Ekondwa 23
Otjira Otjimunikwa tjaMukuru
1. Ombeibela mai tja tjike ohunga notjira otjihamunikwa tjaMukuru?
OMENA RATJIKE eṱe tji mape ya atu kara nongamburiro kutja Mukuru u notjira otjimunikwa? Epu rimwe orondi kutja eye u na otjira otjihamunikwa. Jehova wa mema ovakerubi, ovaserafi novaengeli ovengi varwe okuungura ombango ye momayuru. (Genesis 3:24; Jesaja 6:2, 3; Epsalme 103:20) Jesus Kristus ongu ri Omuengeli Omunene kombanda tjinene na kombanda ya imba avehe. (1 Ovatesalonika 4:16; Judas 9; Omavandururiro 12:7) Ombeibela mai handjuṋuna ovaengeli kutja va zikamisiwa ‘movitrone, nangarire omauhona, nangarire omaunenenene, nangarire omauvara.’ (Ovakolose 1:16, EEP; Ovaefese 1:21) Owo avehe ve karera kerakiza raJehova, amave ungura oviungura eye mbye ve pa mombwaneno.—Daniel 7:9, 10; Job 1:6; 2:1.
2. Omuano Mukuru mwa mema evaverwa roruuma retu mari raisa vi kutja Mukuru u twa onḓengu onene komananeno?
2 Eṱe wina matu munu ondunge yonḓengu Mukuru ndje twa ko ndjero yonḓunino yotjira indu eṱe tji twa tara koviutwa vyoruuma vye. Otjotjihorera, ku na omatau omayovi wozonyose mevaverwa nḓa ṱunwa movimbumba ovitwezu mbi isanewa omikwangu vyozonyose. Omikwangu vyozonyose mbi vi kuka mokutuurungira mouye wopendje momuano omuhaisase, nu wina ozonyose ozeni nozoplaneta moukoto womikwangu vyozonyose mbi otji vi tjita. Oplaneta yetu Ehi, otjotjihorera, ombura aihe ri toora omakukiro mokukondoroka eyuva, ndi ri onyose popezu yetu, momayuva 365 pokainya, ozoiri 5, ozominute 48 nozosekonde 45,51. Ii, evaverwa roruuma ri nondyero onene!
3. Omananeno omawa mokati koviutwa ovihamunika vyaMukuru na mu indi evaverwa roruuma re ye tu honga tjike?
3 Omaṱunino mondyero omahimangongo nga mokati koviutwa ovihamunika vyaMukuru na mevaverwa roruuma re maye tu hongo otjiṋa? Ii, maye tu hongo kutja Jehova oMukuru wondyero yomaṱunino. Tjiri, ku nai, Mukuru ohamukwao na ingo katja isa ovandu kombanda yehi tjiri mbe mu suvera nokuhinomahongorero nondyero yomaṱunino.
OTJIRA TJAMUKURU OTJIMUNIKWA—MORUKAPITAVEZE NA MORUPEVEZE
4, 5. Eṱe matu tjiwa vi kutja Mukuru wa nana otjiwaṋa tje momuano womananeno momayuva waAbraham na wotjiwaṋa tjaIsrael?
4 Ombeibela mai raisa kutja Jehova aruhe wa hongorere ovakarere ve momuano wondyero yomaṱunino. Otjotjihorera, ovarumendu vongamburiro tjimuna Abraham va kaendisa omaṱunḓu novakarere vawo mokurikotamena Jehova. Jehova wa tjivisa ombango ye ku Abraham mokuhungira ku na ye. (Genesis 12:1) Nu Mukuru we mu rakiza okukwambera omatjivisiro nga ku varwe, amatja: “Ami [Abraham] mbe mu toorora kutja a rakize kovanatje ve na kozondekurona ze, ve ṱakamise ondjira yaMuhona.” (Genesis 18:19) Imba pa ri ondyero ohahaisase kotjimbumba tjovandu okurikotamena ku Jehova momuano mbwa pwa.
