AJUMTALÁB 13
An kʼakʼnaxtaláb axi yab chubax, in luklinchámal in bij a Dios
Yan i kʼakʼnaxtaláb tu exóbchal abal a Dios tu kʼanidhál ani in ulalchik abal in kʼakʼnál a Dios. Tam, ¿jaleʼ in tʼajámalchik yan i kidhabtaláb? Játs kom jajáʼchik yab chubax in kʼakʼnál a Dios. In tʼajámalchik abal ka tejwaméj ejtíl max a Dios u janamkaw. ¿Jantʼiniʼ tin tʼajámalchik? ¿Jantʼoj in atsʼál a Dios kʼal jawaʼ in tʼajámal axéʼchik xi kʼakʼnaxtaláb? Ani, ¿jantʼoj neʼets kin tʼajaʼ a Dios abal kin lujkuw jawaʼ in tʼajámalchik?
1. ¿Jantʼiniʼ ti luklinchámej in bij a Dios, kʼal jawaʼ exobchámej an atiklábchik?
Yan i kʼakʼnaxtaláb yab in olnámal «an chubaxtaláb tin kwéntaj a Dios», expidh in olnál i janamtaláb (Romanos 1:25). Jun i tʼiplab, yabchik in exobchámal an atikláb jantʼiniʼ in bij a Dios. Pero an Biblia in ulal abal kwaʼal ki éyendhanchij in bij a Dios (Romanos 10:13, 14). Waʼats i kʼakʼnaxtaláb axi in exóbchal an atiklábchik abal tam u watʼel jun i yajchiktaláb pel kom a Dios antsanáʼ tin léʼ. Pero nixéʼ yab chubax. A Dios yab in kulbetnál abal wawáʼ ki yajchiknaʼ (ka ajiy Santiago 1:13). Axéʼ xi janamtaláb in tʼajámal abal yan i atikláb ka owméj kʼal a Dios.
2. ¿Jantʼiniʼ ti luklinchámej in bij a Dios, kʼal jawaʼ in tʼajámalchik?
An kʼakʼnaxtaláb axi yab chubax yab in tejwamédhanchal i kʼanidhomtaláb an atikláb, antsanáʼ jantʼiniʼ in tʼajál a Jehova. An Biblia in ulal abal max ka múlkunchat «in wálab [...] neʼets ka ulits ma ti éb» (Apocalipsis 18:5). Al yan i támub, an kʼakʼnaxtaláb axi yab chubax in tolmiyámal an eyalchik, in tolmiyámal jitaʼchik u kʼalel ti pejéx ani ma in tʼajámal abal ka tsemets yan i atikláb. Yan i atikláb axi in okʼnál an kʼakʼnaxtaláb axi yab chubax in konchal i tumín an atiklábchik abal jajáʼchik kin koʼoy jawaʼ in léʼ. Axéʼ in tejwamedhál abal yabchik in exlál jantʼiniʼ in ey a Dios. Tam, ¿walám tekedh kin uluwchik abal in tʼojonchal a Dios? (Ka ajiy 1 Juan 4:8).
3. ¿Jantʼoj in atsʼál a Dios kʼal jawaʼ in tʼajámal an kʼakʼnaxtaláb axi yab chubax?
Max tatáʼ yab a kulbetnál jawaʼ in tʼajál axéʼchik xi kʼakʼnaxtaláb, ¿jantʼiniʼ a tsálpayal abal in atsʼál a Dios? A Jehová in kʼanidhál patal an atikláb, pero u lej tsakúl kʼal jitaʼchik in okʼnál an kʼakʼnaxtaláb axi yab chubax, kom in odhnálchik an atikláb ani kom luklinchámej in bij. A Dios in ulumal abal neʼets kin talabédhaʼ patal an kʼakʼnaxtaláb axi yab chubax, ani abal «ni jaykʼiʼ yabáts neʼets ka tsuʼtat» (Apocalipsis 18:21). Lej weʼits, neʼets kin talabédhaʼ patal an kʼakʼnaxtaláb axi yab chubax (Apocalipsis 18:8).
ABAL KA EXÓBNAʼ MÁS
Ki exóbnaʼ jantʼoj más in tsálpayal a Jehová kʼal patal an kʼakʼnaxtaláb axi yab chubax. Jayej, neʼets ki tsuʼuw jantʼoj in tʼajámal axéʼchik xi kʼakʼnaxtaláb. Ani neʼets ki tsuʼuw abal patal axéʼ yab in tomnál kin tʼajaʼ abal tatáʼ ka jilaʼ tit exóbal.
4. A Dios yab in bátsʼuwal patal an kʼakʼnaxtaláb
Yan i atikláb in tsálpayal abal patal an kʼakʼnaxtaláb pel i bel axi tu utuwal kʼal a Dios. Pero, ¿walám chubax nixéʼ? Ka ajiychik Mateo 7:13, 14 ani ka tsálpaychik kʼal axéʼ:
¿Jantʼiniʼ in ulal an Biblia abal játs an bel axi tu utuwal kʼal a Dios?
Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Tu exóbchal an Biblia abal a Dios in bátsʼuwal patal an kʼakʼnaxtaláb?
