólchix kʼal a Jehová?
¿Jantʼoj kwaʼal ki tʼajaʼ abal yabáts ki júnkunchij kʼal jawaʼ in tʼajál an kʼakʼnaxtaláb axi yab chubax?
KA EXÓBNAʼ JANTʼOJ ÍT
Ka tsuʼuw jantʼoj kwaʼal ka tʼajaʼ, max ka atsʼaʼ abal u olnáb i janamtaláb tin kwéntaj an ólchixchik kʼal a Jehová.
¿Jantʼiniʼ a éjtowal ka exlaʼ max yab kʼwajat a tólmiyal an kʼakʼnaxtaláb axi yab chubax kʼal jantʼoj axi a tʼajál?
«Ku kʼwajiy tʼojlidh tin taltal an taltal kʼicháj» (La Atalaya, octubre de 2019, párrafos 16-18)
¿Jantʼoj in tʼajámal talchik i atikláb abal kin tʼajaʼ ki kʼibchij a Jehová?
Ka ajiy an biografía «U léʼak ku exlaʼ a Dios ma tu tsákamtal», abal ka exlaʼ jantʼoj in tʼajaʼ jun i sacerdote abal kin jilaʼ an kʼakʼnaxtaláb axi yab chubax.
«Tólmiyatchik kʼal an Biblia abal kin jalkʼuy in ejatal» (La Atalaya, 1 de julio de 2011)