5 Kombunda, Ovaisrael indu tji va takavara motjivaro nave rire omangete, Jehova ka yandjere kangamwa auhe okurikotamena momuano we omuini, a pauka komatyero omahaisase kangamwa. Kako, Ovaisrael va pungirwa motjiwaṋa otjihaisase tjoverikotamene. Otjiwaṋa tjOvaisrael tja isanenwe “ombongo yaJehova.” (Numeri 20:4, NW; 1 Ekuruhungi 28:8, NW) Andakuzu ove wa ri omurikotamene ouatjiri waJehova moruveze ndo, ove otjo sokurira orupa rwombongo yoverikotamene mbo, kaku pauka ku yo.—Epsalme 147:19, 20, EEP.
6. (a) Mukuru wa raisa vi kutja ondjingonekero ye ya ri kovakongorere vaKristus? (b) Pe na omahongonona yeṋe kutja Ovakriste va woronganisirwe komerikotameno?
6 Ongaro ya ri iṋe meserewondo etenga? Ombeibela mai raisa kutja ondjingonekero yaJehova ya ri kovakongorere vOmuzandu we Jesus Kristus. Jehova wa tirira ombepo ondjapuke ye kombanda yawo. Okuraisa kutja eye nambano aa ungurisa otjira Otjikriste hi moruveze rwotjiwaṋa tjaIsrael, eye wa mbandje kOvakriste ovatenga tjiva omasa wokuverukisa ovavere, okupendura ovaṱi movakoke nokutjita oviungura ovihimise vyarwe. Ove kamoo lese Omatjangwa wOtjigrike Omakriste nokuhinokutemisiwa i epu ndi rokutja Ovakriste va ri mondyero yomaṱunino komerikotameno. Mouatjiri, owo va rakizirwe okuworongana pamwe mena repu ndi. (Ovaheberi 10:24, 25) Ku nai ove indu tji wa ri omurikotamene ouatjiri waJehova meserewondo etenga, ove andakuzu otjo sokukara orupa rwotjira Otjikriste tje.
7. Eṱe matu tjiwa vi kutja Jehova ke na pa ungurisa otjira okukapita tjimwe mu kangamwa omakaondjero woruveze harive?
7 Jehova wa rora okuungurisa otjira okukapita tjimwe momakaendero woruveze kangamwa? Momayuva waNoa, Noa porwe na imba mba ri pu na ye motjitendeze omba ri nomatjeverero waMukuru nu va hupa omeva womupupo. (1 Petrus 3:20) Wina, meserewondo etenga kapa ri ovira vyOukriste vivari poo ovingi. Mukuru aa ungura na ihi tjimwe uriri. Opo pa ri ‘Muhona umwe, ongamburiro imwe, ombapitisimo imwe uriri.’ (Ovaefese 4:5) Otjinga pe ri momayuva wetu Jesus Kristus wa hunganeka kutja mape kara omburo imwe uriri yomahongero wombepo kotjiwaṋa tjaMukuru.
8. Jesus wa raisa vi kutja atja pe kara uri otjira otjimunikwa tjaMukuru tjimwe kombanda yehi meyuva retu?
8 Indu tja hungira ohunga nomakareropo we momasa wOuhona, Jesus wa tja: “Omukarere omunanḓakameno nomunandunge, ngua zikua i omuhona ue kombanda jovakarere ve okuvepa ovikuria moruveze orusemba, eje ouaṋi are? Omuṋingandu omukarere ngui, ngu ma vazeua ama tjiti nai, omuhona tji mee ja. Tjiri, me raere eṋe: Eje me mu pe ouvara kombanda youini ue auhe.” (Mateus 24:45-47, EEP) Pomakotokero we momasa wOuhona mombura 1914, Kristus we ye ku vaza ongambi ‘yomukarere omunanḓakameno nomunazondunge’ amai yandja ‘ovikurya’ vyombepo, poo omatjivisiro? Ii, eye we ye ku vaza ongambi ‘yomukarere’ ohamukwao na ingo ndja zikamene motjihupe kombanda yehi tja imba “ovangu” ve 144 000. (Omavandururiro 12:10, NW; 14:1, 3) Nu okuza ko 1914 omangete wovandu va yakura ‘ovikurya’ owo mbi ve yandja, nu va uta okuungurisa ongamburiro ouatjiri puna wo. Otjira hi tjovakarere vaMukuru tji tjiukwa otja Ovahongonone vaJehova.
