Նոր երգեր՝ երկրպագության համար

¹ «Աստվածաշնչի և թերթիկի Դիտարան ընկերության» (Փենսիլվանիա) վերջին տարեկան հանդիպման ժամանակ, որը տեղի ունեցավ 2014 թ.-ին, հայտարարվեց, որ վերանայվելու է երգարանը։ Դա, իրոք, ոգևորիչ նորություն էր։ Բոլոր ներկաներին հիշեցվեց, որ Թագավորության երգերը կարևոր դեր ունեն մեր երկրպագության մեջ (Սաղ. 96։2)։

² Գուցե հարցնեք. «Ինչո՞ւ է անհրաժեշտ վերանայել երգարանը»։ Կան մի քանի պատճառներ։ Նախևառաջ Աստվածաշնչի մեր հասկացողությունը շարունակում է հստակեցվել, և դա, ինչ խոսք, կարող է ազդել մեր երգերի խոսքերի վրա (Առակ. 4։18)։ Բացի այդ, շատ արտահայտություններ և բառեր, որ կան երգարանում, վերցված են նախորդ անգլերեն «Նոր աշխարհ» թարգմանությունից։ Այդ խոսքերը այժմ պետք է փոխել, որպեսզի դրանք համապատասխանեն անգլերեն վերանայված հրատարակությանը։ Քանի որ հսկայական աշխատանք է պահանջվում կատարել խոսքերը վերանայելու համար, որոշվեց մի քանի նոր երգ ավելացնել։

³ Արդյոք պե՞տք է սպասել, մինչև որ նոր երգարան հրատարակվի։ Ո՛չ։ Ուրախ ենք տեղեկացնել, որ հաջորդ մի քանի ամիսների ընթացքում մի շարք նոր երգեր կթողարկվեն ու կդրվեն jw.org վեբ կայք (նոտաներով)։ Երբ նոր երգ թողարկվի, կծրագրվի Ծառայողական հանդիպման վերջում երգել այն։

⁴ Ինչպես սովորել նոր երգերը։ Ինչ խոսք, գուցե դժվար լինի սովորել նոր երգերը։ Սակայն սաղմոսերգուի նման՝ մենք էլ ենք ուզում գովերգել Եհովային ժողովի հանդիպումների ժամանակ և «լուռ չմնալ» (Սաղ. 30։12)։ Նոր երգերը սովորելու համար հետևիր ներքոհիշյալ պարզ քայլերին։

• Մի քանի անգամ լսիր երգի դաշնամուրային կատարումը, որը կդրվի մեր վեբ կայքում։ Որքան շատ լսես մեղեդին, այնքան քեզ համար հեշտ կլինի հիշել այն։

• Ուսումնասիրիր խոսքերը և փորձիր մտապահել դրանք։

• Երգիր մեղեդին խոսքերի հետ։ Այդպես արա այնքան, մինչև որ լավ սովորես։

• Ընտանեկան երկրպագության ժամանակ մի քանի անգամ ընտանիքով փորձեք նոր երգերը։

⁵ Հաջորդ ամիսներին, երբ ծրագրվի Ծառայողական հանդիպման վերջում նոր երգ երգել, ժողովը մեկ անգամ կլսի դաշնամուրային կատարումը, որից հետո կերգի երգը։

⁶ Ժողովի հանդիպումների ժամանակ երգելը մեծ ուրախություն է պարգևում մեզ, քանի որ բոլորս մեր ձայներն ուղղում ենք Եհովային գովերգելու համար։ Հետևաբար, չպետք է սովորություն ունենանք անհարկի դուրս գալ սրահից երգելու ժամանակ։

⁷ Մեկ ուրիշ կերպով էլ կարող ենք ցույց տալ գնահատանք մեր երգերի հանդեպ։ Համաժողովների ժամանակ ծրագրի յուրաքանչյուր մաս սկսելուց առաջ երաժշտություն է հնչում։ Տարին երկու անգամ աշխարհի տարբեր մասերից նվիրված եղբայրներ ու քույրեր իրենց միջոցներով գալիս են Պատերսոն (Նյու Յորք), որպեսզի կատարեն այն հրաշալի երաժշտությունը, որ գրվել է մեր երկրպագության համար։ Ուստի երբ նախագահողը հրավիրում է մեզ զբաղեցնել մեր տեղերը և լսել նվագախմբի կատարումը, մենք հենց այդպես էլ կանենք։ Այդպես վարվելով՝ կպատրաստենք մեր սիրտը՝ ծրագիրն ունկնդրելու համար (Եզր. 7։10)։

⁸ Այսօր մեր հանդիպումը կավարտենք՝ երգելով նոր երգ, որը կոչվում է «Թագավորությունը հաստատվել է. թող գա՛ այն»։ Այս երգը, որը ներկայացվեց տարեկան հանդիպման ժամանակ, հատուկ գրվել է Թագավորության 100-ամյակի առթիվ։

⁹ Այո՛, այս նոր երգերը «բարի բաներ» են Եհովայի կողմից (Մատթ. 12։35ա)։ Ուստի եկեք սովորենք այս նոր երգերը ու սրտանց երգենք դրանք՝ գովերգելով ու փառաբանելով մեր Աստծուն (Սաղ. 147։1)։