Omahupiro mOuye Oupe wOhange
Indu ove tji mo tara kombunikiro yotjiperendero kombanda yombapira ndji, ove una ouripura uṋe? Omutima woye kau na ku zera ohange, ondjoroka, nomaṋingaparero ngu maye munikwa mba? Otjinga pe ri. Posi yokutja orwo oruroto uriri, poo omeriwovisiro wouripura, okukambura kutja ozongaro nḓa maape ya aze roro okukara kombanda yehi?
Otjingi tjovandu mape ya ave ripura nao. Ovimunikwa vyandino ovita, ozondjito zotjitandi, ourumbu, omitjise, omakurupiro—okutwa ko tjiva uriri. Nungwari ngundee ku na omaundjiro. Mokutara koruyaveze, Ombeibela mai hungire ohunga na imbi ‘eṱe mbi matu undju Mukuru mbya kwizika: Eyuru epe nehi epe mu mamu tura ousemba.’—2 Petrus 3:13; Jesaja 65:17.
“Eyuru epe” ndi “nehi epe,” otja kOmbeibela, kamayuru omape woruuma poo ehi epe katjotjiri. Ehi emunikwa neyuru ya memwa omahinotjipo, nOmbeibela mai raisa kutja owo maye kara nga aruhe. (Epsalme 89:36, 37; 104:5) “Ehi epe” mari rire otjiwaṋa tjovandu ovasemba mbu mave kara kombanda yehi, na indi “eyuru epe” mari rire ouhona womayuru, poo ohoromende, ndje urisiwa ndji mai honapara kombanda yomaturiro wovandu nga kombanda yehi. Posi yokutja, pe ri osemba okukambura kutja “ehi epe,” poo ouye oupe ouhivirikwa, mape ya arire ouatjiri?
Ii, zemburuka epu kutja ozongaro ozosemba nḓa sana ngo za ri orupa rwondandero yaMukuru oini kehi ndi. Eye wa twa omurumendu omutenga nomukazendu mOparadisa yaEden kombanda yehi neve pe otjiungura otjihimise: “Kwatasaneye, takavareye nu mu urise ehi, noro ngari kare kehi yeṋu.” (Genesis 1:28) Ii, ondandero yaMukuru ya ri okukara novanatje nu momakaondjero woruveze okuhandjaura Oparadisa yawo mouye auhe. Nandarire kutja owo kombunda va toorora okuhazuva ku Mukuru, ku nai amave riraisa kutja kavayenene okukara nomuinyo nga aruhe, ondandero yaMukuru oini kai na pu ya runduruka. Nu oyo ya sere okuyenenisiwa mouye oupe!—Jesaja 55:11.
Mouatjiri, indu ove tji mo kumbu Ongumbiro yaMuhona, poo Tate Yetu, amo ningire Ouhona waMukuru okuya, ove mo kumbire ohoromende ye yeyuru okuyekukohorora ehi kourunde nokuyekuhonapara kombanda youye oupe mbwi. (Mateus 6:9, 10) Nu eṱe matu kara nondandarahi kutja Mukuru ma ziri ongumbiro ndjo, orondu Embo re mari kwizike: “Ovasemba mave rumata ehi, nu mave tura mu ro nga aruhe.”—Epsalme 37:29.
Omahupiro mOuye Oupe waMukuru
Ouhona waMukuru mau eta oviyangapara vyouye ovihasasanekwa, amau yenenisa kangamwa atjihe otjiwa Mukuru kombutiro mbya tandera otjiwaṋa tje okuyorokera kombanda yehi. Omatondero nomaitaitikiro maye yanda, nu momakaondjero woruveze auhe kombanda yehi ma rire epanga ratjiri raauhe kangamwa. MOmbeibela, Mukuru ma kwizike kutja eye ma “yandisa ovita mouye auhe.” “Oviwaṋa kamaavi [toorerasana] omangaruvyo rukwao, nu kamaavi rirongerere okurwa ovita rukwao.”—Epsalme 46:9; Jesaja 2:4.
Ehi arihe momakaondjero woruveze mari etwa mongaro tjimuna yotjikunino oparadisa tjomasuviro. Ombeibela mai tja: “Okuti ku ku ri tjo nu ku kwa kukuta maku nyanda, nokuti onguza maku yoroka nu aku nyomoka otja ongara. . . . [Orondu mokuti ongaango omeva tjandje ya taura]. Oturonḓu matu pupu okutuurunga okuti onguza; eheke, ndi mari pi, mari rire erindi, nehi ekukutu mari ura notuharwi.”—Jesaja 35:1, 6, 7, sasaneka oNew World Translation.
