AJUMTALÁB 47
¿Walám neʼets ka éjtowits kit pujan?
Kom it kʼwajat a exobnál an Biblia, a exobnámalits yan jantʼoj tin kwéntaj a Jehová ani walám a jalkʼuyámal yan jantʼoj ta ejatal. Pero walám waʼats jantʼoj axi in tʼajámal abal yabayej ka pidhaʼ a ejatal a Jehová ani kit pujan. Al axéʼ xi ajumtaláb neʼets ka exlaʼ jantʼoj in tʼajámal yan i atikláb abal kin ejtow ka pujan ani neʼets ka exlaʼ jantʼoj a éjtowal ka tʼajaʼ tatáʼ.
1. ¿Jay i exlomtaláb kwaʼal ka koʼoy tin kwéntaj an Biblia abal ka ejtow kit pujan?
Abal ka éjtow kit pujan «kwaʼal ka exlaʼ an chubaxtaláb» (1 Timoteo 2:4). Yab in yéjenchal ka exlaʼ patal jawaʼ in ulal an Biblia. Ma an ólchixchik kʼal a Jehová axi biyálits ti pujadh, in aynanchal kin exóbnaʼ yan jantʼoj (Colosenses 1:9, 10). Pero kwaʼal ka exbay an exobchixtaláb axi más exbadh. An ókʼnomchik axi ti tamkuntaláb neʼets ti tólmiy ka exlaʼ jawaʼ in yéjenchalej ka exbay.
2. ¿Jantʼoj kwaʼal ka tʼajaʼ abal ka ejtow kit pujan?
An Biblia in ulal: «Kit jíkʼtsonchik kʼal a wálab ani kit wichiy kʼal a Dios» (ka ajiy Hechos 3:19). Axéʼ játs jawaʼ in tomnál ka tʼajaʼ tatáʼ abal ka ejtow kit pujan. Axéʼ neʼets ka tʼajaʼ tam ka yajnaʼ jawaʼ a tʼajaʼ kidháb ti biyál ani neʼets ka lej konchij a Jehová abal ti pákwlanchij. Jayej neʼets ka jilaʼ ka tʼajaʼ jawaʼ yab tekedh ani neʼets ka tsápnanchij ka tʼajaʼ jawaʼ ti konchal a Jehová. Kʼeʼat jantʼoj axi kwaʼal ka tʼajaʼ, pel kit tólmixin más ti tamkuntaláb, ejtíl, kit kʼalej ban tamkuntaláb ani kit kalej tit ólnom kʼal an epchalchik.
3. ¿Jaleʼ ti yab in tomnál ka jilaʼ abal an jikʼeltaláb ti ataʼ?
Talchik in tsʼejnál ka pujan kom in tsálpayal abal yab neʼets kin ejtow kin putuw kʼal jawaʼ kin uchaʼ a Jehová. Tam junchikíl, tatáʼ neʼets kit ukʼpin, antsanáʼ jantʼiniʼ in tʼojnálil a Jehová axi ti biyál. Pero ka tʼilaʼ abal a Jehová in exlál abal pel u waláblom (ka ajiy Salmo 103:13, 14). A Jehová neʼets ka kulbéj max tatáʼ ka tsápnanchij, ani ma neʼets ti tólmiy abal ka ejtow kit pujan. An Biblia in ulal abal «yab jitaʼ in éjtowal kin kʼanchij a Dios abal tu ku kʼanidhaʼ» (ka ajiy Romanos 8:38, 39).
ABAL KA EXÓBNAʼ MÁS
Ki tsuʼuw tsab jantʼoj axi neʼets ti tólmiy abal ka éjtow kit pujan: Ka exlaʼ más a Jehová ani ka jilaʼ abal ti tólmiy.
4. Ka tsápnanchij ka exlaʼ más a Jehová
¿Jantʼoj más a yéjenchal ka exlaʼ tin kwéntaj a Jehová abal ka ejtow kit pujan? Jawaʼ ka exlaʼ kwaʼal kin tʼajaʼ ka kʼanidhaʼ a Jehová ani ka léʼnaʼ ka belkaʼ. Yan i exóbal kʼal an Biblia axi tin puwél an Tsabál antsanáʼ tin tʼajámal. Ka tsuʼuwchik an VIDEO abal ka exlaʼ. Talbél ka tsálpaychik kʼal axéʼ.
¿Kʼal jantʼoj ti tólmiyat an atiklábchik axi i tsuʼuw ban video abal kin ejtow ka pujan?
Ka ajiychik Romanos 12:2 ani ka tsálpaychik kʼal axéʼ:
¿Waʼats jantʼoj ti Bibliaʼ axi a atsʼál wéʼ kʼibat ka belaʼ? ¿A lej belál abal jawaʼ in olnál an ólchixchik kʼal a Jehová játs an chubaxtaláb?
