Ekondwa 12
Pirukira Ozombepo Ozorunde Ozonamasa
1. Jesus wa ri nomamwino yeṋe tja hakaena nozombepo ozorunde?
TJIMANGA kombunda yomapapitisiro we, Jesus Kristus wa ya mokuti onguza kwaJudea okukakumba nokuripuratena. Imbo Satana Omudiaboli wa kondja okumutjita kutja ma teye oveta yaMukuru. Posi yokutja, Jesus wa nakaura omarorero wOmudiaboli nu ke na pa kamburwa mombate ye. Jesus wa pirukira ozombepo ozorunde zarwe mokati koviungura vye vyokuzuvarisa kombanda yehi. Ngunda ape ri nao, potuingi, eye ee ze vere nokuzepirukira.—Lukas 4:1-13; 8:26-34; 9:37-43.
2. Eṱe matu tara komapuriro yeṋe?
2 Omatjangwa wOmbeibela nge handjuṋuna omahakaeneno ngo ya sokutukamburisa kutja ozombepo ozorunde ozonamasa oku ze ri. Ozo ze kondjisa okupukisa ovandu. Posi yokutja, eṱe matu yenene okupirukira ozombepo inḓa ozorunde. Nungwari ozombepo ozorunde za za pi? Omena ratjike tji ze kondja okupukisa ovandu? Nu omihingo viṋe mbi ze ungurisa okuyenenisa ozondandero zazo? Okumuna omaziriro komapuriro ohamukwao na inga, maku ku vatere okupirukira ozombepo ozorunde ozonamasa.
OZOMBEPO OZORUNDE—OMBUTIRO YAZO NONDANDERO YAZO
3. Satana Omudiaboli peya vi ma kare ko?
3 Jehova Mukuru wa ungura ovimbumba vyoviutwa vyombepo rukuru komeho wangunda ee hiya mema ovandu. (Job 38:4, 7, NW) Otja tji pa kahururwa mEkondwa 6, umwe wovaengeli imba wa tunga onḓero yokukara novandu mbu mave rikotamene ku ye pendje nokurikotamena ku Jehova. Mokukaondjisa ondandero ndjo, omuengeli omurunde ingwi wa pirukira na yamburura Omuute, nandarire ama yandja oumune komukazendu omutenga, wokutja Mukuru omunavizeze. Mokupwa, nai, ihi otjiutwa tjombepo otjipirukire hi tja uta okutjiukwa otja Satana (omupirukire) Omudiaboli (omuyamburure).—Genesis 3:1-5; Job 1:6.
4. Ovaengeli harive va tjita ouvi vi meyuva raNoa?
4 Kombunda, ovaengeli varwe ve rituka kuna Satana Omudiaboli. Momayuva womundu omusemba Noa, tjiva va imba va isa oviungura vyao meyuru nave toora otutu tonyama mokukovisa ozonḓuma zavo zokurara povakazendu wokombanda yehi. Satana nokuhina omaivaiviro wa hwanga ovaengeli mbo okutoora omurari wokuhinonḓuviro mbo. Iho tja twara kokueta orukwato rozombinḓu mbari ndwa ru isanewa Ovanefelema, mba rira ovatatumise ovanatjitandi. Indu Jehova tja eta Omupupo omunene, owo wa yandeka ovandu ozomboru na indwi orukwato ndwi ndu he ri rwa kauriri rwovaengeli ovehinanḓuviro. Ovaengeli ovapirukire va yepa omayandekero mokuisa otutu twao twonyama nokuyaruka komaturiro wozombepo. Nungwari, Mukuru wa tjaera ozondemone nḓa moku ve ṱiza otja ovarambwa monḓorera yozombepo. (Genesis 6:1-7, 17; Judas 6) Satana, ‘omunane uozondemone’ novaengeli ve ovarunde va ṋiṋikiza komurungu nomapirukiro wawo. (Lukas 11:15, EEP) Ondandero yawo oyatjike?
