Mukuru u yakura ozongamburiro azehe?

1. Otja komaheya wEmbo raMukuru, otupa tuvari twozongamburiro tu tu ri ko ootuṋe?

JESUS wa tjere: “Hitireye momuvero omumango, omuvero mbwi mbu twara kombandjarero tjinga au ri omuparanga, nondjira ndji yenda ngo ai ri ombupu, nu imba mbe ryangera mu yo ava takavara. Nungwari omuvero mbwi mbu twara komuinyo owo omumango, nondjira ndji yenda ngo i neputi, novehinanḓengu imba mbe i muna.” (Mateus 7:13, 14) Otja Embo raMukuru pu mari heye, kuna otupa tuvari twozongamburiro porwe: imwe yatjiri, imwe yoposyo; imwe osemba, imwe ohasemba; imwe ndji twara komuinyo, imwe ndji twara kombandjarero.

2. Omatjangwa ye raisa vi kutja kazongamburiro azehe nḓe tjata kuMukuru?

² Ovandu ovengi ve ripura kutja ozongamburiro azehe ze yakurwa kuMukuru. Omazeva wOmbeibela ngu maye kongorere mba maye raisa kutja katji pe ri:

• “Ovaisrael va tura ondjo rukwao komurungu waMuhona. Owo va karera ooBaal nooAstarte, noomukuru vovisenginina vOvasirie novOvasidon novOvaamoni novOvafilisti. Owo va isa Muhona nave he Mu karere. Muhona opa pindikira nOvaisrael.” (Ovapangure 10:6, 7) Indu eṱe tji matu rikotamene koomukuru wovisenginina poo kovaṱi poo kumukuru warwe pendje naMukuru uatjiri, eṱe katu na kuyakurwa i Jehova.

• “Otjiwaṋa hi tji Ndji yozika notjinyo, nungwari omutima watjo u ri kokure na Ami. Owo mave rikotamene omungandjo uriri, orondu owo ve honga omazikamisiro wovandu porwawo aayo owo onge ri omatwako.” (Markus 7:6, 7) Indu ovandu mbe ritja ve rikotamena kuMukuru tji ve honga ouripura wawo oveni pendje na imbwi Ombeibela mbu i honga okutja omerikotameno wawo omungandjo. Kaye yakurwa kuMukuru.

• “[Mukuru, EEP] Eye Ombepo, nu imba mbu mave rikotamene ku Ye ve sokurikotamena ku Ye mOmbepo na mouatjiri.” (Johanes 4:24) Omerikotameno wetu ye sokukara mombwaneno nouatjiri wEmbo raMukuru.

Ovihape vyongamburiro yoposyo

3. Omomwano umwe uṋe mbu matu yenene okuhaṋa ongamburiro youatjiri ku indji yoposyo?

³ Matu yenene vi okutjiwa kutja ongamburiro i yakurwa iMukuru po indee? Jesus wa tjere: “Eṋe mamu ve zemburukire kovitjitwa vyawo. . . . Omuti omuwa u ruka ovihape oviwa, nomuti omuvi u ruka ovihape ovivi.” Okutja mape heye kutja, ongamburiro tji ya za kuMukuru, oyo i kara novihape oviwa; nungwari ongamburiro tji yaza kuSatana i kara novihape ovivi.—Mateus 7:15-20.

4. Otjitjiukwa tjoundu tjiṋe ovakarere vaJehova tji ve raisa?

⁴ Ongamburiro yatjiri i kara novandu mbu ve na orusuvero mokati kawo oveni nu wina ve raisa orusuvero ku varwe. Ihi omena rokutja Jehova omuini oMukuru omuna rusuvero. Jesus wa tjere: “Tji mwa suverasana, indino avehe otji mave tjiwa kutja oweṋe ovahongewa vandje.” Ozongamburiro ze yenenisa pupe ṱapi oviundjiruako vyomerikotameno youatjiri?—Johanes 13:35; Lukas 10:27; 1 Johanes 4:8.

5. Embo rimwe mari hongonona vi omarandisiro yovakarere yaAfrika?

⁵ Ripura nomarandisiro yovakarere moAfrika. O The New Encyclopædia Britannica mai tja: “OvaAfrika ngambeno 18 000 000 vaherurwa momarandisiro wovakarere nu ave kondisa Sahara nokuvare kwa India kwo vaMoslema, pokati kombura 650 na 1905. Morukondwa orutjavari rweserewondo oritja 15 ovandu vaEuropa va uta nomarandisiro mozondendera zoutokero waAfrika, nu mo 1867 ova Afrika wopokati ko 7 000 000 no 10 000-000 va hindwa nozoskepi otja ovakarere komahi yaAmerika.”

6. Ongamburiro ya ri norupa vi momarandisiro wovakarere?

⁶ Ongamburiro ya toora ongurameno iṋe moruveze rouzeu moAfrika, indu ovarumendu novakazendu novanatje tjaave isamewa mozondjuwo namomaṱunḓu wawo ave kutwa nouketanga ave nyosiwa novitenda ovipyu nu ave randisiwa nokurandwa otja ovinamuinyo? Bethwell Ogot wa tjanga moDaily Nation yaNairobi, Kenya: “Ovakriste na wina ovaMoslema ve kambura moruwano rovandu nungwari va zikamisa oviwaṋa mbyaa vi yandja oruvara komaukarere ngu ye urire nonyengo youmuhoko. . . . Eṱe matu sokuyakura kutja ondjo mai sokutjindwa i ovaMoslema novaKriste, . . . wina mokuhena okutwara ko ombango kouvi mbu wa twara keserewondo romauzeu omanene kovandu vaAfrika.”

