Կարո՞ղ է սա դառնալ քո կյանքի լավագույն ուղին
Եթե մկրտված քրիստոնյա ես, ապա, անկասկած, Աստծո հանդեպ ունեցած սերը մղում է քեզ՝ կատարելու նրա կամքը։ Դեռ ավելին։ Ծառայության մեջ, անշուշտ, մեծ ջանքեր ես ներդնում։ Ի վերջո, Հիսուս Քրիստոսն իր բոլոր հետևորդներին է հանձնարարել աշակերտներ պատրաստելու գործը (Մատթէոս 28։19, 20)։ Իհարկե, թերևս նաև աշխատում ես նյութական կարիքներդ ապահովելու համար։ Բայց, լինելով Հիսուսի հետևորդ և Եհովայի վկա, առաջին հերթին դու քրիստոնյա քարոզիչ ես. մեկը, որն իր կյանքում առաջնությունը տալիս է Թագավորության բարի լուրի ավետմանը (Մատթէոս 24։14)։
Միգուցե դեռ չի բոլորել կամ էլ նորերս է լրացել քսան տարիդ։ Հնարավոր է, շատ ես մտածել, թե կյանքի ինչ ընթացք բռնես։ Քո առջև բացված ճանապարհները ծանր ու թեթև անելիս երևի զգալի տեղ ես հատկացնում նրան, թե ինչը քեզ ավելի մեծ բավարարվածություն կպատճառի։
Տեսնենք, թե իր կատարած ընտրության մասին ինչպես է արտահայտվում դանիացի Յորնը։ Նա իր ընտրած ուղին նկարագրում է որպես «կյանքի իդեալական ուղի, որը հնարավորություն է տալիս կենտրոնանալ բոլոր ասպարեզներից ամենակարևորի վրա»։ Իսկ 31–ամյա հունաստանցի Էվան ասում է. «Երբ համեմատում եմ իմ կյանքը ուրիշների կյանքի հետ, միշտ գալիս եմ այն եզրակացության, որ իմն ավելի հարուստ է, լիարժեք և հետաքրքիր»։ Կյանքի ո՞ր ուղին է, որ այդպիսի բավարարվածություն է պատճառում։ Ինչպե՞ս կարող ես այդ ուղիով ընթանալ։
Ցո՞ւյց է տալիս Աստված, թե որն է այդ ուղին
Կյանքի ուղի ընտրելը բոլորովին էլ հեշտ չէ։ Իրականում, ոմանք կցանկանային, որ Աստված հստակորեն ցույց տար, թե ինչ է ակնկալում իրենցից։
Երբ Մովսեսը գտնվում էր Մադիամի երկրում, Եհովան պատվիրեց նրան վերադառնալ Եգիպտոս և իսրայելացիներին ազատել ստրկությունից (Ելից 3։1–10)։ Աստծո հրեշտակը երևաց Գեդեոնին և հանձնարարեց նրան ազատել Իսրայելին հարստահարիչների ձեռքից (Դատաւորաց 6։11–14)։ Դավիթը ոչխար էր արածեցնում, երբ Աստված ասաց Սամուելին, որ օծի նրան՝ որպես Իսրայելի հաջորդ թագավորի (Ա Թագաւորաց 16։1–13)։ Այսօր մենք այդ կերպով առաջնորդություն չենք ստանում, այլ ինքներս, քննելով իրավիճակները, պետք է որոշենք, թե ինչպես օգտագործել աստվածաշնորհ մեր ընդունակությունները։
Եհովան այսօր երիտասարդ քրիստոնյաների առջև «աշխատանքի մեծ եւ կարեւոր դուռ» է բաց արել (Ա Կորնթացիս 16։9)։ Ինչպե՞ս։ Վերջին տասնամյակում ամբողջ աշխարհով մեկ Թագավորության քարոզիչների թիվն ավելացել է ավելի քան 2 125 000–ով ու անցել վեց միլիոնից։ Ովքե՞ր են իրենց ներդրումն ունենում հոգևոր կերակուր մատակարարելու և աշխարհով մեկ ավետարանը քարոզելու համար անհրաժեշտ Աստվածաշնչեր, գրքեր, գրքույկներ, պարբերագրեր և թերթիկներ հրատարակելու գործում։ Այս օրհնյալ առանձնաշնորհումը ունեն Բեթելի համաշխարհային ընտանիքի անդամները։