5. Satana nozondemone ze ve nozondando zeṋe, nu ve ungurisa tjike okupata ovandu?
5 Ondando ohangundu yaSatana nozondemone oyo okutjita kutja ovandu ve pirukire Jehova Mukuru. Ku nai, ovanaurunde mba va pukisa, ave twa mo emuma nokuwira ovandu moure womakuruhungi wovandu. (Omavandururiro 12:9) Ovihorera vyeyuva randino vi zikamisa kutja omawiriro kovandu i ozondemone ya ririra ko omatwe nai kombanda ya indi tji ye kara. Mokukambura ovandu, ozondemone potuingi ze ungurisa omaungurisiro wourozi momihingo vyavyo avihe. Ozondemone ze ungurisa vi otjipate hi, nu mo yenene okuriyeura vi omuini?
OMUANO OZOMBEPO OZORUNDE MBU ZE KONDJISA OKUKUPUKISA
6. Ourozi otjikwatjike, nu omihingo tjiva vyavyo ooviṋe?
6 Ourozi otjikwatjike? Oko okukara norupa kuna ozondemone, poo ozombepo ozorunde, ohungamo poo mokutuurungira mondjai. Ourozi u tjitira ozondemone imbi otjipate mbi tji tjitira ovayeve: Okunanena ongaripira ku tjo. Nu tjimuna omuyeve tje ungurisa ovipate pekepeke okuhemena ovipuka motjipate, ku nai ozombepo ozorunde ze hiva omihingo pekepeke vyourozi okueta ovandu kehi yazo. (Sasaneka Epsalme 119:110.) Tjiva vyomihingo mbi oumbuke, ounganga, omatarero komaukiro woviraisiro, omarovero, omavaruriro wozonganguze wozombepo nokurangera kovakoke.
7. Ourozi wa takavara pu pe ṱa pi, nu omena ratjike tji u kurira ko nandarire momahi nge isanewa kutja owOvakriste?
7 Ombate tjiri i ungura, mena rokutja ourozi u nana ovandu ongondoroko youye. Imba mba tura mouhuro womovihwa ve yenda konganga yomiti na imba mbe ungura mozomberoo zotjihuro ve ka muna ovauke vozonyose. Ourozi u takavara nandarire momahi nge isanewa kutja owOvakriste. Omanongononeno ye raisa kutja mOvihuro Ovikutasane vyaAmerika aviyerike, ape omambo 30 nge nomapitirisiro yapamwe kombanda 10 000 000, ye yandja ombango komihingo pekepeke vyourozi. Ovabrasilia ve ungurisa ovimariva vyokombanda yozodola zaNamibia omatau 1,8 moviṋa vyourozi ombura aihe. Ngunda, ozopersenda 80 za imba mbe yenda kotuveze tomerikotameno tourozi mehi ndo, owo ave ri Ovakatolika mba papitisiwa na wina mbe yenda kOndumbukiro. Momuano mbwi, ovahonge tjiva ve ungurisa ourozi, ovandu ovengi wozongamburiro ve ripura kutja okuungurisa wo otjiṋa tji tji yakurwa i Mukuru. Nungwari otji pe ri?
EPU OMBEIBELA NDI I NAKAURIRA OMAUNGURISIRO WOUROZI
8. Omamwino wOmatjangwa ohunga nourozi ooyeṋe?
8 Indu tji wa hongwa kutja tjiva vyomihingo vyourozi omiano vyokuhakaena ku na ozombepo ozombwa, ove mo yenene okutemwa mokurihonga imbi Ombeibela mbi mai hee ohunga nourozi. Ovandu vaJehova va rakiziwa: “Kamu nakuyenda ko kozondjai nḓe nozombepo zovaṱi na kozombetere. Amu ze paha ko kutja amu ha zunḓiwa i zo.” (Levitikus 19:31, omatjangwa omapiku owetu; 20:6, 27.) Embo rOmbeibela rOmavandururiro ri yandja erakiza rokutja “imba mbe tjita ourozi” mave ka yandera “merindi mu mu yaka omuriro nosurungu, okutja onḓiro oitjavari [yaaruhe].” (Omavandururiro 21:8; 22:15, EEP) Omihingo avihe vyourozi kavi yakurwa i Jehova Mukuru. (Deuteronomium 18:10-12) Omena ratjike tji pe ri nao?