Ongamburiro novita

7. Ovanane wozongamburiro va kara norupa ruṋe movita?

⁷ Ongamburiro yoposyo ya raisa ovihape vyayo ovivi momiano vyarwe. Otjotjihorera, ngunda Ombeibela a mai tja “suvera omukweṋu” ovanane wozongambuiro mouye auhe va yandja eke rohauzeu nu va ryamisa ovita komurungu.—Mateus 22:39.

8. (a) Ovanane wozongamburiro va ryamisa vi omazepasaneno movirwa komurungu? (b) Omuhonge umwe wa tja vi ohunga novanane wozongamburiro moruveze rwovita moNigeria?

⁸ Ihi otjitjukwa nawa kutja mo 1994, ozonona novapristeri va kara norupa mokuzepa ovandu mo Rwanda. Ongamburiro wina ya ri norupa orunene movirwa vyarwe vyaAfrika. Otjotjihorera, moruveze rwovita ovitirahise vyombinḓu mokati kovandu va Nigeria, ozongamburiro kominda avihe za panḓiparisa ovandu kutja ve karwe ovita. Ovita mbyo tjaa vi ryama komurungu omuhonge umwe wa tjere ovanane wozongereka “va isa oviungura mbi va pewa iMukuru.” Eye wina wa tjere: “Eṱe mbu tu ri isana ovakarere vaMukuru twa rira ovakarere vaSatana.”

9. Ombeibela i tja vi ohunga novakarere vaSatana?

⁹ Ombeibela mai hungire otjiṋa otjingetjo: “Satan omuini u ritjitukisa a munike otja omuengeli wondjerera. Nu otje he ri otjiṋa otjinene kutja ovakarere ve [tji mave ritjiti ajo ovakarere vousemba, EEP].” (2 Ovakorinte 11:14, 15) Otja tjimuna ovandu ovengi ovavi tji ve rimunikisa aayo ovatjite wouwa, Satana wina u pukisa ovandu novakarere mbe rimunikisa aayo ovasemba nungwari mbe na oviungura ovivi novihape mbya wora.

10. Ovanane wozongamburiro va pataṋa vi Mukuru?

¹⁰ Mouye auhe ovanane wozongamburiro ve zuvarisa orusuvero, ohange nouwa nungwari ve ungurisa onyengo, ovita nourunde. Ombeibela i vehongonona nawa. Oyo i tja: “Owo ve tja ve tjiwa [Mukuru, EEP], nungwari ovitjitwa vyawo vi pataṋa otjiṋa hi.”—Titus 1:16.

Pita ‘MuBabilon otjinene’

11. Ombeibela ya hongonona vi ongamburiro yoposyo?

¹¹ Eṱe matu yenene okumuna kutja Jehova u ripura vi ohunga nozongamburiro zoposyo tjitwa lese embo rOmbeibela, Omavandururiro. Membo ndo ongamburiro yoposyo i sasanekwa nomukazendu “Babilon otjinene.” (Omavandururiro 17:5) Tara Mukuru tji me muhongonona:

• “Omukorondu ngwa ingana . . . ozombara zouye za tjitire otuvakiro nomukazendu ngwi.” (Omavandururiro 17:1, 2) Komurungu wokuṱakama muMukuru, ozongamburiro zoposyo ze ri tyakaṋa moviṋa vyopolotika, potwingi okuraera ozohoromende mbi maze sokutjita.

• “Babilon tji nondjo yokutirahi ombinḓu yovaprofete noyotjiwaṋa, ii, indji ombinḓu yaimba avehe mba zepwa kombanda yehi.” (Omavandururiro 18:24) Ozongamburiro zoposyo za tatumisa na ze zepa ovakarere vaMukuru ovaṱakame nu wina za ri norupa orunene motjiṱiro tjomangete movita.

• ‘Otjo tjeripere otjini ongeṋangeṋeno nehambaneno.’ (Omavandururiro 18:7) Ongamburiro yoposyo i na omautumbe omanene ovanane vayo mbu ve ungurisa okuhupa mombyarero.

• ‘Noundjai watjo wovineya tja purukisa oviwaṋa avihe!’ (Omavandururiro 18:23) Momahongero watjo woposyo wokutja omuinyo kau koka, ongamburiro yoposyo ya paturura omivero komiano avihe vyourozi noundjai nu wina ya ryamisa emuma kovaṱi komurungu nomerikotameno kovaṱi.

12. Omarakiza yeṋe Ombeibela ngu i yandja ohunga nongamburiro yoposyo?

¹² Okuposisa omarakiza omanamasa kokupoka kongamburiro yoposyo, Ombeibela mai tja: “Piteye, tjiwaṋa tjandje! Piteye mu tjo! Amu ha kara norupa momauvi watjo, nu amu ha kara norupa momberero yatjo!”—Omavandururiro 18:4, 5.

13. Mape tjitwa tjike kongamburiro yoposyo na imba mbe iungurisa?

¹³ Moruyaveze rwopopezu, Babilon otjinene ouhonapare wouye wozongamburiro zoposyo, matji yandekwa oparukaze. Ombeibela mai tja: “Oviwonga avihe mbi opu mavi zu okutjitona meyuva rimwe: omutjise noruhoze nondjara. Notjo matji ningiririsiwa nomuriro, orondu Muhona [Mukuru, EEP], ngu me tji pangura, Eye omunamasa.” (Omavandururiro 18:8) Kutja atu ha kara norupa momberero ya tjo, eṱe twa sokuyepa otupa atuhe kuna ozongamburiro zoposyo, mokuhina okukara kunatja noviungurisiwa, omikandi nozongamburiro nḓe ha yakurwa i Mukuru. Ihi matu sokutjitjita tjimanga. Omiinyo vyetu vi ri moumba!—2 Ovakorinte 6:14-18.