Պարգևատրող կենսակերպ
«Բեթել» նշանակում է «Աստուծոյ տուն», և Բեթելի տներում բնակվում են այն քրիստոնյա կամավորները, ովքեր ծառայում են «Դիտարան» ընկերության գլխավոր վարչությունում և տարբեր մասնաճյուղերում (Ծննդոց 28։19, տող. ծան.)։ Ներկայումս յուրաքանչյուր Բեթելի ընտանիք կարելի է նմանեցնել լավ կազմակերպված, ‘իմաստությամբ շինված տան’, որի հիմքում ընկած է Եհովայի հանդեպ սերը (Առակաց 24։3)։
Ի՞նչ կարելի է ասել Բեթելում տիրող ընտանեկան մթնոլորտի մասին։ Էստոնիայի Բեթելի ընտանիքի մի 25–ամյա անդամ ասում է. «Հաճելի է միշտ գտնվել այնպիսի մարդկանց մեջ, ովքեր բարեկամ են Եհովային։ Սա ամենաթանկ բանն է ինձ համար Բեթելում» (Սաղմոս 15։1, 2)։
Այսօր ամբողջ աշխարհում Բեթելում ծառայելու առանձնաշնորհում ունեն մոտ 19 500 քրիստոնյաներ (Սաղմոս 110։3)։ Միացյալ Նահանգներում Բեթելի ընտանիքի անդամների 46%–ը 19–29 տարեկան են։ Եսայիայի նման նրանք էլ են ասել. «Ահա ես, ինձ ուղարկիր» (Եսայիա 6։8)։ Եսայիան, լինելով Եհովային արդեն նվիրված ծառա, հավելյալ ծառայություն կատարելու ցանկություն հայտնեց։ Երևում է, որ դա նրանից որոշակի զոհողություններ էր պահանջում։ Նմանապես Բեթելում ծառայողները թողնում են իրենց տունը, հարազատ միջավայրը, ինչպես նաև իրենց ծնողներին, եղբայրներին, քույրերին և ընկերներին։ Այս զոհողությունները նրանք հոժարակամորեն անում են «Աւետարանի համար» (Մարկոս 10։29, 30)։
Սակայն, դրա փոխարեն ի՜նչ հոգևոր օրհնություններ կան Բեթելում։ Ռուսաստանի Բեթելի ընտանիքից մի երիտասարդ քույր պատմում է. «Անձնազոհ ոգի դրսևորելով՝ կարող ենք շատ բան սովորել, որը կօգնի մեզ ապրել նոր աշխարհում։ Կարող եմ ասել, որ իմ պարագայում Եհովայի օրհնություններն ավելի շատ են, քան արածս զոհողությունները» (Մաղաքիա 3։10)։
Կյանքը Բեթելում
Ինչպիսի՞ն է կյանքը Բեթելում։ Բեթելի ընտանիքի անդամները համաձայն են, որ կյանքն այնտեղ բարերար է, բավականություն պատճառող և նույնիսկ հետաքրքիր։ 43 տարեկան Յենսը սիրում է Բեթելի ծառայությունը։ Ինչո՞ւ։ Նա բացատրում է. «Քանի որ գիտակցում եմ, որ յուրաքանչյուրս մեր լուման ենք ներդնում կարևոր հանձնարարություն կատարելու նպատակով ծավալվող հսկայական գործունեության մեջ։ Այստեղ կարողանում եմ տեսնել Եհովայի գործի ծավալն ու կարևորությունը»։
Երկուշաբթի օրվանից մինչև շաբաթ Բեթելում օրը սկսվում է առավոտյան երկրպագությամբ։ Դա Աստվածաշնչի վրա հիմնված քննարկում է, որն անցկացնում է փորձառու երեցներից մեկը։ Երկուշաբթի երեկոյան ընտանիքը մեկ ժամ նվիրում է «Դիտարան» պարբերագրի միջոցով Աստվածաշնչի ուսումնասիրությանը, որից հետո, ժամանակ առ ժամանակ, սուրբգրային թեմայով հանրային ելույթներ են լինում՝ հատկապես Բեթելի ընտանիքին վերաբերող։