9. Omena ratjike tji matu ya kepu rokutja ozombuze zeyuva randino okuza kouye wozombepo kaze zu ku Jehova?
9 Jehova wa hinda ozombepo ozombwa poo ovaengeli ovasemba okuhungira ku novandu tjiva ngunda Ombeibela ai hiya manuka okutjangwa. Okuza momamanukiro wayo, Embo raMukuru ra mbandjeo omaṱikiro wovandu ngu ve hepa okukarera Jehova momuano omuyakurwa. (2 Timoteus 3:16, 17; Ovaheberi 1:1, 2) Eye ka yepe okuza ko kEmbo re eyapuke mokukayandja ozombuze kozondjai. Ozombuze nḓo azehe zandino okuza kouye wozombepo ze za kozombepo ozorunde. Omaungurisiro wourozi ye yenena okutwara kokueterwa oumba i ozondemone poo nandarire okukamburwa i ozombepo ozorunde. Mena ranao, Mukuru morusuvero u tu rakiza kutja atu ha kara norupa mu kangamwa omaungurisiro wourozi. (Deuteronomium 18:14; Ovagalate 5:19-21) Kombanda yaavihe, eṱe tjitwa kaondja komeho okuungurisa ourozi kombunda yokutjiwa oumune waJehova ohunga nawo, oko maku rire okurituka komunda wozombepo ozorunde ozombirukire nokurira ovanavita na Mukuru.—1 Samuel 15:23; 1 Ekuruhungi 10:13, 14; Epsalme 5:4.
10. Oumbuke otjikwatjike, nu omena ratjike tji twa sokuuyepa?
10 Omuhingo umwe omutjiukwa wourozi oumbuke—omakondjero wokutjiwa ohunga noruyaveze poo ovihatjiukwa nombatero yozombepo. Omihingo tjiva vyoumbuke omatarero wozonyose, okutarera mokristal, omazengururiro woturoto, omalesero wozondjira zomomake, nomaukiro wouṋingandu mokuungurisa oukarata wotarot. Ovengi ve kura noumune wokutja oumbuke enyando ndi ha ihamisa, nungwari Ombeibela i raisa kutja ovauke vouṋingandu nozombepo ozorunde oviṋa ovizamumwe. Otjotjihorera, Oviungura 16:16-19 vi tamuna kutja ‘ombepo ombuke’ aa i yenenisa kutja omukazona ‘ma uke.’ Posi yokutja, omasa we wokuhunganeka oruyaveze ya za mo indu ondemone tji ya pitisiwa. Oukahu kutja oumbuke ombate ndji ungurisiwa i ozondemone okunanena ovandu motjipate tjazo.
