Ehongwa 5

Ondando yaMukuru kEhi Ooiṋe?

Omena ratjike Jehova tja mema ehi? (1, 2)

Omena ratjike ehi tji ri he ri oparadisa ku nai? (3)

Mape tjitwa tjike kovandu ovahangundu? (4)

Moruyaveze, Jesus ma tjiti tjike kovavere? kovakurupe? novaṱi? (5, 6)

Okukara norupa mozondaya zoruyaveze, ove mohepa okutjita tjike? (7)

1. Jehova wa mema ehi ndi kutja ovandu ve yenene okuyorokera okuhupa kombanda yaro nga kongaaruhe. Eye wa vangere kutja ehi aruhe ri turwe i ovandu ovasemba novaṋingandu. (Epsalme 115:16; Jesaja 45:18) Ehi kanaa ri roro okuyandekwa; oro ma ri karerere.—Epsalme 104:5; Omuzuvarise 1:4.

2. Komeho wa indi Mukuru ngunda e hiya ungura omundu, Eye wa toorora okarupa okaṱiṱi kehi neke tjiti kutja ke rire oparadisa ombwa. Eye we ke isana otjikunino tjaEden. Opo pa ri mba pa twapo omurumendu nomukazendu omutenga, Adam naEva. Mukuru wa ri nondando kuwo kutja ve kare novanatje nu ve urise ehi arihe. Momakaondjero owo atja ve tjita kutja ehi arihe ri rire oparadisa.—Genesis 1:28; 2:8, 15.

3. Adam naEva va tjita ourunde, mokukatukira owina oveta yaMukuru. Kunao, Jehova we ve pitisa motjikunino tjaEden. Oparadisa ya pandjara. (Genesis 3:1-6, 23) Nungwari Jehova ke na pa zemba ondando ye kehi ndi. Eye wa kwizika okuritjita oparadisa, mu ro ovandu mu mave hupu nga kongaaruhe. Ihi eye me tji yenenisa vi?—Epsalme 37:29.

4. Komeho wa ngunda indi ehi ndi ari hi ya rira oparadisa, ovandu ovahangundu va sokuisamewa. (Epsalme 37:38) Ihi matji tjitwa pu Armagedon, imbi mbi ri ovita vyaMukuru okuyandisa ouhangundu. Okuzambo, Satana ma umbwa mondeko oure wozombura 1 000. Ihi matji heye, kutja kape na ovahangundu mbu mave isiwa okuzunḓa ehi. Ovandu imba vaMukuru aveerike ombu mave hupu.—Omavandururiro 16:14, 16; 20:1-3.

5. Okuzambo Jesus Kristus otji ma honapara otja Ombara kombanda yehi oure wozombura 1 000. (Omavandururiro 20:6, EEP) Eye momakaondjero ma isa po ourunde mouripura na motutu twetu. Eṱe matu rire ovandu ohomonena otja tjimuna Adam na Eva tji va ri ngunda ave hiya tjita ourunde. Okuzambo otjipehi na okukara omitjise, omakurupiro nonḓiro rukwao. Ovavere mave verukisiwa, novakurupe mave rire omitanda rukwao.—Job 33:25; Jesaja 33:24; Omavandururiro 21:3, 4, EEP.

6. Mokati komahonaparero wOzombura Eyovi waJesus, ovandu ovaṱakame mave ungura ehi arihe okurira oparadisa. (Lukas 23:43) Omangete yovaṱi wina maye pendurwa komuinyo wokurira ovandu kombanda yehi. (Oviungura 24:15, EEP) Indu tji mave tjiti imbi Mukuru mbi ma undjire kuwo, owo mave hupu komeho kombanda yehi ngaaruhe. Tjipe he ri nao, owo mave yandekwa ngaaruhe.—Johanes 5:28, 29; Omavandururiro 20:11-15.

7. Ondando yaMukuru okuza kombazu ohunga nehi ku nai mai tuurunga. Ove movanga okukara norupa mozondaya zoruyaveze inḓa? Tji pe ri nao, ove mohepa okukaondja komeho mokurihonga ohunga naJehova nokuzuva koviundjirwako vye. Okukara pozombongarero zOvahongonone vaJehova pEtuwo rOuhona ropopezu mape ku vatere okutjita nao.—Jesaja 11:9; Ovaheberi 10:24, 25.

[Otjiperendero pomukuma 10]

Oparadisa ndja pandjara

[Oviperendero pomukuma 11]

Kombunda yaArmagedon, ehi mari ririsiwa oparadisa