Իսկ ի՞նչ է արվում նորեկներին օգնելու համար։ Նոր անդամներին Բեթելի կյանքին ծանոթացնելու համար ընտանիքի հասուն եղբայրները Բեթելի ծառայության տարբեր երեսակներին վերաբերող դասախոսություններ են կարդում։ Առաջին տարվա ընթացքում Բեթելի ընտանիքի նոր անդամները մի քանի շաբաթ շարունակ՝ շաբաթական մեկ օր, իրենց համար նախատեսված դպրոց են հաճախում, որտեղ ընդլայնում են սուրբգրային իրենց հասկացողությունը։ Նրանք նաև Աստվածաշնչի ընթերցանության հատուկ ծրագրի են հետևում։ Առաջին տարվա ընթացքում ընտանիքի նոր անդամներն ընթերցում են ամբողջ Աստվածաշունչը։
Ո՞րն է այս ամբողջ ուսուցման արդյունքը։ Հոնկոնգի Բեթելի ընտանիքի 33–ամյա անդամ Ջոշուան պատասխանում է. «Բեթելը իրոք որ խորացնում է Եհովայի հանդեպ երախտագիտությունս։ Հաղորդակցվում եմ փորձառու շատ եղբայրների հետ, որոնք իրենց կյանքի մեծ մասն անց են կացրել Եհովային ծառայելով։ Հատկապես ինձ դուր են գալիս այնպիսի հոգևոր միջոցառումներ, ինչպես օրինակ, առավոտյան երկրպագությունն ու «Դիտարանի» ընտանեկան ուսումնասիրությունն է։ Բացի այդ, սիրում եմ կազմակերպվածությունն ու պարզ ապրելակերպը։ Դա ազատում է ինձ ավելորդ հոգսերից։ Նաև սովորում եմ խնդիրները քրիստոնեական ձևով լուծել և միշտ տեսնում եմ դրա օգուտները»։
Բեթելի ընտանիքի անդամներն իրենց ժամանակի և ուժերի մեծ մասը տրամադրում են հոժարակամորեն հանձն առած գործը կատարելուն, այն է՝ օգտագործել իրենց ֆիզիկական և մտային կարողությունները՝ առաջին հերթին կատարելու այն հանձնարարությունը, որ իրենց է տրվում Բեթելում։ Զանազան գործեր կան անելու։ Ոմանք աշխատում են տպագրահաստոցի մոտ կամ էլ կազմարարական արհեստանոցում գրքեր են պատրաստում, որոնք հետո առաքվում են բազմաթիվ ժողովներ։ Ուրիշները ծառայում են խոհանոցում, ճաշարանում կամ լվացքատանը։ Կատարվում են նաև մաքրության պահպանման, հողագործական, շինարարական և այլ աշխատանքներ։ Ոմանք էլ հետևում են վերոհիշյալ բաժանմունքներում տեղադրված սարքավորումների անխափան աշխատանքին։ Մյուսները առողջապահական ծառայություն կամ էլ գրասենյակային աշխատանք են կատարում։ Բեթելում բոլոր նշանակումներն էլ հաճելի են և հիանալի արդյունքներ են բերում։ Այստեղ կատարվող աշխատանքը հատկապես գոհացուցիչ է, քանի որ նպաստում է Թագավորության շահերին և Աստծո հանդեպ սիրուց մղված է արվում։