11. Omena ratjike omakondjisiro wokuhungira kuna ovakoke tji ye twara kombate?
11 Indu tji u na oruhoze ohunga nonḓiro yokaṋepo keṱunḓu okasuverwa poo epanga ropopezu, ove mo yenene okunanenwa tjimanga mombate yarwe. Omunganguze wombepo ma yenene okukupa omatjivisiro yapeke poo ma yenene okuhungira mombosiro ndji ri tji na aayo oyondjo yomukoke. Ṱakamisa! Ongondjero yokuhungira kuna ovakoke i twara komawiro womombate. Omena ratjike? Mena rokutja ovakoke kave hungire. Ove tji mape ya o zemburuka, Embo raMukuru moukahu mari tja ponḓiro omundu ‘u yaruka koruuma; meyuva ndo ourizemburuka we auhe u yanda.’ “Ovakoke kave tjiwa otjiṋa.” (Epsalme 146:4; Omuzuvarise 9:5, 10) Kombanda yanao, ozo tjiri ozondemone nḓa tjiukwa okuhorera ozombosiro zovakoke nokupa ozonganguze omatjivisiro ohunga narive ngwa koka. (1 Samuel 28:3-19) Ku nai, auhe “ngu ma ningire ombepo yovaṱi” ma kamburwa i ozombepo ozorunde nu meritjindi komuano mbu he ri ombango yaJehova Mukuru.—Deuteronomium 18:11, 12; Jesaja 8:19.
OKUZA KOMANANENO NGA KOMAWIRIRO
12, 13. Pe na omahongonona yeṋe kutja ozondemone ze kakatera mokurora nokueta oumba kovandu?
12 Indu ove tji we riwisa kehi yomapu omayandjandunge yEmbo raMukuru ohunga nourozi, mo yenene okuyepa ombate yozondemone. (Sasaneka Epsalme 141:9, 10; Ovaroma 12:9.) Ihi matji hee kutja ozombepo ozorunde maze za ko okukondjisa okukukambura? Kako, koyaṋi! Indu tja za nokurora Jesus ovikando vitatu, Satana “arire tje Mu esa oruveze okaṱiṱi.” (Lukas 4:13) Otjingetjo, ozombepo zongukutusengo kaze nanene ovandu ku zo porwe nungwari wina ze ve wira.
13 Zemburuka omatarero wetu warukuru ohunga nomawiro waSatana kombanda yomukarere waMukuru Job. Omudiaboli wa eta ombandjarero yovitumbwa vye nonḓiro yovengi wovakarere ve. Satana wina wa zepa ovanatje vaJob. Okuzambo a wire Job omuini nomutjise omuhihamise. Nungwari Job wa ṱiza ouṱakame we ku Mukuru nu wa serwa ondaya tjinene. (Job 1:7-19; 2:7, 8; 42:12) Okuza kotjikando ho, ozondemone za tjita ovandu tjiva okurira ovikume poo ovapoṱu nu za kaondja komeho mokuyoroka momaihameno wovandu. (Mateus 9:32, 33; 12:22; Markus 5:2-5) Kundino, omatjivisiro ye raisa kutja ozondemone ze zunḓa otutu twoukazendu notwourumendu twa tjiva nu aze hingi tjiva nga komaverero woviyoze. Ngunda ze hingira varwe komazepero nokurizepa oveni, mbi ri omauvi ku Mukuru. (Deuteronomium 5:17; 1 Johanes 3:15) Pendje na imbyo, omayovi wovandu korutenga mba kamburirwe i ozombepo ozorunde nḓa, va yenena okurikutura ku zo. Ihi peya vi tji yenene ku wo? Owo va tjita nao mokutoora omikambo ominanḓengu.
