Ouye Mbwi Mau Yenene Okuhupa?

Kape na orukwato rwarwe ndwa zuva omahungi omengi nai ohunga nomaandero wouye. Ovengi ve tira kutja ouye mau yanda momazepero omanene wokerna. Varwe ve ripura kutja omaṱundakero mape ya aye nyono ouye. Ngunda, wina varwe ve nongendo yokutja ezunganeno rombwiko ma ri twako ovimbumba vyovandu kumwe.

Ouye mbwi tjiri atja u yenena okuyanda? Indu tji pa kara nao, atja pe heya tjike? Ouye wa rorere okuyanda harukuru?

Ouye Mau Yanda—Warwe Au Yarukire Po

Ii, ouye wa rora okuyanda. Ripura nouye mbwa rira ouhangandu tjinene momayuva waNoa. Ombeibela mai kahurura: “Nouye mbwi oukuru wa vandekerwe i omeva, inga omeva womupupo.” Ombeibela wina i tja: “[Mukuru] wina ka yamene ouye imbwi oukuru, nungwari wa etere omupupo kombanda youye wovandu ovarunde. Imba porwawo mba yamene a ri Noa, ingwi omuzuvarise wousemba, novakwao varwe hambombari.”—2 Petrus 2:5; 3:6.

Kengeza inga omaandero wouye mbwo kutja aaye heye tjike nu kaaye heye tjike. Owo kaaye heye omaandero wovandu. Noa neṱunḓu re va hupa Omupupo wouye auhe. Oplaneta Ehi wina nomayuru omawa wozonyose. Owo wa ri “ouye wovandu ovarunde” ombwa yanda, ondyero yoviṋa ohangundu.

Korusenina, otja ozondekurona zaNoa tji za ririra ko ozengi, ouye warwe wa tungwa. Ouye mbwo outjavari, poo ondyero yoviṋa, ya zikama nga kundino. Omakuruhungi wayo ye ura novita, ozondjito zozondjo, nozondjito zotjitandi. Mape tjitwa tjike kouye mbwi? Mau yenene okuhupa?

Oruyaveze rwOuye Mbwi

Amaye zu nokutja ouye meyuva raNoa wa yandekwa, omatjangwa wOmbeibela maye kaondja komeho: “Omajuru, nge ri po nambano, na ind’ ehi ja tangerua membo otjingero komuriro.” (2 Petrus 3:7, Etestamente Epe nOmapsalme) Otji pe ri, otja omutjange warwe wOmbeibela tji ma handjaura: “Nouje [imbwi mbu ri ko ndinondi] mau kapita.”—1 Johanes 2:17, EEP.

Ombeibela kai na pu i heya kutja ouye porwe poo omayuru wozonyose mavi yanda, nandarire ovyo tji vi ha yandere meyuva raNoa. (Epsalme 104:5) Pendje yanao, ouye mbwi, “nomayuru” wawo, poo ovanane vohoromende kehi yomahwangero yaSatana, “nouye” wawo, poo omerikutiro wovandu, mau yandekwa tjimuna i omuriro. (Johanes 14:30; 2 Ovakorinte 4:4) Ouye mbwi, poo ondyero yoviṋa, mai yanda ape tjimuna ouye wokomurungu wOmupupo. Nandarire Jesus Kristus wa hungira ohunga nongaro “momayuva waNoa” otja otjihorera tja imbi mbi mavi ka tjitwa tjimanga komurungu womaandero wouye.—Mateus 24:37-39.

Okokunanḓengu kutja indu Jesus tja hungira komayuva waNoa ya ri mokuzira epuriro rovaapostele ve: “Otjiraisiro tjomeero woye notjomaandero wouye mbwi ma rire tjiṋe?” (Mateus 24:3) Ovakongorere vaJesus aave tjiwa kutja ouye mbwi mau yanda. Omaundjiro nga ye ve pa emuma?

Pendje yanao, indu Jesus tjaa handjaura ovitjitwa mbi mavi kara ko komurungu womaandero wouye, eye we ve tunduza okunyaṋuka ‘orondu ongutukiro yawo tjinga ya tumbukire.’ (Lukas 21:28) Ii, ongutukiro okuza ku Satana nondyero ye ohangundu yoviṋa, okuhita mouye oupe wohange!—2 Petrus 3:13.

Nungwari ouye mbwi mau yanda ruṋe? Jesus wa yandja “otjiraisiro” tjiṋe ‘tjomeero we, nomaandero wouye’?

“Otjiraisiro”

Embo rOtjingrike imba nda rundururwa “omeero” opa·rou·siʹa, noro ri heya “omakarero po,” oko okutja, okukarambo tjiri. Ku nai, indu “otjiraisiro” tji tja munika, oko kaku na ku heya kutja Kristus meya kamanga, nungwari oko okutja eye weya rukuru nu opa ri. Oko maku heye kutja eye wa uta okuhonapara mohamunika otja ombara yomeyuru nokutja tjimanga eye ma eta omaandero kovanavita ve.—Omavandururiro 12:7-12; Epsalme 110:1, 2.