9. (a) Omena ratjike ovakarere vaMukuru tji ve tjinda ena Ovahongonone vaJehova? (b) Omena ratjike tji ve ruka otuveze twomerikotameno twawo Omatuwo wOuhona?
9 Ovahongonone vaJehova ve tara ku Mukuru na indi Embo re kokumuna omuhunga mu avihe mbi ve tjita. Ena rawo orini Ovahongonone vaJehova ri raisa kutja otjiungura ohongora tjawo otjohi tjokuzuvarisa ohunga nena nOuhona waJehova Mukuru, tjimuna Kristus tja tjita. (Johanes 17:6; Omavandururiro 1:5) Wina, owo ve isana oruveze owo pu ve wongarera komerikotameno Etuwo rOuhona mena rokutja Ouhona waMukuru mokutuurungira mu Messia, poo Kristus, ombu ri epu rondyero rOmbeibela aihe. Indu tji pe ri oukahu kutja Ovakriste veserewondo etenga va ri nomayakuriro ku Mukuru, Ovahongonone vaJehova ve sanisa otjira tjawo ku wo. Ngatu tare ousupi kotjira Otjikriste iho tjikuru nu okuzambo tu kengeze ousane notjira otjimunikwa tjaMukuru ku ndino.
ONDYERO YESEREWONDO ETENGA
10. Oviṋa viṋe tjiva mbya ri vyotjira Otjikriste tjeserewondo etenga?
10 Kutja pe pi pu pa ri Ovakriste meserewondo etenga, owo aave wongara pamwe movimbumba komerikotameno. Ozombongo nḓa aaze wongara pamwe motjimbe tjokusekirapamwe nokukonḓonona. (Ovaheberi 10:24, 25) Otjiungura ohongora tjawo tja ri okuzuvarisa nokuhonga ohunga nOuhona waMukuru, tjimuna Kristus tja tjita. (Mateus 4:17; 28:19, 20) Okaṋepo kombongo indu tji ka virauka komuano womuinyo omuvi, eye aa isiwamo mombongo.—1 Ovakorinte 5:9-13, EEP; 2 Johanes 10, 11.
11, 12. (a) Otjikwatjike tji matji raisa kutja ozombongo zOvakriste ozondenga za muna omaṱikiro nomuhunga okuza kovaapostele na imba “ovarumendu ovanene” mu Jerusalem? (b) Pe heyewa tjike ohunga nomuhunga “mbu hingwa i Mukuru”? (c) Otjikongorereko tja ri tjiṋe kozombongo indu mokuyakura omuhunga ohamukwao na imbwo?
11 Ozombongo zOvakriste meserewondo etenga nḓo za ri ozongutuke kozongwao, kangamwa aihe amai toora omihunga vyayo oini moviṋa? Kako, Ombeibela mai raisa kutja ozo za wanene mongamburiro ndja ri imwe yOukriste. Ozombongo azehe aaze munu omaṱikiro nomuhunga okuza komburo tjingeyo. Ku nai, indu tji pa yeuka ombata ohunga notjiṋa tjomasukarero, ozombongo poo ovandu kave ritoorere oveni omuhunga kutja va sokutjita tjike. Kako, posi yokutja, omuapostele Paulus, Barnabas na varwe va raerwa “[okuenda] kovaapostele na kovatarere mu Jerusalem, ve tuare ku uo ozombata nḓa.” (EEP) Indu ovarumendu ovapyuke mba, nombatero okuza kEmbo raMukuru na indji “ombepo ondjapuke” ye, tji va zikamisa omuhunga wawo, owo va hinda ovarumendu ovaṱakame okukahepura kozombongo.—Oviungura 15:2, 27-29.