OMUANO WOKUPIRUKIRA OZOMBEPO OZORUNDE
14. Mombwaneno notjisanekero tjOvakriste veserewondo etenga vaEfese, mo yenene vi okupirukira ozombepo ozorunde?
14 Omuano umwe mbu mo yenene okupirukira ozombepo ozorunde no riyama omuini neṱunḓu rwoye kozombate zao ouṋe? Ovakriste veserewondo etenga vaEfese mbaave ungurisa ourozi ngunda ave hiya rira ovakambure va toora omikambo omisemba. Eṱe matu lese kutja “otjingi tjaimba mba tjitire oundjai va woronganisa omambo wawo nave ye nyosire momurungu wovandu.” (Oviungura 19:19) Nandarire indu tji u hiya ungurisa ourozi, imbirahi otjiṋa kangamwa otjiungurisiwa mourozi poo tjombuniko yomaungurisiro wourozi. Imbi mavi rire omambo, ozovideo, oviplakata, omizumbi, noviṋa mbi ungurisiwa mozondjero zourozi. Wina, mu vyo mu muna ovisenginina, ozongoze zomeritjeverero noviṋa vyarwe mbi zarerwa okuriyama, noviyandjewa mbya za kovaungurise wourozi. (Deuteronomium 7:25, 26; 1 Ovakorinte 10:21) Kokuraisa: Ovakupasane vevari moThailand va ṋiṋikiziwa orure i ozondemone. Owo va imbirahi oviṋa mbya ri notjiṋa nourozi. Otjikongorereko tja ri tjike? Owo va kuturwa komawiro wozondemone kombanda yao nu kombunda yanao va ryama komeho movyouyapuke.
15. Mokupirukira ozombepo ozorunde ozonamasa, omukambo warwe omunanḓengu oouṋe?
15 Kutja tu yenene okupirukira ozombepo ozorunde, omukambo omunanḓengu warwe owo mbwi wokuungurisa omapu omayandjandunge yomuapostele Paulus kokuhikika ovirwise okuura oviyandjewa vyombepo vyaMukuru. (Ovaefese 6:11-17, EEP) Ovakriste va sokupanḓiparisa omeriyeuriro wawo kuna ozombepo ozorunde. Omukambo mbwi u na ovikeṋa? “Kombanda jaavihe kambureje oruvao ruongamburiro, ndu mamu sora okuzemisa mu ro imbi oviku viomurunde, mbi nomizi viomuriro,” Paulus otja hungira. Otjipe ri, ongamburiro yoye pu ina omasa, omayenenisiro woye opu maye rire omanene okupirukira ozombepo ozorunde ozonamasa.—Mateus 17:14-20.
16. Mo yenene vi okupamisa ongamburiro yoye?
16 Mo yenene vi okupamisa ongamburiro yoye? Mokukaondja komeho okukonḓonona Ombeibela nokuungurisa omapu omayandjandunge momuinyo woye. Omasa wongamburiro yarive ye za koukukutu wonḓikameno yawo—ondjiviro yaMukuru. Ove kona ku itavera kutja ondjiviro ongahuke ndji wa muna no twara komutima otja tjookonḓonona Ombeibela ya tunga ongamburiro yoye? (Ovaroma 10:10, 17) Nokuhinomaivaiviro, ku nai otja tji mokayenda komeho nomakonḓononeno inga nokutjita kutja omakarero po woye pozombongarero zOvahongonone vaJehova ye rire otjiṋa tjahapo, ongamburiro yoye mai panḓiparisiwa nangarire tjinene. (Ovaroma 1:11, 12; Ovakolose 2:6, 7) Otjo matji rire otjiyame otjinamasa komawiro wozondemone.—1 Johanes 5:5.
17. Omikambo viṋe vyokomeho mbi mavi yenene okurira ovinanḓengu mokupirukira ozombepo ozorunde ozonamasa?
17 Omikambo viṋe vyokomeho mbi mavi yenene okutoorwa i omundu ngwa zikamisa okupirukira ozombepo ozorunde ozonamasa? Ovakriste vaEfese aave hepa ondjamo mena rokutja owo aave kara motjihuro mumwe urire omaunguriro kuna ozondemone. Ku nao, Paulus we ve raera: ‘Kumbee aruhe mongumbiro aihe na momaningiriro aehe mombepo.’ (Ovaefese 6:18, EEP) Mena rokutja tu kara mouye mu mwe ura ozondemone, okukumba nomasa kombatero yaMukuru okunahepero mokupirukira ozombepo ozorunde. (Mateus 6:13) Ombatero momuano mbwi okuvaterwa mombepo nozongumbiro zovanene ovaurikwa wombongo yOvakriste.—Jakobus 5:13-15.