Բեթելի ընտանիքի անդամները նշանակված են՝ համագործակցելու տարբեր ժողովների հետ, որտեղ նրանք անմիջապես տեսնում են իրենց աշխատանքի օգուտները։ Նրանք հաճույքով հաճախում են ժողովի հանդիպումներին և մասնակցում քարոզչական գործունեությանը։ Արդյունքում՝ Բեթելի ընտանիքի անդամները իրենց ժողովի քույրերի և եղբայրների հետ ամուր կապեր են հաստատում (Մարկոս 10։29, 30)։
Ռիտան (Մեծ Բրիտանիայի Բեթելի ընտանիքի անդամ) պատմում է. «Անչափ շնորհակալ եմ ժողովի համար։ Հանդիպումների և քարոզչական ծառայության ժամանակ, երբ տեսնում եմ սիրելի եղբայրներին ու քույրերին, փոքրերին և ծերերին, իմ հավատն ավելի է զորանում։ Ինչ էլ որ պատահի, նրանք այնտեղ են։ Դա օգնում է ինձ ավելի եռանդուն լինել Բեթելի իմ ծառայության մեջ»։
Կյանքը Բեթելում չի սահմանափակվում միայն աշխատանքով, ժողովի հանդիպումներով, քարոզչությամբ և ուսումնասիրությամբ։ Ընտանիքը զվարճությանն էլ է ժամանակ հատկացնում։ Ժամանակ առ ժամանակ անց են կացվում զվարճալի և հոգևորապես թարմացնող ընտանեկան երեկոներ, որտեղ իրենց շնորհքն ու ընդունակություններն են ցույց տալիս բազմաթիվ եղբայրներ ու քույրեր. բացի այդ, ընտանիքը քաջալերիչ պատմություններ է լսում Բեթելի ծառայողների կյանքից։ Նաև, բեթելցիները հյուր են գնում միմյանց՝ օգտակար և բարերար ընկերակցություն վայելելով։ Կան նաև հանգիստն անցկացնելու որոշ հարմարություններ, ինչպես նաև գրադարաններ՝ անձնական ընթերցանության և հետազոտություն կատարելու համար։ Չմոռանանք նաև ճաշարանում սեղանի շուրջ ընթացող հաճելի զրույցները։
Թոմը (Էստոնիայի Բեթելի ընտանիքի անդամ) ասում է. «Բեթելից քիչ այն կողմ ծովն է, իսկ հենց կողքին գեղեցիկ անտառ կա, որտեղ ես և կինս սիրում ենք զբոսնել։ Երբեմն ժողովի կամ Բեթելի ընկերներիս հետ գոլֆ, հոկեյ և թենիս եմ խաղում։ Իսկ երբ լավ եղանակ է լինում, հեծանիվներով զբոսանքի ենք գնում»։
Ինչպե՞ս կարող ես համապատասխանել
Իհարկե, Բեթելն առաջին հերթին այնպիսի վայր է, որտեղ հոգևորապես հասուն քրիստոնյաները սուրբ ծառայություն են մատուցում Եհովային և աշխատում են հանուն աշխարհով մեկ սփռված իրենց հավատակիցների շահերի։ Նա, ով դառնում է Բեթելի ընտանիքի անդամ, որոշակի պահանջների պետք է բավարարի։ Ի՞նչ կարող ես անել Բեթելի ծառայությանը համապատասխանելու համար։
Բեթելի ծառայության համար հրավիրվածները պետք է ժողովում լավ համարում ունենան այնպես, ինչպես Տիմոթեոսը, որը ծառայեց Պողոս առաքյալի հետ (Ա Տիմոթէոս 1։1)։ Տիմոթեոսը «բարի վկայութիւն ունէր Լիւստրացի եւ Իկոնիացի եղբայրներիցը» (Գործք 16։2, ԱԹ)։ Թեև նա երիտասարդ էր, սակայն լավ գիտեր Գրությունները և քաջածանոթ էր ճշմարտությանը (Բ Տիմոթէոս 3։14, 15)։ Նմանապես Բեթելի ծառայության հրավիրվածներից էլ ակնկալվում է, որ Աստվածաշնչի գիտությունն ունենան։