12 Pa kongorera tjike okuza kozombongo nḓa muna omaṱikiro nge yandjwa i Mukuru? Ombeibela mai tja: “Nouo, [omuapostele Paulus novakaende pamwe ve] tji va rianga nai movihuro, ve ve pere ing’ [omaraerero nga zikamisiwa, HB] i ovaapostele novatarere mu Jerusalem kokujeṱakamisa. Nozombongo a rire tji za zikamisiua mongamburiro, nu va takavarere ejuva arihe ave ueziua potjivaro tjovakambure.” (Oviungura 16:4, 5, EEP) Ii, ozombongo azehe za ungura kumwe na imbi orutu rwovarumendu ovanene mu Jerusalem mbi va toorera omuhunga, nu owo va harera ko omasa mongamburiro.
OMAHUNGAMISIRO WAMUKURU NDINO
13. (a) Okuza koruveze ruṋe kombanda yehi nu omokutuurungira morutu rwovarumendu ruṋe otjira otjimunikwa tjaMukuru ku ndino mu tji muna omaṱikiro? (b) Orupe ruṋe orutu orunane ndu ru narwo na ingwi “omukarere omunanḓakameno nomunazondunge”?
13 Otjira otjimunikwa tjaMukuru ndino wina tji muna omaṱikiro waMukuru nomuhunga. Pozomberoo ohongora zOvahongonone vaJehova moBrooklyn, New York, pe na orutu oruhinge rwovarumendu Ovakriste ovanene motjiwondo okuza motupa pekepeke twouye mbe yandja ondjeverero ndji hepwa kovitjitwa mouparanga wouye vyotjiwaṋa tjaMukuru. Orutu oruhinge ndwi rwa zikama mouṋepo ‘womukarere omunanḓakameno nomunazondunge.’ Orwo ru karera otja omuhungirirepo ‘komukarere’ omuṱakame ngo.
14. Orutu orunane rwotjiwaṋa tjaMukuru ru riyameka kutjike mokutoora omuhunga warwo?
14 Ovarumendu vorutu oruhinge ndo, otjovaapostele novarumendu ovakuru mu Jerusalem, ve nozombura zondjiririra ozengi moukarere waMukuru. Nungwari owo kave riyameke kounongo woundu mokutoora omihunga. Kako, motjimbe tjokutja owo ve hongorerwa momuhunga woumukuru, owo ve tezera otjihorera tjorutu oruhongore orutenga mu Jerusalem, owo mbaa ve zikamisa omatoorero womihunga vyawo kEmbo raMukuru nu nga tjitirwe kehi yomaṱikiro wombepo ondjapuke.—Oviungura 15:13-17, 28, 29, EEP.
OKUHUNGAMISA OTJIRA OTJIPARANGAUYE
15.Omena ratjike omambo waJesus ku Mateus 24:14 tji maye raisa kutja Mukuru atja kara notjira otjitwezu otjikuryoma kombanda yehi mokati koruveze rwomaandero?
15 Jesus Kristus wa yandja ondunge ohunga nounene wotjira Mukuru tja tja kara natjo kombanda yehi momakaendero woruveze rwomaandero ndwi indu tja tja: “Nu indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.” (Mateus 24:14) Ripura ohunga noviungura ovitwezu ovinene mbi hepwa okuraera ovandu omangete omayovi vehi ohunga nOuhona waMukuru mbwa zikamisa. Otjira tjOvakriste tjeyuva randino, tji tji riyameka korutu oruhinge rwatjo kokumuna omaṱikiro nomuhunga, tje rirongera okuungura otjiungura otjinene hi?
16. (a) Omena ratjike Ovahongonone vaJehova tji va zikamisa ozofabrika ozopirinde ozengi ozondwezu ozonguryoma? (b) Pe ungurwa tjike mozofabrika nḓa?
16 Ovahongonone vaJehova nambano ve zuvarisa ombuze yOuhona momahi nomakoverwahi womeva kokuvare nga kapita 200 mokutuurunga ehi arihe. Okuvatera ovazuvarise vOuhona ovengi okukapita 4 900 000 (mo 1994) okuyenenisa oviungura mbi, ozofabrika ozopirinde ozonguryoma za zikamisiwa momahi omengi. Imba Ozombeibela nomambo nge notjiṋa ohunga nOmbeibela ye ungurwa mozonguyu ozonene ozondwezu. Eyuva arihe rokuungura, otjivaro tjomokati, pe pirindwa omambo oWatchtower noAwake! okukapita omangete yevari nokuhindwa okuza mozofabrika nḓa.