PANḒIPARA MOTJIRWA TJOYE KUNA OZOMBEPO OZORUNDE
18, 19. Mape yenene okutjitwa tjike indu ozondemone tji maze eta oumba komundu rukwao?
18 Nandarire okuza nokutoora omikambo vyombutiro imbi, tjiva va eterwa oumba i ozombepo ozorunde. Tjimuna, omurumendu umwe moCôte d’Ivoire wa konḓonona Ombeibela pamwe nOvahongonone vaJehova na nyanyaura ozongoze ze zokuritjevera. Kombunda yanao, wa tjita omerihongero omawa, a yandja omuinyo we ku Jehova, nu a papitisiwa. Nungwari otjivike kombunda yombapitisimo ye, ozondemone aze utu okumuetera oumba rukwao, ozombosiro aze mu raere okuisa ongamburiro ye ombe ndje nayo. Ihi, tji tja tjitwa kove, matji hee kutja wa pandjara ombatero yaJehova? Katji pe ri kaparukaze.
19 Indu kutja omurumendu ohomonena Jesus Kristus wa ri nombatero yaMukuru, eye wa zuva ombosiro yotjiutwa tjombepo otjirunde Satana Omudiaboli. Jesus wa raisa kutja wa sokutjita vi moruveze tjimuna ndo. Eye wa raera Omudiaboli: “Za po, Satana!” (Mateus 4:3-10) Momuano otjingewo, ove wa sokupanḓa okupuratena kozombosiro okuza kouye wozombepo. Pirukira ozombepo ozorunde mokuisana Jehova kombatero. Ii, kumba amo ravaere amo ungurisa ena raMukuru. Omiano 18:10 vi tja: “Ena [raJehova, NW] oro otjiretundu otjinamasa; omusemba ma taurire ku tjo na kamuna ko omaundiro.” Omurumendu Omukriste moCôte d’Ivoire wa tjita hi, nu ozombepo ozorunde za yandisa okumuetera oumba.—Epsalme 124:8; 145:18.
20. Momboronganeno, mo yenene okutjita vi mokupirukira ozombepo ozorunde?
20 Jehova wa yandjera ozombepo ozorunde okukara mongurameno, nungwari wa yarisa omasa we, tjinenenene ohambwarakaṋa novandu ve, nu ena re ri zuvarisiwa mouye auhe. (Eksodus 9:16) Ove tjiwa kara popezu na Mukuru, konohepero okutira ozombepo ozorunde. (Numeri 23:21, 23; Jakobus 4:7, 8; 2 Petrus 2:9) Omasa wazo ye nondjaerero. Ozo za verwa meyuva raNoa, za rambwa okuza meyuru moruveze rwanambano, nu nai ze undja ombanguriro osenina. (Judas 6; Omavandururiro 12:9; 20:1-3, 7-10, 14) Mouatjiri, ze nemuma nomayandekero wazo ngu maye ya. (Jakobus 2:19) Ku nai, kutja ozombepo ozorunde maze kondjisa oku ku kambura nombate imwe poo yarwe poo maze ku wire momuano kangamwa, ove mo yenene okuzepirukira. (2 Ovakorinte 2:11) Nakaura omuhingo kangamwa wourozi, ungurisa omapu omayandjandunge yEmbo raMukuru, nu paha omayakuriro yaJehova. Tjita mbi nokuhina okuwomba, orondu omuinyo woye wa rekareka komapirukiro woye kuna ozombepo ozorunde ozonamasa!
RORA ONDJIVIRO YOYE
Ozombepo ozorunde ze rora vi okukondjisa okupukisa ovandu?
Omena ratjike Ombeibela tji i nakaura ourozi?
Omundu ma yenene vi okurikutura okuza kozombepo ozorunde ozonamasa?
Omena ratjike tjiwa sokukara amo pirukire ozombepo ozorunde?
[Otjiperendero pomukuma 110]
Ourozi momihingo omingi u tara ko vi?