Jesus ke na pa yandja otjitjitwa tjimwe uriri otja “otjiraisiro.” Eye wa handjuṋuna ovitjitwa ovingi vyouye nozongaro. Avihe mbi mavi tjitwa mokati koruveze ovatjange wOmbeibela ndu mave isana kutja “omayuva omasenina.” (2 Timoteus 3:1-5; 2 Petrus 3:3, 4) Tara koviṋa tjiva Jesus mbya hunganeka kutja mavi rire otjihako ‘tjomayuva omasenina.’

“Otjiwaṋa tjimwe matji sekamene otjiwaṋa otjikwao nouhona umwe au rwisa ouhona oukwao.” (Mateus 24:7) Ovita motuveze twa nambano vya ririra ko ovikuryoma okukapita rukuru. Omunamakuruhungi umwe wa tjanga: “Ovita vyOuye Ovitenga [mbya uta mo 1914] ombya ri ovita ovitenga ‘okuura.’” Ngunda, ovita vyouye ovitjavari vya ri ovinyone tjinene kombanda. Nu ovita vi kaondja komeho okuṱukuṱura ouye. Ii, omambo waJesus ya muna omayenenisiro momuhingo omukumise!

“Nu mape kara ozondjara.” (Mateus 24:7, EEP) Tji paza Ovita vyOuye 1 pe ya ngahino ourumbu ounene momakuruhungi aehe. Ourumbu ouvi tjinene wina wa kongorera Ovita vyOuye 2. Otjiwonga tjondumbiro ohasemba tji tuṋa nga koketjatano kemwe kovature vehi, nu tji zepa ovanatje omangete 14 ombura aihe. Mouatjiri, opo pa kara “ozondjara”!

“Mamu kara omanyinganyingiro wehi.” (Lukas 21:11) Otja kotjivaro tjomokati, ape ovandu povikando omurongo okukapita, va ṱa ombura aihe i omanyinganyingiro wehi okuza ko 1914, kombanda yomaserewondo nga kapita. Tara ku tjiva ouṱiṱi omananḓengu: 1920, moChina, 200 000, omba ṱa; 1923, moJapana, otjiṱiro tja ri 99 300; 1939, moTurkey, otjiṱiro tja ri 32 700; 1970, moPeru, 66 800 omba ṱa; nu mo 1976, moChina, otjiṱiro tja ri ape 240 000 (poo otja kozomburo tjiva, 800 000). Tjiri, “omanyinganyingiro wehi” omanene!

‘Mamu kara omitjise momahi pekepeke.’ (Lukas 21:11) Tjimanga, kombunda yOvita vyOuye 1 ovandu omangete 21 va ṱa i otjimbandanga tjaSpanye. OScience Digest ya zuvakisa: “Momakuruhungi ayehe opo kape na pu pa karere ouyenda wonḓiro outwe nousaruke kamanga otja imbwi.” Okuzambo omaverero womutima, omutjise wonyota, Ehinga (AIDS), noviwonga vyarwe ovingi vya zepa omatau omasere.

“Ourunde . . . mau takavara.” (Mateus 24:12, EEP) Ouye wetu okuza ko 1914 weya kokutjuukirwa otja umwe wozondjito zozondjo nozondjito zotjitandi. Motuveze otuingi kape na umwe ngu kara mondjeverero momivanda, nandarire wina mutenya. Ouṱuku ovandu ve kara mozonganda zawo kongotwe yomivero mbya yezerwa nokutuwa ovipate, amave tira okuyenda pendje.

Oviṋa vyarwe ovingi vya hunganekwa okutjitwa momayuva omasenina nu imbi avihe wina vi yenenisiwa. Imbi vi heya kutja omaandero wouye ye ri popezu. Nungwari, ouṋingandu mape kara ovahupe. Okuza nokutja “ouje mau kapita,” Ombeibela mai kwizike: “Ingui, ngu ma tjiti ombango jaMukuru, eje ma karerere nga aruhe.”—1 Johanes 2:17, EEP.

Ku nai, eṱe matu hepa okurihonga ombango yaMukuru natu i tjiti. Okuzambo otji matu yenene okutuurunga omaandero wouye mbwi koku ka yorokera ozondaya zouye oupe waMukuru nga aruhe. Ombeibela mai kwizike kutja poruveze ndo: “Mukuru ma pioṋa omahoze aehe momeho [wovandu]; nonḓiro kai nakukara ko rukuao, noruhoze nondjuriro nomuhihamo kavi nakukara po rukuao.”—Omavandururiro 21:3, 4, EEP.

Ndoovazu kape raisirwe omuano warwe, omaraisiro aehe wOmbeibela ya isiwa mOmbeibela yOtjiherero yo 1987.

[Omambo wondangi pomukuma 6]

Photo Credits: Airplane: USAF photo. Child: WHO photo by W. Cutting. Earthquake: Y. Ishiyama, Hokkaido University, Japan.