17. (a) Omena ratjike omambo wOmbeibela tji ye rongerwa? (b) Ove mo ṋangwa okutjita tjike?
17 Omambo wOmbeibela aehe nga ye rongerwa motjimbe tjokuvatera ovandu okukura mondjiviro yozondando ozohimise zaJehova. Mouatjiri, omambo “Announcing Jehovah’s Kingdom” (Okutjivisa Ouhona waMukuru) owo orupa rwotjiuru tjembo ndi The Watchtower. Ove mo ṋangwa okukara norupa mokuhandjaura omambo wOmbeibela nga nokuzengurura ku varwe ouatjiri wOmbeibela owo ngu ye na wo. Otjotjihorera, pe narive ove ngu mape ya ombandjeo omatjivisiro omananḓengu ove ngu we rihongo okuza membo ndi, Ove Mape Ya O Kara nOmuinyo Nga Aruhe mOparadisa Kombanda yEhi?
18. (a) Otjira tjaMukuru ku ndino otjinge tjira? (b) Omena ratjike otjiwaṋa tjaMukuru tji tji hepa omatunduziro omengi nambano?
18 Otja tjimuna meserewondo etenga, otjira tjaMukuru ku ndino otjira tjovazuvarise vOuhona mbe riyandja nu mba papitisiwa. Nu otjo tja zikamisiwa okuvatera ouṋepo watjo auhe okukara norupa movitjitwa vyokuzuvarisa mbi. Ovandu mba ve hepa omatunduziro omengi nomapamisiro wombepo, orondu Satana na imba eye mbe yenena okueta kehi yomatunduziro we ve pirukira ombuze yOuhona. Ovapirukire ohamukwao na imbo va zepaisa Jesus mena rokuizuvarisa, nOmbeibela mai tene kutja ovakongorere ve wina mave rondorwa.—Johanes 15:19, 20; 2 Timoteus 3:12.
19. (a) Ooyaṋi mbe yandjwa nambano okuyekuvatera nokupamisa otjiwaṋa tjaMukuru? (b) Ombongo i tjeverwa vi komahingiro omavi ngu mape ya aye eta omboru?
19 Tjimuna meserewondo etenga ku nai ndino “ovarumendu ovanene,” poo ovatarere, ve zikamisiwa okuvatera nokupamisa kangamwa aihe yombongo. Owo wina mave yenene okukuvatera nomaronga wOmbeibela okutjatjara omaputi pekepeke. Ovatarere mba wina ve tjevera “orupanda ruaMukuru.” Ku nai, okaṋepo kombongo indu tji ka vyiuka komuano womuinyo omuvi nu tji make panḓa okutanauka, “ovarumendu ovanene” mave sorisa kutja omundu ohamukwao na ingo ma pitisiwe, poo ma kondwe, okuza mombongo. Ku nai ombongo onauveruke i parurwa.—Titus 1:5, NW; 1 Petrus 5:1-3, EEP; Jesaja 32:1, 2; 1 Ovakorinte 5:13, EEP.
20. (a) Ooyaṋi meserewondo etenga mba tumwa i orutu orunane mu Jerusalem, nu omena repu riṋe? (b) Ooyaṋi mbe tumwa i orutu orunane ku ndino?
20 Otjingetjo, otja orutu oruhongore mu Jerusalem tji rwa tuma ovakuramenepo, tjimuna Paulus na Silas, okukayandja omarakiza nokumbandja omatunduziro kotjiwaṋa tjaMukuru, ku nai orutu oruhongore rweyuva randino ru tjita nao moruveze rwomaandero ndwi. (Oviungura 15:24-27, 30-32) Ape ovikando vivari mombura omukarere omupyuke, ngu isanewa omutarere worukondwa (circuit overseer), u hungamisiwa okusekirisa otjivike nombongo aihe morukondwa rwe.