¿Jantʼoj a éjtowal ka tʼajaʼ max waʼats jantʼoj axi a atsʼál kʼibat ka belaʼ?
5. Yab ka jilaʼ abal nibal jantʼoj ti tʼokʼbay
Patal i tametnaʼ i kʼibataláb abal ki ejtow ki pidhaʼ i ejatal a Jehová ani ku pujan. Abal ka exlaʼchik jun i tʼiplab, ka tsuʼuwchik an VIDEO. Talbél ka tʼilaʼchik jawaʼ a tsuʼuw.
¿Jantʼoj in watʼenchij a Narangerel abal kin ejtow ka pujan?
¿Jantʼiniʼ ti tólmiyat kʼal an kʼanidhomtaláb axi in koʼonchal a Jehová abal kin ejtow ka pujan?
Ka ajiychik Proverbios 29:25 ani 2 Timoteo 1:7 ani ka tsálpaychik kʼal axéʼ:
¿Jantʼiniʼ neʼets ki elaʼ an tsapláb abal ki watʼenchij jawakits tam kʼibataláb?
6. Ka lej belaʼ abal a Jehová neʼets ti tólmiy
A Jehová neʼets ti tólmiy abal ka tʼajchij in kulbétal. Ka tsuʼuwchik an VIDEO ani ka tʼilaʼchik jawaʼ a tsuʼuw.
¿Jaleʼ ti an inik axi i tsuʼuw ban video u jikʼelak ka pujan?
¿Kʼal jantʼoj ti tólmiyat abal kin belaʼ más kʼal a Jehová?
Ka ajiychik Isaías 41:10, 13 ani ka tsálpaychik kʼal axéʼ:
¿Jaleʼ tin tomnál ka lej belaʼ abal neʼets ka ejtow ka putuw kʼal jawaʼ ka uchaʼ a Jehová?
7. Ka kʼakʼnaʼ kom a Jehová ti kʼanidhál
Tam ka tʼajaʼ ti kwéntaj abal a Jehová ti lej kʼanidhál, neʼets ka léʼnaʼ ka pidhaʼ a ejatal ani ka tʼojonchij. Ka ajiychik Salmo 40:5 ani ka tsálpaychik kʼal axéʼ:
Kʼal patal jawaʼ ti pidhámal a Jehová, ¿jawaʼ játs axi más a kʼakʼnál?
An kawlómej Jeremías in kʼanidhálak a Jehová ani in káwintal. Jayej in kulbetnálak kin tʼojonchij a Jehová. Jajáʼ in uluw: «A káwintal tin kulbédhanchij u ichích, ani u lej kʼijidhnál ku ólnaʼ a bij» (Jeremías 15:16). Xowéʼ ka tókʼtsiy axéʼ xi konowixtalábchik:
¿Jaleʼ ti lej kulbél i atsʼál kom pel u ólchix kʼal a Jehová?
¿A léʼ kit pujan abal kit exláj tit ólchix kʼal a Jehová?
¿Waʼats jantʼoj axi ti tʼokʼbanchal abal ka tʼajaʼ?
¿Jantʼoj a éjtowal ka tʼajaʼ abal ka bajuw kit pujan?
JAWAʼ TALCHIK IN TSÁLPAYAL: «In jikʼél yab ku ejtow ku putuw kʼal jawaʼ u aycháb kin tʼajaʼ jun i ólchix kʼal a Jehová».
Tatáʼ, ¿jayej a atsʼál antsanáʼ?
JAWAʼ I EXOBNÁMAL
A Jehová neʼets ti tólmiy abal ka ejtow kit pujan ani ka watʼenchij jawakits tam kʼibataláb.
Ki tʼilaʼ jawaʼ i exóbnaʼ
¿Jay i exlomtaláb kwaʼal ka koʼoy tin kwéntaj an Biblia abal ka ejtow kit pujan?
¿Jantʼoj kwaʼal ka tʼajaʼ abal ka ejtow kit pujan?
¿Jaleʼ ti yab in tomnál ka jilaʼ abal an jikʼeltaláb ti ataʼ?
KA EXÓBNAʼ JANTʼOJ ÍT
Ka lej tsalpay jaleʼ ta léʼ kit pujan.
«¿It kʼwajat tʼojojodh abal kit pujan?» (La Atalaya, marzo de 2020)
Ka tsuʼuw max waʼats jantʼoj axi in tʼajámal abal yabayej ka ejtow kit pujan.
«¿Jantʼoj in kʼibchalej abal kin pujan?» (La Atalaya, marzo de 2019)
Ka tsuʼuw jantʼoj in ejtow kin tʼajaʼ jun i inik abal ka pujan.
Jun i inik axi in bij Ataa yab in éxbayalak jaleʼ ti kwaʼalak ka pujan. Ka tsuʼuw kʼal jantʼoj ti tólmiyat abal kin léʼnaʼ ka pujan.