¿A tʼilál axéʼ?
¿A ajiyámal An Ólchix Uw axi kalnek al axéʼ an támub? Ka tsuʼuw max a tʼilál an tokʼtsixtaláb in kʼál axéʼ an konowixtalábchik:
¿Jantʼoj in léʼ kin uluw ki jalkʼuy i tsalápil? (Rom. 12:2).
Belits max i tʼajál jawaʼ alwaʼ, i yéjenchal ki tʼajaʼ jantʼoj más. Kwaʼal ki lej tʼajaʼ ti kwéntaj jantʼiniʼ játs i ey ani ki tsápnanchij ki jalkʼuy ti ejatal jawaʼ i yéjenchalej ki tʼajaʼ, abal antsanáʼ ki ejtow ki kulbedhaʼ a Jehová (w23.01, páginas 8 ani 9).
¿Jaleʼ in tomnál ku tsalpaxin tekedh kʼal jawaʼ kʼwajat ti watʼel ban xeʼtsintaláb?
I léʼ ki tsuʼuw jantʼiniʼ ti kʼwajat ti putnal an kʼej kaw, jaxtám i lej tʼajál ti kwéntaj jawaʼ kʼwajat ti watʼel ban xeʼtsintaláb, pero yab i léʼ ki olnaʼ i kwetém tsalápil kom nixéʼ neʼets kin tʼajaʼ abal yab ku kʼwajiy junkudh. Jawaʼ in tomnál ki tʼajaʼ játs ki tsuʼuw ban publicaciones jawaʼ tu ólchal in bichówil a Jehová (1 Cor. 1:10) (w23.02, página 16).
¿Jaleʼ ti yab junat an pujantaláb axi in koʼoy a Jesús kʼal axi wawáʼ?
A Jesús yab in yéjenchij kin pidhaʼ in ejatal a Jehová kom waʼtsinits al jun i bichow axi takudh kʼal Jajáʼ. Yab in yéjenchij ka tʼeʼpin kʼal in wálab nibal kin konchij ka pakwlanchat kʼal a Jehová kom jajáʼ yabak wálbidh (w23.03, página 5).
¿Jantʼoj i éjtowal ki tʼajaʼ abal axi más an epchalchik jayej kin bajuw kin bínaʼ jun i tokʼtsixtaláb?
Yab ki bínaʼ jun i tokʼtsixtaláb axi lej nakat, antsanáʼ neʼets ki jilaʼ abal axi kʼeʼatchik jayej kin bínaʼ jun i tokʼtsixtaláb. Jayej yab in tomnál ki ólnaʼ yan i tsalap ban tokʼtsixtaláb axi i binál, kom axi más yabáts neʼets kin elaʼ jantʼoj kin uluw (w23.04, página 23).
¿Jantʼoj játs «an bél axi Tʼokat» axi u olnáb ti Isaías 35:8?
Ti biyál, in tʼipoyalak jun i bél axi u kalelak ti Babilonia ani u ulelak ma ti Jerusalén. ¿Jantʼoj in tʼipoyal xowéʼ? Yan i kʼij okʼxidh kin bajuw an támub 1919, tujey ti kaldháb an Biblia ti uw ani ti wilkʼáb, axéʼ eyan abal ka tujey ti wejkʼáb an bél. Axéʼ xi bél u eyendháb abal ka kʼakʼnáj a Jehová jantʼiniʼ tin tomnál pero jayej neʼets tu ku neʼdhaʼ abal ki kʼakʼnaʼ a Jehová abal etsʼey (w23.05, páginas 15 ma ti 19).
¿Jantʼoj játs an tsab i mimláb axi u tʼilnal ti Proverbios capítulo 9?
A Proverbios u kaw tin kwéntaj an mimláb axi tontolidh, in ulal abal max ki batsʼuw an kanixtaláb axi tu pidhál axéʼ xi mimláb neʼets ku tsemets. Pero axi jun an mimláb in tʼipoyal «an tsalpadhtaláb axi chubax», max ki batsʼuw an kanixtaláb axi jajáʼ tu tʼajchal, neʼets ku kʼwajiy kulbél abal etsʼey (Prov. 9:1, 6, 13, 18) (w23.06, páginas 22 ma ti 24).
¿Jantʼiniʼ in tejwamédhaʼ a Jehová abal in kwaʼal i tsaʼataláb ani in éxbayalak a Lot?
A Jehová in uchaʼ a Lot abal ka kalej ti Sodoma ani ka kʼalej ti tsinél ban tsʼén ti Seir. A Lot in lej konchij a Jehová abal ka jilan ka kʼalej ti Zóar ani a Jehová in jilchij (w23.07, página 21).
¿Jantʼoj in éjtowal kin tʼajaʼ jun i mimláb max in tomkíl in metʼál i pornografía?
In tomnál kin tʼilaʼ abal yab jajáʼ in wálab. Jawaʼ más alwaʼ játs ka utey más kʼal a Jehová. Kin exóbnaʼ ti Biblia tin kwéntaj i mimlábchik axi in koʼoy i kʼibataláb axi lej púlik, pero tólmiyatchik kʼal a Jehová. In éjtowal kin tólmiy in tomkíl abal yab kin atsʼaʼ lej kʼibat kin jilaʼ kin tsuʼuw an pornografía (w23.08, páginas 14 ma ti 17).
¿Jaleʼ ti lej alwaʼ ku kʼwajiy koyat tam jun i atikláb tu kónomchikal jantʼoj tin kwéntaj an Biblia?
Ki tsalpay abal nixéʼ an konowixtaláb in éjtowal tu ku tólmiy ki exlaʼ jantʼoj tam tʼeʼpintaláb in kwaʼal jajáʼ o jantʼoj játs axi in léʼ kin exlaʼ. Antsanáʼ neʼets ku tokʼtsin kʼal i kʼayaʼtaláb (w23.09, página 17).
¿Jantʼoj in tʼajaʼ a María abal kin koʼoy i tsapláb ani jantʼoj i exobnál?
Tam ti a María in exlaʼ abal neʼetsak kin koʼoy jun i tsakam, in jilaʼ abal ka tólmiyat kʼal kʼeʼatchik. An ángel Gabriel ani a Elisabet in eyendhaʼ an dhuchlab abal kin kanatbédhaʼ a María. Xowéʼ ta kʼicháj, an epchalchik jayej in éjtowal tu ku kanatbédhaʼ (w23.10, página 15).
¿Jantʼiniʼ tu tókʼtsinchal a Jehová i olábil?
A Jehová in ulúmal abal neʼets kin atsʼaʼ an oláb axi i tʼajchal. Jajáʼ in tʼajál ti kwéntaj max i olábil kʼwajat junkudh kʼal jawaʼ Jajáʼ in tsálpayal kin tʼajaʼ (Jer. 29:12). Waʼats yan jantʼiniʼ a Jehová in éjtowal kin tókʼtsiy jun i oláb, pero etsʼey neʼets tu ku tólmiy (w23.11, páginas 21 ani 22).
Max ti Romanos 5:2 u olnábits tin kwéntaj jun i aychixtaláb, ¿jaleʼ tu olnáb juníl ban versículo 4?
Tam jun i atikláb ka ólchat tin kwéntaj an Biblia, walám in aychalits ka kʼwajiy ban alabél tsabál. Pero tam kin tamétnaʼ jun i kʼibataláb ani kin tsuʼuw abal u tolmiyáb kʼal a Jehová, nixéʼ in tʼajál abal in bélomtal ka tsapikméj más (w23.12, páginas 12 ani 13).