21. Omutarere worukondwa u vatere vi ozombongo zotjiwaṋa tjaMukuru?
21 Oko ku na ozombongo zOvahongonone vaJehova okukapita 75 000 mouparanga wouye, nu inḓa za haṋewa motukondwa tu twa zikamisiwa ape mozombongo 20 aruhe. Indu tji ma varura ozombongo morukondwa rwe, omutarere worukondwa u tunga ovahongonone vOuhona mokuyenda osemba puna wo movitjitwa vyawo vyokuzuvarisa nokuhonga. Pendje nokuvehwika momuano mbwi, eye u mbandja omaṋangerwako nokuvevatera okupwa moukarere wawo.—Oviungura 20:20, 21.
22. (a) Omatyero yeṋe kokupamisa otjiwaṋa tjaMukuru nge tjitwa potuvari mombura? (b) Omaṋangero yeṋe ngu maye i kove?
22 Omatunduziro komeho nomapamisiro ye mbandjewa otja, potuingi potuvari mombura, ozombongo morukondwa aruhe tji ze worongana pamwe komaworonganeno weyuva rimwe poo womayuva yevari. Potuveze swi opo mape ya ape kara ovandu okuza kangamwa pokati komasere yevari poo yetatu nga ko 2 000 poo ovengi. Ove mo ṋangwa okuvarura inga ngu maye ya morukondwa roye. Eṱe tu nongamburiro kutja omaworonganeno maye ku taareke nu ye noviyangapara kove omuini.
23. (a) Pe kara omaworonganeno yarwe yeṋe otjikando tjimwe ombura aihe? (b) Yemwe yomaworonganeno nga ya ri nounene mbu ṱa pi?
23 Okuzambo, otjikando tjimwe mombura, omeero wa pamwe omanene nge isanewa ombongarero yondendera (district convention) mape ya a ye kara po oure womayuva katjondumba. Omena ratjike tji u hinokukondja tjiri okukara po nokurimunina omuini kutja ombongarero ohamukwao na indjo mape ya a i kara ombwa vi nonandjambi mombepo? Ozombura tjiva, moruveze rwozombongarero zondendera, opo pa ri ozombongarero ozonene okukambakaṋa oviwaṋa poo zouye auhe. Onenenene ndja rora okutjitwa poruveze rumwe ya ri moYankee Stadium mOtjihuro New York nomOrupare oPolo oure womayuva hambondatu mo 1958. Poruveze ndo pa ri ovandu 253 922 kehungi moupata “Ouhona waMukuru Mau Honapara—Omaandero wOuye Ya Tumbuka?” Okuzambo kape nopoṋa pu pa ri opanene okuyenena okuhaamisa ovimbumba ovitwezu mbi ṱa mbo, ku nai omatyero ya tjitwa kotuveze otupupareke movihuro ohongora ovingi okuungurisiwa kozombongarero ozondwezu.
OZOMBONGARERO MOUKOTO WOZOMBONGO
24. Ozombongarero ndano zotjivike zeṋe ozombongo zotjiwaṋa tjaMukuru nḓu ve kara nazo?
24 Orutu oruhongore rwOvahongonone vaJehova wina ru ṱuna orutuu ndwa wana rwomahongero wOmbeibela nge ka wondjisiwa mozombongo azehe zotjiwaṋa tjaJehova. Ombongo aihe i na ozombongarero ndano motjivike. Inḓa ozo Oskole yOukarere waMukuru (Theocratic Ministry School), Ombongarero yOukarere (Service Meeting), Ombongarero mOupata (Public Meeting), omakonḓononeno woWatchtower nomakonḓononeno wembo rombongo (congregation book study). Indu ove tji mape ya kutja ngundee ozombongarero nḓa koyeze tjiwa, eṱe matu ze handjuṋuna ousupi.
25, 26. Oskole yOukarere waMukuru na indji Ombongarero yOukarere ze na ondando iṋe?
25 Oskole yOukarere waMukuru ya zikamisirwa okuvatera ovahongwa okuyupikwa mokuhungira kuna varwe ohunga nOuhona waMukuru. Motuvezeveze, imba mbe ritjangisa ve yandja omahungi omasupi ohunga nomapu wOmbeibela kotjimbumba atjihe. Okuzambo omunene omutarere omunandjiririra u yandja omaṋangerwako komapwisiro.
