Ozondemone Ze Tunduuza Omapirukiro Ku Mukuru

Nungwari omena ratjike Satana nozondemone ze tji ve ungura tjinene nai okunyandovineya kovandu? Mena rokutja owo ve vanga kutja tu rikute ku nawo momapirukiro wawo. Owo ve vanga kutja tu rikotamene kuwo. Owo ve vanga kutja eṱe tu kambure movizeze vyawo nokutjita oviṋa Jehova mbye ha vanga. Ovingi vyovitjitwa mbi vi na otjiṋa notuzo tu tu nouzamumwe novaṱi.

Onḓiro yaumwe omusuverwa ondjiririra ohihamise yotjimbi, nu pe ri momuhunga nosemba okuraisa oruhoze. Kombunda yonḓiro yepanga re Lasarus, Jesus “wa rira.” —Johanes 11:35.

Pe na ozombazu ozengi nḓe wanekwa pamwe nonḓiro, nu inḓa ze panguka tjinene mouparanga wouye. Ozengi zazo kaze vetasana oviuru nomahongero wOmbeibela. Posi yokutja, ovitjitwa tjiva vya zikamena kondunge yokutja ovaṱi ve nomuinyo nu ve yenena okumuna imba ovanamuinyo. Omatjeverero worurova, omitambo omihatjaerwa, novitjitwa ovinene pombakero avihe vya zikamena mondira yokuyamburura ozombepo zovaṱi. Nungwari indu ovaṱi tji ve ‘ha tjiwa otjiṋa,’ imba mbe tjita oviṋa ohamukwao na imbyo ve ryamisa ouhauatjiri waSatana.—Omuzuvarise 9:5.

Ozombazu zarwe poo ovitjitwa vi za mongamburiro yokutja ovaṱi ve hepa ombatero okuza kovanamuinyo nu mave yenene okuhihamisa ovanamuinyo indu tji ve ha zezengerwe. Momahi tjiva omikandi nozombunguhiro ze tjitwa ape omayuva 40 poo ombura imwe kombunda yonḓiro yomundu. Imbi vi tjitirwa mokungovasi mavi vatere omuyaruke ‘okukambakana hembandina’ komaturiro wozombepo. Otjitjitwa tjimwe ouandaraze okongwi okuyandja ovikurya novinuwa kovaṱi.

Oviṋa mbi vi ri posyo orondu vi ryamisa ovizeze vyaSatana ohunga novaṱi. Jehova e tje tu yandjera okukara na kangamwa notjiṋa atjihe tji tji nozombazu nḓa zikamisiwa momahongero wozondemone? Kamaape ya nandarire kaṱiṱi!—2 Ovakorinte 6:14-18.

Ovakarere vaMukuru ingwi ouatjiri kave norupa kangamwa movitjitwa mbi yandja ombatero kovizeze vyaSatana. Pendje yanao, owo ve yandja ombango yorusuvero kokuvatera ovanamuinyo nokuvehuhumiṋa. Owo ve tjiwa kutja omundu tja zu po porumwe, oJehova erike ngu ma yenene okumuvatera.—Job 14:14, 15.

Omaungurisiro wOurozi Ye Pangurwa i Mukuru

Ovandu tjiva ve hakaena nozondemone osemba poo mokutuurungira mondjai. Imbi vi isanewa omaungurisiro wourozi. Ovoodoo (omerikotameno woohiyomuhoko woumbanda), ourozi, ounganga, omaukiro wouṋingandu, nomarangerero avihe mbi oviṋa vyomaungurisiro wourozi.

Ombeibela mai pangura oviṋa mbi, amai tja: “Kape sere okumunika mokati koye kangamwa auhe . . . ngu ungurisa oumbuke, omuungurise wounganga poo kangamwa auhe ngu tara komaukiro woviraisiro poo otjimbanda, poo umwe ngu rova ovakwao poo kangamwa auhe ngu varura omukanguze wozombepo poo omuuke omupyuke wovikaṋena poo kangamwa auhe ngu rangera. Orondu kangamwa auhe ngu tjita oviṋa mbi otjiṋa katjondumba otjiyaukise ku Jehova.”—Deuteronomium 18: 10-12, NW.

Omena ratjike Jehova tji me tu rakiza outwezu nai kovitjitwa mbi?

Kondjeverero yetu oveni, Jehova u tu rakiza kovitjitwa avihe vyomaungurisiro wourozi. Eye we tu suvera nu u na ko natja novandu, nu ma tjiwa kutja imba mbu mave kara norupa kuna ozondemone va yandjwa komihihamo.

Omundu umwe ohamukwao na imbo wa ri Nilda, ngwa ri omukazendu wombepo onganguze moBrazil. Ozondemone za kurungisa omuinyo we. Eye ma serekarere nai: “Ozombepo . . . ze ndji kamburire, amaze ndji raa ooimba nambena. Ami ee tapakaṋa pokati kozongaro zokukara nouripura auhe nokuhinokukara nouripura auhe, nu mba kamburirwe nomaputi wouripura, wotjimbi nowomeritjindiro. Ozondemone ze ndji rondora pu pe ṱa nai ngandu ouruvi wandje tji wa ṱunwa. Ami mba nwa oviporeke vyomeripura nu e utu okunwa omavinu nokupepa omakaa nokuhinondjando. Imbi vya kaenda nai oure wozombura.”

Momakaondjero woruveze, pamwe nombatero yaJehova nOvahongonone ve kombanda yehi, Nilda wa poka okuza ko komasa wozondemone nu nambano u kara nomuinyo ongambwi nomunambwiro. Eye ma tja: “Ami me tunduuza avehe, nandarire oure wokaruveze okaṱiṱi kaparukaze, okuhinokukara norupa kuna ozombepo [ozorunde].”