Բեթելի ընտանիքի անդամները պետք է անձնազոհ ոգի ունենան։ Տիմոթեոսն այնպես էր անձնազոհ ոգի դրսևորում և պատրաստակամությամբ Թագավորության շահերը իր շահերից վեր դասում, որ նրա մասին Պողոսն ասաց. «Ոչ ոք չունեմ նրա նման սրտակից, որ հարազատի պէս հոգայ ձեր մասին, քանզի բոլորն էլ իրե՛նց շահն են փնտռում եւ ո՛չ Յիսուս Քրիստոսինը։ Բայց նրա փորձուած լինելը դուք էլ գիտէք, որովհետեւ ինձ հետ Աւետարանին ծառայեց այնպէս, ինչպէս որդին՝ հօրը» (Փիլիպպեցիս 2։20–22)։
Բեթելի ծառայության համար հոգևոր եղբայրներ ու քույրեր են հարկավոր։ Աստվածաշնչի ուսումնասիրությունը, քրիստոնեական ժողովներին կանոնավոր հաճախելը, ծառայությանը մասնակցելն ու հասուն քրիստոնյաների հետ հաղորդակցվելը նպաստում են, որ Բեթելի ընտանիքի անդամները հոգևորապես աճեն։ Այդպիսով՝ նրանք օգնություն են ստանում՝ հետևելու Պողոսի խրատին. «Ընթացէ՛ք [Քրիստոս Հիսուսով]՝ արմատաւորուած եւ կառուցուած նրա վրայ, հաստատ մնալով հաւատի մէջ, ինչպէս որ ուսանեցիք, որպէսզի աճէք նրա մէջ գոհութեամբ» (Կողոսացիս 2։6, 7)։
Բեթելում կատարվող աշխատանքի բնույթից ելնելով՝ ծառայության են ընդունվում նրանք, ովքեր ֆիզիկապես ուժեղ են և քաջառողջ։ Եթե համապատասխանում ես նշված չափանիշներին, լրացել է 19 տարիդ և ամենաքիչը մեկ տարվա մկրտված ես, մենք խրախուսում ենք քեզ մտածել Բեթելի ծառայության մասին։
Բոլորս էլ ներդրում ունենք
Լինելով քրիստոնյաներ՝ բոլորս էլ ցանկանում ենք Թագավորության շահերը կյանքում առաջին տեղը դնել և անձնվեր ծառայել Եհովային (Մատթէոս 6։33; Կողոսացիս 3։23)։ Կարող ենք նաև քաջալերել Բեթելում ծառայողներին, որ շարունակեն իրենց սուրբ ծառայությունը։ Եվ հատկապես այն երիտասարդ եղբայրներին, ովքեր համապատասխանում են Բեթելի ծառայությանը, հարկավոր է քաջալերել՝ ձգտելու այս օրհնյալ առանձնաշնորհմանը։
Բեթելի ծառայությունը հոգևորապես բավարարություն պատճառող կյանքի ուղի է. ուղի, որ կարող է լավագույնը լինել քեզ համար։ Դա այդպես է Նիքի համար, որը 20 տարեկանից սկսել է ծառայել Բեթելում և արդեն տասը տարի է, ինչ այդ ծառայության մեջ է։ «Ես հաճախ եմ աղոթքով Եհովային շնորհակալություն հայտնում իմ հանդեպ ցուցաբերած շնորհի համար,— ասում է նա։— Սրանից ավել ի՞նչ կարող էի խնդրել նրանից։ Այստեղ շրջապատված ենք հավատարիմ քրիստոնյաներով, ովքեր Եհովայի ծառայության մեջ անում են իրենց լավագույնը»։
[շրջանակ/նկար 22–րդ էջի վրա]
Ի՞ՆՉ ԿԱՐՈՂ ԵՆ ԱՆԵԼ ԵՐԵՑՆԵՐՆ ՈՒ ԾՆՈՂՆԵՐԸ