26 Owandazere mongurova tjingeyo pe kara Ombongarero yOukarere. Omurya kombongarero ndji u pirindwa moOur Kingdom Ministry, embo revapamueze rozombapira mbari poo ozengi ndi tjangwa i orutu oruhongore. Momakaondjero wombongarero ndji omaṋangerwako nge notjiungura nozondjarisiro ohunga nomiano omiungure vyokuhungira kuna varwe ohunga nombuze yOuhona ye yandjwa. Momuano otjingewo, Kristus wa tunduza ovakongorere ve nu e ve pe omaronga kokutja va sokukaendisa vi oukarere wawo.—Johanes 21:15-17; Mateus 10:5-14.
27, 28. Ombongarero yomOupata, omakonḓononeno woWatchtower nomakonḓononeno womambo wombongo i zongembongarero?
27 Ombongarero yomOupata na wina omakonḓononeno woWatchtower aruhe ze karewa nazo mOsondaha. Pe tjitwa omakondjero wapeke okuṋanga ovandu mbe nombango ovape kOmbongarero yomOupata, ndji ri ehungi ohunga nOmbeibela ndi yandjwa i omukarere omupyuke. Omakonḓononeno woWatchtower omatyero womapuriro nomaziriro wehungi rOmbeibela nda yandjwa momapitiro wakatjisupi wembo oWatchtower.
28 Ombongo aihe ngunda amape ya ai hakaene pEtuwo rOuhona motjimbe tjozombongarero nḓa heyewa kombanda mba, ovimbumba oviṱiṱi vi ya pamwe mozondjuwo peke komakonḓononeno wotjivike wembo rombongo. Otjivatere tjokukonḓonona Ombeibela, otja tjimuna embo ndi ove ndi mo lese, tji ungurisiwa otja ondondo yomatyero wOmbeibela ngo, ngu mape ya aye kara oure woiri.
29. (a) Omazemburukiro yeṋe Ovakriste ngu ve zemburuka ombura aihe? (b) Ooyaṋi mbe kara nousemba okuungurisa komboroto nomavinu?
29 Pekepamwe nozombongarero nḓe kara ko aruhe nḓa, Ovahongonone vaJehova ve kara nombongarero yapeke ombura aihe pomazemburukiro wonḓiro yaJesus. Indu rutenga tjaa ṱuna omazemburukiro nga wonḓiro ye, Jesus wa tja: “Ihi tjiteje komazemburukiro uandje.” (Lukas 22:19, 20, EEP) Momakaondjero wovitjitwa vyakauriri Jesus wa ungurisa omavinu nomboroto ndji hinosure, otja ovikuramenepo vya imbwi omuinyo eye mbwa ri a manuka okukapunguha motjimbe tjovandu. Okutja pomariro Omazemburukwa nga wombura aihe imba ovihupe kombanda yehi wa imba 144 000 ovakongorere ovatwirisiwa vaKristus ve raisa omaundjiro wawo weyuru mokuungurisa omboroto nomavinu.
30. (a) Ooyaṋi varwe mbe kara po nouyara pOmazemburukiro, nu omaundjiro wawo ooyeṋe? (b) Ovandu ohamukwao na imbo Jesus we ve handjaura vi?
30 Omangete wavarwe mbe kara po pOmazemburukiro nga mOmatuwo wOuhona ongondoroka yehi ve nenyando okukara ovatarere. Owo wina ve zemburukisiwa ohunga na ihi Jehova Mukuru na Jesus Kristus mbi va tjita okuyenenisa onguturiro yawo okuza kourunde nonḓiro. Posi yokutja, moruveze rwokukara nomaundjiro womuinyo weyuru, owo ve nyanda momaundjiro wokukara nga aruhe nomuinyo moparadisa kombanda yehi. Owo ve ri otja Johanes Omupapitise, ngwa hungira ohunga naye omuini otja “epanga romuvareke” pendje nokurira umwe wokaṋepo 144 000, imbo avehe pamwe mbe ri omuvarekwa waKristus. (Johanes 3:29) Omangete wovandu mba orupa rwainḓa “ozonḓu zarwe” Jesus nḓa hungira ohunga nazo. Owo kauṋepo wa indwi ‘orupanda oruṱiṱi.’ Posi yokutja, otja Jesus tja heya, owo ve ungura moruwano na imba ‘vorupanda oruṱiṱi,’ kokutja avehe “ve rire orupanda rumwe.”—Johanes 10:16, EEP; Lukas 12:32.
