Ինչ կարող են սովորեցնել մեզ թռչունները

«ՄՏԻԿ արէք երկնքի թռչուններին, որ չեն սերմում, եւ ոչ էլ հնձում, եւ ոչ ամբարների մէջ ժողովում, եւ ձեր երկնաւոր Հայրը կերակրում է նորանց. չէ՞ որ դուք նորանցից աւելի լաւ էք» (Մատթէոս 6։26)։ Այս խոսքերը վերցված են Հիսուս Քրիստոսի մի հռչակավոր քարոզից, որը նա ասել էր Գալիլեայի ծովի մոտ գտնվող սարերից մեկի լանջին։ Նրա ունկնդիրների թիվը միայն իր հետևորդներով չէր սահմանափակվում. Հրեաստանի տարբեր մասերից եկած մի մեծ բազմություն էր հավաքվել։ Նրանց միջից գտնվեցին մարդիկ, ովքեր հետագայում դարձան Հիսուսի աշակերտները։ Նրանցից շատերը աղքատ էին, որոնք բերել էին հիվանդների, որպեսզի Հիսուսը բուժեր նրանց (Մատթէոս 4։23–5։2; Ղուկաս 6։17–20)։

Բոլոր հիվանդներին բուժելուց հետո Հիսուսը նրանց ուշադրությունը հրավիրեց ավելի կարևոր՝ հոգևոր կարիքների վրա։ Նրա սովորեցրած դասերից մեկը վերոհիշյալ օրինակն էր։

Երկնքի թռչունները վաղուց գոյություն ունեն։ Նրանց մի մասը սնվում է միջատներով, իսկ ուրիշներն էլ պտուղներով ու սերմերով։ Եթե Աստված այսքան առատ բաներ է տվել թռչուններին, ապա անշուշտ նա ի զորու է օգնելու նաև իր ծառաներին՝ հայթայթելու համար իրենց հանապազօրյա հացը։ Նա գուցե դա անի՝ օգնելով նրանց գտնել աշխատանք, այնպես որ օրվա հացի համար փող վաստակեն։ Կամ նա գուցե հաջողություն տա նրանց՝ իրենց բերքն աճեցնելու համար։ Ինչ վերաբերում է կրիտիկական պահերին, ապա Աստված կարող է այնպես անել, որ բարի հարևանների կամ ընկերների սրտում ցանկություն առաջանա կիսելու իրենց սնունդը նրանց հետ, ով կարիքի մեջ է։

Մենք շատ–​շատ բաներ կարող ենք սովորել՝ ուշադրությամբ դիտելով թռչունների կյանքը։ Աստված թռչուններին բույն հյուսելու զարմանալի բնազդով է ստեղծել, որպեսզի այնտեղ նրանք կարողանան մեծացնել իրենց ձագուկներին։ Եկեք նկատի առնենք երկու տեսակի բներ։ Ձախ կողմում պատկերված է աֆրիկյան ժայռային ծիծեռնակի բույնը։ Այն կառուցվում է ժայռերի ճակատային մասերում կամ տների պատերին։ Այսպիսի բների տանիքը կախ ընկած ժայռերն են, կամ, ինչպես որ պատկերված է այս նկարում, շենքերի կտուրների կախ ընկած մասը։ Բնի հատակը պատրաստվում է իրար խառնված ցեխի մանր գնդիկներից ու բաժակի տեսք ունի։ Ե՛վ էգը, և՛ արուն ժրաջանորեն աշխատում են, որ ցեխի գնդիկներ հավաքեն ու համարյա մեկ ամսից ավարտում են իրենց բնի շինարարությունը։ Հետո սկսում են հատակը ծածկել խոտերով ու փետուրներով։ Երկուսն էլ կերակրում են իրենց ձագերին։ Ներքևում պատկերված է արու ջահրիկի բույնը։ Այս աշխատասեր աֆրիկյան թռչունը իր բույնը շինում է՝ օգտագործելով խոտեր կամ զանազան բուսական մնացորդներ։ Նա կարող է մի օրում վերջացնել իր բնի շինարարությունը ու ի վիճակի է մեկ սեզոնի ընթացքում երեսունից ավելի բներ հյուսել։

Ի՞նչ դաս կարող ենք քաղել։ Եթե Աստված թռչուններին օժտել է այսպիսի ընդունակություններով ու նրանց ապահովել է բներ հյուսելու համար նման առատ «շինանյութերով», ապա անշուշտ նա ի զորու է օգնել իրեն ծառայող մարդկանց, որ ունենան անհրաժեշտ բնակարանային պայմաններ։ Սակայն Հիսուսը ցույց տվեց, որ մի բան էլ է հարկավոր անել, եթե ցանկանում ենք, որ Եհովա Աստված օգնի մեզ հայթայթելու մեր նյութական կարիքները։ «Առաջ Աստուծոյ արքայութիւնը եւ նորա արդարութիւնը խնդրեցէք. եւ այդ ամենքը կ’տրուի ձեզ» (Մատթէոս 6։33)։ Գուցե ձեզ զարմացնի այն հարցը, թե ինչ է նշանակում նախ Աստծո Արքայությունը խնդրել։ Եհովայի վկաները, ովքեր տարածում են այս պարբերագիրը, ուրախությամբ կպատասխանեն այդ հարցին։