Երեցներն ու շրջագայող վերակացուները հատկապես պետք է խրախուսեն երիտասարդ եղբայրներին, որ Բեթելի ծառայության համար դիմում գրեն։ Բեթելի ընտանիքի երիտասարդ անդամների հետ վերջերս կատարված ոչ պաշտոնական հարցումից պարզ դարձավ, որ նրանց 34 %–ին հիմնականում քրիստոնյա վերակացուներն են քաջալերել, որ Բեթելի ծառայությունն իրենց նպատակը դարձնեն։ Ճիշտ է, ժողովներում կզգացվի նրանց պակասը։ Բայց լավ է հիշել, որ թեև Տիմոթեոսն, անկասկած, բարերար ազդեցություն էր թողնում Լիստրայի և Իկոնիայի ժողովների մյուս երիտասարդների վրա, երեցները նրան ետ չպահեցին ծառայության մեջ Պողոսին միանալուց։ Նրանք եզրակացություն չարեցին, որ եթե Տիմոթեոսն ուղեկցեր առաքյալին, ապա դա չափազանց մեծ կորուստ կլիներ իրենց ժողովի համար (Ա Տիմոթէոս 4։14)։
Գլխավորապես քրիստոնյա ծնողները պետք է քաջալերեն իրենց երեխաներին՝ ձգտելու այդ ծառայությանը։ Վերևում հիշատակված հարցումը նաև ցույց տվեց, որ Բեթելում երիտասարդ ծառայողների 40 %–ին հիմնականում իրենց ծնողներն են խրախուսել մտնելու այդ ծառայության մեջ։ Մի քույր, որն արդեն մի քանի տարի է, ինչ ծառայում է Բեթելում, ասաց. «Բեթելի ծառայությունն ընտրելու մեջ ինձ համար մեծ խթան հանդիսացավ Եհովայի ծառայության մեջ ծնողներիս անցկացրած կյանքը։ Աչքիս առաջ ունենալով լիաժամ ծառայության մեջ նրանց օրինակը՝ ես հասկացա, որ սա էր լինելու կյանքի ամենալավ և ամենամեծ բավականություն պատճառող ուղին, որ երբևէ կարող էի ընտրել»։
[շրջանակ 24–րդ էջի վրա]
ՆՐԱՆՔ ԳՆԱՀԱՏՈՒՄ ԵՆ ԲԵԹԵԼԻ ԾԱՌԱՅՈՒԹՅՈՒՆԸ
«Ինձ համար թանկ է Բեթելի ծառայությունը։ Գիտակցելով, որ այսօր ամբողջ օրը Եհովային եմ ծառայել և նույնը անելու եմ վաղը, վաղը չէ մյուս օրը և այդպես շարունակ, բավարարվածության մեծ զգացում եմ ապրում։ Դա խիղճս մաքուր է դարձնում և դրական մտքեր հաղորդում ինձ»։
«Բեթելը մի այնպիսի վայր է, որտեղ կարող ես քո ամբողջ ժամանակն ու կորովը անմնացորդ նվիրել Եհովային ծառայելուն։ Սա ներքին ուրախություն է պատճառում։ Նաև կարող ես Եհովայի կազմակերպությունը ուրիշ կողմից դիտել։ Կազմակերպության գործունեության կենտրոնին քեզ ավելի մոտ ես զգում, իսկ դա, ինքնին, շատ հետաքրքիր է»։
«Բեթելի ծառայությունը ամենալավ բանն է իմ կյանքում։ Այստեղ անընդհատ սովորում ես։ Իսկ դա իմ անձնական շահերի համար չէ, այլ՝ Եհովայի։ Այստեղ կատարած աշխատանքս երբեք ապարդյուն չի անցնի»։
«Ընդունակություններս Բեթելում օգտագործելը գոհունակության և անդորրության զգացումով է սիրտս լցնում, քանի որ դրանք օգտագործում եմ հանուն Եհովայի և եղբայրների»։
«Նախկին մասնագիտությունիցս չեմ կարողացել իսկական բավականություն և ուրախություն ստանալ։ Տարիներ շարունակ երազել եմ աշխատել իմ քույրերի ու եղբայրների հետ և նրանց համար։ Ահա թե ինչու եմ եկել Բեթել։ Ինձ մեծ բավարարվածություն է պատճառում այն բանի իմացությունը, որ իմ բոլոր ջանքերը կնպաստեն ուրիշների հոգևոր բարօրությանը և փառք կբերեն Եհովային»։