OKUKARERA MUKURU PUNA OTJIRA TJE
31. Omahongonona yeṋe nge ri po kutja Mukuru ka yakura imba mbe kara orupa rwongamburiro yoposyo nu ngundee wina mbe kondja okurira orupa rwotjira tje?
31 Pe ri oukahu tjinene kutja, otja motuveze tu twa kapita, Jehova Mukuru u notjira otjimunikwa ku ndino! Eye nambano u tji ungurisa okusembamisa ovandu komuinyo mondyero ye ombe yousemba. Posi yokutja, eṱe kamaa pe ya atu rire orupa rwotjira tjaMukuru nu, moruveze tjingero, atu kara orupa rwongamburiro yoposyo. Embo raMukuru mari tja: “Amu rire ovanane kotjijoke tjambangu pamue novahakambura, orondu ousemba u nomauaneno uatjike nourunde? Nondjerera i noruuano ruatjike nonḓorera? . . . Nomukambure u norumbembera ruatjike nomuhakambura?” (EEP) Ku nai Mukuru ma rakiza: “Zamoeye mokati kawo nu mu haṋike na wo!”—2 Ovakorinte 6:14-17.
32. (a) Indu eṱe tji twa ‘sokuzamo mokati kawo,’ twa sokutjita tjike? (b) Ozondaya zeṋe eṱe nḓu matu munu indu tji matu toora omikambo omisemba okukarera Mukuru puna otjira tji tji hingwa i ye otjimunikwa?
32 Mape hee tjike ‘okuzamo mokati kawo’? Otjinga peri, eṱe katja tu zuva kerakiza ndo tji matu kara orupa, poo okuyandja ombatero, kotjira tjongamburiro tjarwe pendje naihi Jehova Mukuru ungurisa. Okutja kangamwa auhe wetu ngundee tje ri kotjira tjongamburiro ohamukwao na iho, eṱe matu hepa okuyandja omatjivisiro kutja matu poka ku tjo. Indu eṱe nambano tji twa za mo mu imba mbe notjiungura nongamburiro yoposyo natu toora omikambo omisemba okukarera Mukuru notjira otjimunikwa tje, eṱe matu kara mokati kaimba Mukuru mbu ma tja ohunga nawo: “Ami me tura mu uo, nu me rianga mokati kauo, nami me kara Mukuru uauo, nouo mave kara otjiuaṋa tjandje.”—2 Ovakorinte 6:16, EEP.
[Otjiperendero pomukuma 192]
Poruveze rwOmupupo, Mukuru wa ri notjira okukapita tjimwe?
[Oviperendero pomukuma 196]
OZOMBEROO OZOHONGORA OZONENE ZOUYE ZOVAHONGONONE VAJEHOVA
OZOMBEROO OZOMBITISE
Ozokombiuta
ONGANDA OPIRINDE YABROOKLYN
Ovipirinde Ovikame
Omatwi-rwokumwe wOmambo
Omatumino womapirindwa
[Oviperendero pomukuma 197]
OZOPIRINDE MU TJIVA OZENGI ZARWE ZOWATCH TOWER
Brazil
Ehi rOvaingirisa
South Africa
Wallkill, New York
Kanada
[Oviperendero pomukuma 198]
Tjiva va imba 253 922 pomaworonganeno wOvahongonone vaJehova mu New York
Orupare oPolo
oYankee Stadium
[Otjiperendero pomukuma 201]
Orutuu rwomahongero wOmbeibela ru yorokerwa pozombongarero zOvahongonone vaJehova