Opo mape kara epu nda yenena okukara nondjoroka mehi Oparadisa. Ovandu kamaa ve roro okukara nondjara rukwao mena rokuhina ovikurya. “Ehi orini tjiri mari yandja ovihape vyaro,” otja Ombeibela tji mai hee. (Epsalme 67:6, NW; 72:16) Avehe mave yorokere oviungura vyomake wawo oveni, otja Omuute wetu tji ma kwizike: “[Owo] mave kunu omivite nave ri ovihape vyavyo. . . . Kave nokukunina omundu warwe omuvite kutja a rye ku wo, indee.”—Jesaja 65:21, 22.
Mouye waMukuru oupe, ovandu kave na okuṋiṋikizirwa mozondjuwo ozondendeko ozonguryoma poo ovitamba vyoviranda, orondu Mukuru wa kwizika: “Ovandu mave tungu ozondjuwo nave tura mo oveni . . . Owo kave nokutungira omundu warwe ondjuwo kutja a ture mo.” Ombeibela wina mai kwizike: “Oviungura, mbi mave ungura, mavi munu ondoṋeno.” (Jesaja 65:21-23) Ku nai ovandu mave kara noviungura ovinarutanga, novinangovisiro. Omuinyo kau na kukara ounatjirweyo.
Momakaondjero woruveze, Ouhona waMukuru wina mau kotora nandarire orupe orunahange ndwa ri motjikunino tjaEden mokati kovipuka, na pokati kovipuka novandu. Ombeibela mai tja: “Indino ombungu mai kara puna ondjona mohange, notjitotongwe atji rangavara puna ongombona. Ondana notjikeyamona mavi ri pamwe, nokazandona ake rire okarise kavyo.”—Jesaja 11:6-9; Hosea 2:18.
Ripura uri, mehi Oparadisa omitjise noviṱeṱu avihe wina mavi verurwa! Embo raMukuru mari tu kwizikire: “Kape nomundu . . . ngu ma [tja, NW] rukwao kutja eye wa vera.” (Jesaja 33:24) “[Mukuru] ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru vya kapita.”—Omavandururiro 21:4.
Omuano Owo Mu U Ri Maape Ya kOve
Ouatjiri kutja omutima woye mau nyandisiwa i omakwizikiro waMukuru ohunga nomuinyo mouye we oupe wousemba. Nu nandarire kutja tjiva mape ya ava tara komayeninisiro wozondaya ohamukwao na inḓo otja ozombwa tjinene okurira ouatjiri, ozo kazombwa tjinene okuhinokuza keke rOmuute wetu omusuvere.—Epsalme 145:16; Mika 4:4.
Otji peri, kutja opo pe na oviundjirwako okuyenenisiwa indu eṱe tji matu vanga okukara nomuinyo nga aruhe mOparadisa ndji maai ya kombanda yehi. Jesus wa raisa tjimwe tjavyo otjinanḓengu, amatja mongumbiro ku Mukuru: “Nomuinyo waaruhe okwo ngwi okutja owo ve tjiwe Ove, ngu u ri [Mukuru] watjiri [erike], nokutja ve tjiwe Jesus Kristus ngu wa hinda.”—Johanes 17:3, sasaneka Etestamente Epe nOmapsalme.
Okutja, eṱe tjiri tji matu vanga okukara nomuinyo mouye oupe waMukuru, eṱe rutenga twa sere okurihonga ombango yaMukuru okuzambo atu i tjiti. Orondu indi epu: “Ouye [mbwi] na imbi avihe mbi ri mu wo, ovandu mbi ve zera, vi yanda; nungwari ingwi ngu ma tjiti ombango ya[Mukuru], eye ma karerere nga aruhe,” okuyorokera nga aruhe ozondaya nḓu maze rokisiwa i Omuute wetu omusuvere.—1 Johanes 2:17, sasaneka EEP.
Ndoovazu kape raisirwe omuano warwe, omaraisiro ayehe wOmbeibela ya isiwa mOmbeibela yOtjiherero yo 1987.