5. An kʼakʼnaxtaláb axi yab chubax yab in tejwamedhál i kʼanidhomtaláb ejtíl a Dios
An kʼakʼnaxtaláb axi yab chubax in luklinchámal in bij a Dios, jun i tʼiplab játs kom in tolmiyámal an pextaláb. Abal ka exlaʼchik jun i tʼiplab, ka tsuʼuwchik an VIDEO. Talbél ka tʼilaʼchik jawaʼ a tsuʼuw:
¿Jantʼoj in tʼajaʼ yan i kʼakʼnaxtaláb axi yab chubax ban Segunda Guerra Mundial?
¿Jantʼoj a tsálpayal kʼal jawaʼ in tʼajaʼchik?
Ka ajiychik Juan 13:34, 35 ani 17:16. Talbél ka tsálpaychik kʼal axéʼ:
¿Jantʼiniʼ a tsálpayal abal in atsʼál a Jehová tam kin tsuʼuw abal an kʼakʼnaxtalábchik u tólmix ban pextaláb?
An kʼakʼnaxtaláb axi yab chubax in tʼajámal yan i kidhabtaláb ani yab in tejwamedhál i kʼanidhomtaláb ejtíl a Jehová. ¿Jantʼiniʼ a tsuʼumal tatáʼ abal chubax patal axéʼ?
An kʼakʼnaxtalábchik axi yab chubax yab in tejwamedhál i kʼanidhomtaláb ejtíl a Dios.
6. A Dios in léʼ kin kaldhaʼ an atiklábchik kʼal an kʼakʼnaxtaláb axi yab chubax
Ka ajiychik Apocalipsis 18:4a ani ka tsálpaychik kʼal axéʼ:
A Dios in léʼ kin tólmiy patal an atikláb axi kʼambiyámej kʼal an kʼakʼnaxtaláb axi yab chubax. ¿Jantʼoj a tsálpayal? ¿Walám alwaʼ axéʼ?
7. Ka áynanchij ka exlaʼ más tin kwéntaj an Dios axi chubax
¿Walám in tomnál ka jilaʼ ka kʼakʼnaʼ a Dios kom yan i kʼakʼnaxtaláb in luklinchámal in bij? Ka tsalpay kʼal jun i kwitól axi yab in léʼ kin belkaʼ in tátaj, u kʼalel ti kʼwajíl pil, ani in tʼajál yan jantʼoj axi kidháb. Max an tataláb etsʼey in tsápnanchij kin tólmiy in tsakámil, ¿walám in tomnál ki jólbiy kʼal jawaʼ in tʼajaʼ an tsakam?
¿Walám in tomnál ki jólbiy a Jehová kʼal patal jawaʼ in tʼajámal an kʼakʼnaxtaláb axi yab chubax ani ki jilaʼ ki exóbnaʼ an Biblia?
JAWAʼ TALCHIK IN TSÁLPAYAL: «Nanáʼ yab u léʼ kin ólchin nibal jantʼoj tin kwéntaj a Dios, kom patal an kʼakʼnaxtaláb in lej odhnámal an atikláb».
Tatáʼ, ¿jayej a tsálpayal antsanáʼ?
¿Jaleʼ yab in tomnál tu ku owmédhaʼ kʼal a Jehová, jawaʼ in tʼajál an kʼakʼnaxtalábchik axi yab chubax?
JAWAʼ I EXOBNÁMAL
An kʼakʼnaxtaláb axi yab chubax in luklinchámal in bij a Dios kʼal yan i exobchixtaláb axi yab tekedh ani kʼal yan i kidhabtaláb axi in tʼajámal. Jaxtám, lej wéʼits neʼets kin talabédhaʼ.
Ki tʼilaʼ jawaʼ i exóbnaʼ
¿Jantʼoj a tsálpayal tatáʼ kʼal jawaʼ in olnámal ani in tʼajámal an kʼakʼnaxtaláb axi yab chubax?
¿Jantʼoj in tsálpayal a Jehová tin kwéntaj an kʼakʼnaxtaláb axi yab chubax?
¿Jantʼoj neʼets kin tʼajaʼ a Jehová kʼal an kʼakʼnaxtalábchik axi yab chubax?
KA EXÓBNAʼ JANTʼOJ ÍT
Waʼats tsab jantʼoj axi in tʼajámal abal a Jehová yab kin batsʼuw an kʼakʼnaxtaláb axi yab chubax. Ka tsuʼuw jantʼoj játs.
¿Jaleʼ tu konchal a Jehová abal ki kʼakʼnaʼ jun tamkudh ani yab ti kwetémtal?
«¿Walám i yéjenchal ku kʼwajiy al jun i kʼakʼnaxtaláb?» (Artículo axi ti jw.org)
Jun i sacerdote yab in alwaʼ éxbayalak jawaʼ jajáʼ in olnál. Pero játs nixéʼ axi in tʼajaʼ abal kin léʼnaʼ kin exóbnaʼ an Biblia.
«Jun i sacerdote in jilaʼ an iglesia» (¡Despertad!, febrero de 2015)
Al yan i támub, an kʼakʼnaxtaláb axi yab chubax in ulumal i janamtaláb tin kwéntaj a Dios. Jayej in tʼajámal abal an atiklábchik kin tsalpay abal a Dios yab tu kʼanidhál ani ma tu odhnál. Ka exóbnaʼ juʼtáj ti kalej ox kʼal nixéʼ xi janamtaláb.
«I janamtaláb axi tu owmedhál kʼal a Dios» (La Atalaya, 1 de noviembre de 2013)